Ia Faaatoatoaina ia te Ia

O lo tatou Tama Faalelagi ma lo tatou Faaola, o Iesu Keriso, ua i ai le mana e laveai ai i tatou ma suia i tatou. E mafai ona La fesoasoani ia i tatou ia avea e pei o i La’ua.

I ni nai tausaga ua mavae, sa amata ai ona i ai i se tasi o atalii o le ma fanau, o Arona, ni faafitauli faalesoifua maloloina. Sa oo ina vaivai o ia, sa i ai nai uno’oa, ma sa lei foliga maloloina. Ina ua uma le suesuega faafomai, sa iloa ai ua maua o ia i se anemia matuia, o se faama’i lea na taofia ai e le su o ona ponaivi le gaosia o matāuaola ola mumu, ma papa’e, ma fatuola ninii. A aunoa ma se togafitiga ma se vaifofo mulimuli ane, o le a le mafai ona to’a lelei le toto pe tetee atu i ni afaina, e oo lava i nai pa’ū laiti, manu’a laiti, po o ni ma’i laiti e mafai ona vave lamatia ai le ola.

Mo se vaitaimi, sa ia maua ai ni tui masani e fafaga ai fatuola ninii ma le toto e puipuia ai o ia mai tulaga matautia. Sa faamalamalama mai e fomai e na o le pau le vaifofo mo le faama’i o le faia lea o se taotoga e sui ai su o ponaivi, ma o le avanoa sili mo le faamanuiaina o le i ai lea o sona tei e foai atua. Afai e i ai se tasi o ona tei e fetaui lelei, o le taunuuga o le taotoga e mafai ona faasaoina ai le ola. Sa su’eina ona uso laiti e toafa, ma o le tasi, o Maxwell, sa manatu e fetaui lelei lava.

E oo lava i se tagata foai e fetaui lelei atoatoa, o se taotoga o le su o ponaivi o loo i ai pea se tulaga lamatia o faafitauli ogaoga. O le faagasologa na manaomia ai le faatamaiaina o matāuaola o Arona lava ia i su o ona ponaivi na faatama’ia e ala lea i se su’ifefiloi o le kimo ma le faauila a o le i mauaina ia matāuaola faapogai mai su o ponaivi o lona uso o Maxwell. Ona talu ai la ua vaivai le puipuiga faalenatura o le tino o Arona, sa manaomia ai ona faanofoesea o ia i le falemai mo ni nai vaiaso ona sosoo ai lea ma le fale mo ni nai masina faatasi ai ma ni tulafono faapitoa, tapu, ma vai faafomai.

O le taunuuga faamoemoeina mai le taotoga e faapea ia le teenaina e le tino o Arona ia matāuaola o le tagata foai ma o le a faasolosolo malie ona ola mai matāuaola mumū ma papa’e ma fatuola ninii o Maxwell i le tino o Arona. O se taotoga faamanuiaina mai se tagata foai, e afua ai se suiga moni faaletino. O le mea e ofo ai, sa faamatala e se fomai afai e faia e Arona se solitulafono ma tuua se toto i le mea na fai ai le solitulafono, e mafai e leoleo ona pu’e faapagotaina lona uso o Maxwell. E mafua lenei mea ona o le toto o Arona o le a sau mai matauaola ua suia o Maxwell ma maua ai le DNA o Maxwell, ma o le tulaga lea o le a i ai i aso o totoe o lona olaga.

O le faasaoina o Arona i le toto o lona uso ua faaosofia ai le tele o manatu e uiga i le toto togiola o Iesu Keriso ma le aafiaga o Lana Togiola ia i tatou. Ou te fia taulai atu i le asō i le suiga tumau ma le tuuina mai o le ola lea e tupu pe a tatou faatagaina le Alii e faia vavega i totonu o i tatou.¹

Sa lei i ai ia Arona le mana ia te ia lava e faatoilalo ai le faama’i. Sa le mafai e lona tino ona faia matāuaola o le toto e manaomia e tausi ai lona ola. Po o le a lava le mea na ia faia, sa le mafai ona ia faamaloloina su o ona ponaivi. E pei lava ona le mafai e Arona ona faamalolo o ia lava, e le mafai foi ona tatou faasaoina i tatou lava. Po o le a lava lo tatou gafatia, aoaoina, atamamai, pe malolosi, e le mafai ona tatou faamamaina i tatou lava mai a tatou agasala, suia o tatou tino i se tulaga ola pea, po o le faaeaina o i tatou lava. E na o le Faaola o Iesu Keriso ma Lana Togiola e le iu e mafai ai. “Ua leai se isi lava ala po o se isi suafa ua tuuina mai i lalo ifo o le lagi e mafai ona faaolaina ai o le tagata i le malo o le Atua.”² O Lona toto togiola lea e faamamaina i tatou ma faapaiaina i tatou.³

E ui e lei mafai e Arona ona faamalolo o ia lava, ae ina ia mafai ona aoga le taotoga na manaomia lona ioe e fai le mea na fai mai ai foma’i—e oo lava i mea e sili ona faigata ma luitauina. E ui e le mafai ona tatou faasaoina i tatou lava, pe a tatou gauai atu i le finagalo o le Alii ma tausia a tatou feagaiga, ua tatalaina le ala mo lo tatou togiolaina.⁴ E pei o le faagasologa ofoofogia o le suia o le DNA o matāuaola o le toto o Arona, e mafai ona suia o tatou loto,⁵ ia i ai Ona foliga i o tatou mata,⁶ ma avea ma tagata fou ia Keriso.⁷

Na faamanatu atu e Alema i le nuu o Saraemila o le tupulaga talu ai na liua. I le talanoa ai e uiga i lona tama, sa faamatala ai e Alema e faapea “e tusa ai ma lona faatuatua, sa i ai se liuga tele na faia i lona loto.”⁸ Ona ia fesili lea, “Ua oo ea lenei liuga tele i o outou loto?”⁹ E le o tagata na suia o latou lava loto. Sa faatinoina e le Alii le suiga moni. Sa matua manino lava Alema e uiga i lenei mea. Sa ia fai mai, “Faauta, sa liua e ia o latou loto.”¹⁰ Sa latou “faalotomaualaloina i latou lava ma tuu atu lo latou faalagolago i le Atua moni ma soifua … [ma] sa faamaoni seia oo i le iuga … [ma] faaolaina.”¹¹ Sa loto tagata e tatala o latou loto ma faaaoga le faatuatua, ona suia lea e le Alii o latou loto. Ma se suiga tele ina a maoae! Mafaufau i le eseesega i olaga o nei alii e toalua na igoa ia Alema a o lei suia o laua loto ma ina ua uma ona suia o laua loto.¹²

O i tatou o fanau a le Atua ma ua i ai se taunuuga maoae. E mafai ona suia i tatou ia avea e faapei o Ia ma maua “se atoatoaga o le olioli.”¹³ O Satani, i le isi itu, e manao ia tatou pagatia e pei o ia.¹⁴ Ua ia i tatou le tomai e filifili ai po o ai tatou te mulimuli i ai.¹⁵ A tatou mulimuli ia Satani, ua tatou tuu atu ia te ia le mana.¹⁶ Pe a tatou mulimuli i le Atua, Na te tuuina mai ia i tatou le mana.

Na aoao mai le Faaola “e tatau ona atoatoa i tatou.”¹⁷ E mafai ona foliga faigata tele lenei mea. E mafai ona ou vaai manino atu i o’u lē atoatoa patino ma iloa ma le tiga le mamao o le va o a’u ma le atoatoa. Atonu e i ai so tatou naunautaiga e mafaufau e tatau ona tatou faaatoatoaina i tatou lava, ae e le mafai lena mea. O le mulimuli i fautuaga uma i tusi uma o fesoasoaniga faaletagata lava ia i le lalolagi o le a le faataunuuina ai. E na o le tasi lava le auala ma le igoa e tasi e oo mai ai le atoatoaga. “E faaatoatoaina [i tatou] e ala ia Iesu le puluvaga o le feagaiga fou, o lē na faia lenei togiola ua atoatoa e ala i le faamaligiina o lona lava toto.”¹⁸ O lo tatou atoatoa e na o le alofa tunoa lava o le Atua e mafai ai.

Mata e mafai ona e vaai faalemafaufau i le lofituina o le a i ai mo le atalii laitiiti o le ma tama o Arona i le manatu e tatau ona ia malamalama ma faatinoina faiga faavae uma faafomai e ia lava e fesootai ma lona taotoga? E le tatau ona tatou manatu e tatau ona tatou faia le mea e na o le Faaola e mafai ona faia i le gasologa faavavega o lo tatou atoatoa.

E pei ona faaiuina e Moronae lana talafaamaumau, na ia aoao mai ai, “Ioe, o mai ia Keriso, … ma faafiti outou lava mai mea uma e le faaleatua; ma afai tou te faafiti outou lava mai mea e le faaleatua uma, ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa e mafai ai ona outou atoatoa ia Keriso.”¹⁹ Se upumoni ina a mafanafana ma mamana! Ua lava Lona alofa tunoa mo a’u. Ua lava Lona alofa tunoa mo outou. Ua lava Lona alofa tunoa mo i latou uma o e “tigaina ma mafatia i avega.”²⁰

Faatasi ai ma togafitiga faafomai e pei o Arona, e i ai lava sina lē mautonu i le taunuuga. O le mea moni, sa manaomia e Arona se taotoga lona lua ina ua i ai ni faafitauli i le taotoga muamua. O le mea e faafetai ai, faatasi ai ma se suiga faaleagaga o le loto, tatou te le tau mafaufau ai pe o le a tupu. Pe a tatou ola e tusa ai ma Lona finagalo, “faalagolago atoa i galuega a ia o lē ua malosi aoao e laveai,”²¹ e 100 pasene le faamaoniga o le faamamaina e le toto o le Faaola ma iu ai ina faaatoatoaina ia te Ia. O Ia “o se Atua o le upumoni, ma e le mafai ona pepelo.”²²

E leai se fesili faapea o lenei faagasologa o suiga e alu ai le taimi ma o le a le mae’a seia mavae lenei olaga, ae e mautinoa lava le folafolaga. Pe a foliga e mamao tele le faataunuuina o folafolaga a le Atua, tatou te taliaina pea na folafolaga, ma le iloaina o le a faataunuuina lava.²³

O le suiga faavavega i le soifua maloloina o Arona ua aumaia ai le olioli tele i lo matou aiga. Vaai faalemafaufau i le olioli tele i le lagi a o tutupu ni suiga tetele i o tatou agaga.

E alolofa lo tatou Tama Faalelagi ma lo tatou Faaola, o Iesu Keriso, ia i tatou ma ua ofo mai ma le agalelei e suia ma faaatoatoaina i tatou. Sa la finagalo e fai lenei mea. E totonugalemu i la La’ua galuega ma le mamalu.²⁴ Ou te molimau atu ua ia i La’ua le mana e faia ai lenei mea a o tatou o mai ia i La’ua i le faatuatua. I le suafa o Iesu Keriso, amene.