Amarochu me Apasa Ami Kapasen Pwarata

Awewen ekkewe fansoun fan chommong non manau me ouse tepereni, nupwen ami mi chiwen onuon/fopun. Mut ngeniei upwe aporousa ew porous ussun emon chon sukunen high school, Kevin, a finata an epwe sai seni ewe neni ren ew mokutukutun sou emwenin chon sukun, ussun a pusin apasa non an kapas.

“A tori ai fansoun non ewe tetten, me ekkewe chon angangen rechister ra eisiniei itei. Neminewe a nengeni noun ewe tetenin it me apasa, ‘Iwe en ewe anuon seni Utah.’

“‘Wewen pwe ngang chok?’ Ua eis.

“‘Ewer, ewe chok emon.’ A eitieto ai we esisinen itei fiti Utah mi mak fan itei ewe. Nupwen ua okukata won, ua mefi pwe usun uwa esisinneno.

“Ua etiepachenong non ewe enefeitorun ewe hotel fiti nimmon pwan chon sukunen high school fiti ar kewe esisinen iter usun pwan ai we. ‘Hey, en seni Utah. En emon Mormon?’ emon chon sukun a eis.

“Ua mefi pwe ese wor neniei nein meinisin ekkei meinapen chon sukun seni meinisin ekkewe fonu. ‘Ewer,’ Ua pireir ne apasa.

“‘Ami kewe ouwa nuku non Joseph Smith, ewe a era pwe a kuna ekkewe chon nang. Kose wesewen nuku ena, ika en mei nuku?

“Use sinei met upwe apasa. Meinisin ekkewe chon sukun non ewe enefeitor ra nengeniei. U karan chok war, nge meinisin ra ekieki pwe uwa sokono. Ua ekis song nge mwirin uwa apasa, ‘Ua sinei pwe Joseph Smith emon soufosun Kot .’

“‘Ian a feito me ian ena?’ Ua ekieki. Use sinei pwe ua fen tongeni apasa ena. Nge ekkewe kapas mi pung.

“‘Ewer, ua rong pwe ami meinisin mi umwesin chok porousen namanam.’ a apasa.

“Ren ena, a wor ew kouno ese ekinamwe nupwen ewe asamen ewe enefeitor a sukuno. Nupwen am ouwa angei am kewe kiwifer, a takir nge fetanetiw.

“Mwirin ew mongungu me nukun sokuri a apasa, ‘Hey, ekkewe mormon ese pwan wor ekkoch sokkun nour Paipen?’

“O apw. Esap pwan sefan. Ua kun me uwa kuna pwan emon chon sukun ewe a fen nom rei non ewe enefeitor, Christopher.

“‘A iteni ewe Puken Mormon,’ Ua apasa, nge ua mochen wesino ne porous. Ua angei ai kewe potou me poputa ne fetanetiw won ewe nenien fetan.

“‘Ina ewe puk Joseph Smith a chiakuni?’ atewe a eis.

“‘Ewer, ina,’ Ua ponueni. Ua chok fetaneno, epinukunuk pwe upwe omonungaw seni ai saw.

“‘Iwe, ka sinei ifa ussun ai upwe tongeni angei ew?’

“Ew uokisin ua kaeo non siminery a mwittir cheme ngeniei. ‘Use sawasini ewe kapas allimen Jises Kraist.’¹ Nupwen ei a tonong non ai ekiek, ua mefi saw ren ai uwa fen nuokus.

“Ren unusen ewe wik ena uokisin ese fokkun suseniei. Ua ponueni chommong kapas eis ussun ewe Mwichefen ren ukukun ai tongeni, me a chommong chon chiechi ngeniei.

“Ua kuna pwe uwa ingeiti ai we namanam.

“Ua ngeni Christopher ew Puken Mormon. Mwirin ena, a mak ngeniei, a ureniei pwe a korato ekkewe misineri ngeni imwan ewe.

“Ua kaeo ai usap saw ai upwe apasa ai kapasen pwarata.”²

Ua chengen ren an Kevin pworacho ne apasa an kapasen pwarata. Iei ew pworacho mi eniwin iteiten ran seni ekkewe chon ewe Mwichefen unusen fonufan mi nikitu. Nupwen uwa apasa ussun ai kewe ekiek, Ua tingorekemi ami oupwe nengen sefaniti ekkei ruanu kapas eis:

1. Ngang mi sinei me weweiti met kapasen pwarata?

2. Ngang mi sinei ai upwe apasa ai kapasen pwarata?

3. Met ekkewe ra pinei ai upwe apasa ai kapasen pwarata?

4. Ifa usun ai tumunu ai kapasen pwarata?

Ami kapasen pwarata ew pisekimi mi unusen auchea, fan chommong a akoko ngeni ekkewe kinamwein memef non pekin ngun. Ekkei memef ra kan mosonoson ne kapas me awewe ngeni ew mongungu mi “kukkun me kinamwe.”³ Iei ami nuku ika sinei usun ennet a kawor ussun ew pwarata non pekin ngun seni ewe amemefin ewe Ngun mi Fel. Angei ei pwarata epwe ekesiwini met ouwa apasa me ifa usun ami mokutukut. Auchenapen kinikinin ami kapasen pwarata, ewe minne ewe Ngun mi Fel a apochokuna, pachenong:

• Kot inai Sememi won Nang; ami noun semirit. A tongei kemi.

• Jises Kraist mi manau. I ewe Noun ewe Kot mi manau me ami Chon Amanau me Chon Angasano.

• Joseph Smith i emon soufosun Kot a kokko ngeni an epwe eniwinsefanieto ewe Mwichefenin Jises Kraist.

• Ewe Mwichefenin Jises Kraist ren Aramas mi Pin non Fansoun Soponon ina an Kot ewe Mwichefen mi niwinsefanito won ewe fonufan.

• Ewe Mwichefenin Jises Kraist mi niwinsefanito a emwen seni emon soufos mi manau ikenai.

Oua apasa ami kapasen pwarata nupwenn oua kapas ngeni ekkoch usun ekkewe memef non pekin ngun. Ren emon chon ewe Mwichefen, ekkewe tufich ne apasa an kapasen pwarata a feito seni non ekkewe auchean mwichen Mwichefen ika non kukkun auchean, an emon ngeni emon aporous fiti famini, chiechian, me ekkoch.

Pwan ew anen ami oupwe pwarata ami kapasen pwarata seni mokutukut mi tupwon. Ami kapasen pwarata usun Jises Kraist esap chok met ka apasa—nge pwan met ka fori.

Iteiten ami apasa kapasen pwarata ika pwarano fofforun seni ami foffor ami mochen finata ne tapweno mwirin Jises Kraist, ouwa pwan korato ekkoch repwe “feito ren Kraist.”⁴

Chon ewe Mwichefen ra uta pwe chon pwarata ussun Kot non fansoun meinisin, non mettoch meinisin, me non neni meinisin.⁵ Tufichin fori ei non ewe fonufan ne aea mettochun amwasang ren pusin ach ika aea fengen fefeitan mettoch mi amoneta seni ekkoch ese wor nemuchun. Sia pwarata nupwen sia tong, aporousa, me tingor won line. Ami kapas won twitter, fon, me facebook epwe nap auchean me pinin nupwen oua aea social media ne pwarata ifa usun ewe kapas allim a siwini manauemi.

Mettoch ra pinei om kopwe apasata om kapasen pwarata meni epwe pachenong tipemwaramwar usun met kopwe apasa. Matthew Cowley, emon Aposel akkom, a aporousa met mi fisi ngeni nupwen a no ngeni New Zealnand won ew misin non nimu ier non an 17 ierin:

“Usap fokkun monukano ekkewe iotek an semei ewe non ewe ran ua no. Use mwo rorongorong eu ningochun feioch non unusen manauei. Mwirin an kewe amuchunon kapas ngen ei me ren ewe nenien train, ‘Nei at, kopwene no won ena misin; kopwe kaeo; kopwe amonnata om afanafan; me fan ekkoch nupwen a wor kokkom, kopwe ekieki pwe ka fokkun moneta, nge nupwen ka uta, om ekiek epwene unusen pon.’ A fisi ngeni ei ena sokkun fan chommong.

“Ua apasa, ‘Met ka fori nupwen om ekiek a chok pon?’

“Atewe a apasa, ‘Ka uta ikana me fiti meinisin mochenin ngunum, ka apasa kapasen pwarata pwe Joseph Smith emon soufosun ewe Kot mi manau, me ekkewe ekiek repwene punong non mokurom me ekkewe kapas ngeni awom … ngeni netipen meinisin ion mi rongorong.’ Me ai ekiek, napengeni a kon pon atun ai … misin … , a ngeniei ewe tufich ai upwe apasa ai kapasen pwarata ngeni ewe wachemuken mettoch mi fis non uruon fonufan seni ewe irapengesinon ewe Masta. Sotuni fan ekkoch, at me nengin. Ika ese chiwen pwan wor met oupwe apasa, pwarata pwe Joseph Smith i ewe soufosun Kot, me ewe unusen uruon ewe Mwichefen epwe punong non mokurom.”⁶

Pwan usun chok, President Dallin H. Oaks a apasa, “Ekkoch kapasen pwarata ra murinno ar repwe nom won kewe apachapachen peche repwe ekir nap seni ekkewe pwasuk repwe iotek fan iter.”⁷ Ewe Ngun a awora nonnopokun pwarata ngeni ewe chon kapas me chon rongoronng.

Pwan ew osukosuk, usun a affat non an Kevin porous, nuokus. Nupwen Paul a mak ngeni Timothy:

“Kot ese ngenikich ewe ngunun nuokus; nge a fen ourakicheno ren manaman, me tong. …

“Kosap saw ren om pwarata usun ach Samon.”⁸

Ekkewe Memefin nuokus rese feito seni Kot nge ewe chon koum. Awora nuku, usun Kevin a fori, epwe mut ngonuk om kopwe ngas seni ekkei memmef me mecheresino ne apasa met mi non non netipom.

Ua nuku ew kapasen pwarata a pusin nom non kich, nge, ren ach sipwe tumunu me amarieta, Alma a aiti ngenikich pwe sipwe amarochu ach kapasen pwarata mee tumunufichi.⁹ Nupwen sipwe fori ussun ena, “epwe wor waran, me marita, me wor uwan.”¹⁰ Ika ese wor ei “epwe pwaseno.”¹¹

Emon me emon chon ewe Aewin Presetensi a ngeni kich kapasen emwen ren ifa usun sipwe tumunu ew kapasen pwarata.

Preseten Henry B. Eyring a aitikich pwe ach “kamatip won ewe kapasen Kot, ennetin iotek, me aneasochis ekkewe annuken ewe Samon mi namwot epwe fis fan chommong pwe ami kapasen pwarata epwe mamarita me pochonunono.”¹²

Preseten Dallin H. Oaks a achema ngenikich pwe ika sipwe tumunu ach kapasen pwarata, “mi namwot sipwe angei ewe sakrament iteiten wik (nengeni D&C 59:9) pwe sipwe tufichin weiri ewe pwon mi auchea pwe ‘Ngunun epwe nonnom [rech]’ (D&C 20:77,).”¹³

Me President Russell M. Nelson a chok karan aiti ngenikich:

Amwongoni [ami kapasen pwarata] ren ennet. …

“… Amaruketa non ewe kapasen ekkewe soufos nom me iei. Tingorei ewe Samon epwe aituk ifa ussun kopwe rongorong och ngeni. Awora chommongun om fansoun non ewe tempel me non angangen uruon famini.

“… Aucheani ami kapasen pwarata nap seni mettoch meinisin.”¹⁴

Pwi me fefinei achengicheng, ua pwon pwe nupwen oua unusen weweiti met ew kapasen pwarata, me nupwen oupwe apasata, oupwe ngas seni osukosuken tipemwaramwar me nuokus, otufichikemi ami oupwe amarata me tumunu ei akauchean pisek, ami kapasen pwarata.

Sia feioch ren an wor chommongun minen apiru ren ekkewe soufosun nom me ikenai ekkewe ra fen pwarata ar pochokunen kapasen pwarata.

Mwirin an Kraist ewe mano, Peter a uta me pwarata:

“Iwe ami meinisin oupwe sinei … pwe ren ewe iten Jises Kraist ewe re Nazareth, ewe oua irapengesieno, nge Kot a amanauata seni mano, … ei mwan a uta ikei mwemi.

“… Aramas repwe kuna manau ren I chok, pun Kot ese ngeni aramasen fonufan pwan ew it a tongeni amanauakich.”¹⁵

Amulek a tapweno mwirin an Alma afanafan won nuku, a pochokun ne apasa: “Upwe pwarata ngenikemi ren pwisin inisi pwe ekkei mettoch mi ennet. Nengeni, ua apasa ngenikemi, pwe ngang mi sinei pwe Kraist epwe wareto me nein ekkewe noun aramas, … pwe epwe achasefani ekkewe tipisin ewe fonufan; pun ewe Samon Kot a fen apasa.”¹⁶

Joseph Smith me Sidney Rigdon, ir chon pwarata ew amwararen nemwesepwi ren ewe Chon Amanau mi manau sefan, ra pwarata:

“Iwe iei, mwirin ekkewe chommongun kapasen pwarata ekkewe a kawor meren i, iei ewe kapasen pwarata, omuchunon me nein meinisin, minne sia awora fan itan: Pwe i mi manau!

“Pun sia kuna i, me pwan won ewe peniefichin Kot; me sia rong ewe mongungu a awora rekot pwe i Chok ewe Anamon Noun ewe Sam.”¹⁷

Pwi me fefinei, Ua tingor ngenikemi oupwe kukkuta tufichin ami oupwe awora ami kapasen pwarata non kapas me non fofor. Usun ew tufich a karan feito ngeni ei, nesoponon ew mwich ngeni ewe mayorun ew ionapen teninim non South America non an ewe nenien mwich fiti chochon an ewe mwich. Nupwen sia awesano fiti wesewesen kinamwein memef, ua ekieki pwe upwe apasa ai kapsen pwarata. Ai uwa fiti ewe memef, ua awora ew pwarata pwe Jises Kraist i ewe Noun ewe Kot mi manau me ewe Chon Amanauen ewe fonufan. Mettoch meinisin a ekkesiwin non ena fansoun. Sise tongeni chiwen amonungaw seni ewe ngun non ewe rum. Usun nge meinisin a wor rer memef. “Ewe Chon Ourur … a pwarata usun ewe Sam me ewe Nau.”¹⁸ Ua fokkun kinisou ua tingor ewe poracho ai upwe apasa ai kapasen pwarata.

Nupwen a wor ew fansoun usun ei, turufi, foropacheno. Oupwe mefi ewe pwichikaren ewe Chon Ourur non ami nupwen ouwa fori.

Ua apasa ai kapasen pwarata— pwe Kot I Samach won Nang, Jises Kraist mi manau, me ewe Mwichefenin Jises Kraist ren Aramas mi Pin non Fansoun Soponon iei an Kot Mwichefen won fonufan ikenai me a emwen me ren nouch soufos mi acheingicheng, Preseten Russell M. Nelson. Non iten Jises Kraist, amen.