Mga Mata sa Pagtan-aw
Paagi sa gahum sang Balaan nga Espiritu, tugotan ni Cristo nga makita naton ang aton mga kaugalingon kag ang iban subong sang Iya panan-aw.
Pagtan-aw sang Kamot sang Dios
Nagustuhan ko ang istorya sang isa ka solterito sa Daan nga Katipan nga nag-alagad kay propetang Eliseo. Temprano pa sang isa ka aga ang solterito nagbangon, nagkadto sa gwa, kag nasalapoan ang siyudad nga napalibutan sang sa ka panong sang kasoldadohan nga nagatuyo sa pagguba sa ila. Nagdalagan sia pakadto kay Eliseo: “Abaw, agalon ko! ano bala ang himuon ta?”
Si Eliseo nagsabat, “Dili ka magkahadlok: kay ang mga nagaupod sa aton madamo pa sa mga nagaupod sa ila.”
Si Eliseo nakasayod nga ang solterito nagakinahanglan sang sobra pa sa makapakalma nga kasegurohan; nagakinahanglan sia sang panan-awon, Kag gani “nagpangamuyo si Eliseo, … Ginuo, … buksi ang iya mga mata, agud nga makakita sia. Gani ginbuksan sang Ginuo ang mga mata sang pamatan-on nga lalaki kag nakakita sia; kag, yari karon, ang bukid hil-ob sang mga kabayo kag sang mga kangga nga kalayo sa palibot ni Eliseo.” 1
Ayhan may mga inadlaw nga, pareho sang alagad; masalapoan ninyo ang inyo kaugalingon nga nagahimulat nga makita kon paano ang Dios nagahikot sa inyo kabuhi—mga tinion nga inyo mabatyagan ang pagpang-atake—nga ang mga pagtilaw sang kabuhi nagapaluhod sa inyo. Maghulat kag magsalig sa Dios kag sa Iya tiempo, tungod masaligan ninyo ang Iya tagipusuon sang tanan nga inyo. Pero may ikaduha nga leksyon diri. Mga pinalangga kong mga kauturan, mahimo man kamo nga magpangamuyo sa Ginuo nga buksan ang inyo mga mata agud makita ang mga butang nga indi ninyo normal nga makita.
Tan-awa ang Aton mga Kaugalingon subong sa Pagtan-aw sa Aton sang Dios
Ayhan ang pinakaimportante nga mga butang nga klaro naton nga tan-awon amo ang kon sin-o ang Dios kag kon sin-o gid bala kita—mga anak nga lalaki kag babayi sang langitnon nga mga ginikanan, nga may “diosnon nga kinaugali kag wala katapusan nga kadangatan.” 2 Pangabaya ang Dios nga ipahibalo ining mga kamatuoran sa inyo, upod sang kon ano ang Iya balatyagon sa inyo. Kon mas naintiendihan ninyo ang inyo matuod-tuod nga pagkatawo kag kapuslanan, sing madalom sa inyo kalag, mas labi ini nga magaimpluwensya sang tanan sa inyo kabuhi.
Pagtan-aw sa Iban
Ang masayran kon ano ang panan-aw sang Dios sa aton nagahanda sang paagi nga mabuligan kita nga matan-aw ang iban pareho sa Iya nga panan-aw. Ang kolumnista nga si David Brooks nagsiling: “Madamo sang dalagko nga mga problema sang aton sosyedad ang nagahalin sa mga tawo nga nagabatyag nga ginabale-wala sila kag wala ginasapak. … [May] importante nga … kinaiya nga dapat naton tanan … mas paayuhon[, kag amo inang] kinaiya sa pagtan-aw sa isa kag isa sing maayo kag ang makit-an man sing maayo.” 3
Si Jesucristo nagatan-aw sa mga tawo sing maayo. Ginatan-aw Niya ang mga indibidwal, ang ila mga panginahanglan, kag kon sin-o sila sarang mangin. Samtang ang iban makakita sang mga mangingisda, mga makasasala, ukon mga manugsukot sang buhis, si Jesus nakakita sang mga disipulo; samtang ang iban nakakita sang tawo nga ginatublag sang mga yawa, si Jesus wala nagtan-aw sa panggwa nga kasakit, ginkilala sia, kag gin-ayo sia. 4
Bisan sa aton masako nga mga kabuhi, sarang naton sundon ang halimbawa ni Jesus kag tan-awon ang mga indibidwal—ang ila mga panginahanglan, ang ila pagtuo, ang ila pagpanikasog, kag kon sin-o sila sarang nga mangin. 5
Samtang nagapangamuyo ako sa Ginuo nga buksan ang akon mga mata agud makakita sang mga butang nga indi ko normal nga makita, masami ko ginapamangkot ang akon kaugalingon sang duha ka pamangkot kag ginapanilagan ang mga balatyagon nga nagaabot: “Ano ang akon ginahimo nga dapat ko na untatan?” kag “Ano ang wala ko ginahimo nga dapat ko na sugdan?” 6
Sang nagligad nga pila ka bulan, sa tion sang sakramento, ginpamangkot ko ang akon kaugalingon sining mga palamangkutanon kag nasorpesa sa pagpabatyag nga nag-abot. “Untati ang pagtan-aw sa imo telepono samtang nagapila ka.” Ang magtan-aw sa akon telepono mientras nagapila daw sa nangin kinaandan na; nakita ko ini nga manami nga tion nga makaobra sing madamo, magbasa kag magsabat sang email, magtan-aw sa balita, ukon mag-scroll sa mga feeds sa social media.
Pagkadason nga aga, nasalapoan ko ang akon kaugalingon nga nagapila sa malawig nga linya sa isa ka tindahan. Ginkuha ko ang akon telepono kag dason nadumduman ko ang pagpabatyag nga akon nabaton. Gintago ko ang akon telepono kag nagtulok sa palibot. Nakita ko ang isa ka tigulang nga lalaki nga nagalinya sa akon atubang. Ang iya karito bakante luwas lang sang pila ka lata sang kalan-on sang kuring. Medyo nasaw-ahan ako apang naghambal sang bagay nga listo gid pareho sang, “Sa makit-an ko may kuring ka gid.” Nagsiling sia nga may manug-abot nga bagyo, kag indi sia luyag nga mawad-an sang kalan-on sang kuring. Nagsugilanon kami sing makadali, kag dayon nagbalikid sia sa akon kag nagsiling, “Abi mo, wala gid ko may ginsugiran sini, pero kaadlawan ko subong.” Natandog ang akon tagipusuon. Gintamyaw ko sia sang malipayon nga kaadlawan kag nagtanyag sang mahipos nga pangamuyo sang pagpasalamat nga wala ako nag-ukot sa akon telepono kag ginpaligad ang oportunidad nga makakita sing maayo kag makapakig-angot sa iban nga tawo nga nagakinahanglan sini.
Sa bug-os kong tagipusuon indi ako luyag magpareho sa pari ukon sa Levinhon nga nagalakat pakadto sa Jerico—ang nagatan-aw kag nagalabay lang. 7 Apang sa masami sa pamatyag ko amo ako sina.
Pagtan-aw sang Isugo sang Dios sa Akon
Sang sini lang nakatuon ako sang importante nga leksyon parte sa pagtan-aw sing maayo halin sa isa ka bataon nga babayi nga ginhingadlan Rozlyn.
Ang istorya ginpaambit sa akon sang akon abyan nga naglalain gid sang ang iya bana sing 20 anyos nagbiya sa iya. Nga ang ila kabataan nagasaylo-saylo sa ila mga ginikanan, ang ideya nga ahaw magsimba dawsa kabudlay. Sia nagapanugiron:
“Sa simbahan kon sa diin ang pamilya amo ang pinakaimportante, ang magpungko sing isahanon masakit. Sina nga unang Domingo nagsulod ako nga nagapangamuyo nga wala sing may mag-istorya sa akon. Ginhawa ko lang gid ka pugong, kag ang akon mga luha daw matulo na gid. Nagpungko ako sa akon pirme ginapungkoan, nagalaum nga wala sang may makatalupangod nga halos bakante ang malaba nga pulungkoan.
“Isa ka bataon nga babayi ang nagbalikid kag nagtan-aw sa akon. Nagpakunokuno ako nga magyuhom. Nagyuhom man sia. Makita ko ang kabalaka sa iya guya. Mahipos ako nga nagpangamuyo nga indi sia magpalapit sa pagsugilanon sa akon—wala ako sang bisan ano nga mahambal nga positibo kag kabalo ako nga mahibi ako. Nagduko ako kag ginlikawan nga makatulokay kami.
“Sa masunod nga oras, natalupangdan ko nga nagabulubalikid sia kon kis-a. Pagkatapos gid sang miting, nagdiretso sia sa akon. ‘Hi, Rozlyn,’ naghutik ako. Ginhakos niya ako kag nagsiling, ‘Sister Smith, makita ko nga indi maayo ang adlaw subong para sa imo. Ginakasubo ko gid. Palangga ta ka.’ Napaktan ko gid, ang mga luha nagtululagay samtang liwat niya ako nga ginhakos. Apang samtang nagapalayo ako, nagpensar ako sa akon kaugalingon, ‘Siguro masarangan ko ini sa pihak sang tanan.’
“Inang manami nga 16 anyos nga bataon nga babayi, nga lapit katunga sang akon edad, nagpangita sa akon kada Domingo sa nabilin sang sina nga tuig para hakson ako kag magpamangkot, ‘Kamusta ka?’ Naghatag ini sang kinalain sa akon nabatyagan parte sa pagkadto sa simbahan. Ang matuod amo nga nagsugod ako nga magsalig sa sadtong mga hakos. May nakatalupangod sa akon. May nakahibalo nga ato ako didto. May ara nga nag-ulikid.”
Pareho sa tanan nga mga bugay nga ginatanyag sang Amay, ang pagtan-aw sing maayo nagakinahanglan nga kita magpamangkot sa Iya—kag dason mag-akto. Magpangabay nga matan-aw ang iban kasubong sang Iya panan-aw—bilang matuod-tuod Niya nga mga anak nga may wala katapusan kag diosnon nga potensyal. Gani mag-akto paagi sa pagpalangga, pag-alagad, pagpakita sang ila bili kag potensyal suno sa inyo nabatyagan. Kon ini ang mangin sulundan sang aton mga kabuhi, matan-aw naton ang aton mga kaugalingon nga mangin “matuod-tuod nga mga sumulunod ni … Jesucristo.” 8 Ang iban mahimo nga makasandig sang ila mga tagipusuon sa aton mga tagipusuon. Kag sa sini nga sulundan aton man madiskubrehan ang aton kaugalingon nga pagkatawo kag kapuslanan.
Ang akon abyan nagpanugiron sang isa pa ka inagihan samtang nagapungko sa amo man nga bakante nga raya, nagaisahanon, nagapulupamensar kon bala ang 20 anyos nga pagpaninguha nga ipangabuhi ang ebanghelyo sa iya panimalay nangin wala sing pulos. Nagkinahanglan sia sing masobra pa sa nagapakalma nga pagpasalig; kinahanglan niya ang panan-awon. Iya nabatyagan nga naglapos sa iya kaalibuturan ang palamangkutanon: “Ngaa nga ginhimo mo ato nga mga butang? Ginhimo mo bala ang mga ato para sa padya, sa mga pagdayaw sang iban, ukon sa ginahandom nga resulta?” Nagpaiway sia sa makadali, nagpaminagbinag, kag dason nagsabat sing may kaisog, “Ginhimo ko ang mga ato tungod palangga ko ang Manluluwas. Kag palangga ko ang Iya ebanghelyo.” Ang Ginuo nagbukas sang iya mga mata agud buligan sia nga makakita. Ining simple apang gamhanan nga pagbag-o sang panan-aw nagbulig sa iya nga magpadayon sa iya pagtuo kay Cristo, wala sapayan sang iya mga sirkumstansya.
Nagasaksi ako nga palangga kita ni Jesucristo kag mahatagan Niya kita sang mga mata nga makakita—bisan pa nga mabudlay ini, bisan pa nga kapoy kita, bisan pa nga nagakapung-awan kita, kag bisan pa nga ang mga nagakalatabo lain sangsa aton ginalauman. Paagi sa Iya grasya, Iya kita pagabugayan kag padakuon ang aton ikasarang. Paagi sa gahum sang Balaan nga Espiritu, si Cristo magapatigayon sa aton nga matan-aw ang aton mga kaugalingon kag matan-aw ang iban subong sa Iya nga panan-aw. Upod ang Iya bulig, mabatyagan naton kon ano gid ang pinakakinahanglanon. Mahimo nga masugdan naton nga makita ang kamot sang Ginuo nga nagahikot sa kag paagi sa ginagmay nga mga detalye sang aton mga kabuhi—makakita kita sing maayo.
Kag gani, sa sinang dako nga adlaw “kon sia magapakita mangin subong kita sa iya, kay kita maka kita sa iya nga sia gid; agud mahimo naton maangkon ini nga paglaum” 9 among akon pangamuyo sa ngalan ni Jesucristo, amen.