Anisi ekkewe mi Osupwang me Netipengaw

Pwi me fefinei kana, nouch soufos Preseten Russell M. Nelson epwap kapas ngeni kich ekiseno non ei mwich. A eisiniei pwe upwe fos akkom.

Ai itenap ikenai epwe ussun met Ewe Mwichefenin Jises Kraist ren Aramas mi Pin non Fansoun Soponon me memper ra awora me fori fan iten ekkewe mi osupwang me netipengaw. Upwe pwan porous ussun ewe mi chok nonno angang mi kawor seni ekkoch murinon aramas. Awora ngeni ekkana ir mi osupwang iei ew nongonong non meinisin namanamen Abraham me non pwan ekkoch.

Ekkoch maram ra no, Ewe Mwichefenin Jises Kraist ren Aramas mi Pin non Fansoun Soponon a aewin repotei ewe chounon ach angangen anisi ekkewe mi osupwang ngeni unusen fonufan.¹ Ach mwoni tou ren ier 2021 ren ekkana mi osupwang non 188 fonu non unusen fonufan a ukukun $906 minion—arapakan ew pinion chana. Non kapachetan, chon ach mwichefen ra pusin finata ar repwe angang ese fiti kamo a nap seni 6 minion awan angang non chok pwan ewe popun.

Ekkana ukukun nampa, ewer, ew repot ese unus ren ach awora me aninis. Rese apachanong ekkewe angang an ekkewe chon Mwichefen won pusin winikaper ra awora nupwen ra iamwiri emon me emon ne kokko fengen me angang ra pusin mochen fori nefiner fengen kewe chon Mwichefen. Me ach repot ren 2021 ese kapas usun met emon me emon chon Mwichefen ra fori seni ese nean mwichen awora aninis rese akoko ngeni ach Mwichefen. Ua poputa ren ekkei.

Non 1831, kisiseni ruu ier mwirin ewe niwinsefaniton ewe Mwichefen a foruta, ewe Samon a awora ei pwarata an epwe emweni chon ewe Mwichefen me, ua nuku, meinisin Noun kewe semirit unusen fonufan:

“Nengeni, ese fich ngeni ai upwe nemenem non mettoch meinisin; pun ion a echimw non mettoch meinisin, i ewe mi pwan chipwang me esap emon chon angang mi mirit. …

“Ennet ua apasa, aramas repwe ourekin pachenong non ew popun mi eoch, me fori chommong mettoch won pusin ar mochen, me epwe wato watten wenechar;

“Pun ewe pochokun a nom non ir, minne ir ra angang fan iter pusin. Me ren ukukun an aramas foffor murinno esap pout senir nifanger.”²

Nap seni 38 ierin ai emon Apostel, me non nap seni 30 ierin ai angang, ua fen kuna chommong kisasew ne angang weires ren ekkewe mwicheich me ekkewe aramas ewe sokkun ei pwarata a awewei ussun “ew murinon popun” me “uwe[ato] watten wenechar.” Mei wor ekkewe minen awewe ese anea ussun angang unusen ewe fonufan, mi towaw seni ach kewe pusin kinikin me pekinon ach weweiti. Ai nenengenochu ei, ua ekieki usun ewe soufos-king Benjamin non ewe Puken Mormon, ewe an afanafan mi pachenong ei ennet: “Nupwen oua angang ngeni chiechiemi aramas oua chok pwan angang ngeni ami Kot.”³

Watten angangen pekin aninis me aninis ngeni ekkewe mi osupwang ngeni atongeach kewe aramas a wor osukunan me pwomwen fofforun seni Ewe Mwichefenin Jises Kraist ren Aramas mi Pin non Fansoun Soponon me seni kich ekkewe souneng. Awewe chok, sia echikefen nepoputan ew me ew maram me awora ewe ukukun moni nonnopokun ekkewe mongo sise ani an epwe anisi ekkana ir mi osupwang non ach kewe pwisin mwicheich. Ewe Mwichefen a pwan awora watten aninis ngeni ekkewe mi osupwang me ekkoch angangen aninis non unusen fonufan.

Me nuku met meinisin ach Mwichefen mi for wenengeni ekkoch, napengeni angangen anisi mi osupwang ngeni ekkewe semirit noun Kot non unusen fonufan a katou seni aramas me mwichen aramas ese wor ar akoko ngeni ach Mwichefen. Ussun an emon nouch kewe Aposel a kuna, “Kot a nounou nap seni emon aramas ren ponutan an ewe wachemuken me amwararen angang. … A fokkun watte, fokkun weires, ngeni emon chok aramas.”⁴ Ussun kich chon ewe Mwichefen mi niwinsefanito, a auchea ach sipwe apareni me kinisouasini ewe angang an ekkoch.

Ewe Mwichefenin Jises Kraist a mochen epwe anisi ekana mi nom non osupwang, me a pwan mochen epwe angang fengen me ekkoch non ei angang. Sia karan chok fori ew watten niffang ngeni ewe United Nations World Food Programme. Non ekkewe chommong ierin ach angangen aninis, ru mwicheich pwano pwe ir mi angang fengen ngeni kich: angang fengen me ewe Red Cross me Red non chommong fonu a awora ngeni noun Kot kewe semirit ngas fansoun ekkewe osukosuk me kokotongaw. Iwe usun chok, a nangatam fansoun kich mi angang fengen ren Catholic Relief Services. Ekkei mwichen aramas ra kan aitikich chommong mettoch usun aninnis ngeni unusen fonufan.

A pwan wor ach uaochun aninis fengen me ekkoch emwicheich, pachenong Muslim Aid, Water for People, me IsraAID, sia chok ura ekkoch. Nupwen ew me ew mwicheich ren angangen anisi mi osupwang a pusin wor an neni ren winiti angangoch sia aea fengen ewe chok ew popun sia anisi riaffou nein noun Kot kewe semirit. Meinisin ei a kinikinin an Kot angang fan iten Noun semirit.

Minefon pwarata a aitikich pwe ach Chon Amanau, Jises Kraist, i “ewe ennetin saram a asarama meinisin aramas mi feitto non ewe fonufan.”⁵ Nge ei, meinisin noun Kot semirit ra esinesin ar repwe angang ngeni I me angang fengen ngeni ukukun ar sine me tongeni.

Ewe Puken Mormon a aitikich pwe “mettoch meinisin minne a tingor me pesei pwe repwe fori och, me tongei Kot, me angang ngeni i, a amemef me ren Kot.”⁶

Soposopono:

“Pun nengeni, ewe Ngunun Kraist a kawor ngeni emon me emon aramas, pwe i epwe sinei öch seni ngaw; ina minne, ua pwar ngenikemi ewe napanapen apung; pun mettoch meinisin minne a tingorei aramas pwe repwe fori öch, me pesei pwe repwe nuku non Kraist, a feito me ren ewe manaman me niffangen Kraist. …

“Iwe iei, ami pwi, … oua sinei ewe saram ren minne oupwe tongen apungu emon, minne saram ina ewe saramen Kraist.”⁷

Ikkei ekkoch minen awewe ren semirit noun Kot ra anisi pwan ekkoch semirit noun Kot ren ewe auchean kinikinin aninis ren mongo, tumunun safei, me osukun:

Engon ier a no, ekkewe Kanhdaris, emon Sikh mwan me punuwan ewe non ewe United Arab Emirates, ra pusin awora ew eingeingen pochokun ne amongoni ekkewe mi echik. Seni ewe Guru Nanak Darbar Sikh tempel, ra awora nap seni 30,000 mongo ese wor futuk non iteiten nesoponon wik ngeni ese nifinifin ion a tonong non asamer kewe, ina mo ika mi sokono an namanam me ir chon ian. Dr. Kanhdari a awewei, “Sia nuku pwe meinisin ir chok ew, kich noun emon Kot, me sia nom ikei ach sipwe anisi unusen aramas.”⁸

Ewe angangen pekin safei me tumunun ngi ngeni ekkana ra mochen aninis ina ew kapas awewe. Non Chicago, ua churi emon Syrian-American emon Tokter ren pekin safei, Dr. Zaher Sahloul. I emon me nein ekkewe ra forata MedGlobal, ewe minne a forata ekkewe ra angangoch non pekin safei ar repwe fangeno ar fansoun, sinenap, tipachem, me tufich me emwen ne anisi ekkoch non fansoun watten osukosuk, ussun non ewe maun an Syria, ikewe Dr. Sahloul a efeiengawa manauan ne awora aninisin safei ngeni ekkewe aramas esap sounfiu. MedGlobal me ekkewe mwicheich mi ussun chok (pachenong chommong ekkewe mi nipakoch Aramas mi pin non Fansoun soponon) ra pwarano pwe Kot a amwasanga ekkewe mi wor ar nipwakoch non wiser ren nuku ar repwe wato aninisin ekkewe mi osupwang non unusen fonufan.⁹

Chommong noun Kot kewe semirit ra akkomwa ekiekin ekkoch mwen ir ra pachenong non osukun, pwan unusen fonufan. Ew murinon minen awewe, sia sinei seni ach angang weires ne anisi mi osupwang, ina ewe mokutukut an emon mwan itan Mr. Gabriel, ewe a fen pin suseni chommong osukosuk ren ekkoch mettoch mi fis. A karan chok kuna pwe puku ngoroun semirit mi su seni ewe fonu non Eotiw Afengin Africa ra mochen aninis ar repwe amanaua ar epinukunuk me anganga ar ekiek. A ochu fengeni ekkoch sense non ewe mwichen chon suseni fonuer ngeni met ra eita ngeni “tree schools,” ikewe semirit ra chufengen ren ekkewe nesen fan chunon efoch ira. Ese uti an emon epwe forata ika emweni nge pusin i won winikapan a emweni ekkewe angang weires a awora tufichin kaeo fan iten ngoroun semirit non primary school non fansoun ekkewe ierin pekusun ekiweiresin mokutuno ekis.

Ewer, mei wor unungat minen awewe esap wewen pwe meinisin met a wor kapasan me fis seni kewe emwicheich ir aramas emon me emon aramas ra anisi an epwe murinno ika seni Kot a ennetin ina. Ekkei minen awewe ra pwarano pwe Kot a amwasanga chommong mwicheich me aramas ar repwe fori watten murino. A pwan pwano pwe chommong kich sipwe esinna ewe murinno a fis seni ekkoch me anisi nupwen mi wor ach fansoun me wewen ach sipwe fori.

Ikkei ekkoch awewen angang ewe Mwichefen a anisi me minne nouch kewe chon Mwichefen me ekkoch aramas murinno me ekkewe mwicheich ra pwan anisi fiti ew me ew fes ren ewe fansoun me mwoni:

Ua poputa ren kinamwen namanam. Non ach sipwe anisi ena, sia anganga pusin met sia pwapwaiti nge pwan met ekkewe ekkoch namanam ra pwapwaiti. Ussun nouch aemonun Preseten, Joseph Smith, a osukuna, “Sia etiwa ewe tufichin fen ngeni ewe Kot Napanap anongonong won emmwenin ach nuku, me mut ngeni aramas meinisin ewe pwan chok tufich, mut ngeni ir repwe fen ngeni non napanapan, ian, are met ra mochen.”¹⁰

Ekkoch minen awewen an ewe Mwichefen mi niwinsefanito ewe angangen anisi mi osupwang me ekkoch fes ekkewe ra pusin finata ne aninis seni nouch kewe chon mwichefen ir ach kewe itefounon sukun, college, me university me ach kewe rese kon itefouno nge iei ra awora watten fes ren ngasenon seni ekkewe riaffou seni ekkewe tanon me mokutuno ren osukosuk mi pusin fisita ussun ouniar me chechin fonu.

Ekkoch angangen tong ennet nouch kewe chon mwichefen ra anisi ren ar pusin finata ekkewe fes me ar achocho ngeni ra fokkun chommong ne etetenatiw, nge ren chok ach apasata ekkei ekkoch epwe finata ar sokofesen me auchear: fiu ngeni ekkewe sokkun mwichen aramas me ekkoch ra oputa ekkoch ren ese wor popun; kutta ifa ussun epetin me echikaran ei samau; anisi ekkewe mi ter inisir; anisi pekin kon me mwicheich; me ochuono ekkewe nongonongun och me ngaw ren meinisin.

Meinisin ekkewe pekusun angangen anisi mi osupwang ren ewe Mwichefenin Jises Kraist ren Aramas mi Pin non Fansoun Soponon ra kutta ar repwe tapweno mwirin ewe minen apiru ren ekkewe aramas tupwen aramas ra awewei me non ewe Puken Mormon: “Iwe iei, non ar nonnomun unusen feioch, rese asueno emon mi seneno, are ekkewe mi echik, are ekkewe mi kaka, are ekkewe mi semwen, … me iei ra … kisasou ngeni meinisin, ekkewe mi watte me pwan ekkewe mi kukkun, ekkewe mi fotek me pwan ekkewe mi ngaseno, mwan me pwan fefin, ika mwo nukun ewe mwichefen are non ewe mwichefen.”¹¹

Ua pwarata ussun Jises Kraist, minne an ewe saram me Ngun a emweni semirit meinisin noun Kot ar repwe anisi ekkewe mi osupwang me netip riaffou non unusen fonufan. Non iten Jises Kraist, amen.