Pagsunod kay Jesus: Ang Pagkamakigdaeton

Ang mabaskog nga epekto sang internet bugay kag hangkat, nga pinasahi sa aton panahon.

Sa kalibutan sang social media kag nagkalainlain nga plataporma sa madasig nga pagpalapta sang impormasyon, ang tingug sang isa ka tawo mabatian sang mas lapnagon kag mas madasig. Inang tingug, matuod man ukon indi, patas man ukon makasakit, maluluy-on man ukon mapintas, gilayon nga mabatian sa bilog nga kalibutan.

Ang mga post sa social media parte sa pagpasunaid kag kaayo masami nga wala ginasapak, samtang ang mga pulong sang pagtamay kag kaakig masami naton nga makita, bisan pa ang mga pilosopiya sa pulitika, mga tawo sa balita, ukon opinyon parte sa pandemya. Wala sang tawo ukon topiko, lakip na ang Manluluwas kag ang Iya ginpanumbalik nga ebanghelyo ang makalikaw sa sining sosyal nga paniyempo sang pagbinahin-bahin sang mga tawo.

Ang Wali sa Bukid isa ka mensahe para sa tanan pero partikular nga ginhatag sa mga disipulo sang Manluluwas, inang mga nagpili nga sundon Sia.

Ang Ginuo nagtudlo kon paano magpangabuhi sadto kag sa karon, sa kalibutan nga puno sang pagtamay. “Bulahan ang mga makigdaeton,” siling Niya, “kay sila tawgon nga mga anak sang Dios.”¹

Paagi sa taming sang aton pagtuo kay Jesucristo, nagamakigdaeton kita, nga ginapalong—buot silingon, ginapakalma, ginapabugnaw, ukon ginapalong—ang tanan nga nagadabadaba nga baslay sang kaaway.²

Kon himuon naton ang aton bahin, ang Iya promisa amo nga pagatawgon kita nga “mga anak sang Dios.” Ang tagsa ka tawo sa duta “kaliwat”³ sang Dios, pero ang tawgon nga “mga anak sang Dios” nagakahulugan sing mas masobra pa gid. Sa aton pagpalapit kay Jesucristo kag paghimo sang mga kasugtanan upod sa Iya, kita mangin “iya kaliwat” kag “mga manunubli sang ginharian,”⁴ “mga anak ni Cristo, iya mga anak nga lalaki, kag iya mga anak nga babayi.”⁵

Paano ang makigdaeton nagapakalma kag nagapabugnaw sang nagadabadaba nga mga baslay? Sigurado indi sa pag-isol sa atubangan sang mga nagapakanubo sa aton. Sa baylo, nagapabilin kita nga may kompiyansa sa aton pagtuo, nga ginapaambit ang aton mga ginapatihan sing may kalig-on pero pirme nga wala sing kaakig ukon malain nga tuyo.⁶

Sang sini lang, sang makabasa sang isa ka mabaskog nga opinyon nga nagapakalain sang Simbahan, si Reverend Amos C. Brown, isa ka pungsodnon nga lider sang kinamatarong-sibil kag pastor sang Third Baptist Church sa San Francisco, nagsiling:

“Ginatahod ko ang inagihan kag panan-aw sang tawo nga nagsulat sinang mga pulong. Matuod, ugaling lain ang akon panan-awan.”

“Ginaisip ko nga isa ka pinakadako nga kalipay sa akon kabuhi ang makilala ining mga lider [sang Simbahan], lakip na si Pangulong Russell M. Nelson. Sila, para sa akon, ang ehemplo sang pinakamaayo nga pagpamuno nga mahatag sang aton pungsod.”

Litrato

Si Pangulong Nelson upod si Reverend Brown

Dayon gindugang niya: “Pwede kita magkumod parte sa mga nagkalatabo sadto. Pwede naton ipanghiwala ang tanan nga maayo nga mga nagakalatabo sa karon. … Apang ang ini nga mga pamaagi indi magbulong sang pagbinahinbahin sang aton nasyon. … Pareho sa gintudlo ni Jesus, wala naton ginatapna ang malain paagi sa dugang nga kalainan. Nagapalangga kita sing maalwan kag nagapangabuhi sing maluluy-on, bisan pa sa ila nga ginahunahuna naton nga aton mga kaaway.”⁷

Si Reverend Brown makigdaeton. Kalma kag matinahuron niya nga ginpabugnaw ang nagadabadaba nga mga baslay. Ang mga makigdaeton wala nagapawala lang; nagapangkumbinsi sila sa pamaagi sang Manlululwas.⁸

Ano ang nagahatag sa aton sang pangsulod nga kusog agud pabugnawon, pakalmahon, kag palungon ang nagadabadaba nga mga baslay nga ginapuntirya sa mga kamatuoran nga aton ginapalangga? Ang kusog nagahalin sa aton pagtuo kay Jesucristo kag sa aton pagtuo sa Iya mga pulong.

“Bulahan kamo kon ang mga tawo magapasipala kag magahingabot sa inyo, … kag maghambal sang tanan nga bagay sang kalautan batok sa inyo sing di-matuod bangod sa akon.

“… Kay ang inyo balos dako sa langit, kay amo man ang paghingabot nila sang mga [propeta] nga nahauna sa inyo.”⁹

Duha ka importante nga mga prinsipyo ang nagagiya sa aton handum nga mangin makigdaeton.

Una, ang aton Amay nga Langitnon naghatag sa tagsa ka tawo sang iya kahilwayan sa pagpili, upod ang ikasarang nga magpili sang iya kaugalingon nga alagyan.¹⁰ Ining kahilwayan sa pagpili isa sang pinakadako nga regalo sang Dios.

Ika-duha, upod sining kahilwayan sa pagpili, ang aton Amay nga Langitnon nagtugot “sang kasupak sa tanan nga butang.”¹¹ Aton “matilawan ang mapait, agud mahibal-an [naton] nga pakamahalon ang maayo.”¹² Ang oposisyon indi naton dapat ikakibot. Matun-an naton nga kilalahon ang maayo sa malain.

Nagakalipay kita sa bugay sang kahilwayan sa pagpili, nga nakahangop nga may madamo nga wala nagapati sa aton ginapatihan. Sa pagkamatuod, diutay lang sa ulihing mga adlaw ang magapili nga himuon ang ila pagtuo kay Jesucristo nga sentro sang tanan nga ila ginapanumdum kag ginahimo.¹³

Tungod sang mga plataporma sa social media, ang isa ka tingug sang kawala-pagtuo dawsa kadamo kaayo nga negatibo nga tingug,¹⁴ pero bisan pa madamo ini nga tingug, ginapili naton ang dalan sang mga makigdaeton.

Ginatan-aw sang pila ang Unang Pangulohan kag ang Korum sang Dose nga may kalibutanon nga mga motibo, pareho sang mga lider sa pulitika, negosyo, kag kultura.

Pero, ang aton nga mga responsibilidad ginahatag sa lain kaayo nga paagi sangsa ila. Wala kita ginaboto ukon ginapili bilang aplikante. Nga wala sing partikular nga propesyonal nga preparasyon, ginatawag kita kag ginaordinan nga magpamatuod sang ngalan ni Jesucristo sa bilog nga kalibutan tubtob mapatay kita. Nagatinguha kita nga bendisyunan ang nagamasakit, ang ginasuboan, ang naluyahan, kag ang imol kag pabakuron ang ginharian sang Dios. Nagatinguha kita nga mahibal-an ang pagbuot sang Ginuo kag ipahayag ini, ilabi na sa sinang mga nagapangita sang kabuhi nga wala katapusan.¹⁵

Bisan nga ang aton mapainubuson nga handum amo nga ang mga pinanudlo sang Manluluwas tahuron sang tanan, ang mga pulong sang Ginuo paagi sa Iya mga propeta masami nga supak sa pamensaron kag mga huyog sang kalibutan. Amo gid ini halin sadto.¹⁶

Ang Manluluwas nagsiling sa Iya mga Apostoles:

“Kon ang kalibutan [nagadumot] sa inyo, kilalaha ninyo nga ini nagdumot sa akon sing una sa inyo. …

“… Tanan ini himuon nila … kay wala sila makakilala sa nagpadala sa akon.”¹⁷

Palangga kag ginaulikdan naton sing matuodtuod ang aton tanan nga isigkatawo, pareho man ang ila ginapatihan sa aton ukon indi. Si Jesus nagtudlo sa aton sa paanggid sang Maayong Samariahanon nga inang may magkatuhay nga mga pagpati dapat sinsero nga magdab-ot sa pagbulig sa bisan sin-o nga nagakinahanglan, bilang mga makigdaeton, nga nagahimo sing maayo kag dungganon nga mga kawsa.

Sang Pebrero, ang pangulong dinalan sa Arizona Republic nagpahayag, “Ang ginaproponer nga layi sang duha-ka-partido nga ginasuportahan sang mga Santos sa Ulihing mga Adlaw magaamlig sang mga gay kag transgender nga taga-Arizona.”¹⁸

Kita, bilang mga Santos sa Ulihing mga Adlaw, “nalipay nga mangin kabahin sang alyansa sang mga lider sang pagtuluohan, negosyo, LGBTQ nga mga tawo kag komunidad nga nagbuligay sa panimuot sang pagsalig kag respeto.”¹⁹

Si Pangulong Russell M. Nelson sadto mahunahunaon nga nagpamangkot, “Indi bala pwede magluntad ang mga latid nga indi mahimo nga patag-awayan?”²⁰

Nagatinguha kita nga mangin “makigdaeton nga mga sumulunod ni Cristo.”²¹

Ang pila sang mga pagpangatake sa Manluluwas tuman kalain gani wala Sia maghambal sing bisan ano. “[Kag] ang puno nga mga sacerdote kag ang mga escriba … [nagsumbong sa iya] sing masingkal … kag nag-uligyat sa iya,” pero si Jesus “wala sia magsabat sa [ila] sing bisan ano.”²² May mga tinion nga ang pagkamakigdaeton nagakahulugan nga batuan naton ang tentasyon nga magsabat kag sa baylo, nga may dignidad, magpabilin nga mahipos.²³

Masubo para sa aton tanan kon ang masakit ukon nagayaguta nga mga hambalanon parte sa Manluluwas, sa Iya mga sumulunod, kag sa Iya Simbahan ginahambal ukon ginabantala sinang mga aktibo sadto nga mga miyembro, nag-ambit sang sakramento upod sa aton, kag nagpanaksihon upod sa aton parte sa diosnon nga misyon ni Jesucristo.²⁴

Natabo man ini sa tion sang pag-alagad sang Manluluwas.

Pila sa mga disipulo ni Jesus nga kaupod Niya sa tion sang Iya pinakadalayawon nga mga milagro nagpamat-od nga “indi na [magpakig-upod] sa iya.”²⁵ Ang masubo, indi tanan magapabilin nga mabakod sa ila pagpalangga sa Manluluwas kag sa ila determinasyon nga tumanon ang Iya mga kasugoan.²⁶

Si Jesus nagtudlo sa aton nga maglikaw sa mga sitwasyon kag lugar sang kaakig kag pagbinaisay. Sa isa ka halimbawa, pagkatapos nga gin-atubang sang mga Fariseo si Jesus kag ginplanohan kon paano nila Sia laglagon, naglikaw si Jesus sa ila,²⁷ kag ang mga milagro natabo sang “madamo ang nagsunod sa iya, kag gin-ayo niya sila tanan.”²⁸

Kita man makapalayo sa pagbinais kag mabugayan ang mga kabuhi sang iban²⁹ bisan wala naton ginapalayo ang aton mga kaugalingon sa iban.

Sa Mbuji-Mayi, Democratic Republic of the Congo, sang primero may mga nagapakalain sang Simbahan, nga wala makaintiendi sang aton mga ginapatihan ukon makakilala sang aton mga miyembro.

Sadto, ako kag si Kathy nagkadto sa isa ka espesyal kaayo nga pagtililipon sa Simbahan sa Mbuji-Mayi. Ang kabataan malimpyo kaayo ang mga bayo, nga may paglaum kag kalipay sa ila mga nawong. Naglaum ako nga maghambal kuntani sa ila parte sa ila edukasyon pero may nakahambal nga madamo gali ang wala nagaeskwela. Ang aton mga lider, gamit ang diutay lang gid nga pundo para sa tawhanon nga kaayohan, nakakita sang pamaagi nga makabulig.³⁰ Karon, masobra 400 ka mga estudyante—mga babayi kag lalaki, mga miyembro dala na ang indi miyembro—gin-abiabi kag ginatudloan sang 16 ka mga manunudlo nga mga miyembro sang Simbahan ni Jesucristo.

Litrato

Kalanga Muya

Ang katorse anyos nga si Kalanga Muya nagsiling, “[Kay diutay gid lang ang kwarta,] naghinguyang ako sing apat ka tuig nga wala nagaeskwela. … Nagapasalamat gid ako sa ginhimo sang Simbahan. … Makabasa na ako subong, makasulat, kag makahambal sang Pranses.”³¹ Nga nagahambal parte sining proyekto, ang mayor sang Mbuji-Mayi nagsiling, “Nainspirar ako sang Ang Simbahan ni Jesucristo sang mga Santos sa Ulihing mga Adlaw tungod samtang [ang iban] nga simbahan nagabinahinbahin nga ila lang mga kaugalingon ang ginapamensar … [nagapangabudlay kamo] upod [sa iban] agud buligan ang komunidad nga nagakinahanglan.”³²

Tagsa nga mabasa ko ang Juan kapitulo 13, madumduman ko ang perpekto nga ehemplo sang Manluluwas bilang makigdaeton. Si Jesus mapinalanggaon nga naghugas sang tiil sang mga Apostoles. Dayon, mabasa naton nga “[natublag] sia sa espiritu,”³³ sang ginpanumdum Niya ang isa Niya ka pinalangga nga nagahanda sa pagtraydor sa Iya. Gintilawan ko nga panan-awon ang mga hunahuna kag balatyagon sang Manluluwas sang si Judas nagbiya. Makatilingala, nga sa sina nga tion sang pagpanghunahuna, wala si Jesus maghambal parte sa Iya “natublag” nga mga balatyagon ukon parte sa pagluib. Sa baylo, naghambal Sia sa Iya mga Apostoles parte sa gugma, ang Iya mga pulong dako kaayo ang impluwensya sa mga katuigan.

“Ako nagahatag sa inyo sing bag-ong sugo, nga maghigugmaanay kamo; subong nga ako naghigugma sa inyo, nga kamo man maghigugmaanay. …

“Sa sini ang tanan nga tawo makahibalo nga kamo mga gintutun-an ko, kon maghigugmaanay kamo.”³⁴

Kabay nga higugmaon naton Sia kag higugmaon ang tagsa-tagsa. Kabay nga mangin mga makigdaeton kita, nga matawag kita nga “mga anak sang Dios,” amo ang akon pangamuyo sa ngalan ni Jesucristo, amen.