Jises Kraist I Ewe Pochokunen Sarafo
Wanong ami nuku non Jises Kraist. I epwe emwenikemi non ewe an mi pung. I ami pochokun.
Non amonetan ei afanafan ikenai, Ua fen mefi pochokunen memefin ai upwe afanafan ngeni ekkewe onuon me fopun.
Ngang ua pwan porous ngeni ion kana ir mi pin sarafo, pwan mo ngeni ekkana rese tongeni chiwen chemeni.
Me ua porous ngeni meinisin mi tongei nouch kewe sarafo me mochen repwe fefeita non manauer.
Ren ewe maritan tappin aramas, a wor ai porous akaewin fan itemi seni ami Chon Amanau, Jises Kraist.
An Ewe Chon Amanau Porous Ngeni kemi
Chiechiei achengicheng serafo, ika ewe Chon Amanau mi nom ikei iei, met I epwe apasa ngeni kemi?
Ua nuku pwe I epwe poputani ne pwarano An anononun tong fan itemi. Meni I epwe apasa fiti kapas, nge epwe pwan mokut pochokun—seni chok An nom—ina esap wor mwanin, tori anononun non netipemi, epwe ourano unusen ngunumi!
Iwe nge, pokiten kich mi apwangapwang me sise unusoch, ekkoch aurek epwe tonong non ami ekiek. Meni oupwe chemeni ekkewe mwaan ouwa fen fori, ekkewe fansoun nipwakingaw ngeni sosot, ekkewe mettoch oua anean pwe ousap fori—ika anean pwe amo ita ouwa fen foforoch me noom.
Ewe Chon Amanau epwe mefi ena, me ua nuku I epwe affata ngenikemi fiti kapas I a fen apasa non ekkewe pukefel:
“Ousap nuokus.”1
“Ousap tipemwaramwar.”2
“Oupwe pwapwa.”3
“Ousap osukosuka netipemi.”4
Use nuku pwe epwe foruta kunetipingen ren ami kewe mwaan. I esap ekisiretiw. Apw. I epwe urenikemi oupwe aier—oupwe nikitano ami kewe tipis, oupwee ekkesiwin, pwe I epwe tongeni omusakemino. I epwe achema ngenikemi pwe 2,000 ier a no I a wata won I ekkana tipis pwe oupwe tongeni aier. Ina kinikinin ewe kokkotun pwapwa ew niffang ngeni kich seni Samach won Nang mi tong.
Meni Jises epwe afatau pwe ami kewe pwon ngeni I—a for nupwen oua papatais me asofo sefani iteiten ami angei ewe sakrament—a ngeni kemi ew auchean riri ngeni I. Ewe sokkun akoko ekkewe pukefen ra awewei ren ami oupwe aninis fengen ren osemi pwe, fiti An aninis, oua tongeni mwarei osemi kewe.5
Ua nuku ewe Chon Amanau Jises Kraist epwe mochen pwe oupwe kuna, me sinei pwe I ami pochokun. Fiti An aninis, ese wor oukukun kawesinon met oua tongeni forata. Ami tongeni ese kauk. I epwe mochen oupwe kunakemi ussun I a kunakemi. Me a fokkun sokono seni ussun an ewe fonufan kuna kemi.
Ewe Chon Amanau epwe afata, non an esap wor fatafatangawen kapasan, pwe ami noun ewe Kot mi Napanap at me nengin. Sememi non Nang i ewe emon mi unusen ning non unusen fonufan, mi ur ren tong, apwapwa, nimenimoch, pin, saram, chen, me ennet. Me ew ran I a mochen oupwe angei meinisin met mi Ani.6
Iei ewe popun pwata ouwa nom won fonufan—ami oupwe kaeo, marita, me fefeita me winiti mettoch meinisin Sememi non Nang a forikemita fan itan.
Ren an epwe ponueta, I a tinato Jises Kraist an epwe ach Chon Amanau. Iei ewe popun a anisata An ewe wachemuken kokkotun pwapwa, An Mwichefen, An pristut, ekkewe pukefel—meinisin.
Ina fetanin kokotun manauemi. Ina ami fansoun mwemi. Ina pusin ami finata.
Ennet me Finata
Nukanapchochon an Kot kokkot fan iten ami pwapwa ina ami pochokunen finata.7 Ewer, Sememi non Nang a mochen oupwe finata pwapwa esemuch ren I, me I epwe anisikemi ami oupwe angei, nge I esap fokkun oumwesi ngenikemi.
Ina ren I a mut ngenikemi ami oupwe finata: saram ika rochopwak? Murinno ika ngaw? Pwapwa ika netipengaw? Manau ese much ika manon ngun?8
Ngingin nge ussun ew mecheresin finata. Ika met? Nge ren ekkoch wewe, ikei won fonufan, ussun e kon awosukosuk nap seni met ita ururun epwe ina.
Ewe osukosuken pwe iteitan sise kunaochu mettoch ussun ach mochen kuner. Ewe Aposel Paul a awewei ngeni ach nenenong “non ew kinas, mi kiroch.”9 A wor watten rukoruk non ewe fonufan ussun met mi pung me mwan. Pekin ennet a fen sosor a fori ngaw ussun nge mi och me och ussun nge mi ngaw.10
Nge nupwen oua achocho kukuta ewe ennet—ese much, ennet ese sisiwin—ami finata a fatafatochuno. Ewer, mi chok wor sosotumi me ami osukosuk. Mettoch mi ngaw mi chok fis. Mettoch mi rukoruk. Mettoch mi anoninen. Nge oua tongeni atawei nupwen ami mi sinei ika ami ion, pwata oua nom ikei, me inet oua epinukunuku Kot.
Iwe oua kuna ennet me ian?
Ina a nom non ewe kapas allimen Jises Kraist. Me ewe unusochun ewe kapas allim a wor osukunan me non Ewe Mwichefenin Jises Kraist ren Aramas mi Pin Non Fansoun Soponon.
Jises Kraist a apasa, “Ngang ewe aan, ewe ennet, o ewe manau: ese wor emon epwe feinno ren ewe Sam, ika esap punun ngang.”11
Nupwen a wor ami auchean finata oupwe fini, Jises Kraist me An ewe kapas allim mi niwinsefanito ikana ekkana murinon finata. Nupwen a wor ami kapas eis, Jises Kraist me An ewe kapas allim mi niwinsefanito ikana ponuwan mi auchea. Nupwen oua mefi apwangapwang, Jises Kraist i ami pochokun.
I a ngeni ekkewe mi achanu pochokun; me ngeni ekkena mi mefi apwangapwang, I a anapano pochokun.
Ekkewe io ir mi ewitiwiti ewe Samon repwe minafosefan ren An pochokun.12
Ren ewe Pochokunen Serafo
An epwe anisikemi ne kutta ewe An me an epwe anisikemi ne aponueta an Kraist annuk ewe minen emwen epwe anganga non manauemi, Ewe Mwichefenin Jises Kraist ren Aramas mi Pin Non Fansoun Soponon a amonata ew minefon aninis, ew ekesiwinin kapasan Ren Pochokunen Sarafo.
Ren nap seni 50 ier, Ren ewe Pochokunen Sarafo a fen ew minen emwen ren ekkewe ierin fansoun ngeni ekkewe Sarafon Fansoun Soponon. Fansoun meinisin uwa isoni ew kapin non pwekitei, me nounou ngeni aramas ekkewe ir mi mochen sinei ussun nonnomuch. A fen emwirinono me asofosefan ngeni murinon ach sipwe tongeni atawei ekkewe osukosuken me sosotun ach fansoun. Ei minefon kapasen Ren ewe Pochokunen Sarafo mi kawor online non 50 sokofesenin kapasen fonu me pwan wor non chon taropwe. Epwe ew auchean aninis ne finata mettoch non manauemi. Ouse mochen etiwa pwe pusin noumi me nounou ngeni chiechiemi kewe.
Ei minefon kapasen Ren ewe Pochokunen Sarafo mi awewetiw Ew Minen Emwen ne Finata Mettoch.
Ach sipwe wesewesen fatoch, ewe murinon minen emwen oua tongeni tufichin fini I Jises Kraist. Jises Kraist I ewe pochokunen sarafo.
Iwe ewe popun Ren ewe Pochokunen Sarafo an epwe awena kemi ngeni I. A aiti ngenikemi ekkewe ennet ese much ren An kapas allim mi niwinsefanito—ekkewe ennet ussun en ion, ion I, me met ouwa tongeni fori fiti An pochokun. A aiti ngenikemi ifa ussun oupwe fori ekkewe mochen mi pung anongonong won ekkana ennet ese much.13
Mi pwan auchea ach sipwe sinei met Ren ewe Pochokunen Sarafo ese tongeni fori. Ese fori pungun ekiek fan itemi. Ese ngenikemi ew “ewer” ika “apw” ussun meinisin mochen oupwe mesengeni. Ren ewe Pochokunen Sarafo a anonga won ewe nongonongun ami mochen. A anonga won ekkewe auchean mokutukut, nongonong, me annuk nge esap meinisin sokkun mokutukutun inisimi.
Ewe Samon, seni Noun kewe soufos, a fen emwenikich non ena an. I a tingor ngenikich ach sipwe “anapano [ach] tufich non pekin ngun ne angei pekin pwarata.”14 I a kori kich ach sipwe “ausening ngeni I.”15 I a kori kich ach sipwe tapweno mwirin I non ekkewe an mi tekia me pin.16 Me sia kaeo non ew an mi nonofengen iteiten wik non Feitto, Tapweto Mwiri.
Ua ekieki pwe ewe minen emwen a tongeni ngenikemi ew nakatamen tetenin uf ouwa tongeni ufouf, kapas ousap apasa, me kachito ousap katon. Nge ena epwe fokkun fen aninisoch non ew mwichefenin fonufan? Ew anen atawei osukosuk epwe ennetin amonakemita ren ew manauaetamen ami manaueni manauen Kraist?
Joseph Smith a apasa, “Ua aitir kewe nongonong mi pung, me ra pusin anganga.”17
Me King Benjamin a ureni noun kewe aramas non ewe Puken Mormon, “Use tongeni urenikemi meinisin ekkewe mettoch minne oupwe fori tipis; pun mi wor sokosokopaten anen me napanapen pwan, mo ra fokkun chommong ngang use tongeni anneanir.”18
King Benjamin a sopweno ne apasa, “Nge ei ukukun ua tongeni urenikemi, … mamasa inisimi, me ami ekiek, me ami kapas, me ami angang, me aponueta ekkewe annukun Kot, me soposopono non ewe nuku ren … ach Samon pwan mwo ngeni muchun manauemi .”19
Mi mwan an epwe wor ach annuk? Apw ese. A auchea ngeni kich meinisin iteiten ran. Nge mi mwan ne anonga chok ach ekiek won annuk nge esap pwan anonga ekiek won ewe Chon Amanau. A auchea oupwe sinei ekkewe pwata me ifa ussun forun me mwirin eteneki ekkewe niwinin ami kewe finata. A auchea oupwe wata ami nukunuk non Jises Kraist. I epwe emwenikemi non ewe an mi pung. I ami pochokun.20
Ewe Manamanen Ennetin Annuk
Ren ewe Pochokunen Sarafo a pochokun non esinesinen ewe annukun Jises Kraist. Mi pochkun non kokkon ami oupwe fori ekkewe mochen anongonong won an Kraist annuk. Me a pochokun non awewen ekkewe feioch Jises Kraist a pwon ngeni ekkana ra tapweno non An ewe An.21
President Russell M. Nelson a afanafana: “Nupwen ami wachimuken mochen an epwe mut ngeni Kot epwe nemenem [non manauemi], … chommong pungun ekiek repwe winiti mecheres, … Chommong osukosuk epwe winiti esap osukosuk! Ka sineochu ifa usun kopwe enimenima inisum. Ka sinei met kopwe katon me annea, ian kopwe aea om fansoun ia, me ion kopwe chiechi ngeni. Ka sinei met ka mochen awesano. Ka sinei ewe sokkun aramas ka, … fokkun mochen winiti.”22
Ew Nikinik Tekia
A wor an Jises Kraist nikinik mi fokkun tekia fan iten Noun kewe chon kuno. Me ewe tingorun achocho ne kukkuta An mochen me aponueta An kewe ennet ina ewe nikinik mi fokun tekia!
Auchean mochen non pekin inis me ngun esap chok anongonong won porausen emon ika met mi tufich me itefouno .23 Ewe Samon ese apasa, “Fori metichok ka mochen.”
I a apasa, “Mut ngeni Kot epwe nemenem.”
I a apasa, “Feitto.,tapweto mwiri.”24
I a apasa, “Nom non ew an mi pin, tekia, me mi kon fetanoch.”
I a apasa, “Anneasosichi ai kewe annuk.”
Jises Kraist i ach nenien apiru mi unusoch, me sia achocho ngeni fiti pochokunen ngunuch ne tapweno mwirin I.
Chiechiei achengicheng, mut ngeniei upwe eniwini sefani, ika ewe Chon Amanau a uta ikei ikenai, I epwe pwarano An tong ese much fan itemi, An unusen apinukunuk non ami. I epwe urenikemi pwe oupwe tongeni fori ei. Oua tongeni forata ew manau mi apwapwa, pwapwa pokiten Jises Kraist i ami pochokun. Oua tongeni kuna poracho, kinamwe, pwapwa me ketiw iei me feinfeino, pokiten kopwe kuna meinisin non Jises Kraist, non An ewe kapas allim, me non An ewe Mwichefen.
Ren ei ua apasa ai ennetin pwarata ren emon Aposel noun ewe Samon Jises Kraist me nikit ngenikemi ai efeioch non anononun kinisou me tong fan itemi, non iten Jises Kraist amen.