Fafagaina ma le Tuuina Atu o Lau Molimau

O taimi taua o le olaga e masani ona oo mai ma e faafuasei, e tusa lava pe o e laitiiti lava. Faataga a’u e faasoa atu se tala e uiga i se tagata aoga o le aoga maualuga, o Kevin, sa filifilia e malaga i fafo atu o le setete mo se fuafuaga mo tagata aoga taitai, e pei ona faamatalaina i ana lava upu.

“Na oo i lo’u taimi i le laina, ma sa fesili mai le failautusi e foliga i se tagata ofisa mo lesitalaga mo lo’u igoa. Sa autilo i lana lisi ma fai mai, ‘Oi o oe o le alii talavou mai Iuta.’

“‘O le uiga o lau tala ua na’o au lava?’ Sa ou fesili atu ai.

“‘Ioe, na’o oe lava.’ Sa ia tuu maia le pepa o lo’u igoa ma le [upu] ‘Iuta’ na lolomi i lalo ifo ai. A o ou faapipiiina, sa ou lagonaina le pei na faailogaina a’u.

“Sa ou faaofiofi atu i le lifi o le faletalimalo ma isi tagata ’aoga e toalima ma o latou pepa o igoa e faapei o a’u. ‘Ei, e te sau mai Iuta. O oe o se Mamona?’ sa fesili mai ai se tasi o tagata aoga.

“Sa ou lagona le le mautonu i le faatasi ai ma nei tagata aoga taitai uma mai atunuu atoa. ‘Ioe,’ sa ou tali atu ai ma le matamuli.

“‘O outou ia e talitonu ia Iosefa Samita, lea na fai mai sa vaai i agelu. E te le talitonu moni i ai a ea?’

“Sa ou le iloa se upu e fai atu. Sa tau fai fepulafi uma mai tagata aoga i le lifi ia te au. Na faatoa ou taunuu lava, ae ua leva ona manatu tagata uma o au e ese. Sa fai si ou tetee ae na ou faapea atu, ‘ou te iloa o Iosefa Samita sa avea o se perofeta a le Atua.’

“O fea na oso mai ai lenei mea?’ Sa ou tau mafaufau ai. Ou te lei iloa sa i totonu ia te a’u. Ae sa moni ia upu.

“‘Ioe, na fai mai o outou uma o ni tagata lotu ululeaga,’ sa ia fai mai ai.

“Faatasi ma lena mea, sa i ai se sāō le lagolelei ao matala le faitotoa o le lifi. A o ao mai a matou ato, sa savali atu o ia i le potu tele ma ’ata.

“Ona fesili mai lea o se isi leo mai o’u tua, ‘Ei, e i ai ea foi se isi Tusi Paia a Mamona a?’

“Oi leai. Ua toe fai foi. Sa ou faliu ma iloa atu le isi tagata aoga sa matou i totonu o le lifi, o Christopher.

“‘Ua ta’ua o le Tusi a Mamona,’ sa ou fai atu ai, ma le manao e taatia loa le mataupu. Sa ou u’u maia a’u ato ma amata savali atu i le potu tele.

“‘O le tusi lena na faaliliu e Iosefa Samita?’ sa ia fesili mai ai.

“‘Ia, o lena,’ sa ou tali atu ai. Sa faaauau pea ona ou savali, ma le faamoemoe e aloese mai se faalumaina.

“‘E te iloa la pe faapefea ona maua sa’u [tusi]?’

“Sa oo mai ia te au se mau sa ou aoaoina i le seminare. ‘Ou te le ma i le talalelei a Keriso.’ ¹ A o oo mai lenei mea i lou mafaufau, sa ou lagona le mā ona sa ou matamuli.

“Sa le aluese lena mau ma a’u i le taimi atoa na totoe o le vaiaso. Sa ou taliina le tele o fesili na ou mafaia e uiga i le Ekalesia, ma sa ou maua ni uo se tele.

“Sa ou iloa ai sa ou ne’ene’e i la’u tapuaiga.

“Sa ou tuuina atu ia Christopher se Tusi a Mamona. Sa ia tusi mai ia te a’u mulimuli ane, ma ta’u mai sa ia valaauliaina faifeautalai i lona fale.

“Sa ou aoaoina ia aua le mā e faasoa atu la’u molimau.”²

Ua musuiaina au i le lototoa o Kevin i le faasoaina atu o lana molimau. O se lototoa lea ua faia pea lava pea e tagata faamaoni o le Ekalesia i le lalolagi atoa. A o faasoa atu ou manatu, ou te valaaulia outou e manatunatu i fesili nei e fa:

1. Pe o o’u iloa ma malamalama po o le a le molimau?

2. O o’u iloa pe faapefea ona tuuina atu la’u molimau?

3. O a ni mea faalavefau i le tuuina atu o la’u molimau?

4. E faapefea ona ou tausisia la’u molimau?

O lau molimau o se meatotino sili ona faapelepele, e masani ona i ai faatasi ma lagona loloto faaleagaga. O nei lagona e masani ona fesootai filemu mai ma e faamatalaina o se “leo itiiti filemu.”³ O lou talitonuga po o le malamalama o le upumoni, e tuuina mai o se molimau faaleagaga e ala mai i le tosinaga a le Agaga Paia. O le mauaina o lenei molimau o le a suia ai upu e te tautala ai ma le ala e te faatino ai. O elemene autu o lau molimau, ua faamautuina e le Agaga Paia, e aofia ai:

• O le Atua o lou Tama Faalelagi; o oe o Lona atalii/afafine. E alofa o Ia ia te oe.

• O loo soifua Iesu Keriso. O Ia o le Alo o le Atua soifua ma lou Faaola ma le Togiola.

• O Iosefa Samita o se perofeta a le Atua na valaauina e toefuatai le Ekalesia a Iesu Keriso.

• O Le Ekalesia a Iesu Keriso o le Au Paia o Aso e Gata Ai o le Ekalesia toefuataiina a le Atua i le lalolagi.

• O le Ekalesia toefuataiina a Iesu Keriso o loo taitaiina e se perofeta soifua i aso nei.

E te tuuina atu lau molimau pe a e faasoa atua ni lagona faaleagaga i isi. I le avea ai o se tagata o le Ekalesia, ua e maua ni avanoa e tuu atu ai lau molimau tautala i sauniga aloaia a le Ekalesia po o i sauniga e le aloaia, i talanoaga faafesagai taitoatasi ma aiga, uo ma isi.

O le isi auala e te faasoa atu ai lau molimau e ala lea i amioga amiotonu. O lau molimau ia Iesu Keriso e le na o mea e te fai atu ai—ae o ai oe.

O taimi uma e te tuu atu ai se molimau faaleoina pe faaalia e ala i au amioga lou tautino e mulimuli ia Iesu Keriso, ua e valaaulia isi e “o mai ia Keriso.”⁴

O tagata o le Ekalesia e tutu o ni molimau o le Atua i taimi uma ma i mea uma, ma i nofoaga uma.⁵ O avanoa e fai ai lenei mea i le lalolagi o initoneti e faaaoga ai a tatou lava anomea musuia po o le faasoa atu o anomea faagaeetia na saunia e isi ua le gata mai lea. Tatou te molimau atu pe a tatou alolofa, faasoa ma valaaulia, e oo lava i luga o le initoneti. O au savali tweets, tuusa’o, ma tusiga o le a faia ai se faamoemoega maualuga atu, ma paia atu pe a e faaaogaina foi ala o faasalalauga faaagafesootai e faaali atu ai pe faapefea ona mamanuina e le talalelei a Iesu Keriso lou olaga.

O mea faalavefau i le tuuina atu o lau molimau e ono aofia ai le le mautonu e uiga i se upu e fai atu. Na faasoa mai e Matthew Cowley, o se Aposetolo anamua le aafiaga lenei a o ia tuuvaa atu mo se misiona e lima tausaga i le 17 o ona tausaga i Niu Sila.

“O le a le galo lava ia te a’u tatalo a lo’u tama i le aso na ou alu ai. Ou te le’i faalogo lava i se faamanuiaga sili ona matagofie i lo’u olaga. Ona sosoo lea ma ana upu mulimuli ia te au i le nofoaga o nofoaafi; o le a e suesue; o le a e taumafai e saunia au lauga; ma o ni isi o taimi pe a tofiaina oe, o le a e manatu ua e saunia lelei, ae a e tulai i luga, o le a matuai gaogao ’i’i lava lou mafaufau.’ Sa ou mauaina lena aafiaga e silia ma le faa-tasi.

“Sa ou faapea atu, ‘O le a lau mea e fai pe a gaogao ’i’i lou mafaufau?’

“Sa ia fai mai, ‘E te tu i luga iina ma faatasi ai ma le naunautai o lou loto, ia e molimau atu o Iosefa Samita o se perofeta a le Atua soifua, ma o le a tafe ifo manatu i lou mafaufau ma upu i lou gutu … i le loto o tagata uma o e faalogo.’ Ma o lea o lo’u mafaufau, na matele ina gaogao ’i’i i le taimi o la’u … misiona … na tuuina mai ai ia te a’u le avanoa e molimau atu ai i le mea aupito silisili na tupu i le talafaasolopito o le lalolagi talu mai le faasatauroga o le Matai. Faataitai i ai i se taimi, alii ma tamaitai. Afai e leai se isi au tala e fai atu, molimau atu o Iosefa Samita o le perofeta a le Atua, ma o le a tafe atu i lou mafaufau le talafaasolopito atoa o le Ekalesia.”⁶

E faapena foi, na faasoa mai Peresitene Dallin H.Oaks, “O nisi o molimau e faigofie ona maua e ala i le tu atu e tuuina atu nai lo o le tootuli e tatalo mo se molimau.”⁷ E molimau mai le Agaga Paia i le failauga faapena ma le tagata faalogologo.

O le isi mea faalavefau, e pei ona faamamafaina i le tala a Kevin, o le fefe. E pei ona tusi atu Paulo ia Timoteo:

“Aua ua le foaiina mai e le Atua ia te i tatou le Agaga e matata’u ai; a o le agaga e faamalosi ai, ma alofa ai. …

“O lenei, aua e te mā i le molimau i lo tatou Alii.”⁸

O lagona o le fefe e le mai le Alii ae o le tele lava o taimi e mai le fili. O le i ai o le faatuatua, e pei ona sa i ai ia Kevin, o le a mafai ai ona e faatoilaloina nei lagona ma faasoa saoloto atu mea o loo i lou loto.

Ou te talitonu o se molimau o se vaega taua i totonu o i tatou, ae, ina ia tausisia ma atinae atoatoa, na aoao mai Alema e ao ona tatou “tausia a tatou molimau ma le faaeteete tele.⁹ A o tatou faia faapea, “o le a mauaa, ma tupu ae, ma fua mai.”¹⁰ A aunoa ma lenei mea, “o le a mamae.”¹¹

Ua tuuina mai e uso pele taitasi o le Au Peresitene Sili ia i tatou se taitaiga i le ala e tausia ai se molimau.

Na aoao mai i tatou ma le alofa e Peresitene Henry B. Eyring faapea “o le taumamafa i le afioga a le Atua, tatalo ma le loto, ma le usiusitai i poloaiga a le Alii e tatau ona faaaogaina tutusa ma ia faifai pea mo lau molimau ina ia ola ai ma manuia.”¹²

Na faamanatu mai e Peresitene Dallin H. Oaks ia i tatou faapea o le faatumauina o la tatou molimau, “tatou te manaomia le tagofia o le faamanatuga i vaiaso taitasi (tagai i le M&FF 59:9) ina ia agavaa mo le folafolaga taua o le a tatou ‘maua pea lona Agaga e faatasi ma i [tatou]’ (M&F&F 20:77).”¹³

Ma na fautua mai ma le agalelei Peresitene Russell M. Nelson talu ai nei:

“Fafaga [lau molimau] i upumoni. …

“… Tausia lelei oe lava ia i afioga a perofeta anamua ma aso nei. Ole atu i le Alii e aoao oe i le auala e faalogo lelei ai ia te Ia. Faaalu atili se taimi i totonu o le malumalu ma i galuega o talafaasolopito o aiga.

“… Fai lau molimau ma au faamuamua aupito silisili.”¹⁴

Ou uso e ma tuafafine peleina, ou te folafola atu a o outou atili malamalama atoatoa i le mea e ta’u o le molimau, ma a o outou faasoa atu, o le a outou faatoilalo ai mea faalavefau o le le mautonu ma le fefe, ma mafai ai ona outou fafaga ma tausisia lenei meatotino aupito sili ona taua, o lau molimau.

Ua faamanuiaina i tatou i le anoano o faataitaiga a perofeta anamua ma aso nei o e ua tuuina mai ma le totoa a latou molimau.

I le mavae ai o le maliu o Keriso, sa tulai Peteru ma molimau mai:

“Ia iloa e outou uma, … o le suafa o Iesu Keriso o le Nasareta, o lē na faasatauroina e outou, o lē ua toe faatuina e le Atua nai e ua oti, … ua tu mai ai lenei tagata … i o outou luma. …

“… E leai lava se isi igoa i lalo o le lagi ua foaiina mai i tagata e mafaia ona faaolaina ai o i tatou.”¹⁵

O Amoleka, i le sosoo ai ma le lauga a Alema e uiga i le faatuatua, sa ia tautino mamana mai: “O le a ou molimau atu ia te outou e au lava ia, ua moni nei mea. Faauta, ou te fai atu ia te outou, ua ou iloa o le a afio mai Keriso i totonu o le fanauga a tagata, e ave i ona luga solitulafono a ona tagata; ma o le a ia togiola mo agasala a le lalolagi; ona ua fetalai mai ai le Alii le Atua.”¹⁶

Na molimau mai Iosefa Samita ma Sini Rikitone, i le molimauina ai o se faaaliga vaaia mamalu o le Faaola toetu:

“O lenei, ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te ia: O loo soifua o ia!

“Aua sa ma vaai ia te ia, i le lima taumatau lava o le Atua; ma sa ma faalogo i le leo o molimau mai o ia o le Toatasi na Fanaua e le Tamā.”¹⁷

Uso e ma tuafafine, ou te valaaulia outou ia saili avanoa e tuu atu ai lau molimau i le upu ma i faatinoga. Na oo mai se avanoa faapena ia te au lata mai nei, i le faaiuga o se fonotaga ma le pulenuu o se laumua i Amerika i Saute, i totonu o lona afeafe faatasi ma se vaega o taitai o lana kapeneta. A o matou faaiuina ma ni lagona sili ona mafana, sa ou mafaufau ma le matamuli e tatau ona faasoa atu la’u molimau. O le mulimuli ai i le uunaiga, sa ou tuuina atu ai se molimau o Iesu Keriso o le Alo o le Atua soifua ma o le Faaola o le lalolagi. Na suia mea uma i lena taimi. Sa le mateenaina le Agaga i totonu o lena potu. Na foliga mai na ootia tagata uma. “Na molimau mai le Faamafanafana … e uiga i le Tama ma le Atalii.”¹⁸ Ou te matuai faafetai sa ou maua le lototele e faasoa atu ai la’u molimau.

A oo mai se taimi faapenei, ia pu’e mai ma opomauina. O le a e lagona le mafanafana o le Agaga i totonu ia te oe pe a e faia.

Ou te tuuina atu lau molimau ia te outou—o le Atua o lo tatou Tama Faalelagi, o loo soifua Iesu Keriso, ma o Le Ekalesia a Iesu Keriso o le Au Paia o Aso e Gata Ai o le Ekalesia a le Atua i le lalolagi i aso nei o loo taitaia e lo tatou perofeta pele, o Peresitene Russell M. Nelson. I le suafa o Iesu Keriso, amene.