Apang Wala Namon Sila Pagsapaka
Ang mga kasugtanan kag mga ordinansa nagatudlo sa aton kag nagabulig sa aton nga dumdumon pirme ang aton koneksyon kay Ginuong Jesucristo sa aton pag-uswag sa dalan sang kasugtanan.
Ang akon asawa nga si Susan, amon tatlo ka bata nga lalaki kag ila mga asawa, tanan namon nga apo, kag si Elder Quentin L. Cook nga akon katupad sa Korum sang Dose sa halos 15 anyos, tanan sila maugyon sing maabtik nga indi ako manami magkanta. Pero bisan pa nga kulang ako sa talento sa pagkanta, nanamian ako magkanta sang mga himno sang Pagpanumbalik. Ang kombinasyon sang inspirado nga mga liriko kag matahum nga mga sonata nagabulig sa akon nga makatuon sing importante nga mga prinsipyo sang ebanghelyo kag nagainspirar sa akon.
Isa ka himno nga nagbugay sang akon kabuhi sa pinasahi nga paagi amo ang “Ang Hilikuton sang Ginuo Buhaton (Let Us All Press On).” Sang sini lang ginpamalandongan kag gintun-an ko ang isa ka linya sa koro sinang himno. “Ang Ginuo lang ang aton patihon kag indi ang mga malauton.”1
Indi naton pagsapakon.
Kon magkanta ako sang “Ang Hilikuton sang Ginuo Buhaton (Let Us All Press On),” pirme ko ginapanumdum ang mga tawo sa panan-awon ni Lehi nga nagadutdot pasulong sa banas pakadto sa kahoy sang kabuhi nga wala lang “nagakapyot”2 kundi “dalayon nga nagahawid sing hugot sa barandilya nga salsalon, tubtob nakalab-ot sila kag nakakaon sang bunga sang kahoy.”3 Ginlaragway ni Lehi ang kadam-an sa dako kag malapad nga [bilding] nga [nagapunteriya] “sang tudlo sa pag-uliga sa [iya] kag sadtong mga … nagkalaon sang bunga.”4 Ang iya sabat sa mga pagyaguta kag mga insulto manami kag halandumon: “Apang wala namon sila pagsapaka.”5
Ginapangamuyo ko nga bugayan kag pasanagan ang tagsa sa aton sang Balaan nga Espiritu samtang aton ginabinagbinag kon paano kita mapabakod nga “indi pagsapakon” ang malain nga mga impluwensya kag nagauligyat nga mga tingug sang kalibutan nga aton ginapuy-an subong.
Indi Pagsapaka
Ang tinaga nga sapakon nagakahulugan nga talupangdon ang isa ka tawo ukon isa ka butang. Gani, ang liriko sang himno nga “Ang Hilikuton sang Ginuo Buhaton (Let us All Press On)” nagalaygay sa aton nga maghimo sang malig-on nga desisyon nga indi pagpatihon “ang sunlog sang mga malauton.” Kag si Lehi kag ang kaupod niya nga mga tawo nga nagkaon sang bunga sang kahoy nagapakita sang mabakod nga ehemplo sang indi pagsapak sa mga pagyaguta kag paghikay nga pirme nagahalin sa daku kag maligwa nga bilding.
Ang doktrina ni Cristo nga nasulat “sa Espiritu sang buhi nga Dios … sa mga tapitapi nga unod sang [aton mga tagipusuon]”6 nagapadugang sang aton ikasarang nga “indi pagsapakon” ang madamo nga mga disturbo, pagyaguta, kag mga upang sa aton nahulog nga kalibutan. Halimbawa, ang pagtuo nga nakatutok kay Ginuong Jesucristo nagapabakod sa aton paagi sa espirituhanon nga kusog. Ang pagtuo sa Manunubos prinsipyo sang pag-akto kag gahum. Kon mag-akto kita suno sa mga kamatuoran sang Iya ebanghelyo, ginabugayan kita sang espirituhanon nga ikasarang nga padayon nga magsulong sa mga hangkat sang kabuhi samtang nagatutok sa mga kalipay nga ginatanyag sang Manluluwas sa aton. Matuod gid, “kon hustong buhat waay kita kasakit, kay sa Ginuo ang bulig malapit.”7
Personal nga Koneksyon paagi sa mga Kasugtanan
Ang pagsulod sa sagrado nga mga kasugtanan kag takos nga pagbaton sang mga ordinansa sang priesthood nagaangot kag nagaisa sa aton kay Ginuong Jesucristo kag sa Amay nga Langitnon.8 Nagakahulugan lang ini nga nagasalig kita sa Manluluwas bilang aton Tagsakdag9 kag Tagpatunga10 kag nagasalig sa Iya mga merito, kaluoy kag grasya11 sa pagpanglakaton sa kabuhi. Kon matutom kita sa pagkari kay Cristo kag sa pagpangabudlay upod sa Iya, mabaton naton ang nagatinlo, nagapang-ayo, kag nagapabakod nga mga bugay sang Iya wala dulonan kag wala katapusan nga Pagbayad-Sala.12
Ang pagtuman kag paghigugma sang mga pangako sa kasugtanan nagahimo sang koneksyon sa Ginuo nga tuman ka personal kag ka gamhanan sa espirituhanon. Sa aton pagtuman sang mga kondisyon sang sagrado nga mga kasugtanan kag mga ordinansa, amat-amat kag dugang kita nga nagalapit sa Iya13 kag makaeksperiyensya sang epekto sang Iya pagkadios kag buhi nga realidad sa aton mga kabuhi. Sa sina si Jesus indi lang mangin bida sa mga istorya sa balaan nga kasulatan; ang Iya ehemplo kag mga panudlo magaimpluwensya sang tagsa naton ka kagustohan, hunahuna, kag buhat.
Sa prangka lang, indi ko malaragway sing bastante ang husto gid nga kinaiya kag gahum sang aton kasugtanan-nga-koneksyon sa nabanhaw kag buhi nga Anak sang Dios. Pero nagasaksi ako nga ang mga koneksyon sa Iya kag sa Amay nga Langitnon tunay kag amo ang lubos nga ginahalinan sang pagsalig, paghidaet, kalipay, kag sang espirituhanon nga kusog nga nagabulig sa aton nga mag-“isog bisan magsunlog ang pangontra.”14 Bilang nagahimo-kasugtanan kag nagatipig-kasugtanan nga mga disipulo ni Jesucristo, sarang kita mabugayan nga magma“isog, kay Ginuo upod ta”15 kag indi pagsapakon ang malain nga mga impluwensya kag pagsunlog sang kalibutan.
Sa akon pagbisita sa mga miyembro sang Simbahan sa bilog nga kalibutan, pirme ko sila ginapamangkot: ano ang nagabulig sa inyo nga “indi pagsapakon” ang kalibutanon nga mga impluwensya, pagyaguta, kag paghikay? Ang ila mga sabat tuman gid nga makapasanag.
Ang maisog nga mga miyembro sa masami nagatalupangod sang importansya sang pag-agda sang gahum sang Balaan nga Espiritu sa ila mga kabuhi paagi sa makahulugan nga pagtuon sang balaan nga kasulatan, hugot nga pagpangamuyo, kag nagakaigo nga paghanda agud makigbahin sa ordinansa sang sakramento. Pirme man ginasambit ang espirituhanon nga suporta sang matutom nga mga miyembro sang pamilya kag sinaligan nga mga abyan, ang importante nga mga leksyon nga natun-an paagi sa pag-alagad kag pagserbisyo sa ginapanumbalik nga Simbahan sang Ginuo, kag ang kapasidad nga makita ang lubos nga kawala-pulos sang bisan ano nga halin sa daku kag maligwa nga bilding.
Nakita ko sa sining sabat sang mga miyembro ang pila ka sulundan nga labi ka importante. Una kag labi sa tanan, ining mga disipulo may malig-on nga panaksihon sa plano sang kalipay sang Amay nga Langitnon kag sang papel ni Jesucristo bilang aton Manunubos kag Manluluwas. Kag ika-duha, ang ila espirituhanon nga ihibalo kag pagpati ila gid mismo, personal, kag pat-od; indi pangkabilogan kag mabudlay hangpon. Nagapamati ako sa sining debotado nga mga tawo nga nagahambal parte sa mga kasugtanan nga nagahatag sang kusog sa paglampuwas sa oposisyon kag sang ila koneksyon sa buhi nga Ginuo nga nagasakdag sa ila sa maayo kag malain nga mga tinion. Sa sining mga tawo, si Jesucristo matuod gid nga personal nga Manluluwas.
Ang mga kasugtanan kag mga ordinansa sang ebanghelyo nagapanghikot sa aton mga kabuhi pareho sang compass. Ang compass galamiton nga nagatudlo sang panguna nga mga direksyon sang norte, sur, este kag weste para sa katuyoan sang pagpanakayon kag pagtultol sang mga lokasyon-geograpiko. Sa amo man nga paagi, ang aton mga kasugtanan kag mga ordinansa nagatudlo sa aton kag nagabulig sa aton nga dumdumon pirme ang aton koneksyon kay Ginuong Jesucristo sa aton pag-uswag sa dalan sang kasugtanan.
Ang panguna nga direksyon para sa aton tanan sa sini nga kabuhi amo ang magkari kag maperpekto kay Cristo.16 Ang balaan nga mga kasugtanan kag mga ordinansa nagabulig sa aton nga padayon nga magtutok sa Manluluwas kag magtinguha, upod ang Iya grasya,17 nga mangin mas pareho sa Iya. Piho gid, “indi makita bulig sang Gamhanan, matuod apinan.”18
Paghawid sing Hugot sa Barandilya nga Salsalon
Ang aton kasugtanan-nga-koneksyon sa Dios kag kay Jesucristo amo ang paagi nga mabaton naton ang ikasarang kag kusog nga “indi pagsapakon.” Kag ining koneksyon ginapabakod samtang padayon kita nga nagahawid sing hugot sa barandilya nga salsalon. Pero pareho sang pamangkot sang mga utod ni Nephi, “Ano ang kahulugan sang barandilya nga salsalon nga nakita sang aton amay … ?
“Kag nagsiling [si Nefi] sa ila nga ini ang pulong sang Dios; kag kon sin-o man ang magapamati sa pulong sang Dios, kag nagahawid sing hugot sa sini, indi gid sila nga mas-a mawala; ukon ang mga pagsulay kag ang nagadabdab nga mga baslay sang kasumpong indi man makadaug sa ila padulong sa pagkabulag, sa pagganoy sa ila sa kalaglagan.19
Palihog tandai nga ang ikasarang sa pagbato sa tentasyon kag sa nagadabdab nga mga baslay sang kaaway ginapromisa sa mga tawo nga “nagahawid sing hugot” kag indi lang “nagakapyot” sa pulong sang Dios.
Talalupangdon, ginlaragway ni Apostoles Juan si Jesus nga ang Pulong.20
“Sa ginsuguran amo ang Pulong, kag ang Pulong kaupod sa Dios, kag ang Pulong Dios. …
“Ang tanan nga butang ginhimo niya; kag sa wala sia walay bisan ano nga nahimo sang ginhimo. …
“Kag ang Pulong nangin unod kag nagpuyo sa tunga naton, (kag nakita naton ang iya himaya, ang himaya nga iya sang bugtong nga Anak sang Amay,) puno sang bugay kag kamatuoran.”21
Gani, isa sang mga ngalan ni Jesucristo amo “Ang Pulong.”22
Dugang pa, ang ika-walo nga artikulo sang pagtuo nagasiling, “Nagapati kami sa Biblia nga pulong sang Dios kon ini ginlubad sing husto; nagapati man kami sa Libro ni Mormon nga pulong sang Dios.”23
Gani, ang mga pinanudlo sang Manluluwas, nga nasulat sa balaan nga mga kasulatan, “ang pulong” man.
Tugoti ako magpanugyan nga ang paghawid sing hugot sa pulong sang Dios nagakinahanglan sang (1) pagdumdum, pagtahod, kag pagpabakod sang aton personal nga koneksyon sa Manluluwas kag Iya Amay paagi sa mga kasugtanan kag mga ordinansa sang ginpanumbalik nga ebanghelyo kag (2) mapinangamuyuon, seryoso, kag dalayon nga paggamit sang balaan nga mga kasulatan kag mga pinanudlo sang buhi nga mga propeta kag apostoles bilang pat-od nga ginahalinan sang ginpahayag nga kamatuoran. Kon nabugkos kita kag “nagahawid sing hugot” sa Ginuo kag ginabag-o paagi sa pagsunod sa Iya doktrina,24 ginapromisa ko nga sing isa-isa kag sing tingob, pagabugayan kita nga “[magtindog] sa balaan nga mga lugar, kag indi maisdog.”25 Kon magpabilin kita kay Cristo, dayon magapabilin Sia kag magaupod sa aton.26 Piho gid, “sa kabudlayan, Santos nya lipayon, matuod padag-on.”27
Testimonya
Padayon nga magsulong. Maghawid sing hugot. Indi pagsapakon.
Nagasaksi ako nga ang katampad sa mga kasugtanan kag mga ordinansa sang ginpanumbalik nga ebanghelyo sang Manluluwas nagabulig sa aton nga padayon nga magsulong sa buluhaton sang Ginuo, maghawid sing hugot sa Iya nga amo ang Pulong sang Dios, kag indi pagsapakon ang mga pagpangganyat sang kaaway. Sa pagpakig-away para sa husto, kabay nga ang tagsa sa aton maggamit sang espada, bisan pa ang “espada sang [kamatuoran],”28 sa sagrado nga ngalan ni Jesucristo, amen.