“Nian Himuon Ko ang Mahuyang nga mga Butang nga Mangin Mabakod”

Bisan maayo gid man nga mangin matuodtuod, dapat kita mangin matuodtuod sa aton tunay nga mga kaugalingon bilang mga anak sang Dios nga may diosnon nga kinaiya kag kapalaran nga mangin pareho sa Iya.² Kon ang aton tuyo amo ang mangin matuodtuod sa sining diosnon nga kinaiya kag kapalaran, pwes kinahanglan naton tanan nga magbag-o. Ang tinaga sa balaan nga kasulatan para sa pagbag-o amo ang paghinulsol. “Tuman kadamo sang tawo,” tudlo ni Pangulong Russell M. Nelson, “nga nagakabig sang paghinulsol bilang silot—isa ka butang nga dapat likawan luwas sa pinakaseryoso nga mga sirkumstansya”. … Kon si Jesus magpangabay sa imo kag sa akon nga‘maghinulsol,’ ginaagda Niya kita nga [magbag-o].”³

Ang mga computer software developer nagagamit sang kondisyonal nga mga pulong para mahibal-an sang mga kompyuter ang ila himuon. Kon kaisa ginatawag ini sila nga kon-pwes nga mga kondisyones. Pareho sang, kon ang x husto, pwes himoa ang y.

Ang Ginuo nagahikot man paagi sa mga kondisyones: mga kondisyones sa pagtuo, mga kondisyones sa pagkamatarong, mga kondisyones sa paghinulsol. Madamo sang mga halimbawa sang kondisyones halin sa Dios pareho sang:

“Kon tumanon mo ang akon mga kasugoan kag magpadayon tubtob sa katapusan, [pwes] magaangkon ka sang kabuhi nga wala’y katapusan nga sa diin ini nga bugay ang pinakadako sa tanan nga bugay sang Dios.”⁴

Kay “kon kamo mamangkot sa isa ka bunayag nga tagipusuon, sa matuod-tuod nga tinutuyo, nga may pagtuo kay Cristo, [pwes] ipakita niya ang kamatuoran sini sa inyo, paagi sa gahum sang Balaan nga Espiritu.”⁵

Bisan ang gugma sang Dios, bisan pa nga wala sing dulonan kag perpekto, nagapaidalom man sa mga kondisyon.⁶ Halimbawa:

“Kon magbantay kamo sang akon mga sugo, [pwes] magapabilin kamo sa akon gugma; subong nga ako nagbantay sang mga sugo sang akon Amay kag nagapabilin sa iya gugma.”⁷

Si Elder D. Todd Christofferson dugang nga nagpaathag sining kamatuoran sang ebanghelyo sang iya gintudlo, “May mga magasiling, ‘Ang Manluluwas nagapalangga sa akon sa kon ano ako,’ kag matuod gid ina. Pero indi Niya madala ang bisan sin-o sa aton sa Iya ginharian sa kon ano kita, ‘kay wala sang mahigko nga butang nga makapuyo didto ukon makapuyo sa iya presensya’ [Moises 6:57]. Ang aton mga sala kinahanglan anay maresolba.”⁸

Ang bugay sang pagbaton sang gahum sang Dios agud buligan kita nga magbag-o may kondisyon man. Ang Manluluwas nga nagahambal paagi sa kay propeta Moroni sa Libro ni Mormon, nagtudlo: “Kon ang mga tawo magakari sa akon ipakita ko sa ila ang ila kahuyang. Ginahatagan ko ang mga tawo sing kahuyang agud sila mahimo nga mangin mapainubuson; kag ang akon grasya igo para sa tanan nga mga tawo nga nagapaubos sang ila mga kaugalingon sa akon atubang; kay kon magpaubos sila sang ila mga kaugalingon sa akon atubang, kag may pagtuo sa akon, nian himuon ko ang mahuyang nga mga butang nga mangin mabakod para sa ila.”⁹

Kon tan-awon gid naton kon ano ang ginatudlo sang Ginuo sa aton diri, makita naton nga una anay Niya nga ginasiling nga ginahatagan Niya ang mga lalaki kag babayi sang kahuyang, isa lang, nga bahin sang aton mortal nga inagihan bilang nahulog ukon lawasnon nga mga tinuga. Nahimo kita nga kinaugali nga mga lalaki kag babayi tungod sa Pagkahulog ni Adan. Pero paagi sa Pagbayad-Sala ni Jesucristo, mahimo naton malampuwasan ang aton kahuyang, ukon ang aton nahulog nga kinaiya.

Dayon siling Niya nga ang Iya grasya igo kag kon magpaubos kita sang aton kaugalingon kag magtuo sa Iya, pwes Iya “himuon ang mahuyang nga mga butang [madamo] nga mangin mabakod para sa [aton].” Sa iban nga pulong, kon bag-uhon anay naton ang aton nahulog nga mga kinaiya, ang aton kahuyang, pwes mahimo naton maliwat ang aton mga pamatasan, ang aton mga kahuyang.

Rebyuhon naton ang mga rekisitos sa pagbag-o suno sa pagsulundan sang Ginuo:

Una, kinahanglan naton nga magpaubos. Ang kondisyon sang Ginuo para sa pagbag-o amo ang pagkamapainubuson. “Kon magpaubos sila sang ila mga kaugalingon sa akon atubang,”¹⁰ siling Niya. Ang baliskad sang pagkamapainubuson amo ang bugal. Ang bugal nagaluntad kon pamatyagan naton mas maayo kita—kon ang aton ginapamensar ukon ginabatyag ang mas mauna sangsa ginapamensar ukon nabatyagan sang Dios.

Si Haring Benjamin nagtudlo nga “ang kinaugali nga tawo isa ka kaaway sang Dios, … kag mangin amo sini, sa gihapon kag sa gihapon, luwas nga … ubahon [niya] ang kinaugali nga tawo kag mangin isa ka santos paagi sa pagpasag-uli ni Cristo nga Ginuo, kag mangin subong sang isa ka bata, nga masinulundon, mapailubon, [kag] mapainubuson.”¹¹

Para magbag-o, kinahanglan naton nga ubahon ang kinaugali nga tawo kag mangin mapainubuson kag masinulundon. Kinahanglan naton nga mangin mapainubuson para sundon ang buhi nga propeta. Mapainubuson para maghimo kag magtipig sang sagrado nga mga kasugtanan sa templo. Mapainubuson para maghinulsol adlaw-adlaw. Kinahanglan naton nga mangin mapainubuson para maghandum nga magbag-o, sa “pagtugyan sang aton mga tagipusuon sa Dios.”¹²

Ikaduha, kinahanglan naton nga magtuo kay Jesucristo. Sa liwat, sa mga pulong sang Manluluwas: “Kon magpaubos sila sang ila mga kaugalingon sa akon atubang, kag may pagtuo sa akon,”¹³ hatagan Niya kita sang gahum nga malampuwasan ang aton mga kahuyang. Ang pagkamapainubuson, nga ginaupdan sang pagtuo kay Jesucristo, magatugot sa aton nga malab-ot ang nagapabakod nga gahum sang Iya grasya kag ang kabug-osan sang mga bugay nga gintigana bangud sang Iya Pagbayad-Sala.

Si Pangulong Nelson nagtudlo nga “ang matuodtuod nga paghinulsol nagasugod sa pagtuo nga si Jesucristo may gahum nga magtinlo, mag-ayo, kag magpabakod sa aton. … Ang aton pagtuo amo ang nagabukas sang gahum sang Dios sa aton mga kabuhi.”¹⁴

Ikatatlo, paagi sa Iya grasya sarang Niya himuon ang mahuyang nga mga butang nga mangin mabakod. Kon magpaubos kita kag magtuo kay Jesucristo, pwes ang Iya grasya magatugot sa aton nga magbag-o. Buot silingon, hatagan Niya kita sang gahum sa pagbag-o. Posible ini tungod, sa Iya ginsiling, “ang akon grasya igo para sa tanan nga mga tawo.”¹⁵ Ang Iya nagapabakod nga grasya nagahatag sa aton sang gahum para malampuwasan ang tanan nga mga sablag, tanan nga mga hangkat, kag tanan nga mga kahuyang nga handum naton nga bag-uhon.

Ang aton pinakadalagko nga kahuyang mahimo nga mangin pinakadalagko naton nga mga kusog. Sarang kita mabag-o kag “mangin bag-o nga mga tinuga.”¹⁶ Ang mahuyang nga mga butang literal nga “mangin mabakod para sa [aton].”¹⁷

Ginhikot sang Manluluwas ang Iya wala dulonan kag wala katapusan nga Pagbayad-Sala para kita matuod nga magbag-o, maghinulsol, kag mangin mas maayo. Pwede matuod kita nga matawo liwat. Malampuwasan naton ang mga kagawian, mga adiksyon, kag bisan ang “huyog nga maghimo sing malain.”¹⁸ Bilang mga anak nga lalaki kag babayi sang mapinalanggaon nga Amay sa Langit, may gahum kita sa sulod naton sa pagbag-o.

Ang balaan nga mga kasulatan puno sang mga ehemplo sang mga lalaki kag babayi nga nagbag-o.

Si Saul, ang Fariseo kag aktibo nga manugpigos sang nauna nga Kristiyano nga simbahan,¹⁹ nangin si Pablo, ang Apostoles sang Ginuong Jesucristo.

Si Alma isa sadto ka pari sa ginharian sang malain nga si Haring Noe. Nabatian niya ang mga pulong ni Abinadi, naghinulsol sing lubos, kag nangin isa sa pinakamaayo nga mga misyonero sa Libro ni Mormon.

Ang iya anak nga si Alma nag-usik sang iya pagkalamharon sa paghandum sa pagguba sang Simbahan. Isa sia sa “pinakatampalasan sang mga makasasala”²⁰ tubtob nga nagbag-o sia kag nangin mabaskog nga misyonero sa iya kaugalingon nga pagpanikasog.

Si Moises gin-ayop sa pamilya ni Faraon kag nagdako sa kahamungaya bilang prinsipe sang Egipto. Pero sang maintiendihan niya kon sin-o gid sia kag nahibal-an ang iya diosnon nga kapalaran, nagbag-o sia kag nangin bantog nga manughatag-layi nga propeta sa Daan nga Katipan.²¹

Ang lolo sang akon asawa nga si James B. Keysor, nakatandog gid sa akon sang iya kaugalingon nga pagbag-o sang tagipusuon.²² Bata sia sang matinuohon nga mga pionero nga Santos sa Ulihing mga Adlaw sa Salt Lake valley sang 1906, napatay ang iya iloy sang bata pa sia kag ginbudlayan sa iya pagdako. Ang iya pagkatin-edyer kag pagkasolterito ginhinguyang nga malayo sa Simbahan, sa sulod sini nga tion nakaangkon sia sang malaw-ay nga mga kagawian. Wala sapayan sini, nakilala niya kag napangasawa ang isa ka matinuohon nga babayi, kag upod nila nga ginpadako ang lima ka kabataan.

Sang 1943, pagkatapos sang mabudlay nga panahon sang Dakong Kapurauton kag Ikaduhang Inaway Pangkalibutanon, si Bud, nga tawag sa iya sang mga abyan kag pamilya, nagbiya sa Utah kag nagsaylo sa Los Angeles, California, para mangita sang obra. Samtang malayo sa iya panimalay, nagpuyo sia upod sa iya utod nga babayi kag sa iya bana, nga nagaalagad bilang bishop sa ila nga ward.

Sa pagpalangga kag impluwensya sang iya utod kag bayaw, ginbuhi niya liwat ang iya interes sa Simbahan kag nagsugod sa pagbasa sang Libro ni Mormon kada gab-i antes magtulog.

Isa ka gab-i, samtang ginabasa niya ang Alma kapitulo 34, natandog ang iya tagipusuon sang ginabasa niya ang masunod nga mga pulong:

“Huo, luyag ko nga kamo magapalapit kag indi na magpatig-a sang inyo mga tagipusuon. …

“Kay yari karon, ini nga kabuhi amo ang tion para sa mga tawo agud maghanda sa pag-atubang sa Dios; huo, yari karon ang adlaw sini nga kabuhi amo ang adlaw para sa mga tawo sa paghikot sang ila mga pagpangabudlay.”²³

Samtang ginabasa niya ining mga bersikulo, isa ka mabaskog nga balatyayon ang nagsulod sa iya kag nahibal-an niya nga kinahanglan niya nga magbag-o, maghinulsol, kag nahibal-an niya kon ano ang iya dapat nga himuon. Nagbangon sia sa iya hiligdaan kag nagluhod kag nagsugod sa pagpangamuyo, nga nagapangabay sa Ginuo nga patawaron sia kag hatagan sia sing kusog para himuon ang mga pagbag-o sa iya kabuhi. Ginsabat ang iya pangamuyo, kag halin sadto, wala na sia magbalikid sa daan niya nga gawi. Nagserbisyo si Bud sa Simbahan kag nagpabilin nga matinuohon, dedikado nga Santos sa Ulihing mga Adlaw tubtob sa katapusan sang iya kabuhi. Nagbag-o sia sa tanan nga butang. Ang iya hunahuna, iya tagipusuon, iya mga aksyon, ang iya pagkatawo ginbag-o.

Mga kauturan, ang aton diosnon nga kapalaran kag katuyuan amo nga sa ulihi mangin pareho sa aton Amay nga Langitnon kag Manluluwas, nga si Jesucristo. Mahimo naton ini samtang nagabag-o kita, ukon nagahinulsol. Aton “mabaton ang larawan sang Manluluwas sa [aton] mga nawong.”²⁴ Kita mangin bag-o, matinlo, lain, kag kinahanglan lang naton ini padayunon kada adlaw. Kon kaisa pamatyag naton sini daw duha ka abante kag isa ka atras, pero padayon kita nga magaabante nga may pagtuo.

Kag kon magpaubos kita kag magtuo kay Jesucristo, ang grasya ni Cristo kag ang Iya wala dulonan nga nagabayad-sala nga sakripisyo magatugot sa aton nga magbag-o.

Nagasaksi ako kag nagapamatuod nga si Jesucristo amo matuod ang aton Manluluwas kag Manunubos. Bastante matuod ang Iya grasya. Ako nagasiling nga Sia amo “ang dalan, kag ang kamatuoran, kag ang kabuhi.”²⁵ Sa ngalan ni Jesucristo, amen.