Ia Faamaoni i le Atua ma Lana Galuega

O Oketopa talu ai, sa tofia ai a’u, faatasi ma Peresitene M. Russell Ballard ma Elder Jeffrey R. Holland, e asiasi i Malo Soofaatasi, lea na galulue uma ai matou e toatolu o ni faifeautalai talavou. Sa matou maua le avanoa e aoao atu ai ma molimau atu, faapea foi ma lo matou asiasi i nofoaga o le talafaasolopito o le Ekalesia i le Atu Peretania lea na avea ai Heber C. Kimball le tamā o le tamā matua o lo’u tamā, ma ana soa ma uluai faifeautalai.¹

Na matauina e Peresitene Russell M. Nelson, a o faalili i matou i lenei tofiga, e faapea sa le o se mea e masani ai le tofi o ni Aposetolo se toatolu e asiasi i le eria sa latou galulue ai o ni faifeautalai i lo latou talavou. Sa ia faailoa ma e mananao uma lava ia tofia e asiasi i a latou uluai misiona. Faatasi ma se ataata tele i ona foliga, sa ia faamatalaina faapuupuu tulaga e tatau ona i ai e faapea, afai e i ai se isi seti o ni Aposetolo se toatolu na galulue faatasi i le misiona e tasi i le 60 tausaga ua mavae, ona atonu foi lea latou te maua se tofiga faapena.

Ata

Heber<nb/>C. Kimball

I le sauniuniga mo lena tofiga, sa ou toe faitau ai i le Soifuaga o Heber C. Kimball, na tusia e se atalii o lana fanau o Orson F. Whitney, lea na tofia mulimuli ane i le tofi aposetolo. Na tuuina mai lea tusi ia te au e lo’u tina pele, ina ua toeitiiti atoa le fitu o o’u tausaga. Sa matou tapena e auai i le faapaiaga o le Maafaamanatu O Le Nofoaga Lenei i le aso 24 o Iulai, 1947, e Peresitene Siaosi Alapati Samita.² Sa ia manao ia ou iloa atili e uiga i lo’u tuaa, o Heber C. Kimball.

O lenei tusi e aofia ai se faamatalaga maoae e saafi ai ia Peresitene Kimball lea e i ai sona taua mo o tatou taimi. Ae ou te lei faasoaina atu le faamatalaga, se’i ou tuuina atu sina talaaga itiiti.

A o faafalepuipuiina le Perofeta o Iosefa Samita i le Falepuipui o Liperate sa i ai i Aposetolo o Polika Iaga ma Heber C. Kimball le tiutetauave, i lalo o ni tulaga matautia ma le mataga, le vaavaaia o le la’ueseina mai o le Au Paia mai Misuri. O le la’ueseina mai na manaomia le faia i ni vaega tetele ona o le poloaiga ia fasiotia lea na tuuina atu e le Kovana o Lilburn W. Boggs.³

Toetoe atoa le 30 tausaga mulimuli ane, a’o toe tomanatu Heber C. Kimball, i le taimi lea o i ai i le Au Peresitene Sili, e uiga i lenei talafaasolopito ma se tupulaga fou, na aoao mai ai, “Ou te fai atu ia te outou, o le toatele o outou o le a vaai i le taimi o le a oo mai ai faalavelave uma, o tofotofoga, ma sauaga e mafai ona outou tatalia, ma avanoa e tele e faaalia ai lo outou faamaoni i le Atua ma Lana galuega.”⁴

Na saunoa pea Heber: “Ina ia faafetaiaia faigata o le a oo mai, o le a tatau ia te outou ona i ai se malamalama mo outou lava i le moni o lenei galuega.” O le a matuai ogaoga faigata, ma afai e le maua e le alii po o se tamaitai le malamalama patino i ai po o se molimau, o le a pa’ū. Afai e le o ia te oe le molimau, ia ola amiotonu, ma valaau atu i le Alii ma aua lava ne’i tuua [seia] oo ina e [mauaina]. Afai e te le faia o le a le mafai ona e taulimaina. … “O le a oo mai le taimi o le a leai se tane po o se fafine e mafai ona toe ola i se malamalama nono. O le a tofu taitaiina tagata taitoatasi e le malamalama o i totonu ia te ia lava. Afai e te le mauaina, o le a le mafai ona e tatalia; o le mea lea saili mo le molimau ia Iesu ma pipiimau i ai, a oo mai taimi faigata o le a e le tautevateva lava ma pa’ū.”⁵

E taitasi i tatou ma manaomia se molimau patino i le galuega a le Atua⁶ ma le matafaioi faavae tutotonu a Iesu Keriso. O le vaega e 76 o le Mataupu Faavae ma Feagaiga o loo faasino i tikeri e tolu o le mamalu ma o loo faatusa le mamalu selesitila i le la. Ona faatusa lea o le malo terasitila i le masina.⁷

E mālie ona o le la na te gaosia lona lava malamalama a o le masina o le malamalama atagia po o le “malamalama nono.” I le ta’ua ai o le malo terasitila, fuaiupu e 79 o loo ta’u mai ai, “O i latou ia na le loto totoa i le molimau ia Iesu.” E le mafai ona tatou maua le malo selesitila ma ola faatasi ai ma le Atua le Tama i se malamalama nono; e manaomia la tatou lava molimau ia Iesu ma Lana talalelei.

O loo tatou ola i se lalolagi ua anoanoai ai le amioleaga⁸ ma loto ua fulitua i le Atua ona o mataupu a tagata.⁹ O se tasi o faataitaiga matagofie i tusitusiga paia o atugaluga o Heber Kimball e uiga i le sailia o se molimau i le galuega a le Atua ma Iesu Keriso o loo aumaia i fautuaga a Alema i ona atalii e toatolu--o Helamana, Sepulona, ma Korianetona.¹⁰ O le toalua o ona atalii na faamaoni i le Atua ma Lana galuega. Ae o le isi atalii e toatasi na faia ni filifiliga leaga. Ia te au o le tulaga pito sili ona taua o fautuaga a Alema, o lona tuuina atu lea o na fautuaga o se tama mo le manuia o lana lava fanau.

O le popolega muamua o Alema, e pei o popolega o Heber C. Kimball, e faapea e tofu le tagata ma se molimau ia Iesu Keriso ma ia faamaoni i le Atua ma Lana Galuega.

I le aoaoga matagofie a Alema i lona atalii o Helamana, na ia faia ai se folafolaga maoae e faapea, o i latou e “tuu atu lo latou faalagolago i le Atua e lagolagoina i o latou tofotofoga, ma o latou faalavelave, ma o latou puapuaga, ma o le a sii ae i latou i luga i le aso gataaga.”¹¹

E ui ina sa maua e Alema se faaaliga lea na ia vaaia ai se agelu, o se mea tulagaese lea. O uunaiga e faia e le Agaga Paia, o se aafiaga sili lea e masani ai. O nei uunaiga e mafai ona tutusa le taua e pei o faaaliga faaagelu. Na aoao mai Peresitene Iosefa Filitia Samita: “O uunaiga e maua e se tagata mai le Agaga Paia e sili ona taua nai lo se faaaliga. Pe a talanoa mai le Agaga i le agaga, e sili atu ona faigata ona tapeese le mea ua tusilolomi i le agaga.”¹²

E tau atu lea i le fautuaga a Alema i lona atalii lona lua, o Sepulona. O Sepulona sa amiotonu e pei o lona uso o Helamana. O le fautuaga ou te fia faamamafaina o le Alema 38:12, lea e faitauina se vaega, “Ia [faagutu] ou tuinanau uma, ina ia mafai ona faatumuina oe i le alofa.”

Faagutu o se upu malie. A tatou tietie i se solofanua [tulou], tatou te faaaoga le faagutu e faatonutonu ai. O se upu uigatutusa lelei o le taitai, faafoe, po o le taofiofi. Ua tau mai i le Feagaiga Tuai ia i tatou na tatou alalaga fiafia ina ua tatou iloa o le a i ai o tatou tino faaletino.¹³ E le leaga le tino—e matagofie ma e tatau ai—ae o nisi o lagona malolosi, a lē faaaogaina tatau ma faagutu talafeagai, e mafai ona tavavaeese ai i tatou mai le Atua ma Lana galuega ma aafia leaga ai la tatou molimau.

Se’i o tatou talanoa faapitoa i lagona malolosi e lua--muamua, ita ma le lona lua o le tuinanau.¹⁴ E uigaese pe afai e tuua na mea e lua e lē faagutua pe lē puleaina e mafai ona afua ai se lototiga tele, tuuitiitia ai le tosinaga a le Agaga, ma tavavaeese ai i tatou mai le Atua ma Lana galuega. E faaaoga e le fili avanoa uma e faatutumu ai o tatou olaga i ata o le limatētē ma le ola lē mama.

I nisi aiga, e le o se mea e le masani ai se tane po o se ava e ita ma fasi se toalua po o se tamaitiiti. Ia Iulai sa ou auai i se fonotaga Faapalemene a Patī-Uma a Malo Soofaatasi i Lonetona.¹⁵ O le limatētē i fafine ma talavou sa taulai i ai o se faafitauli ogaoga i le lalolagi atoa. E le gata i le limatētē, a o isi sa mafi i sauaga i upu. Ua ta’u mai i le folafolaga i aiga e faapea, o i latou o e faasaunoa i taitoalua po o fanau o le a i ai se aso tou te tutu atu ai e tali atu i luma o le Atua.”¹⁶

Sa matua faamamafaina e Peresitene Nelson lenei mea i le taeao ananafi.¹⁷ Faamolemole ia faasagatonu lou mafaufau, tusa lava pe na sauaina oe e o ou matua pe leai foi, o le a e le sauaina lava faaletino po o upu lafo pe faalelagona lou toalua po o le fanau.

I o tatou taimi, o se tasi o luitau aupito sili ona ogaoga o finauga ma sauaga i upu lafo e fesootai ma mataupu lautele. O le tele o mea, o le ita ma le gagana faatautala ua suitulaga i le tofā, feutagaiga, ma le tauagafau. E toatele ua lafoai le apoapoaiga a le Aposetolo sinia a le Faaola, o Peteru, ia saili uiga auaumama faaKeriso e pei o le faapalepale, onosai, faaleatua, agalelei faaleuso, ma le alofa mama.¹⁸ Ua latou lafoaia foi le uiga auaumama faaKeriso o le lotomaualalo.

E faaopoopo atu i le faafoefoeina o le ita ma le faagutuina o o tatou tuinanau e tatau ona tatou ola i ni olaga mama a’ia’i, e ala i le puleaina o o tatou mafaufauga, gagana, ma taga fai. E tatau ona tatou aloese mai ponokalafi, iloilo le talafeauga o ‘anoata ma ‘anotala e faaali i o tatou fale, ma aloese mai soo se ituaiga o amioga agasala.

O lea mea e aumaia ai i tatou i le fautuaga a Alema i lona atalii o Korianetona. E le pei o ona uso, o Helamana ma Sepulona, sa solia e Korianetona tulafono o le ola mama.

Talu ai sa faia e Korianetona amioga le mama sa tatau ai ia Alema ona aoao o ia e uiga i le salamo. Sa tatau ona ia aoao o ia i le matuia tele o le agasala ona sosoo ai lea ma le ala e salamo ai.¹⁹

O lea la, o le fautuaga puipui a Alema o le faagutu o tuinanau, ae o lana fautuaga mo i latou ua solitulafono ia salamo. Na tuuina mai e Peresitene Nelson se fautuaga maoae e uiga i le salamo i le taimi o le konafesi aoao ia Aperila 2019. Na ia faamanino maia e faapea o le salamo i aso taitasi e taua tele i o tatou olaga. “O le salamo e le o se mea e faa-tasi ona tupu; ae o se faagasologa. O le ki i le fiafia ma le filemu o le mafaufau,” na ia aoao mai ai. “O le salamo i aso taitasi o le ala lea i le mamā, ma o le mamā na te aumaia le mana.”²⁰ Afai na faia e Korianetona le mea na fautua mai e Peresitene Nelson, semanu ua salamo i le taimi lava na amata ai ona ia taliaina mafaufauga lē mama. Semanu e le tutupu mai ni soligatulafono mamafa.

O le fautuaga faaiu na tuu atu e Alema i ona atalii o nisi o aoaoga faavae autu sili ona taua i tusitusiga paia uma. E faatatau i le Togiola na faia e Iesu Keriso.

Na molimau atu Alema o le a aveese e Keriso ia agasala.²¹ A leai le Togiola a le Faaola, o le a moomia e le mataupu faavae faavavau o le faamasinoga tonu le faasalaga.²² Ona o le Togiola a le Faaola, ua mafai ai e le alofa mutimutivale ona manumalo ia i latou o e ua salamo ma mafai ai e i latou ona toe foi atu i le afioaga o le Atua. O le a lelei mo i tatou ona manatunatu loloto i lenei aoaoga faavae autu matagofie.

E leai se tasi e mafai ona toefoi atu i le Atua e ala i ana lava galuega lelei; tatou te manaomia uma faamanuiaga o le taulaga a le Faaola. Ua agasala tagata uma, ma e na o le Togiola a Iesu Keriso e mafai ai ona tatou maua le alofa mutimutivale ma ola faatasi ai ma le Atua.²³

Na tuuina atu foi e Alema se fautuaga matagofie ia Korianetona mo i tatou uma lava ua salamo pe o le a ui atu i le faagasologa o le salamo tusa lava pe itiiti pe matuia agasala e pei o ia na faia e Korianetona. Fuaiupu e 29 o le mataupu e 42 e faitauina, “Ma o lenei, loʼu atalii e, ou te manao ia e tuu nei mea ia le toe faalavelave ia te oe, ae ia nao au agasala ia e popole i ai, le popole lena e aumai ai oe i lalo i le salamo.”

Na gauai Korianetona i le fautuaga a Alema ma sa salamo ma auauna atu ma le mamalu. Ona o le Togiola a le Faaola, o lea ua avanoa ai le faamalologa mo tagata uma.

I ona po o Alema, i ona po foi o Heber, ma e mautinoa foi i o tatou taimi, tatou te manaomia uma ona saili a tatou lava molimau ia Iesu Keriso, faagutu o tatou tuinanau, salamo ia tatou agasala, ma sue le filemu e ala i le Togiola a Iesu Keriso ma ia faamaoni i le Atua ma Lana galuega.

I se saunoaga talu ai nei ma faapea foi i le taeao nei a Peresitene Russell M. Nelson e faapea, “Ou te aioi atu ia te outou ia pulea lelei lau molimau ia Iesu Keriso. Galue i ai. Umia. Tausi i ai. Faafailele ina ia tuputupu ae. Ona matau lea o vavega o le a tutupu i lou olaga.”²⁴

Ou te faafetai lava ona o le a tatou faalogologo atu nei ia Peresitene Nelson. Ou te molimau atu o Peresitene Russell M. Nelson o le perofeta a le Alii mo o tatou aso. Ou te alofa ma faamemelo i musumusuga ofoofogia ma le taitaiga tatou te maua e ala mai ia te ia.

I le avea ai o se Aposetolo a le Alii o Iesu Keriso, ou te tuuina atu la’u molimau mautu i le paia o le Faaola ma le moni a’ia’i o Lana Togiola i le suafa o Iesu Keriso, amene.