Ang mga Kasugtanan sa Dios Nagapabakod, Nagaamlig, kag Nagahanda sa Aton para sa Wala Katapusan nga Himaya

Mga sister, nalipay gid ako nga makatipon sa bilog-kalibutan nga pag-ululutod! Bilang mga babayi nga nagahimo kag nagatuman sang mga kasugtanan sa Dios, nagaambit kita sang espirituhanon nga mga kaangtanan nga nagabulig sa aton nga atubangon ang mga hangkat sang aton panahon kag nagahanda sa aton sa Ika-duha nga Pagkari ni Jesucristo. Kag ang pagtuman sinang mga kasugtanan nagatugot sa aton nga mangin mga babayi nga may impluwensya sa pagdala sang iban sa Manluluwas.

Inang mga nabunyagan nakighisugot sa sinang di-malimtan nga adlaw nga dalhon sa ila kaugalingon ang ngalan ni Jesucristo, dumdumon Sia pirme, tumanon ang Iya mga kasugoan, kag mag-alagad sa Iya hasta sa katapusan. Kon himuon naton ini, ang Amay nga Langitnon nagapromisa nga patawaron ang aton mga sala kag ihatag sa aton ang pagpakig-upod sang Balaan nga Espiritu. Ining mga bugay nagabutang sa aton sa dalan nga, kon magpadayon kita sa pagsulong kag magbatas tubtob sa katapusan, magatugot sa aton nga magkabuhi upod sa Iya kag sa Iya Anak sa selestiyal nga ginharian. Ang tagsa ka nabunyagan nga tawo ginpromisahan sining mga bugay kag mga pribelihiyo kon ginatuman nila ang kasugtanan nga ila ginhimo sa sinang espesyal nga adlaw.

Inang mga naghimo sing dugang pa nga mga kasugtanan sa templo nagabaton sing gamhanan nga mga promisa nga nagasandig sa aton personal nga katampad. Sinsero kita nga nagapromisa nga tumanon ang mga kasugoan sang Dios, ipangabuhi ang ebanghelyo ni Jesucristo, magpangabuhi sing matinlo, kag idedikar ang aton tinion kag mga talento sa pag-alagad sa Ginuo. Bilang balos, ang Dios nagapromisa sang mga bugay sa sini nga kabuhi kag sing oportunidad nga makabalik sa Iya.¹ Sa sinang proseso, ginahatagan kita sang gahum nga mahibal-an ang kinalain sang matuod sa butig, husto sa sayop, sa tunga sang makalilibog kag negatibo nga mga tingug nga nagapalibot sa aton. Gamhanan ini nga regalo!

Sa paghanda para sa una ko nga pagkadto sa templo, ang akon iloy kag mga utod sa Relief Society nagbulig sa akon nga magpili sang mga gamit nga kinahanglanon ko, lakip na ang matahom nga bayo para sa seremonya. Pero ang pinakaimportante nga pagpanghanda nag-abot antes pa man mahibal-an kon ano ang suksukon. Pagkatapos sang interbyu agud mahibal-an kon takos ako, ang akon bishop nagpaathag sang mga kasugtanan nga himuon ko. Ang iya detalyado nga paathag naghatag sa akon sang tsansa nga manumdum kag mangin handa sa paghimo sinang mga kasugtanan.

Pag-abot sang adlaw, nagpartisipar ako nga may balatyagon sang kapasalamatan kag paghidaet. Bisan pa nga wala ko maintiendihan ang bug-os nga kahulugan sang mga kasugtanan nga ginhimo ko, nahibal-an ko nga naangot ako sa Dios paagi sadtong mga kasugtanan kag ginpromisahan sang mga bugay nga haluson ko mahangpan kon tumanon ko ang mga ini. Humalin sadtong una nga eksperiyensya, dalayon ako nga napasalig nga ang pagtuman sang mga kasugtanan nga ginahimo naton sa Dios nagatugot sa aton nga gamiton ang gahum sang Manluluwas, nga nagapabakod sa aton sa indi malikawan nga mga pagtilaw, nagahatag proteksyon batok sa impluwensya sang kaaway, kag nagahanda sa aton para sa wala katapusan nga himaya.

Ang mga eksperiyensya sa kabuhi sarang maglakip sang masadya kag masubo, madulom kag mahimayaon. Ang tagsa ka eksperiyensya nagabulig sa aton nga mas mahangpan ang wala dulonan nga gugma sang aton Amay kag ang aton kapasidad nga magbag-o paagi sa regalo sang Manluluwas nga grasya. Ang pagtuman sang aton mga kasugtanan nagatugot sa gahum sang Manluluwas nga magtinlo sa aton samtang nagatuon kita paagi sa mga eksperiyensya—kon ini man gamay nga sayop ukon dako nga kapaslawan. Ang aton Manluluwas ara lang agud sal-on kita sa aton pagkahulog kon magliso kita sa Iya.

Litrato

Pag-rappel (gamit ang lubid) papanaog sa pil-as

Nakatindog na bala kamo sa mataas nga pil-as nga ang inyo mga tiil ara sa bibi kag nagatalikod kamo sa kadadalman sa idalom? Sa pag-rappel, bisan pa nakahibalo ka nga malig-on ka nga naangot sa madamo nga mabakod nga mga lubid kag mga galamiton nga makadul-ong sa imo sa kasigurohan, ang pagtindog sa bibi makakululba gihapon. Ang pag-isol halin sa bibi sang pil-as kag paghabyog sa hangin nagakinahanglan sang pagsalig sa angkla, nga natakod sing malig-on sa di-maisdog nga bagay. Nagakinahanglan ini sang pagsalig sa tawo nga magahugot sang lubid sa imo pagpanaog. Kag bisan pa ang galamiton nagahatag sa imo sang diutay nga ikasarang nga kontrolon ang imo pagpanaog, dapat may salig ka nga ang imo kaupod indi magtugot nga mahulog ka.

Litrato

Mga angkla sa pag-rappel

Litrato

Dalagita nga nagarappel sa pil-as

Klaro ko nga madumduman ang pag-rappel upod sa isa ka grupo sang mga dalagita. Ako ang pinakauna sa grupo nga magpanaog. Sang pag-atras ko halin sa pil-as, nagsugod ako nga mahulog nga wala sing kontrol. Salamat na lang, ang lubid nagpisik kag ang akon tama-kadasig nga pagkahulog nauntat. Samtang nagatunton ako sa tunga-tunga sang pil-as, hugot ako nga nagpangamuyo para sa kon sin-o ukon ano nga nagahawid nga indi ako mahulog sa mga bato.

Sang ulihi, nahibal-an ko nga indi mapag-on ang pagbutang sang salab-itan sang angkla, kag pagpanaog ko, ang tawo nga nagahugot sang lubid nawaslik pakaya kag madasig nga ginbutong pakadto sa bibi sang pil-as. Bisan paano, maabtik nga nakapanghawid ang iya tiil sa pila ka dalagko nga mga bato. Sang malig-on nga nakaplastar sa amo nga posisyon, gintinguhaan niya nga ipapanaog ako sing amat-amat, gamit ang lubid. Bisan pa nga indi ko sia makita, nakahibalo ako nga nagapangbudlay sia nga ubos-kusog agud masalbar ako. Isa pa ka abyan nga ara sa ubos sang pil-as, naghanda sa pagsalo sa akon kon ang lubid indi maghawid. Sang malab-ot na niya ako, gindakop niya ang akon harness (higot sa lawas) kag ginpapanaog ako sa duta.

Bangod si Jesucristo ang aton angkla kag perpekto nga kaupod, makasiguro kita sang Iya mapinalanggaon nga kusog sa pagtilaw kag sang kaluwasan paagi sa Iya sa ulihi. Pareho sang gintudlo ni Pangulong M. Russel Ballard: “Ang pagtuo sa Dios kag sa iya Anak, ang Ginuong Jesucristo, amo ang … angkla nga dapat ara sa aton mga kabuhi agud malig-on kita nga mapahamtang sa tinion sang kagamo kag kalainan sa sosyedad. … Ang aton pagtuo … dapat masentro kay Jesucristo, sa iya kabuhi kag iya pagbayad-sala, kag sa pagpanumbalik sang iya ebanghelyo.”²

Ang espirituhanon nga galamiton nga nagaamlig sa aton nga indi mabali sa mga bato sang pagtilaw amo ang aton panaksihon kay Jesucristo kag ang mga kasugtanan nga aton ginahimo. Makasalig kita sa sining mga suporta agud maggiya kag magdala sa aton sa kaluwasan. Bilang aton handa nga kaupod, ang Manluluwas indi magtugot nga mahulog kita sing lapaw sa Iya malab-ot. Bisan pa sa mga tinion sang aton pag-antos kag kasubo, ara Sia agud mag-alsa kag magpaisog. Ang Iya gahum nagabulig man sa aton nga maumpawan halin sa masami makahalalit nga epekto sang mga pagpili sang iban. Ugaling, ang tagsa sa aton dapat maghimo sang tanan nga kinahanglanon agud mangin takos kag makabaton sang bulig sang Manluluwas. Dapat kita magpili nga maangkla sa Manluluwas, nga maangot sa Iya paagi sa aton mga kasugtanan.³

Paano naton mapabakod inang angkla? Nagapangamuyo kita nga may mapainubuson nga tagipusuon, nagatuon kag nagapamalandong sang balaan nga mga kasulatan, nagaambit sang sakramento nga may espiritu sang paghinulsol kag pagtahod, nagatinguha nga tumanon ang mga kasugoan, kag sundon ang mga laygay sang propeta. Sa paghimo naton sang aton adlaw-adlaw nga mga buluhaton sa “mas mataas kag mas balaan”⁴ nga mga paagi, mas naangot kita sa Manluluwas kag amo man nagabulig sa iban nga magpalapit sa Iya.

Ano bala kon sayuron ang “mas mataas kag mas balaan nga paagi”? Ginatinguhaan naton nga ipangabuhi ang ebanghelyo sa tanan naton nga mga pagpakig-angot sa iban. Ginatatap naton ang mga nagakinahanglan paagi sa matuod-tuod nga pag-alagad, nga nagapabutyag sang pagpalangga paagi sa simple nga pagserbisyo. Ginapaambit naton ang maayong balita sang ebanghelyo sa mga nagakinahanglan sang paghidaet kag kusog sa ila mga kabuhi kag “wala nakahibalo kon diin ini pangitaon.”⁵ Nagahikot kita sa pag-isa sang mga pamilya buhi man kag patay. Kag para sa sinang mga nakahimo sang kasugtanan sa balay sang Ginuo, pareho sang ginpaathag ni Pangulong Russell M. Nelson, “Ang tagsa ka hamtong nga sumilimba sa templo nagasuksok sang sagrado nga garment sang priesthood, [nga] … nagapadumdum sa aton … sa paglakat sa dalan sang kasugtanan tagsa ka adlaw sa mas mataas kag mas balaan nga paagi.”⁶ Ining mga buhat indi lang panalagsa nga pagpaayaw kundi kinahanglanon sa aton adlaw-adlaw nga kalipay— kag sa aton kalipay sa wala katapusan.

Wala na sing mas importante pa para sa aton wala katapusan nga pag-uswag sangsa pagtuman sang aton kasugtanan sa Dios. Kon ang aton sagrado nga mga kasugtanan sa templo nagaepekto (tungod ginatuman naton), makasalig kita sa malipayon nga pag-updanay sa aton mga pinalangga sa pihak nga kinabuhi. Ang anak ukon ginikanan ukon tiayon nga napatay na nagalaum sa iya bug-os nga tagipusuon nga mangin tampad ka sa mga kasugtanan nga nagabugkos sa inyo sa katubtuban. Kon ginabale-wala naton ukon ginapasapayan ang aton mga kasugtanan sa Dios, ginabutang naton sa peligro inang wala katapusan nga mga kaangtanan. Subong ang tion nga maghinulsol, magkay-o, kag magtinguha liwat.

Ang kasadya indi magdugay kon ibaylo naton ang mga bugay sang wala katapusan nga kalipay para sa umalagi nga katawhay. Bisan pila ang aton edad, ina ang lubos nga kamatuoran: ang yabi sa nagadugay nga kalipay amo ang pagpangabuhi sang ebanghelyo ni Jesucristo kag pagtuman sang aton mga kasugtanan. Ang aton propeta, si Pangulong Nelson, nagpahayag nga “ang aton lubos nga kasigurohan kag ang aton lang gid nagadugay nga kalipay nagasandig sa aton pagkapyot sa barandilya nga salsalon sang ginpanumbalik nga ebanghelyo ni Jesucristo, upod sang iya sini tanan nga kasugtanan kag mga ordinansa. Kon himuon naton ini, hilway kita nga makaaagi sa tunga sang mabudlay nga mga pagtilaw tungod matigayon naton ang gahum sang Dios.”⁷

Madamo sa aton ang nagaagi sa mabudlay nga mga pagtilaw. Samtang ginabati-bati kita sang mga balod sang pagtilaw kag kon kis-a nagakabulagan sa madamo nga luha nga nagatulo sa tion sinang mga kabudlayan, mahimo nga indi kita makahibalo kon diin ibugsay ang aton mga sakayan sang kabuhi. Mahimo gani nga indi kita makapanumdum nga may kusog pa kita nga magtakas sa baybayon. Ang pagdumdum kon sin-o ka—isa ka pinalangga nga anak sang Dios—ngaa ari ka sa kalibutan, kag ang imo lalab-uton nga magkabuhi upod sa Dios kag imo mga pinalangga makapaklaro sang imo panulok kag makatudlo sa imo sa husto nga direksyon. Sa tunga sang bagyo, may nagabanaag nga kasanag nga nagapakita sang alagyan. “Ako ang kasanag nga nagasilak sa kadulom,” pahayag ni Jesus.⁸ Makasalig kita sang proteksyon kon magtulok kita sa Iya kasanag kag magpabilin nga tampad sa aton mga kasugtanan.

Nangin pribelihiyo ko nga makilala ang mga babayi sa lainlain nga pangidaron halin sa bilog nga kalibutan sa lainlain nga mga sirkumstansya nga nagatuman sang ila mga kasugtanan. Kada adlaw, nagatulok sila sa Ginuo kag sa Iya propeta para sa giya, kag indi sa media. Sa pihak sang ila tagsa ka mga hangkat kag ang makahalalit nga mga pilosopiya sang kalibutan nga nagatinguha sa pagpugong sa ila nga magtuman sang ila mga kasugtanan, determinado sila nga magpabilin sa dalan sang kasugtanan. Nagasalig sila sa promisa sang “tanan nga may ara [ang] Amay.”⁹ Kag pila man ang inyo edad, ang tagsa sa inyo nga mga babayi nga naghimo sang mga kasugtanan sa Dios may ikasarang nga ipataas ang suga sang Ginuo kag dal-on ang iban sa Iya.¹⁰ Paagi sa pagtuman sang inyo mga kasugtanan, pakamaayohon Niya kamo sang Iya gahum sang priesthood kag buligan kamo nga maimpluwensyahan sing daku ang tanan nga inyo ginapakig-angotan. Pareho sang ginsiling ni Pangulong Nelson, kamo ang mga babayi nga magatuman sang mga propesiya nga gintagna!¹¹

Pinalangga nga mga sister, labi sa tanan, magpabilin sa dalan sang kasugtanan pakadto kay Jesucristo. Nabugayan kita nga magkari sa kalibutan sa tion nga may madamo nga templo sa bilog nga kalibutan. Ang paghimo kag pagtuman sang mga kasugtanan sa templo matigayon sang tagsa ka takos nga miyembro sang Simbahan. Mga lamharon nga hamtong, indi kinahangalan nga maghulat kamo sa kasal ukon sa misyon agud himuon inang sagrado nga mga kasugtanan. Makahanda kamo bilang lamharon nga babayi sa pagbaton sang proteksyon kag kusog nga ginahatag sang mga kasugtanan sa templo pag-edad mo gid 18 kon handa ka kag luyag mo nga tahuron inang mga kasugtanan sa templo.¹² Kamo nga nakabaton na sang mga bugay sang templo, indi pagtugoti ang mga kritiko ukon mga disturbo nga magbutong sa inyo palayo sa sining wala katapusan nga mga kamatuoran. Tun-i kag magpamangkot sa sinaligan nga mga tawo para sa dugang nga paghangop sang sagrado nga kahulugan kag mga bugay sang mga kasugtanan nga imo nahimo. Magkadto sa templo pirme sa inyo masarangan kag magpamati sa Espiritu. Makabatyag kamo sing makalilipay nga pasalig nga ara kamo sa dalanon sang Ginuo. Masalapoan ninyo ang kaisog nga magpadayon kag dal-on ang iban upod sa inyo.

Nagasaksi ako nga kon ginapili naton nga maghimo sang mga kasugtanan upod sa Amay nga Langitnon kag gamiton ang gahum sang Manluluwas sa pagtuman sang mga ini, pagabugayan kita sing dugang nga kalipay sa sining kabuhi nga sobra sangsa aton subong mahunahuna kag sing mahimayaon nga kabuhi nga wala katapusan sa palaabuton.¹³ Sa ngalan ni Jesucristo, amen.