Rekomendado sa Ginuo

Maayong aga, mga kauturan. Bilang isa ka disipulo sang aton Manluluwas, nga si Jesucristo, ginapaabot ko gid ang pagtililipon sing virtual halin sa tanan nga bahin sang kalibutan para sa sining komperensya.

Nangin indi gid kinaandan ang ini nga tuig. Para sa akon nagsugod ini sa asaynment gikan sa Unang Pangulohan nga idedikar ang balaan nga templo sa Ginuo sa Durban, South Africa. Indi ko gid malipatan ang katahum sang istruktura. Pero labaw pa sangsa palibot sini, ginahatagan ko gid sing balor ang dignidad sang mga tawo nga handa kaayo sa pagsulod sa sinang sagrado nga edipisyo. Nag-abot sila nga handa sa pag-ambit sang isa sa pinakatampok nga bugay sang Pagpanumbalik: ang pagdedikar sang balay sang Ginuo. Nag-abot sila nga may mga tagipusuon nga puno sang gugma para sa Iya kag sa Iya Pagbayad-Sala. Nag-abot sila nga puno sang pagpasalamat sa aton Amay sa Langit sa paghatag sang sagrado nga mga ordinansa nga magapadulong sa eksaltasyon. Nag-abot sila nga takos.

Ang mga templo, bisan diin man ini, nagapangibabaw sa mga paagi sang kalibutan. Ang tagsa ka templo sang mga Santos sa Ulihing mga Adlaw sa kalibutan—ang tanan nga 168 sini sa ila—nagatindog bilang mga testamento sa aton pagtuo sa kabuhi nga wala katapusan kag kalipayan sang paghinguyang sini upod sang aton mga pamilya kag sang aton Amay nga Langitnon. Ang pagtambong sa templo nagadugang sang aton paghangop parte sa Pangulohan sang Dios kag sa wala katubtuban nga ebanghelyo, sa aton pangako sa pagkabuhi kag pagtudlo sang kamatuoran, kag sa aton kahanda sa pagsunod sang halimbawa sang aton Ginuo kag Manluluwas, nga si Jesucristo.

Sa gwa sang tagsa ka templo sa Simbahan amo ang nagakaigo nga mga pulong “Balaan sa Ginuo.” Ang templo ang balay sang Ginuo kag isa ka santuaryo gikan sa kalibutan. Ang Iya Espiritu nagalikop sa sinang nagasimba sa sulod sinang sagrado nga mga dingding. Ginapahamtang Niya ang mga sulukdan sa diin makasulod kita bilang Iya mga bisita.

Ang akon ugangan nga lalaki, si Blaine Twitchell, isa sang pinakamaayo nga tawo nga akon nakilala, nagtudlo sa akon sang dako nga leksyon. Ako kag si Sister Rasband nagbisita sa iya sang tagumatayon na sia. Sang nagsulod kami sa iya kwarto, manuglakat na ang iya bishop. Sang gintamyaw namon ang bishop, nahunahuna ko, “Kanami nga bishop. Ari sia diri nagaminister sa isa ka tampad nga miyembro sang iya ward.”

Siling ko kay Blaine, “Kanami sang bishop kay nagbisita gid sia.”

Si Blaine nagtulok sa akon kag nagsabat, “Sobra pa da. Ginpangabay ko ang bishop nga magkadto kay gusto ko nga interbyuhon niya ako para sa akon temple recommend Gusto ko mapatay nga rekomendado sa Ginuo.” Kag ginhimo niya ini!

Ina nga mga tinaga, “rekomendado sa Ginuo,” nagpabilin sa akon. Ginpabag-o sini ang pagtamod parte sa regular nga interbyu sang aton mga lider sang Simbahan. Importante kaayo ang temple recommend nga sa pagsugod pa lang sang Simbahan, tubtob 1891, ang tagsa ka temple recommend ginaendorso sang Pangulo sang Simbahan. ¹

Kon para man sa mga lamharon ukon mga hamtong, ang inyo temple recommend nga interbyu indi parte sa kon ano ang dapat kag indi dapat himuon. Ang recommend indi isa ka checklist, pases para makasulod, ukon tiket para sa ginatigana nga pulungkoan. May yara ini sang mas mataas kag mas balaan nga katuyoan. Agud mangin kalipikado sa prebilihiyo nga mahatagan sang temple recommend, kinahanglan kamo mangabuhi nga nagasanto sa mga panudlo sang Ang Simbahan ni Jesucristo sang mga Santos sa Ulihing mga Adlaw.

Sa inyo interbyu may oportunidad kamo sa pag-usisa sang inyo kalag parte sa inyo personal nga pagtuo kay Jesucristo kag Iya Pagbayad-Sala. Ginatugotan kamo sa pagpabutyag sang inyo testimonya parte sa ginpanumbalik nga ebanghelyo; sang inyo kahanda sa pagsakdag sinang gintawag sang Ginuo nga magpamuno sang Iya Simbahan; sang inyo pagtuo sa doktrina sang ebanghelyo; sang inyo pagtuman sang mga responsibilidad sa pamilya; kag sang inyo mga kinaiya sang pagkamatinud-anon, pagkaputli, katampad, pagkamatinumanon, kag pagsunod sang Pulong sang Kaalam, sang layi sang ika-pulo, kag sang pagkabalaan sang Adlaw nga Inugpahuway. Amo ina sila ang pundasyon sang mga prinsipyo sang kabuhi nga nasentro kay Jesucristo kag sa Iya buluhaton.

Ang inyo temple recommend indikasyon sang madalom, espirituhanon nga tinutuyo nga nagatinguha kamo sa pagkabuhi sang mga layi sang Ginuo kag sa pagkaluyag sang Iya naluyagan: pagkamapinaubuson, pagkahagop, kalig-on, paghigugma, kaisog, kaluoy, pagpatawad, kag pagkamatinumanon. Kag nagapangako kamo sa sinang mga sulukdan kon magpirma kamo sang inyo ngalan sa sinang sagrado nga dokumento.

Ang inyo temple recommend nagabukas sang mga puwertahan sang langit para sa inyo kag sa iban pa nga may mga seremonya kag mga ordinansa nga may wala katapusan nga kabilinggan, lakip ang mga bunyag, endowment, pagkasal, kag mga pagselyo.

Ang mangin “rekomendado sa Ginuo” amo ang mapadumdom sang kon ano ang ginapaabot sa isa ka Santos sa Ulihing mga Adlaw nga nagatipig sang kasugtanan. Nahangpan ini sang akon ugangan nga si Blaine bilang importante nga pagpanghanda para sa adlaw nga magatindog sia sing mapainubuson sa atubang sang Ginuo.

Binagbinaga sang si Moises nagtaklad sa Bukid nga Horeb kag ang Ginuong Jehova nagpakita sa iya sa nagadabadaba nga sapinit. Ang Dios nagsiling sa iya, “Huksa ang imo mga sapin sa imo mga tiil, kay ang duog nga ginatindugan mo dutang balaan.” ²

Ang pagkakas sang aton mga sapatos sa puwertahan sang templo nagaindikar sang pagbuya sang kalibutanon nga mga handum ukon mga kalipay nga nagatublag sa aton gikan sa espirituhanon nga pagtubo, pagpahigad sinang mga butang nga nagaupang sang aton ginapakamahal nga mortalidad, paglandas sang mabinaison nga pamatasan, kag pagtinguha sa paghatag sing tion nga mangin balaan.

Sa diosnon nga disenyo, ang aton pisikal nga lawas gintuga sang Dios, isa ka templo para sa aton espiritu, kag dapat nga tahuron. Matuod gid ang mga pulong sa Primary nga kanta, “Ang akon lawas isa ka templo [nga] nagakinahanglan sing dako nga paghalong.” ³ Sang ang Ginuo nagpakita sa mga Nefinhon, nagsugo Sia, “Magpakabalaan paagi sa pagbaton sang Balaan nga Espiritu, agud makatindog kamo nga wala sing musing sa akon atubang.” ⁴ “Ano nga sari sang mga tawo kamo mangin dapat?” pamangkot sang Ginuo kag dayon nagsabat, “Bisan subong man sa akon.” ⁵ Agud mangin “rekomendado sa Ginuo,” nagatinguha kita nga mangin pareho sa Iya.

Nadumduman ko si Pangulong Howard W. Hunter sa iya una nga pamulong-pulong sa pangkabilugan nga komperensya bilang ika-14 nga Pangulo sang Simbahan. Nagsiling sia: “Handum gid sang akon tagipusuon nga ang tagsa ka miyembro sang Simbahan takos sa pagsulod sa templo. Makapalipay sa Ginuo kon ang tagsa ka hamtong nga miyembro mangin takos sang—kag may dala nga—current temple recommend.” ⁶ Idugang ko nga ang limited-use nga recommend magapahamtang sing maathag nga banas para sa aton mahal nga mga lamharon.

Nadumduman ni Pangulong Nelson ang mga pinamulong ni Pangulong Hunter: “Sa sina nga adlaw, Hunyo 6, 1994, ang temple recommend nga amon ginadala nangin lain nga bagay sa akon kahita. Antes sina, nangin paagi ini agud matigayon ang katuyoan. Nangin paagi ini agud tugotan ako sa pagsulod sa sagrado nga balay sang Ginuo; pero pagkatapos nga ginhimo niya ang ina nga deklarasyon, nangin kutob lang gid dira. Ini nangin akon simbolo sang pagkamatinumanon sa isa ka propeta sang Dios.” ⁷

Kon makuha pa lang kamo sang recommend ukon kon nagpaso na ang inyo recommend, magpila na sa puwertahan sang bishop pareho sang mga Santos sang una nga nagpila sa puwertahan sang Nauvoo Temple sang 1846. ⁸ Ang akon mga katigulangan nalakip mga matutom. Ginbayaan nila ang ila matahum nga siyudad kag nagpa-weste, pero nakahibalo sila nga may sagrado nga mga eksperiyensya nga nagahulat sa ila sa sulod sang templo. Ginsulat ni Sarah Rich gikan sa kaumhan sang Iowa, “Kon indi tungod sa pagtuo kag ihibalo nga ginhatag sa amon sa sina nga templo …, ang amon pagpanglakaton kuntani nangin pareho sang … paglumpat sa dulom.” ¹⁰ Amo ina ang mawasi sa aton kon magpangabuhi kita sing isahanon nga wala sing inspirasyon kag paghidaet nga ginpromisa sa templo.

Sugdi na ang proseso subong nga mangin “rekomendado sa Ginuo” agud nga ang Iya Espiritu mangin yara sa inyo sing dalayon kag ang Iya mga sulukdan magadala sa inyo sang “paghidaet sang konsiyensya.” ¹⁰

Ang inyo mga lider sang mga lamharon, pangulo sang elders quorum, pangulo sang Relief Society, kag ministering brothers kag sisters magabulig sa inyo sa paghanda, kag ang inyo bishop ukon branch president mapinalanggaon nga magagiya sa inyo.

Nakaeksperiyensya kita sing tion nga ang mga templo ginsira ukon limitado lang ang paggamit. Para kay Pangulong Nelson kag sinang sa aton nga nagaalagad sa iya tupad, ang inspirado nga desisyon nga isira ang mga templo nangin “masakit” kag “puno sang pagkabalaka.” Si Pangulong Nelson nagpamangkot, “Ano ang ihambal ko sa Propetang si Joseph Smith? Ano ang ihambal ko kay Brigham Young, Wilford Woodruff, kag sa iban pa nga mga Pangulo, tubtob kay Pangulong Thomas S. Monson?” ¹³

Sa karon, amat-amat na kag nagapasalamat kita sa pagbukas liwat sang mga templo para sa mga pagselyo kag mga endowment sa limitado lang nga kadamuon.

Apang, ang pagkatakos sa pagtambong sa templo ginapatuman sa gihapon. Luyag ko suliton, nga makasulod man kamo sa templo ukon indi, kinahanglan ninyo sang current temple recommend agud makapabilin sing malig-on sa banas sang kasugtanan.

Sang manugtapos nga bahin sang nagligad nga tuig, ako kag si Sister Rasband may buluhaton sa New Zealand nga maghambal sa dako nga grupo sang mga lamharon nga single adult. Indi sila basta-basta nga makakadto sa templo; ang isa sa Hamilton nga ginakay-o, kag ginahulat pa nila ang pagbungkag sang duta para sa templo sa Auckland. Apang, nainspirar ako sa pagpaisog sa ila nga magkuha liwat ukon magbaton sang mga temple recommend.

Bisan nga indi nila mapresentar ini sa templo, magapresentar sila sang ila mga kaugalingon sa atubang sang Ginuo nga putli kag handa sa pag-alagad sa Iya. Ang pagkatakos sa pagkapot sang current temple recommend pareho nga proteksyon batok sa kaaway, bangod naghimo kamo sang malig-on nga pangako sa Ginuo parte sa inyo kabuhi, kag sang promisa nga ang Espiritu mangin yara sa inyo.

Nagahimo kita sang buluhaton sa templo kon mangita kita sang aton mga katigulangan kag maghatag sang ila mga ngalan para sa mga ordinansa. Samtang nga sirado ang aton mga templo, mahimo naton sa gihapon nga maresearch ang aton mga pamilya. Upod ang Espiritu sang Dios sa aton mga tagipusuon, kita, paagi sa proxy, nagatindog para sa ila agud mangin “rekomendado sa Ginuo.”

Sang nagaalagad ako bilang Executive Director sang Temple Department, pirme ko mabatian si Pangulong Gordon B. Hinckley nga nagatudlo sa sining balaan nga kasulatan nga ginsambit sang Ginuo parte sa Templo sang Nauvoo: “Papadayona kag indi pagpauntata ang buluhaton sa akon templo, kag ang tanan nga buluhaton nga ginhatag ko sa inyo; kag dobleha pa gid ang inyo katutum, kag inyo pagpadayon, kag pagbatas, kag inyo mga pagpangabudlay, kag indi ninyo madula ang inyo padya, siling sang Ginuo sang mga Kasoldadohan.” ¹²

Ang aton buluhaton sa templo nakahigot sa aton wala katapusan nga padya. Sining ulihi lang gintilawan kita. Gintawag kita sang Ginuo sa paghikot sa mga templo nga may “katutum … pagpadayon, kag pagbatas.” ¹³ Ang mangin “rekomendado sa Ginuo” nagakinahanglan sang sina nga mga kinaiya. Kinahanglan kita nga mangin matutum sa pagtuman sang mga kasugoan, magpursige sang pagtutok sa aton mga kasugtanan sa templo, kag magpasalamat sang padayon nga ginatudlo sang Ginuo parte diri kag mangin mapinasensyahon samtang nagahulat kita nga magbukas liwat ang mga templo sing bug-os.

Kon ang Ginuo magtawag nga “doblehon” pa naton ang aton mga panikasog, ginapangayo Niya nga magdugang kita sa pagkamatarong. Halimbawa, mahimo kita magpasangkad sang aton pagtuon sang balaan nga mga kasulatan, sang aton family history research, kag sang aton mga pangamuyo sang pagtuo agud mahimo naton ipaambit ang aton pagpalangga sa balay sang Ginuo sa sinang mga nagahanda sa pagbaton sang temple recommend, ilabi na gid ang mga miyembro sang aton pamilya.

Ginapromisa ko sa inyo bilang Apostoles sang Ginuong Jesucristo nga samtang nagatinguha kamo nga doblehon ang inyo matarong nga mga panikasog, magabatyag kamo sing kalig-on sa inyo debosyon sa Dios nga Amay kag kay Jesucristo, magabatyag kamo sing kasunson sang Balaan nga Espiritu nga nagagiya sa inyo, mangin mapinasalamaton kamo tungod sa inyo sagrado nga mga kasugtanan, kag magabatyag kamo sang paghidaet sa paghibalo nga kamo “rekomendado sa Ginuo.” Sa ngalan ni Jesucristo, amen.