E Mafai Ona Tatou Faia Mea Faigata e ala atu ia te Ia

I le taimi o le galuega a le Faaola i le lalolagi, sa Ia matauina ai se tagata sa tauaso. Na fesili soo o Iesu, “Rapi e, po o ai ea na agasala, po o ia nei, po o ona matua, ina ua fanau mai o ia o tauaso?

O le tali mausali, alofa, ma le faamaoni a le Faaola ua faamautinoa mai ai ia i tatou e silafia e Ia a tatou tauiviga: “E lei agasala lenei tagata, po o ona matua: a ia faaalia galuega a le Atua ia te ia”¹

E ui o nisi luitau e ono oo mai ona o le le usiusitai ma le loto i ai, ae ua tatou iloa o le tele o luitau o le olaga e oo mai ona o isi mafuaaga. Po o le a lava le puna o o tatou luitau, e mafai ona avea ma se avanoa faaauro e tuputupu ae ai.

E lei tuuaunoaina lo matou aiga i faigata o le olaga. I lo’u tuputupu a’e, sa ou faamemelo i aiga toatele. O ia aiga na lagona le tosina mai ia te a’u, aemaise lava ina ua ou mauaina le Ekalesia i lo’u talavou e ala i le tuagane matua o lo’u tina, o Sarfo, ma lona toalua i Takoradi, Kana.

Ina ua ma faaipoipo ma Hana, sa ma mananao i le faataunuuina o o ma faamanuiaga faapeteriaka, lea na faailoa mai ai o le a faamanuiaina i ma’ua i se fanau toatele. Peitai, a o lei fanau mai le ma tamaitiiti lona tolu, sa manino i tulaga faafoma’i o le a le mafai e Hana ona toe maua se isi pepe. Ma le agaga faafetai, e ui ina sa fanau mai Kenneth i se tulaga lamatia o lona ola ma lona tina, ae sa fanau saogalemu o ia, ma sa toe malosi lona tina. Sa mafai ona ia amata auai atoatoa i lo matou olaga faaleaiga—e aofia ai le auai i le Lotu, tatalo faaleaiga i aso taitasi, suesuega o tusitusiga paia, afiafi faaleaiga, ma gaoioiga faafiafia tuufaatasi.

E ui ina sa tatau ona matou fetuunaia o matou faamoemoega o se aiga toatele, ae o se fiafiaga le faatinoina o aoaoga mai le “O Le Aiga: O Se Folafolaga i le Lalolagi” ma le ma fanau pele e toatolu. O le mulimuli ai i na aoaoga na faaopoopo ai le tele o le uiga i lo’u faatuatua tuputupu ae.

E pei ona ta’ua i le folafolaga: “O le faaipoipoga i le va o le alii ma le tamaitai e taua i Lana fuafuaga e faavavau. E tatau ona fanauina fanau i totonu o feagaiga o le faaipoipoga, ma ia tausia e se tamā ma se tina o ē ua faamamaluina ma le faamaoni atoatoa feagaiga faaleulugalii.”² A o matou faatinoina nei mataupu faavae, na faamanuiaina i matou.

Peitai, i se tasi faaiuga o le vaiaso i le taimi o la’u auaunaga o se peresitene o le siteki, sa matou oo atonu o se tofotofoga sili lea ona leaga e mafai ona feagai ma matua. Sa toe foi mai lo matou aiga mai se gaoioiga a le Ekalesia ma faapotopoto mo le taumafataga o le aoauli. Ona o atu lea o le ma fanau tama e toatolu i totonu o le matou lotoa e taaalo.

Sa lagona e lo’u toalua ni uunaiga faifai pea atonu e i ai se mea o faaletonu. Sa ia fai mai ia te au e siaki tamaiti ao ma fufuluina ipu. Sa ou lagona o loo latou saogalemu talu ai sa ma faalogoina o latou leo o le fiafia mai a latou taaloga.

Ina ua iu ina ma o atu e siaki le ma fanau tama, oi lo ma faanoanoa sa ma maua atu Keneti laitiiti e 18 masina le matua i se pakete vai, e le o iloa e ona uso. Sa ma faanatinati o ia i le falemai, ae o taumafaiga uma e toe faaola mai o ia na le manuia.

Sa matua lofituina i ma’ua ona o le a ma le maua le avanoa e tausia ai lo ma atalii faapelepele i lenei olaga faaletino. E ui ina sa ma iloa o Keneti o le a avea ma se vaega o lo matou aiga e faavavau, ae sa ou fesili pe aisea o le a faatagaina ai e le Atua lenei faalavelave e tupu ia te au ae o loo ou faia mea uma ou te mafaia e faalautele ai lo’u valaauga. Faatoa ou sau lava i le fale mai le faataunuuina o se tasi o o’u tiute i le auauna atu i le Au Paia. Aisea na le mafai ai e le Atua ona silasila mai i la’u auaunaga ma laveai lo ma atalii ma lo ma aiga mai lenei faalavelave? O le tele o lo’u mafaufau i ai, o le tele foi lea o lo’u ita.

Sa lei tuuaia lava au e lo’u toalua ona o le le tali atu i ana uunaiga, ae sa ou aoaoina se lesona e suia ai le olaga ma faia ni tulafono se lua, e le tatau lava ona solia:

Tulafono 1: Faalogo ma gauai i uunaiga a lau avā.

Tulafono 2: Afai e te le o mautinoa mo soo se mafuaaga, tagai i le tulafono numera 1.

E ui ina sa lofituina le aafiaga, ma sa faaauau pea ona ma faavauvau, ae sa iu ina faamamaina la matou avega lofituina.³ Sa ma aoaoina ma lo’u toalua ni lesona patino mai lena maliu. Sa oo ina ma lagonaina le lotogatasi ma le noatia ia ma’ua feagaiga o le malumalu; ua ma iloa e mafai ona ma mauaina Keneti o sa ma’ua tama i le isi lalolagi ona sa fanau o ia i totonu o le feagaiga. Sa ma oo foi i se aafiaga e manaomia e auauna atu ai i isi ma gaualofa atu ai i o latou tiga. Ou te molimau atu ua mou atu lo ma le fiafia a o ma faatinoina le faatuatua i le Alii. O loo faaauau pea ona faigata o tatou aafiaga, ae ua tatou aoao faatasi ma le Aposetolo o Paulo e faapea, “e mafai ona tatou faia o mea uma e ala ia Keriso lea [e faamalosia ai i tatou]” pe afai tatou te taulai atu ia te Ia.⁴

Na aoao mai Peresitene Russel M. Nelson: “Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.” Sa ia toe faapea mai, “E oo mai le olioli mai ia te Ia ma ona o Ia.”⁵

E mafai ona tatou lototetele ma faatumulia i le filemu i o tatou taimi faigata. O le alofa tatou te lagonaina ona o le Faaola ma Lana Togiola ua avea ma se punaoa mamana ia i tatou i o tatou taimi faigata. “O mea uma lava e le talafeauga e uiga i le olaga, e mafai ona faasa’o e ala i le Togiola a Iesu Keriso.”⁶ Na Ia fetalai mai foi, “E maua foi outou e le puapuaga i le lalolagi: a ia outou loto tetele; ua ou manumalo i le lalolagi.”⁷ E mafai ona Ia fesoasoani ia i tatou e onosaia soo se tiga, ma’i, ma tofotofoga tatou te feagai i le olaga nei.

Ua tatou maua le tele o tala faatusi paia o taitai maoae ma tamalii, e pei o Ieremia, Iopu, Iosefa Samita, ma Nifae, o e sa lei tuuaunoaina mai tauiviga ma luitau o le olaga nei. O i latou o tagata soifua o e sa aoao e usitai i le Alii e oo lava i tulaga faigata.⁸

I le taimi o aso matautia i le Falepuipui o Liperate, na alaga atu ai Iosefa Samita: “Le Atua e, o fea o i ai oe? Ma o fea o i ai lou faapaologa ua ufi ai lou afioaga lafi?”⁹ Na aoaoina Iosefa e le Alii ia “onosaia lelei”¹⁰ ma folafola atu afai na te faia, o nei mea uma o le a maua ai e ia le poto masani ma o le a avea mo lona lelei.¹¹

O le tomanatu ai i o’u lava aafiaga, ua ou iloa ai ua ou aoaoina nisi o a’u lesona sili ona lelei i taimi sili ona faigata i lo’u olaga, o taimi na aveesea ai a’u mai lo’u sone mafanafana.taugalemu. O faigata sa ou feagai ai o se talavou, a o aoao e uiga i le Ekalesia e ala i le seminare, o se tagata faatoa liliu mai, ma i le avea ai ma se faifeautalai faamisiona ma luitau sa ou feagai ai i la’u aoga, i le taumafai e faalautele o’u valaauga, ma i le tausiaina o se aiga ua saunia ai a’u mo le lumanai. O le tele o lo’u tali atu ma le fiafia i tulaga faigata faatasi ai ma le faatuatua i le Alii, o le faateleina foi lena o lo’u tuputupu ae i lo’u avea ai ma soo.

O mea faigata i o tatou olaga e le tatau ona oo mai o se mea e faateia ai pe a tatou ulu atu i le ala sa’o ma le vaapiapi.¹² “O mea sa tiga ai o Ia” na aoaoina ai Iesu Keriso “ia usiusitai.”¹³ A o tatou mulimuli ia te Ia, aemaise lava i o tatou taimi faigata, e mafai ona tatou tuputupu ae ia avea atili e faapei o Ia.

O se tasi o feagaiga tatou te osia ma le Alii i le malumalu o le ola ai lea i le tulafono o le taulaga. O le ositaulaga sa avea pea lava ma vaega o le talalelei a Iesu Keriso O se faamanatu o le taulaga togiola sili a Iesu Keriso mo i latou uma na soifua pe o le a soifua i le lalolagi.

Ata

Faifeautalai a Elder Morrison

Ou te iloa e tauia pea e le Alii o tatou manaoga amiotonu. Manatua le toatele o fanau sa folafola mai ia te a’u i lo’u faamanuiaga faapeteriaka? Ua faataunuuina lena faamanuiaga. Sa ma auauna atu ma lo’u toalua ma le fia selau faifeautalai, mai le silia ma le 25 atunuu, i le Misiona a Kana Cape Coast. E tutusa lava le pele o i latou ia i ma’ua e peiseai o i latou moni lava o sa ma’ua fanau.

Ou te molimau atu tatou te tuputupu ae i lo tatou avea ai ma soo pe a tatou faatinoina le faatuatua i le Alii i taimi faigata. A tatou faia lea mea, o le a Ia faamalolosia ma le alofa mutimutivale i tatou ma fesoasoani ia i tatou e tauave a tatou avega. I le suafa o Iesu Keriso, amene.