Ang Pagserbisyo sa Misyon Nagbugay sang Akon Kabuhi sa Katubtuban
Ginapangamuyo ko nga kamong mga lamharon nga lalaki kag mga lamharon nga babayi kag ang inyo mga ginikanan makakita kag makahibalo kon paano bugayan sang pagserbisyo sa misyon ang inyo kabuhi.
Salamat, Pangulong Nelson, sa paghambal liwat sinang laygay parte sa pagserbisyo sa misyon.
Mga kauturan, pila ka tuig na ang nagligad samtang nagahambal ako sa pangkabilogan nga komperensya, ang panulok sa wala ko nga mata gulpi lang nagpalya tungod sang ginatawag macular degeneration, nga sang ulihi naglala pa gid nga indi ko na magamit ina nga mata.
Samtang ginaatubang ko ining kabudlayan, nagdugang ang akon pagpasalamat sa iban pa nga klase sang panan-awan, lakip na ang panan-awan sang nagliligad. Samtang ginabalikan ko ang akon kabuhi, nakita ko ang pila ka mga eksperiyensya nga nagtuga sang dako nga epekto. Isa sinang mga eksperiyensya amo ang kon paano ang akon full-time nga pagserbisyo sa misyon bilang pamatan-on sa England nagbugay sa akon kabuhi kag nagporma sang akon espirituhanon nga kapalaran.
Ginapanumdom ko kon paano ang mga hangkat sa ekonomiya bangud sa Dakong Kawad-on sang tinuig 1930 nagtuga sang masubo nga resulta sa akon mga ginikanan kag sa amon pamilya. Si tatay nangin okupado kaayo sa pagsalbar sang iya baligyaan sang salakyan kag sa pagsuporta sang pamilya sa sining tion sang kabudlayan nga may tion nga ang akon mga ginikanan wala na makasimba.
Bisan nga wala kami nagasimba bilang pamilya, wala ina nagpugong sa akon nga magsimba kon kis-a upod sa akon mga abyan.
Sadtong panahon, ang maglakat sa misyon ara na ngadaan sa akon pensar, pero wala ko ginaistorya sa akon mga ginikanan.
Samtang nagaeskwela sa kolehiyo, ako kag ang pila ko ka mga abyan nagdesisyon nga maglakat sa misyon. Ginkadtuhan ko ang akon bishop, nag-aplay ako sa misyon sang naglakat ang akon mga ginikanan sa lain nga lugar. Pagbalik sang akon mga ginikanan, ginsorpresa ko sila sang balita nga gintawag ako nga mag-alagad sa Gran Britanya. Nagapasalamat ako sa ila mainit nga suporta sa sining desisyon kag sa maayo nga mga abyan nga nagbulig sa akon nga magdesisyon nga mag-serbisyo.
Ang akon pagserbisyo sa misyon naghanda sa akon nga mangin mas maayo nga bana kag amay kag mangin madinalag-on sa negosyo. Ginhanda man ako sini sa bug-os-kabuhi nga pagserbisyo sa Ginuo sa Iya Simbahan.
Sang Abril 1985 nga pangkabilogan nga komperensya, gintokahan ako nga maghambal sa sesyon sang priesthood. Ginpatungod ko ang akon pamulong-pulong sa mga pamatan-on. Naghambal ako parte sa paghanda sa pagserbisyo bilang misyonero. Siling ko, “Sa tanan nga paghanas nga nabaton ko sa mga hilikuton ko sa Simbahan, wala na sing mas importante para sa akon sangsa paghanas nga nabaton ko bilang disinuebe anyos nga elder nga nagaserbisyo sa full-time nga misyon.”1
Kilala kamo sang Ginuo. Kon nagaalagad kamo sa misyon, makaangkon kamo sang mga eksperiyensya nga makabulig sa inyo nga mas makilala Sia. Magatubo kamo sa espirituhanon samtang nagaserbisyo sa Iya. Sa Iya ngalan, ipadala kamo sa mga tulumanon para magserbisyo sa iban. Hatagan Niya kamo sang mga eksperiyensya sa mga pagpabatyag halin sa Balaan nga Espiritu. Hatagan kamo sang Ginuo sang awtoridad nga magtudlo sa Iya ngalan. Sarang ninyo ipakita sa Iya nga makasalig Sia sa inyo kag masaligan kamo.
Masobra lang lima ka bulan ang nagligad, si Elder Jeffrey R. Holland kag Elder Quentin L. Cook, nga nag-alagad man bilang mga misyonero sa mga Isla sang Britanya, nag-upod sa akon sa pagbisita sa mga miyembro kag mga misyonero sa sinang matahum nga lugar. Sang didto, ginpanumdom ko ang akon mga eksperiyensya bilang batan-on nga misyonero. Nagapamatuod ako nga sa akon misyon nahibal-an ko nga ang akon Amay nga Langitnon kag ang akon Manluluwas nga si Jesucristo nakakilala kag nagapalangga sa akon.
Ginbugayan ako sang duha ka talahuron nga mga mission president, si Selvoy J. Boyer kag Stayner Richards, upod ang ila mapisan nga mga asawa, sanday Gladys Boyer kag Jane Richards. Kon balikdon ko, makita ko sing mas maathag nga nagsalig sila sa akon kag palangga nila ako. Gintudloan nila ako sang ebanghelyo. Dako ang ila ginapaabot sa akon. Ginhatagan nila ako sang madamo nga makahalangkat nga mga tulumanon kag mga responsibilidad sa pagkalider para buligan ako nga magtubo kag maghanda para sa bug-os-kabuhi nga pagserbisyo.
Nadumduman ko man sang gintawag ako ni Pangulong Spencer W. Kimball nga magpanguna sa Canada Toronto Mission upod ang akon pinalangga nga asawa, si Barbara, kag ang amon mga kabataan sa amon tupad. Gintawag kami ni Pangulong Kimball nga mag-alagad sang Abril 1974, pagkatapos niya nga maghatag sang iya inspirado nga pangmisyonaryo nga mensahe nga gintig-ulohan “When the World Will Be Converted.”2 Sa sina nga mensahe ginpaathag ni Pangulong Kimball ang iya panan-awon kon paano dalhon ang ebanghelyo sa bilog nga kalibutan. Nagpanawagan sia sang madamo pa gid nga mga misyonero sa bilog nga kalibutan. Ginpahanumdom niya kita sang ginalauman sang Ginuo nga “ang tagsa ka tawo dapat … magbayaw sang tingug sang pagpaandam sa mga pumuluyo sang duta.”3 Ang pinanudlo ni Pangulong Kimball parte sa ginapaabot sa mga pamatan-on nga magserbisyo sa misyon nangin topiko sa sulod sang panimalay sa bilog nga kalibutan. Inang pagpaabot wala magliwat. Nagapasalamat ako nga ginpabakod man ni Pangulong Russell M. Nelson ang ginalauman sang Ginuo sini nga aga.
Halos 10 ka tuig na halin sang gin-anunsyo ni Pangulong Thomas S. Monson ang pagpanubo sang edad sang misyonero para sa mga pamatan-on kag lamharon nga mga babayi.4 Para sa akon, ang mayor nga rason sining pagbag-o amo nga mas hatagan ang aton mga lamharon sang makapabag-o-kabuhi nga mga oportunidad sa pagserbisyo bilang misyonero.
Bilang Apostoles sang Ginuong Jesucristo, ginapanawagan ko karon sa inyo nga mga pamatan-on—kag sa mga lamharon nga babayi nga gusto magserbisyo sa misyon—nga magsugod na subong sa pag-istorya sa inyo mga ginikanan parte sa paglakat sa misyon. Ginahagad ko man kamo nga istoryahon ang inyo mga abyan parte sa paglakat sa misyon, kag kon ang isa sang inyo mga abyan indi pa sigurado sa paglakat, paisoga sila nga mag-istorya sa ila bishop.
Ipangako sa inyo kaugalingon kag sa inyo Amay nga Langitnon nga magaalagad kamo sa misyon kag sugod sa sina nga tion magtinguha nga halungan ang inyo mga tagipusuon, mga kamot, kag mga kaisipan nga mangin matinlo kag kaangay-angay. Ginaagda ko kamo nga mag-angkon sang mabakod nga testimonya parte sa ginpanumbalik nga ebanghelyo ni Jesucristo.
Mga amay kag iloy sining matahum nga mga lamharon, importante ang inyo papel sa sining proseso sang pagpanghanda. Sugdi sini nga adlaw nga makighambal sa inyo kabataan parte sa pagserbisyo sa misyon. Nakahibalo kami nga ang pamilya amo ang may pinakadako nga impluwensya sa pagbulig sa aton mga pamatan-on kag lamharon nga mga babayi sa paghanda.
Kon ara pa kamo sa edad nga magserbisyo sa misyon pero wala pa makaalagad tungod sang pandemya ukon sa iban pa nga mga rason, ginaagda ko kamo nga maglakat na subong. Istoryaha ang inyo bishop, kag maghanda sa pagserbisyo sa Ginuo.
Ginapaisog ko kamo nga mga bishop nga buligan ang tanan nga pamatan-on kag lamharon nga mga babayi nga malapit na sa edad nga maglakat sa misyon sa paghanda nga magserbisyo, kag ginapaisog ko man kamo nga mga bishop nga kilalahon atong mga husto na sa edad pero wala pa makalakat. Agdaha ang tagsa ka pamatan-on nga mangin misyonero, subong man ang tagsa ka dalaga nga gusto magserbisyo.
Sa mga misyonero nga nagaserbisyo sa karon, salamat gid. Natabuan gid ang inyo misyon sa tion sang pangkalibutanon nga pandemya. Ang resulta, ang inyo eksperiyensya sa misyon indi pareho sa eksperiyensya ko sa misyon ukon sa mga eksperiyensya sang mga misyonero nga nagserbisyo antes sang 2020. Nakahibalo ako nga indi ini mahapos. Pero bisan pa sa tunga sining mabudlay nga panahon, ang Ginuo may trabaho nga ginpahimo sa inyo, kag ginhimo ninyo ini sing maayo. Halimbawa, gingamit ninyo ang teknolohiya sa bag-o nga mga paagi para pangitaon ang mga handa na nga magtuon parte sa Pagpanumbalik sang ebanghelyo ni Jesucristo. Sang nagserbisyo kamo sing matutom kag suno sa inyo mga ikasarang, nakahibalo ako nga ang Ginuo nalipay sa inyo pagpaninguha. Nakahibalo ako nga ang inyo pagserbisyo magabugay sa inyo kabuhi.
Kon gin-release na kamo sa inyo misyon, tandai nga wala kamo gin-release sa pagkaaktibo sa Simbahan. Patuboa ang maayo nga mga pangginawi nga inyo natun-an sa misyon, padayona sa pagpabakod ang inyo testimonya, magpisan, magpangamuyo, kag magtuman sa Ginuo. Tahura ang mga kasugtanan nga inyo ginhimo. Padayuna ang pagbugay kag pagserbisyo sa iban.
Ginapangamuyo ko nga kamong mga lamharon nga lalaki kag mga lamharon nga babayi kag ang inyo mga ginikanan makakita kag makahibalo kon paano bugayan sang pagserbisyo sa misyon ang inyo kabuhi. Kabay nga mahibal-an ninyo sa inyo mga kaisipan kag mabatyagan sa inyo mga tagipusuon ang gahum sang imbitasyon nga ginhatag sang Ginuo sa halangdon nga mga misyonero nga anak ni Mosias. Siling niya, “Maglakat kamo … kag palig-una ang akon pulong; apang magmangin mapainumuron kamo sa pagkamainantuson kag mga kapipit-an, agud nga mahimo kamo nga makapakita sang maayong mga halimbawa … sa akon kag himuon ko kamo nga isa ka galamiton sa akon mga kamot tuhoy sa kaluwasan sang madamo nga mga kalag.”5
Kabay nga bugayan sang Dios ang mga lamharon sang Simbahan nga maghandum sa paghanda kag pagserbisyo sa Iya amo ang akon mapainubuson nga pangamuyo, nga akon ginatanyag sini nga aga sa sagrado nga ngalan sang Ginuong Jesucristo, amen.