Ang Dios Magahimo sang Butang nga Indi Mahunahuna

Kon daw pamilyar ini tungod sang mga sirkumstansya nga aton ginahamtangan subong, ina bangud kay amo gid man.

Duda ako nga may tawo nga makabati sang akon tingug ukon makabasa sang akon mga pulong nga wala maapektuhi sang pangkalibutanon nga pandemya.

Sa mga nagapangasubo bangud sang pagtaliwan sang pamilya kag mga abyan, nagapangasubo kami upod sa inyo. Ginaampo namon sa Amay nga Langitnon nga paumpawan kag lugpayan kamo.

Ang malawig nga mga konsikwensya sining virus masobra pa sa pisikal nga ikaayong-lawas. Madamo sang mga pamilya ang nawad-an sang palangitan-an kag nagapangatubang sang gutom, kawala-kasigurohan, kag kakulba. Ginadayaw namon ang maalwan nga mga pagpaninguha sang madamo agud mapunggan ang paglapta sining balatian. Natandog kami sa mahipos nga sakripisyo kag dalayawon nga pagpangabudlay sang mga nagrisgo sang ila kaugalingon para magbulig, magpang-ayo, kag suportahan ang mga tawo nga nagakinahanglan. Puno ang amon mga tagipusuon sang pagpasalamat sa inyo kaayo kag kaluoy.

Ginapangamuyo namon nga buksan sang Dios ang mga bintana sang langit kag pun-on ang inyo mga kabuhi sang wala katapusan nga mga bugay sang Dios.

Kadamo pa sang wala mahibal-i parti sa sining virus. Pero kon may isa ako nga nahibal-an, amo nga ining virus wala makapakibot sa Amay nga Langitnon. Indi Niya kinahanglan magtipon sang dugang nga mga batalya sang mga anghel, magpatawag sang emerhensya nga mga miting, ukon magpaliton sang mga ayuda halin sa dibisyon nga taghimo-sang-mga-kalibutan para atubangon ang wala ginapaabot nga panginahanglan.

Ang mensahe ko karon amo nga bisan nga ining pandemya indi naton gusto ukon ginapaabot, ginhanda sang Dios ang Iya mga anak kag ang Iya Simbahan para sa amo sini nga tion.

Huo, malampuwasan naton ini. Pero kinahanglan naton maghimo sang sobra pa sangsa mag-ugtom, magpadayon, kag maghulat nga magbalik ang mga bagay sa normal sadto. Magaabante kita, kag mangin mas maayo kita tungod sini.

Sa isa ka bahin, mga binhi kita. Kag para malab-ot sang mga binhi ang ila potensyal, kinahanglan nila nga tampukan antes sila manubo. Nagasaksi ako nga bisan pa may tinion nga pamatyagan naton natampukan kita sang mga pagtilaw sang kabuhi ukon napalibutan sang emosyonal nga kadulom, ang pagpalangga sang Dios kag ang mga bugay sang ginpanumbalik nga ebanghelyo ni Jesucristo magadala sang indi mahunahuna nga butang nga magtubo.

Ang tagsa ka dispensasyon nagpangatubang sang iya tinion sang pagtilaw kag kabudlayan.

Si Enoc kag ang iya katawhan nagpangabuhi sa tion sang kalainan, giyera, kag pinatyanay. “Apang ang Ginuo nagkari kag nagpuyo upod sa iya katawhan.” May ginapamensar Sia nga indi mahunahuna para sa ila. Ginbuligan Niya sila nga magtukod sang Sion—sang katawhan nga “isa sing tagipusuon kag isa sing panghunahuna” nga “nagpuyo sa pagkamatarong.”⁴

Ang lamharon nga si Jose, ang anak ni Jacob, ginhulog sa buho, ginbaligya sa pagkaulipon, ginluiban, kag gin-abandonar.⁵ Nakapanghunahuna siguro si Jose kon nalimtan na sia sang Dios. Ang Dios may ginapamensar nga indi mahunahuna para kay Jose. Gingamit niya ining tion sang pagtilaw agud pabakuron ang karakter ni Jose kag ibutang sia sa posisyon nga maluwas niya ang iya pamilya.⁶

Litrato

Si Joseph sa Bilanggoan sang Liberty

Pamensara si Joseph Smith nga Propeta samtang napriso sa Bilanggoan sang Liberty, kon paano sia nag-ampo para sa kaumpawan sang mga Santos sa pag-antos. Nakapanghunahuna siguro sia kon paano matukod ang Sion sa amo sadto nga mga sirkumstansya. Pero ang Ginuo naghambal sang kalinong sa iya, kag ang mahimayaon nga rebelasyon nga nagsunod naghatag sang paghidaet sa mga Santos—kag nagapadayon ini sa pagdala sang kalinong sa inyo kag sa akon.⁷

Pila bala ka beses sang una nga tinuig sang Ang Simbahan ni Jesucristo sang mga Santos sa Ulihing mga Adlaw nga nagkalisod kag nagpanghunahuna ang mga Santos kon bala nalimtan na sila sang Dios? Pero sa tunga sang mga pagpanghingabot, mga peligro, kag mga pamahog nga ubuson sila, ang Ginuong Dios sang Israel may ginahunahuna nga lain para sa Iya diutay nga panong. Butang nga indi mahunahuna.

Ano ang aton matun-an sa sining mga halimbawa—kag sa ginatos nga iban pa sa balaan nga mga kasulatan?

Una, ang matarong wala ginahatagan sang libre nga pases para makalikaw sa mga pagtilaw kag kabudlayan. Kinahanglan naton tanan nga mag-agi sa tunga sang tinion sang kabudlayan, kay sa tunga sining tinion sang pagtilaw matun-an naton ang mga prinsipyo nga magapabakod sang aton mga karakter kag nagatugot sa aton nga mahilapit sa Dios.

Ikaduha, ang aton Amay nga Langitnon nakahibalo nga nagaantos kita, kag tungod mga anak Niya kita, indi Niya kita pagtalikdan.⁸

Pamensara ang isa nga maluluy-on, ang Manluluwas, nga naghatag sang dako nga bahin sang Iya kabuhi sa pag-alagad sa masakiton, sa ginasuboan, sa nagaduhaduha, sa nawad-an sing paglaum.⁹ Sa pamatyag ninyo indi amo sina ang Iya pagkabalaka sa inyo karon?

Pinalangga ko nga mga abyan, pinalangga nga mga kauturan, bantayan kamo sang Dios kag tuytuyan kamo sa sining tinion sang wala kasigurohan kag kahadlok. Kilala Niya kamo. Mabatian Niya ang inyo mga pag-ampo. Matutom Sia kag masaligan. Tumanon Niya ang Iya mga promisa.

May ginapamensar ang Dios nga indi mahunahuna para sa inyo sa personal kag sa Simbahan sa kabilugan—isa ka dalayawon nga buluhaton kag katingalahan.

Ang pinakamaayo nga inadlaw ara sa unhan naton, wala sa likod. Amo nga ginhatagan kita sang Dios sang moderno nga rebelasyon! Kon wala ini, ang pangabuhi mahimo nga daw pareho sang paglupad nga nagatiner lang, nga nagahulat nga madula ang alipuop para makahugpa kita sing hilway. Ang mga katuyuan sang Ginuo para sa aton mas mataas pa sina. Bangud ini ang Simbahan sang buhi nga Cristo, kag bangud ginapangunahan Niya ang Iya mga propeta, nagaabante kita kag nagapasaka sa mga lugar nga wala pa naton malab-ot, sa kataason nga indi naton mahunahuna!

Karon, wala ini nagakahulugan nga indi na naton maeksperiyensyahan ang mga undag sa aton biyahe sa kabuhi. Wala ini nagakahulugan nga wala na sing gulpiyada nga mga pagpalya sang mga instrumento, mekanikal nga mga problema, ukon seryoso nga mga hangkat sang panahon. Sa matuod, mahimo nga mas maglala pa gani ini antes ini magkanay.

Bilang piloto sa inaway kag kapitan sa eroplano, natun-an ko nga samtang indi ko pwede pilion ang pagtilaw nga akon masugata sa tion sang biyahe, sarang ko pilion kon paano ako maghanda kag kon ano ang akon reaksyon. Ang kinahanglanon sa tion sang krisis amo ang pagkalma kag alerto nga pagsalig.

Paano naton himuon ini?

Atubangon naton ang kamatuoran kag magbalik sa mga pundasyon, sa tig-una nga mga prinsipyo sang ebanghelyo, sa kon ano ang importante. Pabakuron ninyo ang inyo pribado nga relihiyoso nga pangginawi—pareho sang pagpangamuyo kag pagtuon sang balaan nga kasulatan kag pagtuman sang mga kasuguan sang Dios. Maghimo kamo sang mga desisyon base sa napamatud-an na nga pinakamaayo himuon.

Magtutok sa mga butang nga inyo mahimo kag indi sa mga butang nga indi ninyo mahimo.

Tipuna ninyo ang inyo pagtuo. Kag magpamati kamo sa nagagiya nga pulong sang Ginuo kag sang Iya propeta para giyahan kamo padulong sa kahilwayan.

Tandai, ini ang Simbahan ni Jesucristo—Sia ang ara sa timon.

Panumduma ang madamo nga inspirado nga mga pag-uswag nga natabo sang naligad lamang nga dekada. Sambiton ko ang pila lamang sini:

• Ginpaathag liwat nga ang sakramento amo ang sentro sang aton pagsimba sa Adlaw nga Inugpahuway.

• Ang Dali, Magsunod sa Akon gintigana bilang nasentro-sa-puluy-an, suportado-sang-Simbahan nga kasangkapan sa pagpabakod sang mga indibidwal kag mga pamilya.

• Ginsugdan naton ang mas mataas kag mas balaan nga paagi sa pagminister sa tanan.

• Ang paggamit sang teknolohiya sa pagpaambit sang ebanghelyo kag paghimo sang buluhaton sang Ginuo naglapta sa bilog nga Simbahan.

Bisan ining mga sesyon sang pangkabilogan nga komperensya indi mangin posible kon wala ang manami nga mga kasangkapan sang teknolohiya.

Mga kauturan, upod si Cristo sa timon, indi lamang mangin maayo ang tanan; indi ini mahunahuna.

Sang primero abi naton nga mangin sablag ang pangkalibutanon nga pandemya sa buluhaton sang Ginuo. Halimbawa, ang tradisyonal nga pamaagi sang pagpaambit sang ebanghelyo indi na posible. Ugaling, ang pandemya nagbukas sang bag-o kag mas matugahon nga paagi sa paglab-ot sa mga matuod-tuod sa tagipusuon. Ang buluhaton sang pagtipon sang Israel nagadako sa gahum kag kapagsik. Ginatos kag linibo ka mga istorya ang makapamatuod sini.

Isa ka maayo nga abyan nga nagaistar sa matahum nga Norway ang nagsulat sa amon ni Harriet parte sa pagdamo sang bunyag sining karon lang. “Sa mga lugar kon sa diin gamay ang Simbahan,” ginsulat niya, “ang mga salingsing mangin mga sanga, ang mga sanga mangin mga ward!!”

Sa Latvia, isa ka babayi nga nakadiskubre sang Simbahan paagi sa pag-klik sang pasayod sa internet ang nasadyahan sa pagtuon parte sa ebanghelyo ni Jesucristo nga nagkadto gid sia sa iya talana nga pagpakigkita isa ka oras antes, kag antes matapos sang mga misyonero ang una nga leksyon, nangayo na sia sang petsa para mabunyagan.

Sa Este nga Bahin sang Europa, isa ka babayi nga nakabaton sang tawag halin sa mga misyonero ang nagsiling, “Mga sister, ngaa subong lang kamo nagtawag? Madugay na ako nga nagahulat!”

Madamo sa aton mga misyonero ang mas masako subong. Madamo ang nagatudlo sa mas madamo nga tawo. Mas nagdugang ang koneksyon sang mga miyembro kag mga misyonero.

Sang nagligad, mahimo nga daw nahigot kita sa tradisyonal nga pamaagi nga kinahanglan pa sang pandemya para mabuksan ang aton mga mata. Ayhan nagatukod pa kita gamit ang sandstone nga may granite man nga magamit. Tungod sa panginahanglan, nagatuon na kita karon kon paano maggamit sang lainlain nga mga metodo, lakip na sa teknolohiya, sa pag-imbitar sang mga tawo—sa normal kag natural nga pamaagi—agud magkari kag magtan-aw, magkari kag magbulig, kag magkari kag mangin bahin.

Buluhaton ini sang Ginuo. Ginaagda Niya kita nga pangitaon ang Iya pamaagi sa paghimo sini, kag mahimo nga lain ini sa aton nagliligad nga eksperiyensya.

Natabo ini kay Simon Pedro kag sa iban nga mga disipulo nga nag-upod sa pagpangisda sa Dagat sang Tiberias.

“Sinang gab-i wala gid sila sing nakuha.

“Pero sang nagpamanagbanag [na], si Jesus nagtindog sa baybayon. …

“Kag nagsiling sia sa ila, Iladlad ninyo ang pukot sa [pihak] nga kilid sang sakayan, kag makakita kamo.”

Gani ginladlad nila ini [sa pihak nga kilid] kag “karon indi na sila makasarang sa pagbatak sini, bangud sang kadamuon sang isda.”¹⁰

Ang Dios nagpahayag kag padayon nga magapahayag sang Iya gamhanan nga kamot. Ang adlaw magaabot nga magabalikid kita kag magahibalo nga sa sining tion sang pagtilaw, ginbuligan kita sang Dios nga magpangita sang mas maayo nga mga paagi—sang Iya pamaagi—sa pagtukod sang Iya ginharian sa mabakod nga pundasyon.

Nagasaksi ako nga ini buluhaton sang Dios kag magapadayon Sia sa paghimo sang madamo nga indi mahunahuna nga mga butang sa tunga sang Iya mga anak, Iya katawhan. Ginakaptan kita sang Dios sa palad sang Iya maatipanon kag maluluy-on nga mga kamot.

Nagasaksi ako nga si Pangulong Russell M. Nelson amo ang propeta sang Dios sa aton panahon.

Bilang Apostoles sang Ginuo, ginaagda kag ginabendisyunan ko kamo nga “malipayon nga himuon ang tanan nga [inyo] masarangan; kag dayon kabay nga maghulat [kamo] nga may lubos nga pagsalig nga makita ang kaluwasan sang Dios, kag mapahayag ang iya butkon.”¹¹ Kag ginapromisa ko nga ang Ginuo magatugot sang indi mahunahuna nga mga butang halin sa inyo matarong nga pagpangabudlay. Sa ngalan ni Jesucristo, amen.