Tanan nga Nasyon, Kaliwat, kag Lengguahe
Sarang kita, sa aton kaugalingon nga paagi, nga mangin bahin sang katumanan sang mga propesiya kag mga promisa sang Ginuo—kabahin sang ebanghelyo nga nagapakamaayo sang kalibutan.
Mahal kong mga kauturan, sang sini lang naghikot ako sang isa ka temple sealing, nga ginasunod ang COVID-19 nga mga pagsulundan. Upod sang nobya kag nobyo, pareho nga tampad nga nagbalik na nga mga misyonero, amo ang ila mga ginikanan kag tanan nila nga mga utod. Indi yadto mahapos. Ang nobya ang ika-siyam sang napulo ka kabataan. Ang iya siyam ka utod nagpungko sing pasunod, halin sa pinakamagulang pakadto sa pinakamanghod, nga may social distancing siyempre.
Ang pamilya nagtinguha nga mangin maayong mga kaingod bisan diin sila nagaistar. Apang, isa ka komunidad ang nangin di-maabiabihon—tungod, siling sang iloy sang nobya ang ila pamilya mga miyembro sang Ang Simbahan ni Jesucristo sang mga Santos sa Ulihing mga Adlaw.
Ginhimo sang pamilya ang tanan agud magpakig-abyan sa eskwelahan, mabulig, kag mabaton, pero wala gid. Ang pamilya padayon nga nagpangamuyo nga maghumok ang mga tagipusuon.
Isa ka gab-i, nabatyagan sang pamilya nga nasabat ang ila mga pangamuyo, pero sa wala gid ginapaabot nga paagi. Nasunog ang bilog nila nga balay. Pero may lain pa gid nga natabo. Ang sunog nagpahumok sa mga tagipusuon sang ila mga kaingod.
Ang ila mga kaingod kag lokal nga eskwelahan nagtipon sang mga bayo, mga sapatos, kag iban pa nga kinahanglanon sang pamilya, nga nadulaan sang tanan nila nga pagkabutang. Ang kaayo nagbukas sang pag-intiendi. Indi yadto ang paagi nga ginlauman ukon ginpaabot sang pamilya nga sabton ang ila mga pangamuyo. Apang, nagpasalamat sila sa ila natun-an paagi sa mabudlay nga mga eksperiyensya kag wala ginapaabot nga mga sabat sa sinsero nga mga pangamuyo.
Matuod gid, sa sinang may tampad nga mga tagipusuon kag mga mata sa pagtan-aw, ang mapinalanggaon nga mga kaluoy sang Ginuo ginapahayag sa tunga sang mga hangkat sang kabuhi. Ang pagsabat sing matutum sa mga hangkat kag sakripisyo matuod nga nagadala sang mga pagpakamaayo sang langit. Sa sining mortal nga kabuhi, mahimo kita madulaan ukon maghulat sa pila ka butang sa pila ka tion, pero sa ulihi masalapoan naton kon ano ang labing importante. 1 Amo ina ang Iya promisa. 2
Ang aton 2020 ka tuig nga anibersaryo nga proklamasyon nagasugod sa dako kaayo nga promisa nga “Palangga sang Dios ang Iya mga anak sa tagsa ka nasyon sang kalibutan.” 3 Sa tagsa sa aton sa tagsa ka nasyon, kaliwat, lengguahe, kag katawhan, 4 ang Dios nagapromisa, nagahimo sang kasugtanan, kag nagaagda sa aton sa pag-ambit sang Iya bugana nga kalipay kag kaayo.
Ang gugma sang Dios para sa tanan nga tawo napamatud-an sa bug-os nga balaan nga kasulatan. 5 Ang inang gugma nagalakip sang mga kasugtanan kay Abraham, pagtipon sang Iya naglinapta nga mga anak, 6 kag sang Iya plano sang kalipayan sa aton mga kabuhi.
Sa panimalay sang pagtuo dapat wala sang mga dumuluong, wala sang mga dumalayon, 7 wala sang manggaranon kag imol, 8 wala sang “iban.” Bilang “masigkabanwahanon kaupod sang mga balaan,” 9 ginaagda kita bag-uhon ang kalibutan, sing bug-os gid, isa ka tawo, isa ka pamilya, isa ka komunidad sa isa ka panahon.
Nagakatabo ini kon ginakabuhi naton kag ginapaambit ang ebanghelyo. Sa temprano pa lang sining dispensasyon, ang Propetang si Joseph nakabaton sing talalupangdon nga propesiya nga luyag sang Amay nga Langitnon nga ang tanan-tanan bisan diin makadiskubre sang gugma sang Dios kag makaeksperiyensya sang Iya gahum sa pagtubo kag pagbag-o.
Ina nga propesiya nabaton diri, sa puluy-an sang mga Smith sa Palmyra, New York. 10
Gintukod liwat ang puluy-an sang mga Smith sa iya sini orihinal nga pundasyon kag ginhuman sang 1998. Ang kwarto sa ikaduha nga panalgan may amo man nga 18 por 30 por 10 piyes (5.5 por 9 por 3m) nga kalaparon sa diin si Moroni, nga isa ka mahimayaon nga mensahero gikan sa Dios, nagpakita sa lamharon nga si Joseph sang gab-i sang Septyembre 21, 1823. 11
Madumduman ninyo ang panaysayon sang Propetang si Joseph:
“Si [Moroni] nagsiling … ang Dios may buluhaton nga ipahimo sa akon; kag nga ang akon ngalan kilalahon sa kaayohan kag sa kalainan sa tanan nga nasyon, kaliwat, kag lengguahe. …
“Nagsiling [si Moroni] nga may libro nga natago, … nga ang kabug-osan sang wala’y katubtuban nga Ebanghelyo nalakip diri.” 12
Diri kita mapundo. Ginasimba naton ang Dios nga Wala’y Katapusan nga Amay kag ang Iya Anak, si Jesucristo, indi ang Propetang si Joseph ukon bisan sin-o nga mortal nga lalaki ukon babayi.
Apang binagbinaga kon paano natuman ang mga propesiya sang Dios nga ginahatag sa Iya mga alagad. 13 Ang pila natuman sing mas temprano, ang pila naman medyo ulo-ulihi, pero ang tanan natuman. 14 Kon mamati kita sa espiritu sang propesiya sang Ginuo, sarang kita, sa aton kaugalingon nga paagi, nga mangin bahin sang katumanan sang Iya mga propesiya kag mga promisa—bahin sang ebanghelyo nga nagapakamaayo sang kalibutan.
Sang 1823, si Joseph isa ka di-kilala nga 17 anyos nga pamatan-on nga nagapuyo sa isa ka di-kilala nga baryo sa isa ka bag-o nga independiente nga pungsod. Luwas kon matuod ini, paano sia makahunahuna sa pagsiling nga mangin instrumento sia sa buluhaton sang Dios kag magalubad sang balaan nga kasulatan paagi sa dulot kag gahum sang Dios nga mangin kilala sa bisan diin lang?
Apang, kay tungod matuod ini, kamo kag ako makasaksi sinang propesiya nga ginatuman samtang ginaagda kita sa pagbulig nga matuman ini.
Mga kauturan, sa bilog nga kalibutan, ang tagsa sa aton nga nagapartisipar sa sining Oktubre 2020 nga pangkabilogan nga komperensya nalakip sa mga nasyon, mga kaliwat kag mga lengguahe nga ginsambit.
Karon, mga miyembro sang Ang Simbahan ni Jesucristo sang mga Santos sa Ulihing mga Adlaw nagapuyo sa 196 ka nasyon kag mga teritoryo, nga may 3,446 ka stakes sang Simbahan sa 90 sang mga ini. 15 Ginarepresentar naton ang lain-lain nga lokasyon kag mga sentro sang kabakod.
Sang 1823, sin-o ang maghunahuna nga sa tuig 2020 may mangin tatlo ka pungsod nga ang tagsa may kapin isa ka milyon nga miyembro sining Simbahan—ang Estados Unidos, Mexico, kag Brazil?
Ukon 23 ka pungsod nga ang tagsa may kapin sa 100,000 ka miyembro sang Simbahan—tatlo sa North America, katorse sa Central kag South America, isa sa Europa, apat sa Asya, kag isa sa Africa? 16
Ginatawag ni Pangulong Russell M. Nelson ang Libro ni Mormon nga “isa ka milagroso nga milagro.” 17 Ang iya sini mga saksi nagapamatuod, “Ginapahibalo sa tanan nga nasyon, kaliwat, lengguahe, kag katawhan.” 18 Sa karon, ang pangkabilogan nga komperensya matigayon sa 100 ka lengguahe. Si Pangulong Nelson nakapamatuod parte kay Jesucristo kag Iya ginpanumbalik nga ebanghelyo sa 138 ka nasyon kag nagadugang pa.
Sugod sa 5,000 ka naimprinta nga kopya sang 1830 nga unang edisyon sang Libro ni Mormon, may mga 192 ka milyon nga kopya sang tanan ukon bahin sang Libro ni Mormon ang ginbantala sa 112 ka lengguahe. Ang mga paglubad sang Libro ni Mormon matigayon man sa digital. Ang karon nga mga paglubad sang Libro ni Mormon nagalakip kalabanan sang 23 ka lengguahe sa kalibutan nga ginahambal sang 50 ka milyon nga tawo ukon sobra pa, sing tingob ang mismo lengguahe sang mga 4.1 ka bilyon nga tawo. 19
Paagi sa diutay kag simple nga mga butang—sa diin ang tagsa sa aton ginaagda sa pagpakigbahin—ginapahanabo ang dalagko nga mga butang.
Halimbawa, sa isa ka stake conference sa Monroe, Utah, nga ang populasyon 2,200, namangkot ako kon pila ang nagmisyon. Halos ang tanan nga kamot nag-alsa. Sang nagligad nga mga tinuig, gikan sa sinang stake, 564 ka misyonero nagmisyon sa tanan nga 50 ka estado sang U.S. kag 53 ka pungsod—sa tagsa ka kontinente luwas lang sa Antarctica.
Parte sa Antarctica, bisan sa Ushuaia, sa punta nga bahin sang sur sang Argentina, nakita ko ang katumanan sang propesiya sang ang aton mga misyonero nagpaambit sang ginpanumbalik nga ebanghelyo ni Jesucristo sa isa ka lugar nga ginatawag nga “ang punta sang kalibutan.” 20
Ang larawan nga ginaporma sang mga takop sang apat ka libro sang Saints 21 nagalaragway sang bug-os kalibutan nga pag-angot sang mga bunga sang pagpangabuhi sang ebanghelyo para sa tampad nga mga Santos bisan diin lang. Ang kasaysayan sang aton Simbahan nakaangkla sa personal nga testimonya kag eksperiyensya sa ebanghelyo sang tagsa ka miyembro, lakip na si Mary Whitmer, ang tampad nga sister nga ginpakitaan ni Moroni sang mga lamina sang Libro ni Mormon. 22
Maabot sa Enero 2021, ang aton tatlo ka bag-o nga bug-os-kalibutan nga mga magasin sang Simbahan—ang Friend, For the Strength of Youth, kag ang Liahona—nagaagda sang tanan nga magpasakop kag magpaambit sang mga eksperiyensya kag testimonya sa aton bug-os-kalibutan nga katilingban sang pagtuo. 23
Mga kauturan, samtang nagadako ang aton pagtuo sa Amay nga Langitnon kag kay Jesucristo, nagabaton sang mga bugay sa pagpangabuhi sang ginpanumbalik nga mga kamatuoran sang ebanghelyo kag mga sagrado nga kasugtanan, kag nagatuon, nagabinagbinag, kag nagapaambit parte sa nagapadayon nga Pagpanumbalik, nagapakigbahin kita sa pagtuman sang propesiya.
Ginabag-o naton ang aton mga kaugalingon kag ang kalibutan sa sulundan sang ebanghelyo nga nagapakamaayo sang mga kabuhi bisan diin lang.
Ang isa ka Aprikana nga sister nagsiling, “Ang pag-alagad sang akon bana sa priesthood nagahimo sa iya nga mas pasensyoso kag mabuot. Kag ako nagaamat man nga mangin mas maayo nga asawa kag iloy.”
Ang karon-respetado nga internasyonal nga consultant sa negosyo sa Central America nagasiling nga antes niya nadiskubrehan ang ginpanumbalik nga ebanghelyo sang Dios, nangabuhi sia nga wala sing direksyon sa kalye. Karon sia kag ang iya pamilya nakasalapo sang pagkatawo, katuyoan, kag kabakod.
Isa ka bata nga lalaki sa South America nagasagod sing mga manok kag nagabaligya sang mga itlog sini agud makabulig sa pagbakal sang mga bintana para sa balay nga ginatukod sang iya pamilya. Ginauna niya bayad ang iya ika-pulo. Literal niya nga makita ang pagbukas sang mga bintana sang langit.
Sa Four Corners, isa ka komunidad sa sur-weste nga Estados Unidos, isa ka Tumandok nga Amerikano nga pamilya nagapatubo sing matahum nga mga rosas nga nagabuskad sa disyerto, nga nagasimbolo sang pagtuo sa ebanghelyo kag pagsandig-sa-kaugalingon.
Isa sa nakasalbar sa mapait nga inaway sibil, isa ka utod sa Southeast Asia masubo nga nagsiling nga wala na sing kahulugan ang kabuhi. Nakasalapo sia sang paglaum sa isa ka damgo sa diin ang iya anay klasmeyt nagakapot sang sacrament tray kag nagapamatuod parte sa nagaluwas nga mga ordinansa kag Pagbayad-Sala ni Jesucristo.
Ang Amay nga Langitnon nagaagda sa aton sa bisan diin nga batyagon ang Iya gugma, nga magtuon kag magtubo paagi sa edukasyon, disente nga obra, serbisyo nga nagasalig-sa-kaugalingon, kag mga sulundan sang kaayo kag kalipayan nga masalapoan naton sa Iya ginpanumbalik nga Simbahan.
Kon magsalig kita sa Dios, kon kaisa paagi sa pagpakitluoy sa aton pinakamadulom, pinakamasubo, kag labing wala kapat-uran nga mga tinion, matun-an naton nga mas kilala Niya kita kag mas palangga Niya kita sangsa aton pagkahibalo ukon pagpalangga sang aton mga kaugalingon.
Amo ini kon ngaa kinahanglan naton ang bulig sang Dios sa pagpaluntad sang nagadugay nga hustisya, pag-alalangay, pagkawala pinasulabi, kag paghidaet sa aton mga puluy-an kag mga komunidad. Ang aton pinakamatuod, pinakasinsero, pinakamasaligan nga istorya, lugar, kag pagkamangin kabahin nagakatabo kon mabatyagan naton ang nagatubos nga gugma sang Dios, nagapangita sang grasya kag mga milagro paagi sa Pagbayad-Sala sang Iya Anak, kag nagapasad sing nagadugay nga mga kaangtanan paagi sa sagrado nga mga kasugtanan.
Ang espiritwal nga kaayo kag kaalam kinahanglanon sa magamo, magahod, mahigko nga kalibutan sa karon nga panahon. Paano pa gid naton mapaumpawan, mainspirar, kag mapadako ang espiritu sang tawo? 24
Ang pagtanom sang mga kahoy sa Haiti isa lamang sa ginatos ka mga halimbawa sang mga tawo nga nagabinuligay sa paghimo sang maayo. Ang lokal nga komunidad, lakip ang 1,800 ka miyembro sang aton Simbahan, nga nagdonar sang mga inugtanom nga mga puno, nagtililipon agud magtanom sing halos 25,000 ka puno. 25 Ining pila-ka-tuig nga proyekto sang pagpananom nakatanom na sing kapin sa 121,000 ka mga puno. Ginapaabot nga magpananom sing linibulibo pa.
Ining nahigintingob nga pagpanikasog nagahatag sing handong, nagatipig sang duta, nagapugong sang mga pagbaha sa ulihi. Nagapatahum ini sang mga palibot, nagapasad sang komunidad, nagapakaon sa tawo, kag nagapaumpaw sang kalag. Kon mamangkot kamo sa mga Haitian kon sin-o ang magaani sang bunga gikan sining mga puno, mahambal sila, “Kon sin-o ang ginagutom.”
Mga 80% sang populasyon sang kalibutan may mga ginaupdan nga relihiyon. 26 Ang relihiyoso nga mga komunidad nagaresponder sa gilayon nga mga panginahanglan pagkatapos sang mga natural nga kalamidad subong man sa dalayon nga mga kinahanglanon para sa pagkaon, puluy-an, edukasyon, ihibalo, kag training sa trabaho. Sa bilog nga kalibutan, ang aton mga miyembro, mga abyan, kag Simbahan nagabulig sa mga komunidad sa pagsuporta sa mga bakwit kag nagahatag sang tubig, sanitasyon, mga kagamitan para sa may sablag, kag pag-atipan sang panan-aw—isa ka tawo, isa ka baryo, isa ka kahoy sa isa ka tion. 27 Bisan diin, nagatinguha kita nga mangin maayo nga mga ginikanan kag maayo nga mga pumuluyo, nga magbulig sa aton mga palibot kag mga sosyedad, lakip ang Latter-day Saint Charities. 28
Ang Dios nagahatag sa aton sang moral nga pagbuot—kag moral nga salabton. Pahayag sang Ginuo, “Ako, nga Ginuong Dios, nagahilway sa inyo, gani hilway na [kamo].” 29 Sa pagbantala sang “kahilwayan sa mga bihag,” 30 ang Ginuo nagapromisa nga ang Iya Pagbayad-Sala kag banas sang ebanghelyo makabugto sang dutan-on kag espirituhanon nga mga gapos. 31 Upod sang kaluoy, ining nagatubos nga kahilwayan nagadab-ot sa sinang nag-agi na sa mortalidad.
Pila ka tuig ang nagligad, isa ka pari sa Central America nagsugid sa akon nga nagatuon sia sang iya ka mga Santos sa Ulihing mga Adlaw nga “bunyag para sa mga minatay.” “Daw ka insakto man,” siling sang pari, “nga ang Dios maghatag sa tagsa ka tawo sing oportunidad nga mabunyagan, bisan pa kon san-o ukon diin sila nagapuyo, luwas sa magagmay nga kabataan, ‘nga buhi kay Cristo.’ 32 Ang Apostoles nga si Pablo,” siling sang pari, “naghambal parte sa mga patay nga nagahulat sang bunyag kag pagkabanhaw.” 33 Ang nagatal-os nga mga ordinansa sang templo nagapromisa sa tanan nga nasyon, kaliwat, kag lengguahe nga wala sing kinahanglan nga “magpabilin nga ulipon sang kamatayon, sang impiyerno, ukon sang lulubngan.” 34
Sa aton paghibalo parte sa Dios, kon kaisa ang wala ginapaabot nga mga sabat sa mga pangamuyo nagakuha sa aton gikan sa kalye, nagadala sa aton sa komunidad, nagatabog sang kadulom pa-gwa sa aton mga kalag, kag nagagiya sa aton sa pagpangita sang espirituhanon nga palalipdan kag pagkamangin bahin sa kaayo sang Iya mga kasugtanan kag nagapadayon nga gugma.
Ang dalagko nga mga butang sa masami nagasugod sa magagmay, pero ang mga milagro sang Dios makita adlaw-adlaw. Daw ano ang aton pagpasalamat para sa diosnon nga dulot sang Balaan nga Espiritu, sa Pagbayad-Sala ni Jesucristo, kag sa Iya ginpahayag nga doktrina, mga ordinansa, kag mga kasugtanan nga makita sa Iya ginpanumbalik nga Simbahan, nga gintawag sa Iya ngalan.
Kabay nga malipayon naton nga batunon ang pangagda sang Dios nga magbaton kag magbulig sa pagtuman sang Iya ginpromisa kag ginpropesiya nga mga pagpakamaayo sa tanan nga nasyon, kaliwat, kag lengguahe, ginapangamuyo ko sa sagrado kag balaan nga ngalan ni Jesucristo, amen.