Nagagana bala ang Plano?

Nagagana bala ang plano?

Sang sini lang, nakasugilanon ako sa isa ka young adult nga nagserbe sa mission pila na katuig ang nagligad kag subong nagaobra na. Sa pila ka bagay, maayo ang lakat sang iya pangabuhi. Apang ang iya pagtuo nagaluya. Nagadalom ang iya pagpangduhaduha parte sa Manluluwas kag sa Iya Simbahan. Nagpaathag sia nga wala niya nabaton ang mga bugay nga ginpaabot niya halin sa ginpanumbalik nga ebanghelyo. Wala sia nakabatyag nga ang plano sang kalipayan nagagana sa iya kabuhi.

Ang akon mensahe subong para sa tanan nga may kaanggid nga mga balatyagon. Nagahambal ako sa ila nga sadto anay “nakabatyag sang huyog nga mag-amba sang ambahanon sang nagatubos nga gugma” pero wala na “mabatyagan ang subong karon.”¹

Ang aton Amay nga Langitnon naghanda sang plano para sa aton wala katapusan nga kalipay. Pero kon ang kabuhi wala nagauswag sa paagi nga ginalauman naton, mahimo nga dawsa wala nagagana ang plano.

Ayhan nagabatyag kita kon kis-a sing pareho sang ginbatyag sang mga disipulo ni Jesus sang ara sila sa sakayan “sa tunga sang linaw nga ginabulobalinsay sang mga balod, tungod kay sumpong ang hangin.”²

Dayon, sang kaagahon:

“si Jesus nag-apas sa ila, nga nagalakat sa ibabaw sang tubig.

“Kag sang makita nila sia nga nagalakat sa ibabaw sang tubig, kinulbaan gid sila, …. kag nagsinggit sila sa kahadlok.

“Sa gilayon si Jesus nagsiling sa ila, “Magpakaisog kamo! Ako ini. Indi kamo magkahadlok.

“Dayon si Pedro nagsiling, Ginuo, kon ikaw gid ina, pakadtua ako sa imo nga nagalakat sa ibabaw sang tubig.

“[Kag] nagsabat [Sia], Dali diri. [Kag] nagpanaog si Pedro sa sakayan, kag naglakat [sia] sa ibabaw sang tubig pakadto kay Jesus.

“Pero sang matalupangdan niya nga mabaskog ang hangin, hinadlukan sia kag nag-amat-amat sia lugdang sa tubig. Nagsinggit sia, “Ginoo,… tabangi ako.

“Sa gilayon gindawhat sia ni Jesus kag gin-uyatan nga nagasiling, “kadiutay sang imo pagtuo, ngaa bala nagpangduhaduha ka?”³

Pwede bala ako magpaambit sa inyo sing tatlo kag prinsipyo nga natun-an ko kay Pedro? Ginapangamuyo ko nga ining mga prinsipyo makabulig sa bisan sin-o nga nagabatyag nga ang plano sang kalipayan wala nagagana sa ila mga kabuhi.

Una, mag-akto nga may pagtuo kay Jesucristo.

Nagadayaw ako sa pagtuo ni Pedro. Sa simple nga imbitasyon ni Jesus nga “dali,” ginbiyaan niya ang iya ginabulubalinsay nga sakayan. Daw nakahibalo sia nga kon si Jesucristo nag-agda sa iya nga maghimo sang isa ka butang—mahimo niya ini.⁴ Si Pedro nagsalig sa Manluluwas labaw sangsa nagsalig sia sa iya sakayan. Kag inang pagtuo naghatag sa iya sang kusog sa pag-akto nga may kaisog sa tion sang mabudlay, makahaladlok nga sitwasyon.

Ang pagtuo ni Pedro nagapahanumdum sa akon sang eksperiyensya nga ginsugid ni Elder José L. Alonso. Wala madugay matapos nga napatay ang bata nga lalaki ni Elder Alonso, nga may ginbilin nga magagmay nga kabataan, nabatian ni Elder Alonso ang kabataan nga nagasugilanon.

“Ano ang aton himuon?” pamangkot nila.

Ang siyam katuig nga bata nga babayi nagsabat, “Ok lang si Daddy. Nagawali sia sang ebanghelyo ni Jesucristo.”

Pareho kay Pedro, ining gamay nga bata nakakita sing lapaw sa iya mga hangkat kag nagsalig kay Jesucristo kag sa Iya Pagbayad-Sala. Ang pagtuo sa Manluluwas nagadala sang paghidaet kag kabakod nga magpadayon.

Kon balikdon ninyo ang inyo ekskperiyensya, nagapati ako nga makita ninyo nga naggamit kamo sang pagtuo sa madamo nga beses. Ang pagbuylog sa Simbahan buhat sang pagtuo. Ang pagpakighambal sa Amay nga Langitnon sa pangamuyo buhat sang pagtuo. Ang pagbasa sang balaan nga mga kasulatan buhat sang pagtuo. Ang pagpamati sa akon mensahe sa sining pangkabilogan nga komperensya isa ka buhat sang pagtuo. Suno sa ginhambal ni Pangulong Russell M. Nelson, “Indi pagbuhini ang pagtuo nga imo na naangkon.”⁵

Isa pa gid ka leksyon nga natun-an ko kay Pedro amo ini:

Sa tion sang problema, magliso gilayon kay Jesucristo.

Sa iya paglakat pakadto sa Manluluwas, si Pedro ginhadlokan sa hangin, kag nagsugod sa paglugdang. Pero sang narealisar niya ang nagakatabo, wala sia nagtinguha nga magkapakapa sa tubig nga sia lang ukon maglangoy pabalik sa sakayan. Imbis nga magbuya sa iya pagtuo kay Cristo, nagkapyot sia sing mas hugot nga nagasinggit “Ginuo, luwasa ako.”

“[Kag] sa gilayon gindawhat sia ni Jesus kag gin-uyatan.”⁶

Tanan kita nagapangatubang sang mabaskog nga mga hangin nga makauyog sang aton pagtuo kag makapalugdang sa aton. Kon matabo ini, palihog dumduma nga ang plano sang kalipayan sang Amay nga Langitnon may isa pa gid ka ngalan—ang plano sang pagtubos. Ang plano indi para mahapos lang kita nga magdalhay sa kabuhi, nga wala nagakasandad, wala nagalugdang, nga may yuhum pirme sa aton mga guya. Nahibal-an sang Amay nga Langitnon nga kinahanglanon naton nga matubos. Ini ang rason nga ginhanda Niya ang plano sang pagtubos.⁷ Ini ang rason nga nagpadala Sia sang Manunubos. Kon ginabudlayan kita—sa bisan ano nga rason—wala ina nagakahulugan nga ang plano wala nagagana. Ina ang tion nga pinakakinahanglan naton ang plano!

Sa sinang tinion, sunda ang ehemplo ni Pedro. Magliso gilayon sa Manluluwas.

“Karon amo ang tion kag ang adlaw sang inyo kaluwasan. … Indi ninyo pagpabuyan-buyanan ang adlaw sang inyo paghinulsol.”⁸

Bisan ano ang aton sitwasyon sa karon ukon mga nahimo sang nagliligad, ang paghinulsol amo ang paagi nga mag-uswag. Si Pangulong Nelson nagtudlo:

“Wala na sing labi pa nga makahilway, makapadungog, ukon labi pa kaimportante sa aton indibidwal nga pag-uswag sangsa tayuyon, adlaw-adlaw nga pagtutok sa paghinulsol. …

“Kon bala kamo maukod nga nagapadayon sa banas sang kasugtanan, nagbiya sa banas sang kasugtanan, ukon indi makakita sang banas sa inyo subong ginatindogan, nagapangabay ako sa inyo nga maghinulsol. Batyaga ang nagapabakod nga gahum sang adlaw-adlaw nga paghinulsol—sa paghimo kag pagmangin mas maayo sa kada adlaw.”⁹

Ang pagkari kay Cristo nagakahulugan sing masobra pa sangsa pagpanumdum sa Iya ukon pag-istorya parte sa Iya ukon bisan pa gani pagpalangga sa Iya. Nagakahulugan ini sang pagsunod sa Iya. Nagakahulugan ini sang pagpangabuhi sa paagi nga ginatudloan Niya kita nga magpangabuhi. Kag para sa aton tanan, nagakahulugan ini sang paghinulsol gilayon.

Isa sang akon mga bata nga babayi sadto nag-obra sa missionary training center. Ginsugiran niya ako parte sa elder nga iya gintudloan nga nagsiling sa iya nga indi sia sigurado kon ang Libro ni Mormon matuod. Sige-sige and iya pangamuyo para sa esprituhanon nga saksi, pero wala sia nakabaton sang sabat.

Ang akon bata nagpangamuyo nga makahibalo kon ano ang iya himuon agud mabuligan ining misyonero. Ang pagpabatyag nga iya nabaton amo nga ang balaan nga mga kasulatan wala ginhatag para lang nga mabasa naton ang mga ini kag mag-angkon sang panaksihon; ginhatag sila agud tudloan man kita sa pagtuman sang mga kasugoan sang Dios. Ginpaambit sang akon bata ining panghunahuna sa misyonero.

Sang ulihi, nakita niya liwat ining misyonero, nga mas malipayon tan-awon. Ginsugiran niya sia nga nakabaton na gid man sia sang panaksihon nga ang Libro ni Mormon matuod. Nakahibalo sia nga ining panaksihon nag-abot tungod nga naghimo sia sing mas daku nga pagtinguha nga himuon ang ginatudlo sang Libro ni Mormon.

Sundon naton ang ehemplo ni Pedro sa pagliso sa Manluluwas sa mga tinion sang problema. Sunda si Cristo imbes nga magsalig sa inyo kaugalingon nga kaalam kag kusog. Bisan ano na kalawig nga nagtinguha kamo sa pagkapakapa sa tubig nga wala Sia, indi pa gid ulihi ang tanan agud magdab-ot sa Iya. Ang plano nagagana!

Ang ika-tatlo nga prinsipyo nga natun-an ko halin kay Pedro kag sa eksperiyensya niya amo ini:

Ipaubos ang inyo kaugalingon sa Ginuo kag buligan Niya kamo nga makahimo kag makatigayon sing mas dalagko nga mga butang.

Si Pedro nagpakita sang pagtuo, pareho sa paglakat sa tubig kag sa pagdab-ot sa Manluluwas sang kinahanglanon niya ang bulig. Bisan pa, nakita sang Manluluwas kay Pedro ang potensyal para sa mas labaw pa. “Kadiutay sang imo pagtuo,” siling Niya, “ngaa bala nagpangduhaduha ka?”¹⁰

Mahimo kuntani nga masaklaw si Pedro sa sining pagsaway. Pero ginbaton niya ini sing mapainubuson. Padayon niya nga gintinguhaan ang mas daku nga pagtuo kay Jesucristo. Paagi sa madamo nga dugang nga nagapabakod-pagtuo nga mga eksperiyensya—ang pila sang mga ini tuman kaayo kabudlay—si Pedro sang ulihi nangin ang mabakod nga lider nga luyag sang Ginuo nga mangin sia. Nakahimo sia sang dalagko nga mga butang sa pag-alagad sa Ginuo.

Ano ang dalagko nga mga buluhaton nga gusto ipahimo sang Ginuo sa inyo? Sa Iya Simbahan kag ginharian, may madamo nga mga oportunidad sa pagserbe kag pag-alagad sa iban pareho sang ginhimo sang Manluluwas. Luyag niya kamo nga mangin kabahin sang Iya daku nga buluhaton. Ang plano sang kalipayan mangin mas matuod sa inyo kon ginabuligan ninyo ang iban nga ipangabuhi ini.

Sa pagpatubo sang akon kaugalingon nga pagtuo, ining mga pulong ni Alma nangin makapabag-o kabuhi: “Bulahan sila nga nagapaubos sang ila mga kaugalingon nga wala na ginapilit nga mangin mapainubuson.”¹¹ Mapainubuson naton nga ibutang ang aton mga kaugalingon sa lugar nga si Jesus makaalsa sa aton, makagiya sa aton, kag makahimo sang aton mga ikasarang nga pinakamapuslanon.¹²

Nagasaksi ako nga ang plano sang kalipayan nagagana. Gintuga ini sang inyo Amay nga Langitnon, nga nagapalangga sa inyo. Nagagana ini tungod nalampuwasan ni Jesucristo ang sala kag kamatayon paagi sa Iya Pagbayad-Sala. Magkari sa Iya, sunda Sia, kag “sa gilayon ang daku nga plano sang pagtubos mapahanabo sa inyo.”¹³ Sa ngalan ni Jesucristo, amen.