Isa ka Dako nga Pagbag-o sang Tagipusuon:

Sang Biyernes, Oktubre 28, 1588, tungod nadulaan sing elisi gani ginamaniobra na gid lang gamit ang bugsay, ang barko nga La Girona, nga iya sang Dako nga Armada sang Espanya, nabunggo sa mga kabatohan sang Lacada Point sang Norte nga Ireland.¹

Ang barko nagkulob. Isa sa naupod sa pagkalunod nga nagapaninguha nga mabuhi nagasuksok sang bulawan nga singsing nga ginhatag sa iya pila pa lang ka bulan sang iya asawa may nasulat nga, “Wala na ako sang mahatag pa sa imo”²

“Wala na ako sang mahatag pa sa imo”—isa ka dinalan kag isa ka singsing nga may desinyo sang kamot nga nagauyat sang tagipusuon, isa ka pagpabutyag sang pagpalangga halin sa isa ka asawa sa iya bana.

Sang ginabasa ko ini nga istorya, naghatag ini sa akon sing madalom nga impresyon, kag akon ginpamensar ang ginpangabay sang Manluluwas: “Kag magadulot kamo bilang isa ka halad sa akon sang isa ka buong nga tagipusuon kag isa ka mahinulsulon nga espiritu.”³

Akon man ginhunahuna ang mga reaksyon sang katawhan ni Haring Benjamin sa iya mga pulong: “Huo, nagapati kami sa tanan nga mga pulong nga imo ginhambal sa amon …, nga naghikot sang isa ka dako nga pagbag-o sa amon, ukon sa amon mga tagipusuon, sa bagay nga wala na kami sing huyog nga maghimo sing malain, kundi dalayon nga maghimo sing maayo.”⁴

Sugiran ko kamo sang akon inagihan sang nagaedad ako sing 12 anyos, nga ang epekto naglab-ot tubtob karon.

Ang akon iloy nagsiling, “Eduardo, dasiga dira. Ulihi na ’ta sa Simbahan.”

“Nay, mapabilin ko upod kay tatay karon nga adlaw,” ang akon ginsabat.

“Sigurado ka?” Kinahanglan mo makadto sa imo miting sa priesthood quorum,” siling niya.

Nagsabat ako, “Kaluoy man kay tatay! Mabilin sia nga isahanon. Updan ko sia sini nga adlaw.”

Si tatay indi miyembro sang Ang Simbahan ni Jesucristo sang mga Santos sa Ulihing mga Adlaw.

Ang akon nanay kag mga utod nga babayi naglakat sa simbahan. Gani, ginkadtuan ko si tatay sa iya shop, kon diin sia nagatiner kon Domingo, kag suno sa akon ginhambal sa akon iloy, nagtiner ako sing makadali, buot silingon, pila lang ka minutos upod sa iya, kag dayon namangkot, “’Tay, okay ka lang di?”

Nagpadayon sia sa iya kalingawan nga pagpangay-o sang mga radyo kag relo, kag nagyuhom lang sa akon.

Dayon ginhambalan ko sia,“Makighampang ako sa akon mga abyan.”

Si tatay, nga wala nagatulok, nagsiling sa akon, “Domingo man subong. Indi bala dapat ara ka sa Simbahan?”

“Huo, pero sini nga adlaw nagsiling ko kay nanay nga indi ko magsimba,” sabat ko. Si tatay nagpadayon sa iya ginaobra, kag para sa akon, pahanugot na ato nga maglakat.

Sina nga aga may ara sing importante nga hampang sang soccer, kag ginhambalan ako sang akon mga abyan nga indi pwede nga wala ako, kag kinahanglan namon nga dag-on ina nga hampang.

Ang mabudlay kay kinahanglan ko mag-agi sa atubang sang simbahan para makakadto sa ginahampangan sang soccer.

Tungod desidido, nagdalagan ako pakadto sa ginahampangan sang soccer kag nagpundo sa atubang sang dako nga sablag, ang simbahan. Nagdalagan ako sa tabok sang dalan, kon diin may dalagko nga mga kahoy, kag nagdesisyon nga magdalagan sa tunga sang mga ini agud wala sing makakita sa akon tungod oras ato nga inug-abot sang mga miyembro sa pagsimba.

Igu-igo lang gid ang pag-abot ko sa pagsugod sang hampang. Nakahampang ako kag nakapuli antes makapuli ang akon iloy.

Ang tanan natigayon; nagdaug ang amon grupo, kag nalipay gid ako. Pero atong madasig ko nga pagdalagan pakadto sa ginahampangan wala nakaluwas sa quorum adviser sang mga deacono.

Nakita ako ni Brother Félix Espinoza nga madasig nga nagadalagan sa tunga sang tagsa ka kahoy, nga nagapalipod.

Sa pagsugod sang semana, si Brother Espinoza nagkadto sa amon balay kag nangabay nga makighambal sa akon. Wala sia naghambal parte sa nakita niya sang Domingo, ukon namangkot kon ngaa wala ako nagtambong sa akon miting.

Gindaho lang niya sa akon ang manwal kag nagsiling, “Luyag ko nga ikaw ang matudlo sa klase sa priesthood sa Domingo. Ginmarkahan ko na ang leksyon para sa imo. Indi ina mabudlay. Gusto ko basahon mo ina, kag mabalik ako matapos ang duha ka adlaw agud buligan ka nga maghanda para sa leksyon.” Pagkasiling sini, ginduhol niya sa akon ang manwal kag naglakat.

Indi ko gusto nga magtudlo sa klase, pero indi ko sia mabalibaran. Nagplano ako nga sina nga Domingo, updan ko liwat si tatay—buot silingon, may ara naman sang importante nga hampang nga soccer.

Si Brother Espinoza isa ka tawo nga ginadayaw sang mga lamharon.⁵ Nakita niya ang ginpanumbalik nga ebanghelyo kag nagbag-o sang iya kabuhi ukon, sa iban nga pulong, sang iya tagipusuon.

Pag-abot sang Sabado sang hapon, namensar ako nga, “Ti, basi bwas mabugtaw ako nga nagamasakit, kag indi ako pwede magsimba.” Indi na ang hampang nga soccer ang ginakabalak-an ko, kundi ang klase nga akon dapat tudloan, labi na ang leksyon parte sa Adlaw nga Inugpahuway.

Nag-abot ang adlaw nga Domingo, kag nagbugtaw ako nga mas maayo pa gid ang lawas. Wala ako sing rason—wala sing lusot.

Amo ato ang una nga tion nga magtudlo ako sang leksyon, pero si Brother Espinoza ara sa akon tupad, kag amo ato ang adlaw sang dako nga pagbag-o sang akon tagipusuon.

Sumugod sadto, ginatipigan ko na nga balaan ang Adlaw nga Inugpahuway, kag sa kadugayan, sa mga pulong ni Pangulong Nelson, ang Adlaw nga Inugpahuway nangin makalilipay.⁶

“Ginuo, ginahatag ko sa Imo ang tanan; wala na ako sang mahatag pa sa Imo.”

Paano kita makaangkon sinang dako nga pagbag-o sang tagipusuon? Ginaumpisahan ini kag sa ulihi nagakatabo

1. kon nagatuon kita sang balaan nga mga kasulatan agud maangkon ang ihibalo nga magapabaskog sang aton pagtuo kay Jesucristo nga amo ang magtuga sang handum nga magbag-o;⁷

2. kon aton patubuon ina nga handum paagi sa pagpangamuyo kag pagpuasa;⁸

3. kon mag-akto kita, suno sa pulong nga natun-an ukon nabaton, kag nagahimo kita sang kasugtanan sa pagtugyan sang aton mga tagipusuon sa Iya, pareho sang katawhan ni Haring Benjamin.⁹

Paano naton mahibaloan nga ang aton tagipusuon nagabag-o?¹⁰

1. Kon gusto naton nga malipay ang Dios sa tanan nga butang.¹¹

2. Kon ginakabig naton ang iban nga may pagpalangga, pagtahod, kag konsiderasyon.¹²

3. Kon makita naton ang mga kinaiya ni Cristo nga nangin bahin sang aton pamatasan.¹³

4. Kon mabatyagan naton pirme ang paggiya sang Balaan nga Espiritu.¹⁴

5. Kon ginatuman naton ang kasugoan nga mabudlay para sa aton nga tumanon kag padayon nga ginapangabuhi ini.¹⁵

Kon nagapamati kita sing maayo sa mga laygay sang aton mga lider kag malipayon mga nagadesisyon nga sundon ini, wala bala kita nagaeksperiyensya sang dako nga pagbag-o sang tagipusuon?

“Ginuo, ginahatag ko sa Imo ang tanan; wala na ako sang mahatag pa sa Imo.”

Paano naton ginatipigan ang dako nga pagbag-o?

1. Kon nagaambit kita sang sakramento kada semana kag nagabag-o sang aton kasugtanan nga dalhon sa aton mga kaugalingon ang ngalan ni Jesucristo, dumdumon Sia pirme, kag tumanon ang Iya mga kasuguan.¹⁶

2. Kon ginaliso naton ang aton mga kabuhi pakadto sa templo.¹⁷ Ang regular nga pagkadto sa templo magabulig sa aton nga mapabilin nga bag-o kag ginbag-o ang tagipusuon samtang nagapartisipar kita sa mga ordinansa.

3. Kon palangga naton kag ginaalagaran ang aton mga kaingod paagi sa ministering kag pang-misyonero nga buluhaton.¹⁸

Dayon para sa aton dako nga kalipay, ina nga pangsulod nga pagbag-o nagabaskog kag nagalapnag tubtob nga magbugana sa maayong mga buhat.¹⁹

Ining dako nga pagbag-o sang tagipusuon nagadala sa aton sang balatyagon sang kahilwayan, pagsalig, kag paghidaet.²⁰

Ining pagbag-o sang tagipusuon indi isa ka hitabo; nagakinahanglan ini sang pagtuo, paghinulsol kag dalayon nga espirituhanon nga pagpaninguha para matabo. Nagaumpisa ini kon maghandom kita nga ipaidalom ang aton pagbuot sa Ginuo, kag nagakatabo ini kon magsulod kita kag magtuman sang mga kasugtanan upod sa Iya.

Inang indibidwal nga aksyon may positibo nga epekto sa aton kag sa mga tawo sa palibot naton.

Sa mga pulong si Pangulong Russell M. Nelson, “Ang mga makahalalit nga kagamo sa bilog nga kalibutan—kag sang mga ara sa aton indibidwal nga kabuhi—masolbar kon kita tanan magpili nga sundon si Jesucristo kag pamatian ang Iya mga pinanudlo.²¹ Ining akto sa pagsunod sa mga pinanudlo sang Manluluwas nagadala sang dako nga pagbag-o sang tagipusuon.

Mahal kong mga kauturan, mga lamharon, kag mga kabataan, samtang nagapartisipar kita sa komperensya sining katapusan sang semana, tugoti ninyo ang mga pulong sang aton mga propeta, nga magahalin sa Ginuo, nga magsulod sa aton mga tagipusuon agud maeksperiyensya ang dako nga pagbag-o.

Sa mga wala pa makabuylog sa ginpanumbalik nga Simbahan sang Ginuo, ginaagda ko kamo nga magpamati sa mga misyonero nga may sinsero nga handum nga mahibaloan kon ano ang ginapaabot sang Dios sa inyo kag maeksperiyensyahan inang pangsulod nga transpormasyon.²²

Karon ang adlaw nga magpamat-od nga sundon ang Ginuong Jesucristo. “Ginuo, ginahatag ko sa Imo, ang akon tagipusuon; wala na ko sang mahatag pa sa Imo.”

Pareho sang singsing nga nakita halin sa sinang nalunod nga barko, kon ihatag naton ang aton tagipusuon sa Dios, ginasalbar kita halin sa akig nga kadagatan sining kabuhi, kag paagi sini, ginapadalisay kita kag ginatinloan paagi sa Pagbayad-Sala ni Cristo kag mangin “mga anak ni Cristo,” nga espirituhanon nga “ginbun-ag sa Iya.”²³ Sa sini ako nagapamatuod sa ngalan ni Jesucristo, amen.