Fesoasoani i Ē Matitiva ma Mafatia

Uso e ma tuafafine, o le a saunoa mai lo tatou Peresitene pele o Russell M. Nelson ia i tatou i se taimi mulimuli ane o lenei sauniga. Ua ia talosagaina a’u e avea ma failauga muamua.

O la’u mataupu i le asō e faatatau i mea e foai atu ma faia e Le Ekalesia a Iesu Keriso o le Au Paia o Aso e Gata Ai ma ona tagata mo ē matitiva ma mafatia. O le a ou talanoa atu foi i foai faapena e faia e isi tagata lelei. O le foai atu ia i latou e lē tagolima o se mataupu faavae i tapuaiga uma faaAperaamo ma i isi foi tapuaiga.

I nai masina talu ai, sa lipotia ai e Le Ekalesia a Iesu Keriso o le Au Paia o Aso e Gata Ai mo le taimi muamua le aofa’iga o a tatou galuega alofa i tagata i le lalolagi atoa.¹ O a tatou tupe faaalu i le 2021 mo i latou e lē tagolima i atunuu e 188 i le lalolagi atoa e $906 miliona—toeitiiti lava piliona talā. E faaopoopo atu i ai, sa ofofua atu e o tatou tagata le silia ma le 6 miliona itula o galuega i le mafuaaga lava e tasi.

O le mea moni, o na fuainumera o se lipoti lē mae’a o a tatou foai ma fesoasoaniga. E le o aofia ai auaunaga faaletagata lava ia a ō tatou au paia e tuuina atu patino a o latou auauna ai i le tasi ma le isi i tofiga valaauina ma auaunaga ofofua atu mai le tagata i le tagata. Ma e le o ta’ua foi i le tatou lipoti o le 2021 mea o loo faia e o tatou tagata taitoatasi e ala i faalapotopotoga lē mafaitaulia o galuega alofa e lē fesootai aloa’ia ma le tatou Ekalesia. Ou te amata atu i mea nei.

I le 1831, e le’i atoa le lua tausaga talu ona faatulagaina le Ekalesia toefuataiina, sa tuu mai ai e le Alii lenei faaaliga e taiala ai ona tagata ma, ou te talitonu, o Ana fanau uma i le lalolagi atoa:

“Aua faauta, e lē tatau ona Ou poloai atu i mea uma; aua o ia o lē e tau faamalosia i mea uma, o ia lava lea o se auauna paie ma lē poto. …

“E moni Ou te fai atu, e tatau i tagata ona auai ma le naunautai i se faamoemoega lelei, ma fai mea e tele i lo latou lava loto malie, ma aumai le amiotonu tele;

“Aua ua i totonu ia te i latou le mana, lea ua latou pule ai ia te i latou lava. O le a lava le tulaga e oo i ai le faiga e tagata o mea lelei, o le a leai lava se ala o le a aveesea ai lo latou taui.”²

I le silia ma le 38 tausaga i le avea ai ma se Aposetolo ma le silia ma le 30 tausaga o galuega faapolofesa, ua ou vaai i le tele o taumafaiga agalelei a faalapotopotoga ma tagata o ituaiga o loo faamatalaina mai e lenei faaaliga o se “faamoemoega lelei” ma le “aumai[a] o le amiotonu tele.” E lē mafaitaulia faataitaiga o auaunaga alofa faapena i le lalolagi atoa, i tala atu o o tatou lava tuaoi ma tala atu o lo tatou iloa lautele. I le mafaufau ai i lenei mea, ou te manatua le perofeta o le Tusi a Mamona, le tupu o Peniamina, o lē ana le lauga lea sa aofia ai le upumoni e faavavau: “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua.”³

O le tele o le uelefea ma auaunaga alofa i o tatou uso a tagata o loo aoaoina ma faatinoina e Le Ekalesia a Iesu Keriso o le Au Paia o Aso e Gata Ai ma i tatou o ona tagata. Mo se faataitaiga, tatou te anapopogi i le Aso Sa muamua o masina taitasi ma foai atu e lē itiiti ifo ma le tau tutusa o meaai e le o taumafaina e fesoasoani ai ia i latou o ē lē tagolima i o tatou lava faapotopotoga. E fai foi e le Ekalesia ni foai tetele mo galuega alofa ma isi auaunaga i le lalolagi atoa.

E ui i mea uma e fai patino e le Ekalesia, ae o le tele o auaunaga alofa i fanau a le Atua i le lalolagi atoa e faatinoina e tagata ma faalapotopotoga e leai se fesootaiga aloa’ia ma le tatou Ekalesia. E pei ona sa matauina e se tasi o a tatou Aposetolo: “O loo faaaogaina e le Atua le silia ma le toatasi le tagata mo le faataunuuina o lenei galuega sili ma le ofoofogia. … E telē na’uā ma faigata tele mo soo se tagata se toatasi.”⁴ I le avea ai ma tagata o le Ekalesia toefuataiina, e manaomia ona tatou iloa ma talisapaia atili le auaunaga a isi.

Ua tuuto atu le Ekalesia a Iesu Keriso e auauna atu ia i latou e lē tagolima, ma ua tuuto atu foi e felagolagoma’i faatasi ma isi i lena taumafaiga. Talu ai nei sa tatou faia ai se meaalofa telē lava i Malo Aufaatasi mo le Polokalame o Meaai i le Lalolagi. I le tele o auga tausaga o a tatou galuega alofa, e lua lava faalapotopotoga ia e tu matilatila mai o ni paaga autu: o polōketi faatasi ma sui o le Koluse Mumu ma le Red Crescents i le tele o atunuu ua maua ai e fanau a le Atua se toomaga tāūa i taimi o faalavelave faalenatura ma tặua. E faapena foi, o loo i ai se tatou faamaumauga umi o fesoasoaniga faatasi ma le Tautua mo Toomaga a le Katoliko. O nei faalapotopotoga ua latou aoaoina tele i tatou e uiga i toomaga i le lalolagi.

Ua i ai foi ni a tatou fegalegalea’iga manuia ma isi faalapotopotoga, e aofia ai le Muslim Aid (Fesoasoaniga a Mosalemi), Water for People (Suavai mo Tagata), ma le IsraAID, na o ni nai vaega ua tā’ua. E ui e tofu faalapotopotoga atofa ma ana lava ia vaega e faapitoa i ai, ae ua tatou auai faatasi i le sini e tasi o le faamāmāina o mafatiaga o fanau a le Atua. O nei mea uma o se vaega o le galuega a le Atua mo Ana fanau.

Ua aoao mai e faaaliga o onapo nei e faapea o lo tatou Faaola, o Iesu Keriso, o le “malamalama moni ua faamalamalama ai tagata uma e o mai i le lalolagi.”⁵ O lenei mea, ua faamalamalamaina ai fanau uma a le Atua e auauna atu ia te Ia ma i le tasi ma le isi i le mea sili latou te iloa ma gafatia.

Ua aoao mai le Tusi a Mamona e faapea “o mea uma e valaau mai ma faatosina mai ia faia mea lelei, ma alofa i le Atua, ma auauna atu ia te ia, ua musuia e le Atua.”⁶

Faaauau:

“Aua faauta, ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso. …

“Ma o lenei, ou uso e, … ua outou iloa le malamalama tou te faamasino ai, o le malamalama lea o Keriso.”⁷

O nisi nei o faataitaiga o fanau a le Atua o loo fesoasoani atu i isi fanau a le Atua i o latou manaoga taua mo meaai, tausiga faafomai, ma le aoao atu:

I le sefulu tausaga talu ai, sa faalauiloa patino ai e le au Kandharis, o se tane ma se ava Sika (Sikh) i le Iunaite Arapi Emirate, se taumafaiga ofoofoogia e fafaga ē fia’a’ai. E ala atu i le malumalu o Guru Nanak Darbar Sikh, o loo la laulauina atu ai i le taimi nei le silia ma le 30,000 meaai fualaau aina i faai’uga o vaiaso uma i soo se tasi e ulufale atu i o la faitotoa, e tusa lava po o le a le lotu po o le ituaiga. Sa faamatala mai e Dr. Kandhari, “Ma te talitonu e tasi tagata uma; o i tatou o fanau a le Atua e tasi, ma ua tatou i ai iinei e auauna atu i tagata soifua.”⁸

O le tuuina atu o le tausiga faafomai ma le tausiga o oloa ia i latou e lē tagolima o le isi lea faataitaiga. I Sikako, sa ma feiloai ai ma le fomai Amerika-Suria mo ma’i tigaina, o Dr. Zaher Sahloul. O ia o se tasi o sui faavae o le MedGlobal, lea e faatulagaina le au polofesa faafomai e ofofua atu o latou taimi, tomai, malamalama ma le taitaiga e fesoasoani ai i isi o loo mafatia, e pei o le tặua a Suria, lea sa lamatia ai le soifua o Dr. Sahloul i le tuuina atu o le tausiga faafomai i tagata lautele. E faaalia e le MedGlobal ma faalapotopotoga faapena (e aofia ai le tele o le aufaigaluega o le Au Paia o Aso e Gata Ai) e faapea o loo auina atu e le Atua le aufaigaluega o le faatuatua e aumai le toomaga o loo manaomia mo ē matititva i le lalolagi atoa.⁹

E toatele foi fanau lē manatu faapito a le Atua o loo aofia i taumafaiga faafaiaoga, i le lalolagi atoa. O se faataitaiga lelei, ua tatou iloa e ala i a tatou taumafaiga o galuega alofa, o le gaoioiga a se alii e suafa ia Mr. Gabriel, sa avea ma se tagata sulufai mai tặua eseese i nofoaga eseese. Sa ia matauina talu ai nei le faitau selau o afe o tamaiti sulufai i Aferika i Sasae na manaomia le fesoasoani ia faatumauina le ola o o latou faamoemoe ma le gaoioi o o latou mafaufau. Sa ia faatulagaina isi faiaoga i le faitau aofai o tagata sulufai i le mea sa latou ta’ua o “a‘oga laau,” ia sa potopoto ai tamaiti mo lesona i lalo o le paolo o se laau. Sa le’i faatali o ia mo isi e faatulaga pe faatonutonu ae taitai lava e ia taumafaiga na tuuina atu ai ni avanoa e aoao ai mo le faitau afe o tamaiti o a’oga amata i le taimi o tausaga faigata o le fesulufa’isolo.

Ioe, o nei faataitaiga e tolu e lē faapea ai o mea uma ua talanoaina pe faia e faalapotopotoga po o tagata taitoatasi ua lelei pe faale-Atua ona o nisi latou te faataugāina punaoa e foai atu. O nei faataitaiga ua faaalia ai le musuiaina e le Atua o le tele o faalapotopotoga ma tagata taitoatasi e faia se lelei tele. O loo faaalia ai foi e tatau i le toatele o i tatou ona amanaia mea lelei ua faia e isi ma lagolagoina ona o loo i ai lo tatou taimi ma punaoa e faia ai.

O nisi nei o faataitaiga o auaunaga e lagolagoina e le Ekalesia lea foi e lagolagoina e o tatou tagata ma isi tagata lelei ma faalapotopotoga i foai patino o taimi ma tupe:

Ou te amata atu i le saolotoga o tapuaiga. I le lagolagoina ai, tatou te tautuaina o tatou lava tulaga manuia ae faapena foi le tulaga manuia o isi tapuaiga. E pei ona aoao mai le tatou uluai Peresitene, o Iosefa Samita, “Matou te taʼutino atu ua ia i matou le aiā tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea lava aiā tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai.”¹⁰

O isi faataitaiga o galuega alofa a le Ekalesia toefuataiina ma isi fesoasoaniga ia foi e lagolagoina e o tatou tagata volenitia, o a tatou a’oga, kolisi, ma iunivesite lauiloa faapea ma a tatou foai tetele faalēiloa ae ua faasalalauina nei mo le toomaga o i latou e mafatia mai faatama’iaga ma fesulufa’iga ona o faalavelave faalenatura e pei o asiosio ma mafui’e.

O isi gaoioiga o galuega alofa e lagolagoina e o tatou tagata i a latou foai ma taumafaiga ofofua atu ua matuā anoanoa’i ua lē mafai ona lisiina, ae o le a ta’ua na o ni nai mea nei o le a faailoa ai lo latou eseesega ma le tāūa: faato’ilaloina o le faailogalanu ma le faailoga tagata; sailiiliga i auala e puipuia ma togafitia ai faama’i; fesoasoani i tagata e i ai mana’oga faapitoa; lagolagoina o faalapotopotoga o musika; ma le faaleleia o siosiomaga mamā ma faaletino mo tagata uma.

O taumafaiga uma o galuega alofa a Le Ekalesia a Iesu Keriso o le Au Paia o Aso e Gata Ai e saili atu e mulimuli i le faataitaiga a se nuu amiotonu i le Tusi a Mamona: “Ma sa faapea, i o latou tulaga tamaoaiga, ona latou lē auina ese atu soo se tasi sa lē lavalavā, po o se sa fia ‘ai, po o se sa fia inu, po o se sa ma’i, … sa latou limafoai i tagata uma, o e matutua ma e laiti, o e pologa ma e saoloto, o tane ma fafine, pe e i fafo o le ekalesia pe e i totonu o le ekalesia.”¹¹

Ou te molimau atu ia Iesu Keriso, o lē ana le malamalama ma le Agaga o loo taialaina fanau uma a le Atua i le fesoasoani atu i ē matitiva ma mafatia i le lalolagi atoa. I le suafa o Iesu Keriso, amene.