O Le Tali o Iesu

Ua faamamaluina a’u e lauga atu ia te outou i lenei sauniga o le konafesi. O le asō ou te lauga atu ia te outou o ni uō. I le Evagelia a Ioane, sa aoao mai ai le Faaola e faapea, o i tatou o Ana uo pe afai tatou te faia le mea e fai mai ai.¹

O lo tatou alolofa taitoatasi ma le soofaatasi i le Faaola, ma a tatou feagaiga ma Ia, ua noatia faatasi ai i tatou. E pei ona sa aoao mai Peresitene Henry B. Eyring: “Ou te fia fai atu ia te outou e ‘ese le tele o le alofa o le Alii ia te outou ma faatuatuaina outou. E le gata i lena, ou te fia ta’u atu foi ia te outou le tele o Lona faalagolago ia te outou.”²

Ina ua valaauina a’u e avea o se Pulega Aoao e Peresitene Russell M. Nelson, sa matuai faatumulia a’u i lagona eseese. Sa lofituina. Sa ma faatalitali ma le naunautai ma lo’u toalua, o Julie i le sauniga o le aoauli o le Aso Toonai o le konafesi aoao. O se tulaga faamaualaloina le lagolagoina. Sa ou faitauina ma le faaeteete a’u la’a ne’i ou pa’ū a o savali atu i lo’u nofoaga fou.

I le faaiuga o lena sauniga, sa i ai se mea na tupu na i ai se aafiaga maoae ia te a’u. Sa fai se laina a uso o le korama ma faafeiloai ia le Au Pulega Aoao fou taitoatasi. Sa tofu faasoa mai e i latou taitoatasi lo latou alolofa ma le lagolago. Faatasi ai ma se abrazo mai le loto, sa latou fai mai, “Aua le popole—o oe o sō i matou.

I a tatou sootaga ma le Faaola, e silasila o Ia i le loto ma e “le faailoga tagata.”³ Mafaufau pe na faapefea ona Ia filifili Ana Aposetolo. Na Te le’i amanaia ia tulaga po o le tamaoaiga. Na Te valaaulia i tatou e mulimuli ia te Ia, ma ou te talitonu Na Te Faamautinoa mai o i tatou lava o ni ō o Ia.

O lenei savali e faatatau faapitoa i le autalavou o le Ekalesia. Ua ou vaaia ia te outou le mea o loo vaaia e Peresitene Nelson ia te outou. Na Ia fetalai e faapea “e i ai se mea faapitoa e le mafaafitia e uiga i lenei tupulaga o talavou. Atonu sa i ai se talitonuga mautinoa tele o lo outou Tama Faalelagi ia te outou fua i le auina mai o outou i le lalolagi i lenei taimi. Sa outou fananau mai mo mea silisili!”⁴

Ou te faafetai mo mea ua ou aoaoina mai le autalavou. Ou te faafetai lava mo mea ua aoao mai ai a’u e la’u fanau, mo mea ua aoao mai e faifeautalai ia te a’u, ma mea ua aoao mai e fanau a o’u uso ma tuafafine.

E le’i leva atu, sa ma galulue ai ma Nasa le atalii o lo’u uso laitiiti. Ua ono ona tausaga ma e mamā lava lona loto. E sili ona ou fiafia ia Nasa le atalii o lo’u uso, ma ou te talitonu o a’u o lona uncle e sili ona fiafia i ai, lea o loo lauga atu i le konafesi i le asō.

A o fesoasoani mai o ia ia te a’u e fai se tonu o la ma poloketi, sa ou fai atu, “Nasa, manaia tele lau ‘aitia. “Na faapefea ona e poto tele?” Sa ia tilotilo mai ia te a’u ma se foliga i ona mata o loo ta’u mai ai, “Uncle Ryan, e faapefea ona e le iloa le tali i lena fesili?”

Sa na ona faamimigi o ona tau’au, ataata, ma fai mai ma le mautinoa, “Iesu.”

Sa faamanatu mai e Nasa ia te a’u i lena aso lenei aoaoga faigofie ae maoae. O le tali i le fesili aupito faigofie ma faafitauli aupito lavelave e tutusa i taimi uma. O le tali o Iesu Keriso. E maua tonu uma po o tali ia te Ia.

I le Evagelia a Ioane, na fetalai le Faaola i Ona soo e faapea o le a Ia saunia se nofoaga mo i latou. Sa lē mautonu ia Toma ma fai atu i le Faaola:

“Le Alii e, matou te le iloa le mea e te maliu atu i ai; matou te mafaia faapefea ona iloa o le ala?

“Ua fetalai atu Iesu ia te ia, O a’u nei le ala, ma le upumoni, ma le ola, e le alu atu lava se tasi i le Tama, pe a le ui mai ia te a’u.”⁵

Na aoao atu e le Faaola Ona soo e faapea o Ia “o le ala, le upumoni, ma le ola.” O Ia o le tali i le fesili pe faapefea ona o mai i le Tama Faalelagi. O le mauaina o se molimau i Lana matafaioi paia i o tatou olaga o se mea sa ou aoaoina a o avea ma alii talavou.

A o o’u auauna atu o se faifeautalai i Atenitina, sa valaaulia ai e Peresitene Howard W. Hunter i matou e faia se mea sa maua ai se aafiaga maoae i lo’u olaga. Na ia saunoa, “E tatau ona tatou iloa lelei Keriso nai lo le na ona iloa o ia; e tatau ona tele atu lo tatou manatua o Ia nai lo le na ona manatua o ia; e tatau ona faatele ona tatou auauna atu ia te Ia ma le totoa nai lo le na ona auauna atu ia te ia.”⁶

O le taimi lena sa ou popole ai pe faapefea ona avea ma faifeautalai sili atu le lelei. O le tali lenei: ia iloa Keriso, ia manatua o Ia, ma ia auauna ia te Ia. Ua soofaatasi faifeautalai i le lalolagi atoa i lenei faamoemoega: ia “valaaulia isi e o mai ia Keriso, e ala i le fesoasoani ia i latou ia talia le talalelei toefuataiina e ala i le faatuatua ia te [Ia] ma Lana Togiola”, ma e ala i le “salamo, papatisoga, ma le mauaina o le meaalofa o le Agaga Paia, ma tumau ai e oo i le iuga.”⁷ Ia tatou uo o loo faalogologo i faifeautalai, ou te faaopoopo atu ma la’u valaaulia ia o mai ia Keriso. O le a tatou tauivi faatasi ia iloa Keriso, ia manatua o Ia, ma ia auauna ia te Ia.

O le auauna atu i se misiona o se taimi paia o lo’u olaga. I la’u faatalanoaga faaiu ma ia o se faifeautalai faamisiona, sa talanoa mai ai Peresitene Blair Pincock e uiga i suiga o le a oo mai i taitai misiona, a o lalata foi ina mae’a le la auaunaga ma lona faletua. Sa ma taufai faanoanoa i le tuua ai o se mea sa matuai o ma alolofa tele i ai. Sa mafai ona ia vaaia lo’u popole i le manatu o le a le avea o se faifeautalai faamisiona. O ia o se tamaalii o le faatuatua tele ma sa ia aoao mai a’u ma le alofa e pei ona sa ia faia i tausaga e lua ua mae’a. Sa tusi lona lima i le ata o Iesu Keriso i luga a’e o lana kesi ma fai mai, “Elder Olsen, o le a lelei mea uma aua o Lana galuega.” Sa ou lagona le mautinoa i le iloa ai o le a fesoasoani mai le Faaola ia i matou, e le na o le taimi a o matou galulue ae o taimi uma lava—pe a tatou faatagaina o Ia.

Sa aoaoina i matou e Sister Pincock mai le ta’ele o lona loto i fasifuaitau aupito faigofie faaSipaniolo. A fai mai o ia, “Jesucristo vive,” sa ou iloaina e moni ma o loo soifua o Ia. A fai mai o ia, “Elderes y hermanas, les amo,” sa ou iloaina e alofa o ia ia i matou ma sa manao ia matou mulimuli e le aunoa i le Faaola.

Sa faamanuiaina talu ai nei i ma’ua ma lo’u toalua e auauna atu o ni taitai misiona e galulue ma faifeautalai iloga i Iurukuei. Ou te fai atu o faifeautalai aupito sili nei i le lalolagi, ma ou te talitonu o lagona foi na o taitai misiona uma. E aoao mai e nei soo i matou i aso uma, e uiga i le mulimuli i le Faaola.

I le taimi o faatalanoaga masani sa savali mai i totonu o le ofisa se tasi o a matou faifeautalai tamaitai lelei tele. O ia o se faifeautalai faamanuiaina, o se faiaoga faamasani ma’eu, ma o se taitai tuuto. Sa faamemelo ma faaaloalogia o ia e ana soa ma sa alofagia e tagata. Sa usitai, lotomaualalo, ma talitonu mautinoa. O la ma talanoaga talu ai sa taulai i lana eria ma tagata sa ia aoaoina. Ae sa ‘ese le talanoaga lenei. Ina ua ou fesili ia te ia pe o a mai, sa mafai ona ou iloa e i ai se mea o faaletonu ai o ia. Sa ia fai mai, “Peresitene Olsen, Ou te le iloa pe mafai ona ou faia lenei mea. Ou te le iloa pe o le a lava lo’u lelei. Ou te le iloa pe mafai ona avea a’u ma faifeautalai o loo manaomia ai a’u e le Alii.”

O ia o se faifeautalai maoae. E matuai lelei i mea uma. O se ituaiga o faifeautalai e faamoemoe i ai peresitene misiona uma. Ou te le’i popole lava e uiga i ona tomai o se faifeautalai.

A ou faalogologo atu ia te ia, sa ou tauivi ia iloa le mea e fai atu ai. Sa ou tatalo le leoa, “Le Tama Faalelagi e, o se faifeautalai tulaga ese lea. O Oe e anaina. O loo ia faia sa’o mea uma. Ou te le fia fai atua se tala sese. Faamolemole fesoasoani mai ia ou iloa le tala e fai i ai.”

Sa oo mai upu ia te a’u. Sa ou fai atu, “Hermana, ou te faamalie atu lava ona ua i ai nei lagona ia te oe. Se’i o’u fai atu lava se fesili. Pe a faapea e i ai sau uo o loo e aoaoina o sē e faapea ona lagona, mata o le a sau tala e fai i ai?”

Sa tilotilo mai ia te a’u ma ata. Faatasi ai ma lena agaga faafaifeautalai e le mafaaseseina, sa ia fai mai, “Peresitene, e faigofie. Ou te fai i ai e iloa lelei o ia e le Faaola. Ou te fai i ai o loo soifua o Ia. E alofa o Ia ia te oe. E lava lou lelei, ma e te mafaia!”

Sa soisoi ma fai mai, “Ou te manatu afai e faatatau lena mea i a tatou uo, o lona uiga e faatatau foi ia te a’u.”

Pe a i ai ni a tatou fesili po o ni masalosaloga, atonu tatou te faapea e lavelave tele ni tali pe fenumia’i tele foi. Se’i o tatou manatua o le fili, le tamā o pepelo uma, o le tosiata o fenumia’iga.⁸

O Le Faaola o le Mata’isau o le faigofie.

Na saunoa Peresitene Nelson:

“E atamai le tiapolo. Mo le fia afe tausaga na ia faia pea mea lelei e foliga leaga ma mea leaga e lelei. O ana savali e leotetele, malolosi, ma faasausili.

“Peitai, o savali mai lo tatou Tama Faalelagi e iloagofie lava le ‘ese. E fesootai mai e Ia ma le faigofie, filemu, ma i se manino matuā maofa lava lea e le mafai ona tatou malamalama sese ai ia te Ia.”⁹

Tatou te faafetai lava i le alofa tele o le Atua ia i tatou na Ia auina mai ai Lona Alo. O Ia o le tali.

Na saunoa Peresitene Nelson talu ai nei:

“E leai se isi taimi ua matua sili ona manaomia ai le talalelei a Iesu Keriso i lo le taimi nei. …

“… Ua faamamafaina e lenei mea le manaoga faananati mo i tatou ia mulimuli i le faatonuga a le Alii i Ona soo ia ‘o atu ia … i le lalolagi uma, ma talai atu le talalelei i tagata uma.’”¹⁰

Ia i latou o e o le a filifili e auauna atu, e mafai ona ou molimau atu i faamanuiaga o le a oo mai pe a “outou ua’i atu i le valaau a se perofeta. O le auauna atu e le o se mea tau oe; o se mea tau i le Faaola. O le a valaauina oe i se nofoaga, ae e sili atu ona taua, o le a valaauina oe i tagata. O le a ia te oe le tiutetauave tele ma faamanuiaga o le fesoasoani i uo fou ia malamalama o le tali lava o Iesu.

O Le Ekalesia lenei a Iesu Keriso o le Au Paia o Aso e Gata Ai, ma o iinei lava lo tatou faasinomaga. O mea uma e fautuaina ai ma le alofa e Peresitene Nelson i tatou e fai, o le a ta’ita’i atu ai i tatou e faalatalata atili i le Faaola.

I o tatou talavou ofoofogia—e aofia ai ma Nasa le atalii o lo’u uso—i o outou olaga atoa, po o le a lava le faigata po o le fenumia’i ma lu’itau e i ai, e mafai ona outou manatua o le tali e faigofie: o Iesu lava i taimi uma.

E pei ona ou faalogo ia i latou o e tatou te lagolagoina o perofeta, tagatavaai, ma talifaaaliga o faapea mai i le tele o taimi, ou te fai atu foi matou te alolofa ia te outou, matou te faafetai atu ia te outou, ma e matou te manaomia outou. O iinei lava lo outou faasinomaga.

Ou te alofa i le Faaola. Ou te molimau atu i Lona suafa, o Iesu Keriso. Ou te molimau atu o Ia o Lē na te taitaiina ma Lē na te faaatoatoaina lo tatou faatuatua,”¹¹ ma o Ia o le Mata’isau o le faigofie. O le tali o Iesu. I le suafa o Iesu Keriso, amene.