Farisata Om Pochokun, O Zion
Emon me emon kich sipwe cheki tetenochuch fiti iotek non pekin inis me non pekin ngun.
Kapas monomon ir ew auchean kinikinin an ewe Samon Jises Kraist manamanen pochokunen afanafan. Mecheresin wewen, an ewe Chon Amanau kapas monomon ir tutunap ra anonno ekkewe ennet non pekin ngun ngeni ekkewe mettoch me mwokutun manau Ren awewe, ewe Kapas Allimen Testamen Sofo a ur ren afanafan mi awewei ewe muun Ngang ngeni efou foun ira,1 ngeni efou faw mi momwong,2 ngeni emon mi wor imwan me chon angang non an atake,3 ngeni engon fopun nimenimoch,4 me pwan chommong ekkoch. Fansoun an ewe Samon angang non Galilee, ekkewe pukefel ra affata pwe “ese kapas ngenir ren och mettoch ika ese nounou kapas monomon.”5
Ewe wewen ika porousen ew kapas monomon napengeni ese fatatateoch awewen. Nge, ewe tutunap a chok awora ennet seni nang ngeni emon chon angei ren ukukun nonnon an nuku non Kot, ren an pwisin amonata non pekin ngun, me ren an mochen kaeo. Iwe, mi namot emon epwe aea an pungun finata me nikitu ne “tingor, kutta, me fichifich”6 an epwe kuna ekkewe ennet mi nom non kapas monomon.
Ua iotek pwe ewe Ngun mi Fel epwe asarama emon me emon kich nupwen sia ekieki auchean ewe kapas monomon usun ewe mongon apupunun noun ewe King ewe.
Ewe Mongon Apupunu an King
“Me Jises … a pwan nounou sefan ekkoch kapas monomon, me apasa,
“Ewe muun nang a iei usun, a wor emon king a amonnata mongon apupunun noun at,
“A tinano noun kewe chon angang pwe repwe ereni ekkewe aramas ra kokkoto pwe repwe fiti ewe kametip, nge ekkewe aramas rese mochen fiti.
“Iwe, a tinano pwan ekkoch noun kewe chon angang, a apasa, Oupwe ereni ekkewe ra kokkoto, Pwe, ai ei kametip a fen monnota: nei kou me nei kewe man mi aumanau a fen ninino, me mettoch meinisin a fen monnota: Oupwe feito fiti ei mongon apupunu.
“Nge ekkewe ra kokkoto rese mo afani, nge ra chok en me pwisin fori an angang, emon me emon feino non an atake, pwan emon a feino non an sitowa.”7
Non fansoun nom, apwapwan apupunu ina eu me nein ekkewe fansoun apwapwa non manauen chon Jew—ew mettoch a tongeni fis non ew wik pwan mwo ru. Ena sokkun mettoch a auchea epwe watte kokkotun, me wasona ra angei esinesin chok me mwen ena ran, fiti ew achechem a titino atun poputan ewe ranin ewe apwapwa. Ew etiwetiw seni emon king ngeni noun aramas ngeni ew apupunu usun ei sokkun a ew annuk. Nge, chommong me nein ekkewe wasona mi kokkoto non ei kapas monomon rese feito.8
“Ar rese etiwa ne fiti an ewe king kametip a ew fofforun ungeni … nemenem mi tekia me ew fofforun atai annuk ngeni ewe chon nemenemen muu me noun we. … Ewe sapeseni ren emon mwan ngeni an atake me ren emon ngeni an [pwapwaiti angangen pisnis]”9 a pwarano mwanin met ra akkom aucheani me ar amonungaw seni mochenin ewe king.10
Ewe kapas monomon a soposopono:
“Mwirin a apasa ngeni noun chon angang, Ewe apupunu a fen monnota, nge ekkewe aramas ua kokkorir rese fich ngeni.
“Iwe oupwe feino won ekkewe anenap, o korato chommong aramas io chok oua kuna, repwe fiti ewe apupunu.
“Iwe ekkewe chon angang ra feinno won ekkewe aan, o ra emwicha fengeni meinisin ekkewe aramas ra kuner, ese nifinifin aramas och o aramas mi ngaw: iwe ewe neenien apupunu a ureno ren aramas.”11
Ewe oreni non ena fansoun pwe ewe souketiwen ewe mongon apupunu—non ei kapas monomon, ewe king—an epwe awora uf fan iten ekkewe wasonan ewe apupunu. Ekkena sokkun ufoufen apupunu ir mi mecheres, rese pwan amwarar minne meinisin chon fiti ra ufouf. Non ei napanap, tettenin aramas me wis ir mi koturuno, iwe meinisin chon fiti ewe mongo ra tongeni chufengen non ar nonnofengen.12
Aramas mi ketiw seni ekkewe anenap ar repwe fiti ewe apupunu ita esap wor ar fansoun me anen ar repwe kut ufer mi fich ren amonnetan ewe apupunu. Ina minne, ewe king eni epwe ngeni noun kewe wasona ufer seni pwisin ufan kewe. Meinisin ir mi kawor ngenir ewe tufichin ar repwe pwisin ufouf non ufoufen mi tekian King.13
Nupwen ewe king a tonong non ewe nenien apupunu, a nenengeni ewe mwicheich me mwitir apareni pwe mi fatoch emon wason ese ufouf ufoufen apupunu. Ewe mwan a emwenito, me ewe king a eis, “Pwii, ifa usun om tonong ikei nge kose ufouf ufoufen apupunu? Ewe mwan a chok fanafaneno.”14 Auchean wewen, ewe king a eis, “Pwata kose ufouf ufoufen apupunu, nge a fen wor echo mi kawor ngonuk?”15
Mi fatoch pwe ewe mwan ese ufouf mi fich ngeni ewe auchean mettoch, me ekkewe kapas, “Ewe mwan a chok fanafaneno” a affata pwe ese wor an ewe mwan kunetipingen.16
Elter James E. Talmage awora ekkei kapas mi akkaiti usun auchean fofforun ewe mwan: “Pwe ewe chon fiti ese ufouf a fen tipisin tumunugaw, ennetin osufonungaw, ika ekoch watten tipis, a fatafatoch seni porausan. Akkom, ewe king a men etiwetiwoch, a chok eis ifa usun an ewe mwan a tonong nge ese ufouf ufoufen apupunu. Ika ewe wasona efen awewei sokonon nikinikin, ika efen awora weweochun an kunetipingen, i epwe fokkun fen kapas; nge sia sinei pwe a chok fonofonono ese kapas. An ewe king kokko a fen non ngeni meinisin ion noun kewe chon angang ra kuna; nge emon me emon neir epwe tonong non ewe nenien king me ren ewe asam; me mwen ar repwe tori ewe rumwen mongo, ikewe ewe king epwe pwato, emon me emon epwe ufoufoch; nge ewe emon ese ufouf, ren och popun a tonong me ekis; me ese tonong ikewe ekkewe chon mas ra nom ie ren ewe nenien tonong, i emon soumwacho.”17
Emon Souneng chon mak, John O. Reid, a esinna pwe an ewe mwan etiwengawa an ese ufouf ewe ufoufen apupunu a pwarata an “osufonungaw ngeni ewe king me noun we.” Esap chok ren an ese or ufoufen apupunu ren; nge, a finata esap mo ngo ufouf echo. A ungeni an esap ufouf mi fich ngeni ewe apupunu. An ewe king ponuweni a mwitir me opunguno: “Foti poun me pechen, o oturau nukun, me poutanong i non ewe kirochun nukun; Ikewe ie epwe or kechiw me akkarungi ie.”18
An ewe king apungu ewe mwan esap chok anongonong won an ese wor ufan ufoufen apupunu—nge ren ennetin, “i a, finata pwe esap mo nge ufouf echo. Ewe mwan … a mochen ewe pekin osufonoch ren an fiti ewe mongon apupunu, nge … ese mochen fori orenien ewe king. A mochen fori mettoch non napanapen an mochen. An ese wor ufan mi fich a pwarano netipan an mochen ungeni ewe king me an kewe ourour.”19
Chommong Ra Kokko, nge Chokisikis Ra Kefinita
Ewe kapas monomon a osopwano ren ei anonnonun uwokisin: “Pun chommong ra kokko, nge chokisikis ra kefinita.”20
Amwararan pwe, Joseph Smith a fori ei ekesiwin ngeni ei uwokisin seni Matthew non an amemefin chiakun ewe Paipen: “Pun chommong ra kokko, nge chokisikis ra kefinita; ina minne meinisin rese ufouf ewe ufoufen apupunu.”21
Ewe tingorun kokko ngeni ewe mongon apupunu me ewe finata ne mongo non ewe kametip ir mi wewe fengeni nge pwan sakofesen. Ewe tingorun kokko mi no ngeni meinisin mwan me fefin. Emon aramas mi tongeni etiwa ewe tingorun kokko me mwotiw ren ewe kametip—nge ese mo finita an epwe mongo pokiten i ese wor ufan mi fich ngeni ewe ufoufen apupunun siwin ngeni nuku non ewe Samon Jises Kraist me An chen mi ning. Iei, mi wor rech ru an Kot kokko me pwisin ach pwonueni ena kokko, me chommong mi tongeni kokko nge chokisikis ra kefinita.22
Sipwe ika sipwe winiti chon kefinita esap ew wis mi oukuk a ewis ngenikich. Nge, en me ngang kich mi tongeni finata ach sipwe kefinita seni tupwenun angangen ach pungun finata.
Ouse mochen oupwe esinna aean ewe kapas kefinata non ekkei wokisin mi nonno seni ewe Doctrine me Covenants:
Nengeni, a wor chommong mi kokko, nge chokisikis ra kefinata. Nge pwata rese kefinita?
“Pun a nap an netiper ekieki mettochun ei fonufan, me emweni ar epinikunuk ngeni ewe sufonun aramas.23
Ua nuku ewe pungunon ekkei uwokisin ir mi wesewesen wenechareu. Ese wor noun Kot tettenin ion a kon echeni ren minne sipwe aneanei pwe fan ew itach epwe kapacheta won. I ese ouku “ekkewe mi finita” ngeni fitemon chok. Iwe nge, ach netip, ach mochen, ach asufonu pwonen kapas allim me angangepin, ach aneasochis ngeni ekkewe annuk, me, akkauchean, an ewe Chon Amanau chen me umoumoch a finata ika sipwe anneanong me nein noun Kot mi finita.24
“Pun am aua achocho ne mak, pwe am aupwe pesei nöum kewe, me pwan pwium kewe, pwe repwe nuku non Kraist, me repwe siwini nonnomur ngeni Kot; pun am aua sinei pwe a seni chen kich sia manau, me mwirinon meinisin met sia tongeni fori.”25
Non osukosuken manauach iteiten ran me non fitikokon ewe fonufan minne sia nom non, eni sipwe orukoruk seni ekkewe mettochun esemuch mi kon auchea ren ach fori mocheniach, feiochuch, itefounoch, me anapa met kich mi aucheani. Ach mwochomwochen foffori “ekkewe mettochun ewe fonufan” me “ewe sufonun aramas” repwe efisi an epwe turseni kich wisach seni ach uputiw non pekin ngun ngeni mettoch mi kis seni ew tarotarongawen sup.26
Pwon me Kapasen Pwarata
Ua anniwini an ewe Samon kapasen fon ngeni Noun aramas mi kawor me ren ewe soufosun Testamen Noom Haggai: “Iwe iei anon ewe Samonun aramas; Aureki napanapemi.”27
Emon me emon kich sipwe atonaochu met kich mi aucheani non pekin inis me ngun me ennetin iotek ach sipwe esinna ekkewe mettoch non manauach ir mi eppeti ekkewe chommong feioch Samach won Nang me ewe Chon Amanau ra mochen ngeni kich. Ewe Ngun mi Fel epwe anisi kich ne kunaochu ion wesewesen kich.28
Nupwen sia kuttafichi ewe niffang non pekin ngun ren ekkewe mas ar repwe kuna me sening ar repwe rong,29 Ua pwon pwe sipwe feioch ren ewe tufich me kapung an epwe apochokuna ach pwonen pachengeni ewe Samon mi manau. Sipwe pwan angei ewe manamanen Kot non manauach30—me nesopon sipwe kokko ngeni me finita ngeni an ewe Samon kametip.
“Neno, neno; farisata om pochokun, O Zion.”31
“Pun Zion epwe napeno non ning, me non pinin; kianin kewe repwe watteno; chunnan repwe pochokununo; ewer, ennetin ua apasa ngonuk, Zion epwe uta me ufoufuta ufan mi ning.”32
Ua pwapwa ne pwarata usun pinin me wesetan Kot, Samach Esemuch, me usun Noun we At Achengicheng, Jises Kraist. Ua pwarata pwe Jises Krasit I ach Chon Amanau me Chon Angasano me I mi manau. Me ua pwan pwarata pwe ewe Sam me ewe Nau ra pwa ngeni ewe at Joseph Smith, minne a poputani ewe Niwinsefaniton an ewe Chon Amanau kapas allim non ewe fansoun soponon. Amo emon me emon kich sipwe kutta me feioch ren mas an epwe kuna me sening an epwe rong, ua iotek non ewe it mi pin iten Jises Kraist, amen.