Priesthood er a Melchizedek me a Kiis

Ak mla mongit el muut el mo mesaod el kirel a priesthood er a Dios, el cheldecheduch el bla derrenges er a retedei el milngedecheduch el ulsisechakl er kid el kmo ng mekera ea priesthood a omekngeltengat er a redil, rengeasek el redil, rengeasek el sechal.

A priesthood a chedaol klisiich me a deruchall el ulsirs er a klemerang el usbechall er a urerel a Dios el mo uchul a klungiolir a rokui el Rengelekel. Priesthood a diak el tirke el tir a mla mechedaol el mora obis er a priesthood me a lechub eng tirkel tir a olab a deruchellel. A resechal el tir a olab a priesthood a diak le priesthood. El uaisei el diak el kired el omekedong er a re mla mechedaol el sechal el priesthood, ng bai melemalt sel domekedong er tir el chad el obang a priesthood.

A klisichel a priesthood a ngar ngii er a chelsel a telengtengil a Ikelesia me a telungalek. E ng di a klisichel a priesthood me a deruchellel a kakerous a urerel er a Ikelesia me a telungalek. Aika a oltirakl er a osisechakl el Dios a mla rullii. A moktek er a uldesuel a Dios a omekrael er a Rengelekel el mora diak a ulebengelel el klengar. A telungalek er a klechad a klou a ultutelel er isei el uldasu. A Ikelesia a ngar er ngii el omeskid a osisechakl, deruchall, me a chedaol el ruoll el ngii a kedmekill el melemolem a deliongel er a telungalek el mo er a diak a ulebengelel. Osisiu, a telengtengil a telungalek me a Ikelesia er a Jesus Kristo a ngar er ngii a osisiu el melisiich el delongelir. A klengeltengat er a priesthood—el uaia cherrengelel a ebangkelio me a chedaol ruoll el ua techolbechelid, omengedaol, me a mo nguu a sengk er a Chedaol Reng, klengeltengat er a templo, me a diak a ulebengelel el chebechiil—a ngar er ngii el osisiu el mora sechal me a redil.¹

A priesthood el dosaod er ngii a Priesthood er a Melchizedek, el ngii a mloluut er a uchelel a Oltel a ebangkelio. Joseph Smith me a Oliver Cowdery a milchedaol er a Petrus, Jakobus, me a Johanes, el tir a ulmekedong er tir “el olab a kisel a renged, me a ollutel a cherrungel el taem” (Doctrine and Covenants 128:20). Tirka el re Apostol er a rechuodel a ngilai aike el deruchall er Ngii el Osobel. A rokui el deruchall me a obis er a priesthood a rechelel a Priesthood er a Melchizedek (mesa Doctrine and Covenants 107:5), el ngii a oba a llemeltel a omerreder, me a klisichel me a deruchellel el kirel a rokui el obis er a ikelesia er a rokui el rekil a beluulechad (mesaDoctrine and Covenants 107:8).

Chelsel a Ikelesia a deruchellel a ngar er bab el priesthood, Priesthood er a Melchizedek, me a ngar er eou el Priesthood er a Aaron a meruul el ngara cheungel a derdellel a merreder er a priesthood, el uaia bisob me a lechub a president, el ngii a olab a kisel sel priesthood. Mo uchul a klemedengei er a omerelel a deruchellel a priesthood er a Ikelesia, e ng kired el ungil medengei a osisecheklel a kisel a priesthood.

A kisel a Priesthood er a Melchizedek er a renged a milkedmokl el okiu a Petrus, Jakobus, me a Johannes, e ng di ng dimlak el kudmeklii a oltel a kisel a priesthood. A bebil er a kisel a priesthood a mlei ruriul. Uriul er a omengedaol er a kot el templo er aika el uriul klebesei er a Kirtland, Ohio, tedei el profet—Moses, Elias me a Elijah—a uluut a “kisel a ollutel,” el uldimukl er ngii a kiis el kirel a omengideb er a Israel me a ureor er a templo er a Rubak (mesa Doctrine and Covenants 110), el President. Eyring a mla smodii el kmal mo ungil.

A kot el dodengelii el okesiul a urerel aika el kiis a ngara omerelel a chedaol ruoll er a priesthood. A chedaol el ruoll a kuoll el omeruul el olechotel a rellel a chedaol telbiil me a yaksok el klengeltengat. Chelsel a Ikelesia a rokui el chedaol ruoll a mekedmokl er a cheungel a deruchellel a merredelel a priesthood el ngii a oba kisel sel chedaol ruoll.

A chedaol ruoll a oumesingd el mekedmokl el okiu a rechad el tir a mla mechedaol el mora obis er a priesthood el ngara cheungel a derdellel ngike el oba kisel a priesthood. Uaia okesiu, a rulab a betok el kakerous el obis er a Priesthood er a Aaron a oungerachel er a chedaol ruoll er a sakrament el ngara cheungel a kisel me a derdellel a bisob, el ngii a oba kisel a Priesthood er a Aaron. Osisiu el blekeradel a mora chedaol ruoll er a priesthood el redil a oungerachel er a chelsel a templo. El uaisei el redil a diak el olab a deruchall er a obis er a priesthood, te meruul a chedaol el ruoll er a templo el ngara cheungel a derdellel a president er a templo, el ngii a olab a kiis er a chedaol ruoll er a templo.

A ta er a okesiu er a deruchellel a priesthood el ngara cheungel a derdellel a tang el ngii a olab a kiis a osisechakl er a resechal me a redil el tir a mokedong el mo olisechakl er a ebangkelio, el osisiu el ngara chelsel a klas er tir er a ward el le ngarngii me a lechub e ng mision. A bebil er a okesiu a tirke el tir a olab a deruchall er a omerredel er a ward e meruul a deruchellel a priesthood er a omerredel er tir el ngara moktek er a skel okedongir me a cheungel a olterekokl a ngerachel me a chederdellel a merredel er a priesthood el ngii a olab a kiis er a ward me a lechub e ng stake. Tia a olechotel a kmo ng mekera e a deruchellel me a klisiechel a priesthood a meruul e oldeu er a Ikelesia er a Jesus Kristo er a Uriul-klebesei el Santo.²

A deruchellel a priesthood a dirrek el meruul e a klengeltengat er ngii a muchesuar er a chelsel a telungalek er a Uriul-klebesei el Santo. El telungalek e ak mesaod er a oba priesthood el bechiil el sechal me a redil me a rengelekir. Ak dirrek el dochel a bebil er a tekoi el duubech er a chelsel a oumesingd el deliongel el ngii a mukdubech er a kodall me a dertel a chelbechiil.

A osisechakl el kmo deruchellel a priesthood a sebechel el mekedmokl el di ngara cheungel a chederdellel ngike el ngii a oba kiis er sel teletael a klou a ultutelel er a Ikelesia, e ng di ng diak el mekedmokl er a chelsel a telungalek. Ua okesiu, a chedam a oungerachel e meruul er a priesthood er a chelsel a telungalek er ngii el okiu a deruchellel a priesthood el ngii a obang. Ngii a diak a ngerchelel el olab a dereder me a lechub e ng kengei er a ngike el ngii a oba a kisel a priesthood el mo uchul e ng kudmokl a ngerchelel er a telungalek er ngii. Aika uldimukl er ngii a omellach er a chedal a telungalek er ngii, mengideb a miting er a telungalek, e meruul a klengeltengat er a priesthood el mo er a bechil me a rengelekel, me a lechub e ng omekungil el klengeltengat el mo er a telungalek er ngii me a lechub a rebebil.³ A remengeteklel a Ikelesia a olisechakl er a telungalek e ng di te diak el ongedereder er a omerellel a deruchellel a priesthood er a chelsel a telungalek.

A osisiu el okesiu a meruul sel sekum e a chedam a dibus e a chedil ngike a mengeteklel a telungalek. Ngii a merredel er a blil e ngii a usbechall el melai a klisiich me a klengeltengat er a priesthood el mera blil el okiu a klengeltengat me a omerenged er a templo. El uaisei el ngii a diak a deruchellel el mengedmokl a klengeltengat er a priesthood el ngii a sebechel el di mekedmokl el okiu a chad el ngii a oba kltukl el obis er a priesthood, ngii a sebechel el kudmokl a rokui el bebil er a ngerachel er a omerredel er a chelsel a telungalek. Sel loruul e ngii, e ngii a meruul er a klisichel a priesthood el mo uchul a klungiolir a rengelekel el ngii a merredel er tir er a deruchellel el merredel er a telungalek.⁴

A lsekum e a rechedam a menglou a priesthood er tir er a chelsel a telungalek er tir, e ngii a muut el ongereklii sel moktek er a Ikelesia el muut er a ngii di el ngerang el sebechir el remuul. A rechedam el tir a olab a Priesthood er a Melchizedek a kiri el meruul a deruchellir el okiu a omengesuseu, outekangel el ngara ringel, omelemedemek me a delemedemek el reng, me a meral beltik el reng (mesaDoctrine and Covenants 121:41). Sel kot el ngar er bab el okesiu el kirel a omeruul el mo er a rokui el deruchellel a priesthood sei a kot el klou a ultutelel er a chelsel a telungalek. Rolab a priesthood a dirrek el kiri el oltirakl a llechul a Dios me ng sebechir el mo olab a klisichel a priesthood el mo omekngeltengat er a rechedal a telungalek er tir. Te kirir el mengoias a klaubeltikelreng er a delongelir a rechedal a telungalek el mo uchul e ng sorir el olengit er tir el mo omekngeltengat er tir. E a rechedam me a rechedil a kirir el mengesuseu a muut el betok el omekngeltengat er a priesthood er a chelsel a telungalek er tir.⁵

Ngara ikal klou el ongdibel, se dosiik a di kedeb el bokungo er a klechad el subek el reng er tial cherarou el pandemic, ke de mla mosisechakl er ungil osisechakl er diak a ulebengelel. Ak mengesuseu er a derta er kid el mo nguu a osenged “di tang” el mo ngmai aika el klemerang er a diak a ulebengelel el mo uchul e a bedenged “a mo mui er a llomes” (3 Nephi 13:22).

Ngara Osisecheklel el mora seked el ngii a milluches er a chelsel a Biblia me a Babier er a Mormon, a Osobel a ulsisechakl el kmo a bedenged er a klechad a sebechel mo mui er a llomes me a lechub e ng mo mui er a ilkolk. Kid, a uaisei, a soad el mo mui er a llomes, e a Osobeled a ulsisechakl er kid el kmo kede mekera e kudmeklii tiang. Ng kired el orrenges aikel cheldecheduch el kirel a klemerang er a diak a ulebengelel. Ngii a uluusbech er a okesiu er a medad, el okiu ngii e kede ngmai a llomes el mera chelsel a bedenged. Alsekum e a medad a “di mo tang”—a ta er a omelekingel, alsekum e ke de di uldalem el kirel a omelai el llomes me a klemedengei—Ngii a silodii el kmo, “a bedengem el rokir a mo mui er a llomes” (Mateus 6:22; 3 Nephi 13:22). E ng di alsekum e a “osenged a mekngit”—el ngii, sel sekum e ke de osiik a mekngit e olsiseb er a chelsel a bedenge—Ngii a mla omeklatk, “a rokir el bedengem a mo mui er a ilkolk” (bades 23. El ta er a omelekoi, a llomes me a lechub eng ilkolk er a bedenged a ultuil er a osenged—me a lechub e dolai— a diak a ulebengelel klemerang el desuub.

Ng kired el oltirakl er a ongtil a Osobel el mo osiik e oker el mo medengei a diak a ulebengelel klemerang. Ngii a yaksok el kmo a Demad er Babeluades a kongei el olisechakl er a rokui el tir a osiik a klemerang (mesa 3 Nephi 14:8). A lsekum kede meral soad tiang e ngar er ngii a di tang el medad el mo ngmai, a Osobel a mla yaksok el kmo a diak a ulebengelel klemerang “a mo obkais” el merkid (mesa 3 Nephi 14:7–8).

A klekakerous er ngii, a Diabelong a kmal semeriar el mengeuid a uldesued me a lechub e ng omekrael er kid el mo cheroid er a meklou a ultutelel el ua omerellel a priesthood er a Dios. A Osobel a mla omeklatk er kid el kirel a “diak el meral profet, el me duum er kau el oubail a bilel a sib, e ng di chelsir tir a meral omedikl el wolf” (3 Nephi 14:15). Ngii a miskid tia el omelasem el mo ngosukid el mo ng milt a klemerang er a delongelel a betok el kakerous el osisechakl el mo uchul a rrau el reng: “Ke mo medengelterir el okiu a redechir,” Ngii a ulsisechakl (3 Nephi 14:16). “A ungil kerrekar a diak el sebechel el ourodech a mekngit el rodech, el osisiu el mekngit el kerrekar a diak el [sebechel] el ourodech a ungil rodech” (bades 18). Uaisei, ng kired el omes a olechotel urerel—“rodech”—er a osisechakl el ngii a mosisechakl me a rechad el tir a olisechakl. Sei a kot el ungil el nger el mora rokui el ultok el derenges el omtok er a Ikelesia me a osisechakl, llechul me a omerredelel. Moltirakl er a omelasem el Osobel a mla olisechakl. Momes a redechel—olechotel a urerel.

Sel domdasu er a rodech er a ebangkelio me a mla moluut el Ikelesia er a Jesus Kristo, e kede oldeu a rengud el kirel a kmo ng mekera e a Ikelesia, er a chelsel a klengar er a re ngarngii el chedal, a mla meleketek el ulemuchel er a mekekerei el ongdibel er a Intermountain West el mo er a klou er ngii a teruich me a tellolem el million el rechedal a kiei er a beluu el diak el uldimukl er a Beluu er a Merikel. Okiu a ulekeroul, e ke de mla melchesuar a omdois er ultirekllel a Ikelesia el mo olengeseu er rechedal a ikelesia. Ke de olengeseu el loreked er a llechul a dios, el mo kudmekli a ngerachel el mo olisechakl er a mla moluut el ebangkelio, er a keldibel er a Israel, e mo omekedechor a templo er a beluulechad el meliuekl.

Kid a ulekrael lokiu a profet, el President Russell M. Nelson, el chederdellel a Dios a mla ousbech er ngii el mo kudmokl aike el ngerachel el kid a mla melechesuar er a ika el eru el rak el ngii a merredel. Chelechang e ke de mo ngeltengat el mo rongesii a President Nelson, el ngii a mo olisechakl er kid el kmo ke de mekerang e melechel a urelled er tial mla moluut el Ikelesia er a Jesus Kristo er tial meringel el taem.

Ak olecholt er a klaumerang er ngak er a klemerang er aika el tekoi e obengekem el meluluuch el kirel a profet, er kid el ngii a bo derengesii er chelechang, el oba ngklel a Jesus Kristo, amen.