Ang Templo ug ang Inyong Espirituwal nga Pundasyon

Minahal kong kaigsoonan, mapasalamaton ko nga ikauban kamo karong buntag aron mopaambit sa mga pagbati sa akong kasingkasing.

Abi ninyo, nagpahigayon kita og dako nga mga kausaban sa makasaysayanong Templo sa Salt Lake. Kining komplikado nga proyekto naglakip sa daghang gikinahanglan nga pagpalig-on sa orihinal niini nga pundasyon, nga nakaserbisyo og maayo labaw na sa usa ka siglo. Apan kini nga templo kinahanglan nga mobarog og mas dugay pa. Sa ulahing bahin sa Mayo, akong gisusi ang kalamboan niining dako nga proyekto. Naghunahuna ko nga kamo malipay nga makakita unsay nakita sa akong asawa nga si Wendy ug nako. Tingale mahibaloan ninyo ngano nga ang himno nga “Unsa Kalig-on ang Tukuranan”¹ adunay bag-ong kahulogan kanamo.

Ang video gikan sa dapit nga giayo sa Templo sa Salt Lake: “Nagtan-aw kami sa orihinal nga pundasyon sa Templo sa Salt Lake. Nagtindog ko sa dapit nga ilawom sa Garden Room. Samtang akong gisusi ang pagkahimo niining tibuok gambalay, nahingangha ko sa unsay nahimo sa mga pioneer. Hingpit akong nakadayeg sa dihang akong gikonsiderar nga ilang gitukod kini nga talagsaong templo gamit lamang ang mga himan ug mga pamaagi nga anaa kanila labaw sa siglo na ang milabay.

“Hinoon, paglabay sa daghan nga dekada, kon susihon nato pag-ayo ang pundasyon, makita nato ang epekto sa pagkapudpod, gintang sa orihinal nga bato nga gibutang, ug sa nagkalahi nga kalig-on sa semento.

“Karon samtang nakasaksi ko unsay mahimo sa moderno nga mga enhinyero, mga arkitekto, ug mga eksperto sa konstraksyon sa pagpalig-on sa orihinal nga pundasyon, natingala ako pag-ayo. Ang ilang trabaho makapahibulong!

“Ang pundasyon sa bisan unsa nga gambalay, ilabi na sa dagko sama niini, kinahanglan nga lig-on ug makasugakod gayod sa mga linog, pagkapudpod, kusog nga hangin, ug sa dili mapugngan nga anam-anam nga pag-unlod nga makaapekto sa tanan nga gambalay. Ang komplikado nga buluhaton sa pagpalig-on nagpadayon na og molig-on niining sagrado nga templo pinaagi sa usa ka pundasyon nga makasugakod ug mosugakod sa pagsulay sa panahon.”

Gibuhat nato ang tanan sa paghatag niining halangdon nga templo, nga nagkahuyang, usa ka pundasyon nga mobatok sa pwersa sa kinaiyahan hangtod sa Milenyo. Sa samang paagi, panahon na karon nga kita moimplementar sa dili ordinaryo nga mga paagi—tingali mga paagi nga wala nato mahimo kaniadto—sa pagpalig-on sa atong personal nga espirituwal nga mga pundasyon. Ang dili ordinaryo nga mga panahon nagkinahanglan og dili ordinaryo nga mga paagi.

Minahal nako nga mga kaigsoonan, kini mao ang ulahing mga adlaw. Aron kamo ug ako makasugakod sa umaabot nga mga katalagman ug mga kalisod, kinahanglan nga kita adunay lig-on nga espirituwal nga pundasyon nga natukod diha sa lig-on nga sukaranan sa atong Manunubos, nga si Jesukristo.²

Mao nga ako mangutana sa matag usa kaninyo, unsa kalig-on ang inyong tukuranan? Ug unsa nga mga pagpalig-on sa inyong pagpamatuod ug pagsabot sa ebanghelyo ang gikinahanglan?

Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. Dayon, kon kita motuman sa atong mga pakigsaad, Siya motuga nato sa Iyang makaayo, makapalig-on nga gahom.³ Ug oh, kadako sa atong panginahanglan sa Iyang gahom sa mga adlaw nga umaabot.

Kita gisaaran nga “kon [kita] andam dili [kita] mahadlok.”⁴ Kini nga kasiguroan adunay dagkong implikasyon karon. Ang Ginoo namahayag nga bisan sa dili ordinaryo nga mga hagit, kadtong kinsa motukod sa ilang mga pundasyon diha kang Jesukristo, ug nakat-on unsaon sa paggamit sa Iyang gahom, dili kinahanglan nga magpadala sa talagsa nga mga kabalaka niining panahona.

Ang mga ordinansa ug mga pakigsaad sa templo karaan. Ang Ginoo misugo ni Adan ug Eva sa pag-ampo, paghimo og mga pakigsaad, ug sa paghalad og mga sakripisyo.⁵ Sa pagkatinuod, “bisan kanus-a ang Ginoo adunay mga katawhan dinhi sa yuta kinsa mosunod sa Iyang mga pulong, sila gimandoan sa pagtukod og mga templo.”⁶ Ang sumbanan nga mga kasulatan puno sa mga pakisayran bahin sa mga pagtulon-an sa templo, sinina, pinulongan ug daghan pa.⁷ Ang tanan nga atong gituohan ug ang tanan nga saad nga gihimo sa Dios ngadto sa Iyang mga anak sa pakigsaad anaa sa templo. Sa matag panahon, ang templo naghatag og gibug-aton sa bililhon nga kamatuoran nga kadtong kinsa mohimo og mga pakigsaad uban sa Dios ug motuman niini mga anak sa pakigsaad.

Sa ingon, sa balay sa Ginoo, kita makahimo sa sama nga mga pakigsaad nga gihimo ni Abraham, Isaac, ug Jacob ngadto sa Dios. Ug kita makadawat og sama nga mga panalangin!

Imahe

Mga Templo sa Kirtland ug Nauvoo

Ang mga templo nahimong kabahin niini nga dispensasyon gikan sa labing una pang mga panahon.⁸ Si Elijah mihatag sa mga yawe sa awtoridad sa pagsilyo ngadto ni Joseph Smith didto sa Templo sa Kirtland. Ang kahingpitan sa pagkapari gipahiuli didto sa Templo sa Nauvoo.⁹

Hangtod sa pagkamartir, si Joseph Smith nagpadayon sa pagdawat og mga pagpadayag nga nagdugang sa pagpahiuli sa mga ordinansa sa pagtuga ug pagsilyo.¹⁰ Siya nakahibalo, hinoon, nga dugang nga paghashas ang gikinahanglan. Human mapangalagad ang pagtuga ngadto ni Brigham Young niadtong Mayo 1842, si Joseph misulti ni Brigham, “Wala kini masakto sa pagkahan-ay, apan nahimo nato ang tanang kutob sa atong mahimo ubos sa mga sirkumstansiya diin kita mahimutang, ug ako gusto nga sugdan ninyo sa pagpahimutang ug pag-organisar ug paghimo og mga sistema niining tanang mga seremonya.”¹¹

Human sa kamatayon sa Propeta, si Presidente Young midumala sa pagkompleto sa Templo sa Nauvoo¹² ug dayon mitukod og mga templo sa Teritoryo sa Utah. Sa pagpahinungod sa ubos nga mga andana sa Templo sa St. George, si Brigham Young madasigong mipahayag sa pagkadinalian sa buhat sa templo alang sa mga patay dihang siya miingon nga, “Sa dihang ako naghunahuna niini nga hilisgutan, ako gusto sa pinulongan sa gamhanan kaayo nga tingog aron sa pagpukaw sa katawhan.”¹³

Gikan nianang higayona, ang mga ordinansa sa templo hinay-hinay nga gipalambo. Si Presidente Harold B. Lee mipasabot sa pamaagi, mga polisiya, ug bisan ang pagpangalagad sa mga ordinansa sa templo nagpadayon nga nausab diha sa gipahiuli nga Simbahan sa Manluluwas. Si Presidente Lee miingon: “Ang mga baroganan sa ebanghelyo ni Jesukristo mga balaan. Walay usa nga mousab sa mga baroganan ug mga [doktrina] sa Simbahan gawas sa Ginoo pinaagi sa pagpadayag. Apan ang pamaagi mausab kon ang dinasig nga paggiya moabot ngadto niadtong kinsa nangulo diha sa usa ka gihatag nga panahon.”¹⁴

Hunahunaa kon sa unsa nga paagi nga ang pagpangalagad sa sakramento nausab sa milabay nga mga katuigan. Sa unang mga adlaw, ang tubig sa sakramento idalit ngadto sa kongregasyon sa usa ka dako nga sudlanan. Ang tanan moinom gikan niini. Karon mogamit kita og indibidwal nga kopa nga ilabay ra pagkahuman. Ang pamaagi nausab, apan ang mga pakigsaad nagpabilin nga pareha.

Palandonga kining tulo ka kamatuoran:

1. Ang Pagpahiuli usa ka proseso, dili usa ra ka panghitabo, ug magpadayon hangtod ang Ginoo moanhi pag-usab.

2. Ang kataposan nga tumong sa pagpundok sa Israel¹⁵ mao ang pagdala sa mga panalangin sa templo ngadto sa matinud-anong mga anak sa Dios.

3. Samtang maningkamot kita nga epektibong makatuman niana nga tumong, ang Ginoo mopadayag pa og dugang nga mga pagpasabot. Ang nagpadayon nga Pagpahiuli nagkinahanglan og nagpadayon nga pagpadayag.

Ang Unang Kapangulohan ug ang Korum sa Napulog Duha ka Apostoles kanunay nangutana sa Ginoo kon aduna bay mas maayong paagi sa pagdala sa mga panalangin sa templo ngadto sa Iyang matinud-anong mga anak. Nagtinguha kami og giya kanunay kon unsaon sa pagsiguro sa tibuok kalibotan ang pagkatukma ug pagkakanunay sa instruksiyon sa templo, mga pakigsaad, ug mga ordinansa bisan pa sa managlahi nga pinulongan ug kultura.

Ubos sa direksyon sa Ginoo ug agig tubag sa among mga pag-ampo, bag-ong mga kausaban sa pamaagi gihimo. Siya mao ang Usa kinsa gusto nga kamo makasabot og klaro sa unsay inyong gihimo nga mga pakigsaad. Siya mao ang Usa kinsa gusto nga kamo makasinati og hingpit sa Iyang sagrado nga mga ordinansa. Siya gusto nga kamo makasabot sa inyong mga pribilehiyo, mga saad, ug mga responsibilidad. Siya gusto nga kamo makabaton og espirituwal nga mga panabot ug mga pagkaamgo nga wala sukad ninyo maangkon. Kini mao ang Iyang tinguha alang sa tanan nga mga patron sa templo, bisan asa pa sila magpuyo.

Ang bag-o nga mga kausaban sa pamaagi sa templo, ug ang uban nga mosunod, mao ang padayon nga ebidensya nga ang Ginoo aktibong naggiya sa Iyang Simbahan. Siya naghatag og mga oportunidad alang sa matag usa kanato sa pagpalig-on sa atong espirituwal nga mga pundasyon nga mas epektibo pinaagi sa pagsentro sa atong mga kinabuhi diha Kaniya ug sa mga ordinansa ug sa mga pakigsaad sa Iyang templo. Kon kamo modala sa inyong rekomend sa templo, usa ka mapainubsanon nga kasingkasing, ug usa ka nagtinguha nga hunahuna ngadto sa balay sa Ginoo sa pagkat-on, Siya motudlo kaninyo.

Kon ang gilay-on, mga hagit sa panglawas, o ubang mga babag makapugong ninyo sa pagtambong sa templo sulod sa usa ka panahon, ako modapit kaninyo sa paghimo og regular nga oras sa paghinumdom diha sa inyong hunahuna sa mga pakigsaad nga inyong gihimo.

Kon kamo dili pa ganahan nga motambong sa templo, adto og kadaghan—dili lang pipila. Tugoti ang Ginoo, pinaagi sa Iyang Espiritu, motudlo ug modasig kaninyo didto. Ako mosaad kaninyo nga sa kadugayan, ang templo mahimong usa ka dapit sa kasiguroan, kahupayan, ug pagpadayag.

Kon mahimo pa lang nga makigsulti ko tinagsa-tagsa sa matag young adult, ako mangaliyupo gyod kaninyo sa pagpangita og kompanyon diin kamo masilyo didto sa templo. Tingali maghunahuna mo unsa nga kalainan ang mahimo niini sa inyong kinabuhi. Ako mosaad nga kini mohimo sa tanan nga kalainan! Kon kamo magminyo sa templo ug balik-balik nga moadto, kamo malig-on ug magiyahan sa inyong mga desisyon.

Kon ako mahimo nga makigsulti sa matag bana ug asawa kinsa wala pa masilyo sa templo, ako mangamuyo kaninyo sa paghimo sa gikinahanglan nga mga lakang aron modawat nianang labing mahinungdanon, makapausab sa kinabuhi nga mga ordinansa.¹⁶ Makahimo ba kana og kalainan? Kana kon gusto ninyo nga mouswag sa kahangtoran ug magkauban sa kahangtoran. Ang paghandom nga magkauban sa kahangtoran dili makapahimo niini. Walay laing seremonya o kontrata ang makahimo niini.¹⁷

Kon ako mahimo nga makigsulti sa matag lalaki o babaye kinsa naghandom alang sa kaminyoon apan wala pa makakita sa ilang mahangturong kompanyon, ako moawhag ninyo nga dili maghulat hangtod maminyo aron matugahan diha sa balay sa Ginoo. Sugdi karon ang pagkat-on ug pagsinati unsay gipasabot nga masangkapan sa gahom sa pagkapari.

Ug sa matag usa kaninyo kinsa nakahimo og mga pakigsaad sa templo, ako mangamuyo kaninyo sa pagtinguha—sa mainampoon ug sa kanunay—sa pagsabot sa mga pakigsaad ug mga ordinansa sa templo.¹⁸ Espirituwal nga mga pultahan ang maabli. Kamo makat-on unsaon sa pag-abli sa tabil tali sa langit ug yuta, unsaon sa paghangyo nga ang mga anghel sa Dios motabang kaninyo, ug unsaon nga mas makadawat og direksyon gikan sa langit. Ang inyong makugihon nga mga paningkamot sa pagbuhat sa ingon mosuporta ug mopalig-on sa inyong espirituwal nga pundasyon.

Minahal kong kaigsoonan, kon mahuman na ang pag-ayo sa Templo sa Salt Lake, wala nay mas luwas nga dapit atol sa usa ka linog sa Walog sa Salt Lake kay sa sulod niana nga templo.

Sa samang paagi, bisan unsa nga kasamok nga mahitabo sa inyong kinabuhi, ang labing luwas nga dapit sa pagkaespirituwal mao ang pagpuyo diha sa inyong mga pakigsaad sa templo!

Palihog tuohi ko kon ako moingon nga kon ang inyong espirituwal nga pundasyon natukod nga lig-on diha ni Jesukristo kamo dili kinahanglan nga mahadlok. Kon kamo magmatinud-anon sa inyong mga pakigsaad nga gihimo didto sa templo, kamo lig-unon pinaagi sa Iyang gahom. Dayon, kon ang espirituhanon nga mga linog mahitabo, kamo makabarog nga lig-on tungod kay ang inyong espirituwal nga pundasyon lig-on ug dili matarog.

Gimahal ko kamo, mga kaigsoonan. Nasayod ako niini nga mga kamatuoran: ang Dios, nga atong Langitnong Amahan, gusto nga kamo mopili nga mopauli ngadto Kaniya. Ang iyang plano sa mahangturong kauswagan dili komplikado, ug kini nagtahod sa inyong kabubut-on. Kamo gawasnon nga mopili kon kang kinsa kamo gusto mapareha—ug kinsa ang gusto ninyong ikauban—sa kalibotan nga moabot!

Ang Dios buhi! Si Jesus mao ang Kristo! Mao kini ang Iyang Simbahan, nga gipahiuli aron matabangan kamo nga matuman ang inyong balaan nga kapalaran. Sa ingon ako mopamatuod pinaagi sa sagradong ngalan ni Jesukristo, amen.