Okkufatiw Fonufan me Kuna Asoso

Pwii me fefinei achengicheng, uwa unusen kinisou ren ai kapong ngeni kemi non ei ningochun sossoren Sabbath. Oua nom non ai ekiek fansoun meinisin. Ua ingeno ren ami mwitir mokutukut inet chok oua kuna ekkoch a auchea ngenir aninis. Ua mwar ren ewe nuku me kapasen pwarata oua pwomeni iteitan. Ua kechiw ren ami netipechou, netipengaw, me aurek. Ngang ua tongei kemi. Ua affata ngeni ami pwe Samach won Nang me Noun Achengicheng, Jises Kraist, ir mi tongei kemi. Ir mi wesewesen pwisin sinei usun nonnomumi, ami kirekiroch, ami mochen, me ami iotek fan iten aninis. Iteiten, ua iotek fan itemi pwe oupwe mefi Ar tong ngeni kemi.

Ach sinei ussun Ar tong mi auchea usun ita sia fos ngenir iteitan ren ew osukosuken efeiengawen porous. Meni a fen wor ran nupwen oupwe anean pwe oupwe ufoufeta ufoufen mour, numufengenikemi non efou pwor, me eisini emon epwe fongunikemi nupwen meinisin ekkei osukosuk ra wesino.

Nge, achengicheng pwi me fefinei, ra chommong mettoch mi amwarar ra nom mwach. Non ekkan ran repwe feito, sipwe kuna ewe watten pwanon an ewe Chon Amanau manaman minne ewe fonufan epwe keran kuna. Nefinen iei me ewe fansoun I epwe niwinsefan “ren manaman me watten ning,”¹ I epwe awora tufich ese nea, feioch, me manaman won ekkewe mi nikitu.

Nge, iei sia nom non met mi ennetin ew fansoun weires non uruwon ei fonufan. Ekkewe weires me osukosuk ra efisi chommong aramas repwe mefi chourek me pekus. Inamo, ekieki ew mettoch a keran fis minne epwe aweweochu ifa usun ami me ngang sipwe kuna asoso.

Non atun ewe open house ren ewe Washington D.C Tempel a keran fis, emon memper seni ewe mwichen open house a kuna weweochun ekkesiwin nupwen an emweni fetanei ekkoch chon mak porous non ewe tempel. Ren och popun ew kukkun famini a pachengeni ei mwichen media. Emon chon repot a soun eis usun ewe “sai” an emon chon angangen tempel nupwen i a fein fetan non ewe tempel. I a mochen sinei ika ewe fetanin tempel mi esisinata ekkewe osukosuk non an emon aramas sai non manau.

Emon kukkun at non ewe famini a rongorong ewe aporous. Nupwen ewe mwich a tonong non ew rumwen endowment, ewe at a itini ewe rong, ikewe aramas ra fotopuku ar repwe fori pwon mi pin ren Kot, me a apasa, “O a men och. Ikei ew neni ren aramas ar repwe asoso won ar fetanin tempel.”

Use nuku pwe ewe at mi sinei ifa usun amwararen met we a kuna. Meni i ese sinei usun ewe wewefengen nefinen ach fori ew pwon mi pin ren Kot non ewe tempel me an ewe Chon Amanau amwararen pwon:

“Oupwe feito rei, ami meinisin mi pekus ren choun osemi o ngang upwe ngeni kemi asoso.

“Oupwe angei osei o oupwe mwarei o oupwe kaeo seni ei; … iwe oupwe kuna asoso ren ngunumi.

“Pun osei we mi mecheres, o ai chou mi pan.”²

Achengicheng pwi me fefinei, ua netipeta ren ekkewe ra suseni ewe Mwichefen pokiten ra mefi pwe ar choni mwichefen a nap repwe fori mettoch. Rese mwo kuna pwe fori me apwonueta pwon mi pin a fen fori manau epwe mecheres! Emon a fori pwon mi pin non nenien papatais me non tempel—me apwonureta—a napeno ar mumuta ngeni ewe manamanen Jises Kraist. Ouse mochen ekipwichi ena amwararen ennet!

Manamanen nang ina ewe niwinin ach apwonueta pwon mi pin ren Kot—manaman minne a apochokuna kich ach sipwe ungeni ach sossot, me netipengaw. Ei manaman a amecheresi ach aan. Ekkewe ra manaueni ekkewe annuk mi tekia an Jises Kraist a wor ar mumuta ngeni An manaman mi tekia. Iwe, chon apwonueta pwon mi pin ra tufich ngeni ew auchean sokkun asoso minne a fis ngenir seni nefinen ar pwon ngeni Kot.

Me mwen an ewe Chon Amanau fangeta Inisin ngeni ewe riaffoun Gethsemane me Calvary, a afata ngeni Noun kewe Aposel, “Fonufan epwe eriaffou kemi. Nge oupwe chok epinukunuk! Ua fen okkufatiw fonufan.”³ Mwirin, I a tingorei emon me emon kich pwe sipwe pwan fori nupwen I a apasa, “Ua mochen pwe ami oupwe okkufatiw ewe fonufan.”⁴

Achengicheng pwi me fefinei, ai porous ngeni kemi ikenai pwe pokiten Jises Kraist a okkufatiw ei fonufan mi tipis, me pokiten I a achasefan fan iten emon me emon kich, ami mi pwan tongeni okkufatiw ei mwono non tipis, pusin en me ekieki an mochen, me apekusun fonufan.

Pokiten ewe Chon Amanau, seni An Achasefan esemuch, a angasa kich seni apwangapawng, muan, me tipis, me pokiten A fen mefi metek meinisin, aurek, me chou oua fen ani,⁵ iwe nupwen oupwe ennetin aier me kutta An aninnis, oua tongeni okkufu ei efeiengawen fonufan.

Oua tongeni okkufu ekkewe semwenin ewe fonufan ren pekin ngun me memef, mi pachenong pusin uweiuketa, namanam tekia, song, manauengaw, koput, mochenia, nonowo, me nuokus. Inamo ekkewe osukosuk me emweningaw mi rokopwani kich, oua tongeni kuna ennetin asoso—wewen ngaseno me kinamwe—pwan fansoun ami osukosuk mi aweires.

Ei auchean ennet a pesei unungat nongonongen kapas eis:

Aewin, met wewen ach sipwe akkufatiw ewe fonufan?

Oruwan, ifa usun sipwe fori?

Me Ounungatin, ifa usun ach okkufatiw fonufan a efeiochu manauach?

Met wewen ne akkufatiw fonufan? A wewen ach okkufatiw ewe sossotun ach kon ekieki usun ekkewe mettochun ei fonufan nap seni ekkewe mettochun Kot. A wewen ach nuku ewe nongonongen Kraist nap seni ekkewe ekiekin aramas. A wewen ach pwapwa non ennet, amam nikatuputup, me winiti mi “tekison chon tapweno mwirin Kraist.”⁶ A wewen ach fini ne suseni mettoch mi asueno ewe Ngun. A wewen ach chengen ne “aturano” pwan ach kewe tipis sia echeni.⁷

Iei, okkufatiw fonufan esap wesewesen wewen winiti mi unusoch non ei manau, esap pwan wewen pwe ami osukosuk repwe chok morono—pokiten resap. Me esap wewen pwe ousap chiwen fori muan. Nge okkufatiw fonufan wewen pwe ami ungeni tipis epwe napeno. Netipemi epwe pweteteno nupwen ami nuku non Jises Kraist a napeno.⁸ Okkufatiw fonufan wewen ach marita ne tongei Kot me Noun Achengicheng nap seni om tongei emon ika och mettoch.

Iwe, ifa usun, sipwe okkufatiw fonufan? King Benjamin a aiti kich ifa usun. I a apasa pwe “ewe inisin aramas i ewe chon koum ngeni Kot” me epwe chok fis feinfeino “tiwenon chok ika a fang ngeni ekkewe pesepesen ewe Ngun mi Fel, me poutano ewe inisin aramas me winiti emon souneng seni ewe achasefan an Kraist ewe Samon.”⁹ Iteiten fansoun oua kutta me tapweno mwirin amemefin ewe Ngun, iteiten fansoun oua fori och mettoch mi och—mettoch ewe “inisin aramas” esap fori—oua okkufatiw fonufan.

Okkufatiw fonufan esap och mettoch a fis non eu ran ika ru. A fis non unusen manau nupwen sia enniwini ne etiwa ewe nongonong mi ennet an Kraist. Sia amari nuku non Jises Kraist ren ach aier iteiten ran me apwonueta pwon mi pin minne a efeiochu kich ren manaman. Sia nom non ewe aanen pwon mi pin me sia feioch ren pochokunen ngun, ach pwarata, napenon nuku, me ewe angangen chon nang. Manaueni ewe nongonongen Kraist a tongeni awora ewe pochokunen tetten wenechar, a forata amwokutun pekin ngun non manauach.¹⁰

Nupwen sia achocho ne manaueni ekkewe annuk mi tekia an Jises Kraist, netipach me wesewesen nonnomuch a poputa ne siwin. Ewe Chon Amanau a chunata kich seni weiweitiwen ei fonufan mi tur ren an efeiochu kich ren watten tong ennet, tekison, fangoch, kirekiroch, ach pwisin tumunu inisich, kinamwe, me asoso.

Iei, meni oupwe ekieki pwe a usun angangen ngun mi weires nap seni asoso. Nge iei ewe wachemuken ennet: nupwen ewe fonufan a pesei pwe nemenem, pisekisek, itefouno, me apwapwan ewe inis a wato pwapwa, rese! Rese tongeni! Met ra awora ese wor nge ew ekkesiwin mi pon ren ewe “feiochun me pwapwan nonnomun ekkewe [ra] aponueta ekkewe annukun Kot.”¹¹

Ewe ennet pwe a kon apekus ach kutta pwapwa ikewe sise tongeni kuna! Nge inamo, nupwen oua angang fengen me Jises Kraist me fori ewe angangen ngun mi namot ne okkufatiw fonufan, I, me I chok, a wor ren ewe manaman ne chunoketa seni ochoun ei fonufan.

Iei, ifa usun ach okkufatiw fonufan a efeiochu manauach? Ewe ponuwan mi fateoch: Ach tonong non ew pwon mi pin ngeni Kot a ochufengeni kich ngeni I non ew napanap minne a fori mettoch meinisin usun manau epwe mecheres. Ouse mochen ousap wewengaw rei: Ngang use apasa pwe ach fori pwon mi pin a fori manau epwe mecheres. Ennetin, esuku ungeni, pokiten ewe chon koum ese mochen kopwe kuna ewe manamanen Jises Kraist. Nge ami angang fengen me ewe Chon Amanau wewen oupwe mecheres ngeni An pochokun me manamanen ngaseno.

Ua apungano sefan eu pochokunen afanafan an Preseten Ezra Taft Benson: “Mwan me fefin mi akunnu manauer ngeni Kot repwe kuna pwe I epwe echuono manauer nap seni ra pwisin tongeni. I epwe anapano ar pwapwa, awatteno ar kuna emwen, emwitiri ar ekiek, … seikata ngunur, achommongano ar feioch, anapano ar tufich, oururu ngunur, chunata chiechier, me ngenir watten kinamwe.”¹²

Ekkei tufich ese wor ei e nonno ngenir tapweno mwirin ekkana ra kutta aninisin nang an epwe anisir ne okkufatiw fonufan. Ren ei popun, ua ngeni chon ewe Mwichefen meinisin ena pwan chok annuk ua ngeni nouch kewe anuon me fopun non ewe May. Ua pesei ngenir—me sio ngeni kemi iei—pwe oupwe tumunu ami pwisin kapasen pwarata usun Jises Kraist me An kapas allim. Angang ngeni. Tumunu pwe epwe mar. Amwongoni ngeni ennet. Ousap enimengawa ngeni ekiek mi muan an mwan me fefin rese nuku. Nupwen oua fori ewe soposoponon pochokunen ami kapasen pwarata usun Jises Kraist ami epwe kon aucheani, mamasa ren manaman repwe fis non manauemi.¹³

Ai sio ngeni kemi non ei sosoran pwe oupwe kutta asoso seni ewe pochokun, tipemwaramwar, me eriaffoun ei fonufan ren ami okkufatiw fonufan me ren ami pwon mi pin ren Kot. Mut ngeni I epwe sinei ren ami iotek me ami foffor pwe oua ennet usun ami oupwe okkufatiw fonufan. Eisini I an epwe asarama ami ekiek me tinato aninis mi auchea ngeni kemi. Iteiten ran, rekotuni ekkewe ekiek oua ekieki nupwen oua iotek; mwirin achocho ne tapweno mwirin. Achommongu fansoun ami nom non ewe tempel, me kutta ami oupwe weweiti ifa usun ewe tempel a aiti kemi ne okkufu ei fonufan mi turutiw.¹⁴

Usun ua fen apasa akkom, ewe ochufengenin Israel ina ewe mi nap auchean seni mettoch meinisin mi fis won fonufan ikenai. Ew mettoch mi kon auchea usun ei ochufengen ina ach amonnata ew aramas mi tufich, monneta, me nimenimoch ne etiwa ewe Samon nupwen I a feito sefan, ew aramas a fen finata Jises Kraist nap seni ei fonufan mi turutiw, ew aramas mi pwapwa non ar pungun finata ne manaueni ekkewe annuk mi tekia, me pin an Jises Kraist.

Ua kokori kem, achengecheng pwi me fefinei, ami oupwe winiti ei aramas tupwon. Aucheani me sufonuti ami pwon mi pin nap seni meinisin ekkoch pwon. Nupwen oupwe mut ngeni Kot epwe nemenem non manauemi, ua pwone ngeni kemi watten kinamwe, pwaracho, pwapwa, me ewer, asoso.

Ren ewe manamanen wisen aposel mi pin mi nom rei, ua efeiochukemi non ami kutta ne akkufatiw ei fonufan. Ua efeiochukemi pwe oupwe anapano ami nuku non Jises Kraist me kaeoch ifa usun oupwe aea An manaman. Ua efeiochukemi pwe oupwe sinei ennet seni muan. Ua efeiochukemi pwe oupwe kon ekieki usun ekkewe mettochun Kot nap seni ekkewe mettochun ei fonufan. Ua efeiochukemi pwe oupwe kuna met mi auchea ngeni chon unukum me apochokuna ekkewe oua tonger. Pokiten Jises Kraist a okkufatiw fonufan, oua pwan tongeni. Ua fokkun pwarata non itan Jises Kraist mi pin, amen.