Mapag-on sa tunga sang mga Unos

Pinalangga kong mga kauturan, ginbugayan kita sini nga adlaw nga makabati sa inspirado nga mga alagad sang Dios nga maghatag laygay kag pagpaisog. Ang kada isa sa aton, kon diin man kita, nakahibalo nga nagapuyo kita sa nagalala sa kadelikado nga panahon. Ang akon ginapangamuyo nga kabay makabulig ini sa inyo nga magtindog nga mabakod sa tunga sang mga unos nga aton ginaatubang, nga may paghidaet sa tagipusuon.¹

Ang una nga dapat himuon amo ang dumdumon nga ang kada isa sa aton pinalangga nga anak sang Dios kag may inspirado Sia nga mga alagad. Inang mga alagad sang Dios nakakita sang panahon sa diin nagakabuhi kita subong. Si Apostoles Pablo nagsulat kay Timoteo, “Apang hangpa ini, nga sa katapusan nga mga adlaw magaabot ang makahalanguyos nga mga tion.”²

Ang bisan sin-o nga may mata para makita ang mga patimaan sang panahon kag may dulunggan para mabatian ang mga pulong sang mga propeta nakahibalo nga matuod ini. Ang mga peligro sang pinakadako nga katalagman nagaabot sa aton halin sa mga pwersa sang kalainan. Ina nga mga pwersa nagasige dako. Kag gani mangin mas mabudlay, indi mas mahapos, ang pagtahod sa mga kasugtanan nga kinahanglan naton himuon kag tumanon para ipangabuhi ang ebanghelyo ni Jesucristo.

Sa aton nga nagakabalaka para sa aton kaugalingon kag sa mga pinalangga naton, may paglaum sa promisa nga ginhimo sang Dios parte sa lugar nga hilway sa katalagman sa tunga sang mga unos.

Ari ang tinaga nga nagalaragway sinang lugar. Sulit-sulit ini nga ginalaragway sang buhi nga mga propeta. Halimbawa, sa nasulat sa Libro ni Mormon, isa ka inspirado kag mapinalanggaon nga amay ang naghambal sa iya mga anak nga lalaki kon paano nila pabakuron ang ila mga kaugalingon agud magpadayon nga mabakod sa mga unos sa ila atubang: “Kag karon, mga anak ko, dumduma, dumduma nga sa bato sang aton Manunubos, nga amo si Cristo, ang Anak sang Dios, nga kamo kinahanglan gid nga magpasad sang inyo sadsaran; agud kon ang yawa magapadala sang iya mamadlos nga mga hangin, huo, sang iya mga baslay sa buhawi, huo, kon ang tanan niya nga bato nga hielo kag ang iya mabaskog nga dalimuos magatupa sa inyo, mangin wala ini sing gahum sa pagpangibabaw sa inyo sa pagguyod sa inyo paidalom sa kadadalman sang kapiutan kag nagapadayon nga kasubo, tungod sang bato nga sa diin kamo napasad, nga amo ang isa ka pat-od nga sadsaran, … nga kon diin ang mga tawo magapasad indi sila mahulog.”²

Ang kapiutan kag nagapadayon nga kasubo nga iya ginasiling amo ang masakit nga mga epekto sang kasal-anan kon indi naton ini lubos nga mahinulsulan. Ang nagadamo nga mga unos amo ang mga tentasyon kag ang nagadugang nga mga pagpang-atake ni Satanas. Wala na sing mas importante pa sangsa karon nga intiendihon kon paano magpasad sa sinang sigurado nga pundasyon. Para sa akon wala na sang mas maayo nga lugar nga magpangita sangsa sa katapusan nga wali ni Haring Benjamin, nga nasulat man sa Libro ni Mormon.

Ang mapanagnaon nga mga pulong ni Haring Benjamin magamit naton sa aton panahon. Nahibal-an niya sa iya mismo nga eksperiyensya ang halit sang giyera. Gindepensahan niya ang iya katawhan sa giyera, nga nagasalig sa gahum sang Dios. Maathag niya nga nakita ang makahaladlok nga gahum ni Lucifer sa pagtentar, sa pagtinguha nga pirdehon, kag paluyahon ang mga anak sang Dios.

Gin-agda niya ang iya katawhan kag kita nga magpasad sa solo nga bato sang kahilwayan (sa katalagman), nga amo ang Manluluwas. Ginklaro niya nga libre kita nga magpili sa tunga sang husto kag sayop kag nga indi naton malikawan ang mga konsikwensya sang aton mga pagpili. Maathag kag maisog sia nga naghambal tungod nakahibalo sia kon ano nga kasubo ang magaabot sa mga indi magpamati kag magpati sa iya mga paandam.

Ari ang iya paglaragway sa mga konsikwensya nga nagasunod sa aton pagpili nga sundon ang mga pagpabatyag sang Espiritu ukon sa pagsunod sang malain nga mga mensahe nga halin kay Satanas, nga ang tuyo amo ang tentaron kag gub-on kita:

“Kay yari karon, may isa ka kasulub-on nga ginpamatbat sa iya nga magapili sa pagtuman sinang [malain] nga espiritu; kay kon sia magapili sa pagtuman sa iya, kag magapabilin kag mamatay sa iya mga sala, ang amo man magainom sang paghukom sa iya kaugalingon nga kalag; kay magabaton sia para sa iya mga suhol sang isa ka silot nga dayon, sanglit nakalapas sang layi sang Dios nga batok sa iya kaugalingon nga ihibalo. …

Gani kon ina nga tawo indi maghinulsol, kag magapabilin kag mamatay nga isa ka kaaway sang Dios, ang mga ginapangayo sang diosnon nga hustisya nagapukaw sang iya wala’y kamatayon nga kalag sa isa ka buhi nga igbalatyag sang iya kaugalingon nga kabasulanan, nga amo ang tunaan nga magapalangupos sia sa atubang sang Ginuo, kag magapuno sang iya dughan sang kabasulanan, kag kahapdi, kag kasakit, nga subong sang kalayo nga di-mapalong, nga ang iya dabdab nagatub-ok paibabaw sa gihapon kag sa gihapon.”

Si Haring Benjamin nagpadayon sa pagsiling, “O, tanan kamong tigulang nga mga lalaki, kag kamo man nga mga pamatan-on, kag kamong magagmay nga mga kabataan nga makahangop sang akon mga pulong, kay naghambal ako sing maathag sa inyo agud nga inyo mahangpan, ginapangamuyo ko nga magbugtaw kamo sa isa ka panumduman sang makahaladlok nga kahimtangan sadtong mga nagkalahulog sa kalapasan.”³

Para sa akon, ang gahum sinang paandam nga maghinulsol nagaporma sa akon hunahuna sang laragway sang piho gid nga tion nga ikaw kag ako magatindog sa atubang sang Manluluwas pagkatapos sining kabuhi. Handum gid sang aton tagipusuon nga indi magpalangupos kundi magtulok sa Iya, nga makita Sia nga nagayuhum, kag mabatian Sia nga nagasiling, “Maayo gid, ulipon nga maayo kag matutom: … sulod [ka].”⁵

Gin-athag ni Haring Benjamin kon paano naton mabaton ang paglaum nga mabatian inang mga tinaga kon pangitaon naton ang paagi sa sining kabuhi nga mabag-o ang aton mga kinaiya paagi sa Pagbayad-Sala ni Jesucristo. Ina lang gid ang paagi nga makapasad kita sa sigurado nga pundasyon kag magtindog nga mabakod sa tion sang mga unos sang pagsulay kag mga pagtilaw sa aton atubang. Ginlaragway ni Haring Benjamin ina nga pagbag-o sang aton mga kinaugali sa isa ka matahum nga paanggid nga padayon nga nagatandog sa akon tagipusuon. Gingamit ini sang mga propeta sa sulod sang milenya kag sang Ginuo Mismo. Amo ini: kinahanglan naton nga mangin pareho sang bata—gamay nga bata.

Para sa iban, indi ina mahapos batunon. Kalabanan sa aton gusto nga mangin mabaskog. Mahimo nga ang panulok naton sa pagmangin pareho sang bata amo ang mangin mahuyang. Kalabanan sang mga gininakan nagahulat sang panahon nga ang ila kabataan wala na nagabinata-bata. Pero si Haring Benjamin, nga nakaintiendi pareho sa bisan sin-o nga mortal kon ano ang kahulugan sang mangin tawo sang kusog kag kaisog, nagaathag nga ang mangin pareho sang bata indi ang mangin bata-bata. Ini ang mangin pareho sang Manluluwas, nga nangamuyo sa Iya Amay para sa kusog agud mahimo ang pagbuot sang Iya Amay kag bayaran ang mga sala sang tanan nga mga anak sang Iya Amay kag dayon ginhimo ini. Ang aton mga kinaugali kinahanglan nga mabag-o pareho sang iya sang bata para mabaton ang kusog nga kinahanglan naton para magtindog nga mabakod kag may kalinong sa tinion sang peligro.

Ari ang makatalandog nga paglaragway ni Haring Benjamin kon paano nagaabot inang pagbag-o: “Kay ang kinaugali nga tawo isa ka kaaway sang Dios, kag nangin amo na gikan sa pagkapukan ni Adan, kag mangin amo sini, sa gihapon kag sa gihapon, luwas nga magaampo sia sa mga pagpangganyat sang Espiritu nga Balaan, kag ubahon ang kinaugali nga tawo kag mangin isa ka santos paagi sa pagpasag-uli ni Cristo nga Ginuo, kag mangin subong sang isa ka bata, nga masinulundon, mapailubon, mapainubuson, mapainumuron, puno sang gugma, handa sa pagsunod sa tanan nga mga butang nga ginatan-aw sang Ginuo nga nagakabagay nga ipatuman sa iya, bisan subong sang isa ka bata nga nagasunod sa iya amay.”⁶

Mabaton naton inang pagbag-o samtang nagahimo kita kag nagapabakod sang aton mga kasugtanan upod sa Dios. Ginadala sina ang gahum sang Pagbayad-Sala ni Cristo agud tugotan ang pagliwat sa aton mga tagipusuon. Mabatyagan naton ini tagsa nga mag-ambit kita sang sakramento, maghikot sang ordinansa sa templo para sa nagtaliwan nga himata, magpamatuod bilang saksi sang Manluluwas, ukon mag-atipan sang nagakinahanglan bilang disipulo ni Cristo.

Sa sinang mga eksperiyensya, sa kadugayan kita mangin pareho sang bata sa aton kapasidad nga magpalangga kag magtuman. Magatindog kita sa sigurado nga pundasyon. Ang aton pagtuo kay Jesucristo magagiya sa aton sa paghinulsol kag sa pagtuman sang Iya mga kasuguan. Magatuman kita, kag makaagom kita sang gahum nga pakigbatuan ang tentasyon, kag mabaton naton ang ginpromisa nga pagpakig-upod sang Balaan nga Espiritu.

Ang aton mga kinaugali magaliwat kag mangin pareho sang gamay nga bata, masinulundon sa Dios kag mas mapinalanggaon. Ina nga pagbag-o magatugot sa aton nga mabaton ang mga dulot nga nagaabot paagi sa Balaan nga Espiritu. Ang pagpakig-upod sang Espiritu magapaumpaw, magagiya, kag magapabakod sa aton.

Nahibal-an ko ang pila sang buot silingon ni Haring Benjamin sang sia magsiling nga pwede kita mangin pareho sang gamay nga bata sa atubang sang Dios. Natun-an ko sa madamo nga inagihan nga ang Balaan nga Espiritu masami nagahambal sa malinong nga tingug, nga mas mabatian dayon kon ang tagipusuon sang tawo mapailubon kag mapainubuson, pareho sang iya sang bata. Ang matuod, ang epektibo nga pangamuyo amo ang nagasiling “Handum ko lamang ang Imo gusto. Isiling lang sa akon kon ano ina. Himuon ko ina.”

Kon mag-abot ang mga unos sang kabuhi, sarang kamo nga mangin mabakod tungod nagatindog kamo sa bato sang inyo pagtuo kay Jesucristo. Ina nga pagtuo magadala sa inyo sa paghinulsol adlaw-adlaw kag sige-sige nga pagtuman sang mga kasugtanan. Dayon dalayon ninyo Sia nga madumduman. Kag sa tunga sang mga unos sang pagdumot kag kalainan, makabatyag kamo nga mabakod kag puno sang paglaum.

Labaw pa dira, makita ninyo ang inyo kaugalingon nga nagalab-ot sa pag-alsa sa iban nga mangin hilway sa katalagman sa ibabaw sang bato upod ninyo. Ang pagtuo kay Jesucristo pirme nagadala sang mas dako nga paglaum kag sang balatyagon sang gugma sa iban, nga amo ang matuod nga gugma ni Cristo.

Nagapamatuod ako sa inyo nga ang Ginuong Jesucristo naghatag sa inyo sang imbitasyon nga “Magpalapit sa akon.”⁷ Ginaagda Niya kamo, tungod sang Iya gugma para sa inyo kag sa inyo mga pinalangga, nga magpalapit sa Iya para sa kalinong sa sining kabuhi kag kabuhi nga walay katapusan sa kalibutan nga magaabot. Nahibal-an gid niya ang mga unos nga inyo atubangon sa inyo pagtilaw bilang bahin sang plano sang kalipayan.

Ginapangabay ko kamo nga batunon ang imbitasyon sang Manluluwas. Pareho sang mapailubon kag mapinalanggaon nga bata, batuna ang Iya bulig. Maghimo kag tumana ang mga kasugtanan nga Iya ginatanyag sa Ang Simbahan ni Jesucristo sang mga Santos sa Ulihing mga Adlaw. Pabakuron kamo sang mga ini. Nahibal-an sang Manluluwas ang mga unos kag ang mga lugar nga hilway sa katalagman sa dalanon pabalik sa Iya kag sa aton Amay nga Langitnon. Nahibal-an Niya ang dalan. Sia ang Dalan. Nagasaksi ako sini sa sagrado nga ngalan ni Jesucristo, amen.