Indi Ka Magkahadlok: Magtuo Ka Lamang!

Ginapatungod ko ang akon inughambal karon sa mga lamharon sang Simbahan, buot silingon sa bisan sin-o nga kaedad ni Pangulong Nelson ukon mas hubin pa. Talagsa lang ako nagagamit sang talan-awon, pero indi ko mapunggan nga ipakita ini.

Litrato

Sulat halin kay Marin Arnold

Ining cri de couer naghalin sa otso-anyos ko nga abyan nga si Marin Arnold, nga iya ginsulat sang siyete-anyos sia. I-translate ko para sa inyo ang iya sinulatan nga Egyptian:

Ti, Marin, ang inughambal ko karon piho gid nga makadismaya liwat sa imo. Pero kon magsulat ka sa imo bishop para magreklamo, importante nga ihambal mo sa iya nga ang ngalan ko “Kearon. Elder Patrick Kearon.”

Sa halos duha ka tuig, isa ka pandemya nga pareho kagrabe sang sa nasulat sa biblia ang naglikop sa aton planeta, kag bisan inang salot nagpadulog sang halos tanan sa sosyal, klaro, wala sini nauntat ang pagkabrutal, kasingki, kag mapintas nga pagkaagresibo sa pulitika—sa sulod kag sa gwa sang pungsod. Kon kulang pa ina, nagapangatubang pa kita gihapon sang madugay na nga mga hangkat sosyal kag kultural, halin sa ekonomikanhon nga kapigaduhon pakadto sa pagpangguba sang palibot pakadto sa indi patas nga pagtrato sa rasa kag madamo pa.

Ining mabaskog nga unos kag madulom nga panahon mahimo nga makapaluya sa mga lamharon sa tunga naton, atong mga ginatulok naton sing may paglaum kag kapagsik para sa palaabuton sang aton mga kabuhi. Ginasiling nga “ang gahum sang mga lamharon amo ang komon nga manggad sang bilog nga kalibutan. Ang … mga lamharon … amo ang mga nawong sang aton … palaabuton.”² Dugang pa, ang aton mga kabataan amo ang mga sinaligan nga sa ila mga kamot nahamtang ang kapalaran sining Simbahan.

Sa nagakatabo sa karon, maintiendihan naton kon ang idealismo sang mga lamharon nagapalya diutay. Si Dr. Laurie Santos, isa ka propesor sang Yale University, sang sini lang naghimo sang klase nga gintawag Psychology and the Good Life [Ang Sikolohiya kag ang Maayo nga Kabuhi]. “Sa una nga tuig nga gintanyag ang klase, halos [isa sa apat] sang [bilog] nga undergraduate student body ang nag-enrol.”³ Masobra 64 milyon ka tawo dayon ang nagbisita sa iya nga podcast. Nga nagasulat parte sining butang, isa ka manunulat ang nagkomento nga kasakit tan-awon nga kadamo sa mga maalam, lamharon pa nga mga estudyante—kag mga hamtong—ang desperado nga “nagapangita sang butang nga nadula sa ila” ukon, mas malala pa, nagahandum sang bagay nga wala nila maangkon.⁴

Ang pangabay ko karon sa aton mga lamharon, kag sa inyo nga mga ginikanan kag mga hamtong nga nagalaygay sa ila, sugdi ang inyo pagpangita sang kalipayan paagi sa pagbaton sang bugay nga nabaton na naton halin sa manughatag sang tanan nga maayo nga bugay.⁵ Kag mismo sa tion nga madamo sa kalibutan ang nagapamangkot sang madalom nga palamangkutanon sang kalag, dapat kita nga magsabat gamit ang “maayong balita”⁶ sang ebanghelyo ni Jesucristo. Ang Simbahan ni Jesucristo sang mga Santos sa Ulihing mga Adlaw, nga nagawagayway sang misyon kag mensahe sang Manluluwas sang kalibutan, nagatanyag sang pinakaepektibo nga pamaagi sa wala katapusan sa pagpangita sang maayo kag paghimo sang kaayuhan sa amo sini kakinahanglanon nga tiyempo.

Si Pangulong Russell M. Nelson nagsiling nga ining henerasyon sang mga lamharon may kapasidad nga “magtuga sang mas dako nga epekto [para sa kaayuhan] sa kalibutan sangsa nagliligad nga henerasyon.”⁷ Kita, sa tanan nga katawhan, dapat “[naga]kanta sang ambahanon sang nagatubos nga gugma,”⁸ pero nagakinahanglan ina sang disiplina—“pagkadisipulo,” kon isiling ta—inang klase nga nagabantay batok sa negatibo nga mga pamatasan kag makaguba nga mga kagawian nga nagapapalayo sa aton samtang ginatinguhaan naton nga ipakita ang kalipay sang wala katapusan nga kaluwasan.

Bisan pa nga nagatiner kita “sa mas masanag nga parte sang dalanon,”⁹ makasugata gid kita palanagsa sinang tawo nga determinado sa pagpangita sang madulom kag negatibo sa bisan ano nga butang. Nakahibalo kamo sang iya prinsipyo: “Pinakamadulom ang antes gid sang mangito-ngito nga kadulom.” Kalain nga panan-awon, kag daw ano ka miserable nga pangabuhi! Huo, kon kaisa gusto naton nga magpalagyo sa kon diin kita, pero indi kita dapat magpalagyo sa kon sin-o kita—mga anak sang buhi nga Dios nga nagapalangga sa aton, nga pirme handa sa pagpatawad sa aton, kag indi gid, bisan san-o magsikway sa aton. Kamo ang Iya pinakabilidhon nga manggad. Ikaw Iya anak, nga Iya ginhatagan sang mga propeta kag mga promisa, espirituhanon nga mga dulot kag rebelasyon, mga milagro kag mga mensahe, kag mga anghel sa magtimbang nga bahin sang kabuhi.¹⁰

Ginhatagan man Niya kamo sang simbahan nga nagapabakod sang mga pamilya sa duta kag nagabugkos sang mga ini sa wala katapusan. Nagahatag ini sang masobra 31,000 ka mga ward kag branch kon sa diin ang mga tawo nagatipon kag nagakanta kag nagapuasa kag nagapangamuyo para sa kada isa kag nagahatag sang ila masarangan sa mga pigado. Diri ang tagsa ka tawo may ngalan, ginaisip, kag ginaministeran kag kon diin ang mga abyan kag mga kasilingan boluntaryo nga nagaserbisyo sa kada isa sa mga calling halin sa pagka-klerk pakadto sa pagpaninlo. Ang mga lamharon nga hamtong—kag may-edad man nga mga mag-asawa—linibo nga nagaserbisyo sa misyon nga ila mismo gasto kag indi makapili kon diin sila magaalagad, kag ang mga miyembro bata kag tigulang nagalakat sa mga templo sa paghikot sang sagrado nga mga ordinansa nga kinahanglanon para bugkuson ang tawhanon nga pamilya—isa ka maisog nga buluhaton sa nagabinahin-bahin nga kalibutan pero butang nga nagasiling nga ang ini nga pagbinahin-bahin temporaryo lamang. Pila lang ini sa mga rason nga ginahatag naton sa “paglaum nga yara sa [aton].”¹¹

Siyempre, sa aton panahon karon, mabudlay kaayo nga mga isyu ang nagaatubang sa bisan sin-o nga disipulo ni Jesucristo. Ang mga lider sining Iya Simbahan nagahatag sang ila mismo mga kabuhi sa pagpangita sang giya sang Ginuo sa pagsolbar sining mga hangkat. Kon ang iban sini indi maresolbar sa ikalipay sang tanan, siguro bahin ini sang krus nga siling ni Jesus dapat naton pas-anon para magsunod sa Iya.¹² Mismo tungod kay may madulom nga inadlaw kag mabudlay nga mga isyu, nagpromisa ang Dios nga Sia, halin sa panganod sa adlaw kag sa haligi sang kalayo sa gab-i, magagiya sa mga propeta, magahatag sang salsalon nga barandilya, magabukas sang makitid nga pwertahan padulong sa masipot nga banas, kag labaw sa tanan magahatag sa aton sang gahum para matapos ang tulumanon.¹³

Gani palihog, palihog, magtiner kamo para sa bilog nga sinalo-salo bisan pa nga indi kamo sigurado sa broccoli. Magpaidalom sa Iya kasanag kag ipahulam ang inyo kandila para sa kawsa.¹⁴ Husto ang ginasiling sa Primary: Si Jesus matuod gid “[gusto nga kamo] mangin silak sang adlaw.”¹⁵

Sang ang Judio nga lider nga si Jairo nagpakitluoy kay Jesus nga paayuhon ang iya 12-anyos nga bata nga babayi nga tagumatayon sa ila balay, ang nagapalibot nga mga tawo nagpaatrasar sa Manluluwas nga sang ulihi isa ka suluguon ang nag-abot kag nagsiling sa nagakabalaka nga amay, “Ang imo anak nga babayi patay na; indi na lang pagtublaga ang Manunudlo.”

“Apang si Jesus sang nakabati sini, nagsabat sa iya, “Indi ka magkahadlok; magtuo ka lamang, kag magaayo sia.”¹⁶

Kag nag-ayo sia. Kag amo man kamo. “Indi ka magkahadlok: magtuo ka lamang.”

Tungod ang kada isa sa inyo diri malahalon sa Dios kag sa sining Simbahan, itakop ko ini upod ang espesyal nga deklarasyon sang isa ka apostoles. Antes pa ninyo mabaton ang dulot sang Balaan nga Espiritu, may Kasanag ni Cristo nga gintanom sa inyo kalag,¹⁷ inang “kasanag nga yara sa tanan nga butang, … nagahatag kabuhi sa tanan nga butang,”¹⁸ kag amo ang impluwensya para sa kaayuhan sa mga tagipusuon sang tanan nga tawo nga nagkabuhi ukon magakabuhi pa. Ina nga kasanag ginhatag para amligan kamo kag protektahan kamo. Isa sa sentro sini nga mga mensahe amo nga ang kabuhi pinakabilidhon sa tanan nga mga regalo, regalo nga mabaton lamang sa wala katapusan paagi sa Pagbayad-Sala sang Ginuong Jesucristo. Bilang Kasanag kag Kabuhi sang Kalibutan,¹⁹ ang Bugtong nga Anak sang Dios nagkari para hatagan kita sang kabuhi paagi sa paglampuwas sang kamatayon.

Kinahanglan naton ipangako sing lubos ang aton mga kaugalingon sa regalo sa sinang kabuhi kag maghingagaw sa pagbulig sadtong mga ara sa katalagman nga buy-an ining sagrado nga regalo. Mga lider, mga manuglaygay, mga abyan, pamilya—bantayi ang mga senyales sang depresyon, kasubo, ukon bisan ano nga nagapatimaan sang paghalit-sa-kaugalingon. Magtanyag sang imo bulig. Magpamati. Magpatunga kon kinahanglanon.

Sa bisan sin-o sa aton mga lamharon dira nga ginabudlayan, kon ano man ang inyo mga palaligban ukon kabudlayan, ang kamatayon paagi sa paghikog maathag gid nga indisolusyon. Indi sini mabuhinan ang kasakit nga inyo ginabatyag ukon sa pamatyag ninyo inyo ginatuga. Sa kalibutan nga desperado sa kasanag nga kinahanglanon sini, palihog indi pagpagamaya ang wala katapusan nga kasanag nga ginbutang sang Dios sa inyo kalag antes gintuga ining kalibutan. Makighambal sa isa ka tawo. Magpangayo sang bulig. Indi paggub-a ang kabuhi nga ginhalaran ni Cristo sang Iya kabuhi agud luwason. Masarangan ninyo ang mga kabudlayan sining mortal nga kabuhi tungod buligan namon kamo nga madala ini. Mas mabaskog kamo sangsa ginahunahuna ninyo. Ang bulig sarang maangkon, halin sa iban kag labi sa tanan halin sa Dios. Ginapalangga ka kag ginahatagan bili kag ginakinahanglan. Kinahanglan namon kamo! “Indi ka magkahadlok: magtuo ka lamang.”

Isa ka tawo nga nagpangatubang sang mga sirkumstansya nga mas masobra pa sa atubangon ninyo kag nakon ang sadto nagsiling: “Mag-abante [pinalangga kong mga lamharon nga kaabyanan]. Kaisog, … kag abante, abante sa kadalag-an!” Papangalipaya ang inyo mga tagipusuon, kag mangin tuman kamasinadyahon.”²⁰ Madamo kaayo kita sang dapat ikalipay. Ara ang kada isa sa aton, kag ara Sia. Indi pag-idingot sa amon ang tsansa nga makaupod kamo, ang akon ginapangabay, sa sagrado kag balaan nga ngalan ni Ginuong Jesucristo, ang aton Manunudlo, amen.