Konafesi Aoao
Ua Si’i A’e i luga o le Satauro
Konafesi aoao ia Oketopa 2022

Ua Si’i A’e i luga o le Satauro

Saunia e Elder Jeffrey R. Holland

O Le Korama a Aposetolo e Toasefululua

Ina ia avea ma soo o Iesu Keriso, e tatau i le tagata ona amoina i nisi taimi se avega ma alu i le mea o loo manaomia ai le ositaulaga ma lē ma’alofia ai mafatiaga.

I tausaga ua mavae, i le mavae ai o se talanoaga a se iunivesite e uiga i le talafaasolopito faalelotu o Amerika, sa fesili mai se isi tagata a’oga ia te au, “Aisea e le faaaoga ai e le Au Paia o Aso e Gata Ai le satauro lea e faaaoga e isi Kerisiano e fai ma faatusa o lo latou faatuatuaga?”

E tusa ai ma na fesili e uiga i le satauro e matele lava o se fesili e uiga i la tatou tautinoga ia Keriso, sa vave ona ou ta’u atu ia te ia faapea e manatu Le Ekalesia o Iesu Keriso o le Au Paia o Aso e Gata Ai i le taulaga togiola a Iesu Keriso ia avea ma fatu moni, le faavae taua, le aoaoga faavae autu, ma le faaaliga taualuga o le alofa faaleatua i le fuafuaga maoae a le Atua mo le faaolataga o Ana fanau.1 Sa ou faamalamalamaina faapea, o le alofa tunoa laveai o loo i ai i totonu o lena faatinoga, sa taua ma o se mea foai fua mai i le aiga atoa o le tagata mai ia Atamu ma Eva e oo i le iuga o le lalolagi.2 Sa ou ta’ua le Perofeta o Iosefa Samita, o lē sa saunoa: “O mea … uma e faatatau i la tatou tapuaiga ua na o ni faaopoopoga” i le Togiola a Iesu Keriso.3

Ona ou faitau atu lea ia te ia le mea na tusia e Nifae i le 600 tausaga a o le’i soifua mai Iesu: “Ma sa … fetalai mai le agelu ia te aʼu … ma faapea mai: Vaai ia! Ma sa ou vaai ma iloa atu le Tamai Mamoe a le Atua, … [ o lē] ua sii ae i luga o le satauro ma fasiotia mo agasala a le lalolagi.”4

Faatasi ai ma loʼu “alofa, faasoa, ma le valaaulia” ua titiʼi aʼe, sa ou faitau pea! Ia sa Nifae i le Lalolagi Fou na fetalai atu ai le Keriso toetu: “Na auina mai au e lo’u Tama ina ia sii ae au i luga o le satauro … , ina ia mafai ona ou aumai o tagata uma ia te au, … ma o le pogai lenei na sii a’e ai au i luga”5

Toetoe a ou si’i maia le Aposetolo o Paulo ae ou matauina ua amata ona ou vaaia mata o la’u uo ua matuā le fia auai. O se tepa vave i lana uati taulima na mautinoa na faamanatu atu ai ia te ia e i ai se mea e tatau ona alu i ai—po o fea—ma sa ia faataalise ese atu loa i lana fuafuaga atofa fatufua. Na faapena ona faai’u ai le ma talanoaga.

O le taeao nei, i le 50 tausaga mulimuli ane, ua ou naunau e faauma atu lena faamalamalamaaga—tusa lava pe amata autilo outou uma, taitoatasi ia outou uati taulima. A o ou taumafai e faamatala atu pe aisea e le masani ai ona tatou faaaogaina le satauro o se faatusa o le faatuatuaga faalelotu, ou te manao ia matuai manino lo tatou faaaloalo loloto ma le maoae o le faamemelo mo faamoemoega e tumu i le faatuatua ma soifuaga tuuto o i latou e faaaogaina.

O se tasi mafuaaga tatou te le faamamafaina ai le satauro e avea ma faatusa e pogai mai o tatou tupu’aga faale-Tusi Paia. Talu ai o le faasatauroga o se tasi o ituaiga e sili ona tiga e faaoo ai le oti i le Malo o Roma, e toatele uluai soo o Iesu na filifili e aua nei faatauaina lena auala faameaola e faaoo ai mafatiaga. O le faauigaga o le maliu o Keriso, sa mautinoa le totonugalemu i lo latou faatuatuaga, peitai pe a ma le 300 tausaga sa latou sailia ai lava e momoli atu le faasinomaga o la latou talalelei e ala i isi auala.6

E oo atu i seneturi lona fa ma le lona lima, ua folasiaina mai le satauro e avea o se faatusa o le FaaKerisiano lautele, peitai o tatou e le o se talitonuga “FaaKerisiano lautele.” E le o se Katoliko po o se Porotesano, ae, o tatou o se ekalesia toefuataiina, le ekalesia o le Feagaiga Fou ua toefuataiina . O lea, o lo tatou tupuaga ma le pule e oo i tua a o le’i oo i le taimi o fonotaga, mataupu silisili tau faatuatuaga, ma faatusa o faatuatuaga kerisiano.7 I lea la tulaga, o le le’i i ai o se faatusa lea sa faatoa masani nei ona faaaoga ina ua mavae le tele o tausaga, o se isi lea faamaoniga o Le Ekalesia a Iesu Keriso o le Au Paia o Aso e Gata Ai o se toefuataiga mai o amataga o Kerisiano moni.

O se isi mafuaaga o le le faaaogaina o satauro e avea ma faatusa, o la tatou faamamafa i le vavega atoa o le misiona a Keriso—Lona Toetu mamalu faapea foi Ona mafatiaga ma le maliu taulagaina. I le faamamafaina o lena sootaga, ua ou matauina ni atavali se lua8 ua avea o se ufi talātua mo le Au Peresitene Sili ma le Korama a Aposetolo e Toasefululua i a latou fonotaga paia faalevaiaso i le malumalu i Aso Tofi taitasi i le Aai o Sate Leki. O nei atatosi ua avea o ni faamanatu faifai pea ia i matou, o le tau na totogi ma le manumalo na malo ai o Ia, o Lē o ana auauna i tatou.

Ata
O Le Faasatauroga, saunia e Harry Anderson
Ata
O Le Toetu, saunia e Harry Anderson

O se ata e sili atu ona laua’itele o le manumalo vala-lua o Keriso, o lo tatou faaaogaina lea o lenei ata laitiiti a Thorvaldsen o le Keriso toetu o loo tulai mai i le mamalu mai le tuugamau ma manu’a o Lona Faasatauroga o loo iloga pea.9

Ata
Faailoga o le Ekalesia

Ma le mea mulimuli, tatou te faamanatu ia i tatou lava na aoao mai Peresitene Gordon B. Hinckley, “E tatau ona [avea] olaga o tagata … ma faatusa o lo tatou [faatuatuaga].”10 O O nei manatunatuga—e aumaia ai ia te a’u le mea atonu e sili ona taua o mau faasino uma i le satauro. E leai ma se sootaga i asoa po o maataua, ma tumutumu po o faailoilo. Ae e faiā ma le amiosa’o mausali pei o le papa ma le ivitu e vilita’i e fai le mea tonu lea e tatau i Kerisiano ona aumai i le valaaulia ua tuuina mai e Iesu i tagata uma o Ona soo. I atunuu uma ma tisipenisione uma, ua Ia fetalai mai ia i tatou uma, “Ai se alii [po o se tamaitai] e fia mulimuli mai ia te au, aua ne’i usiusitai o ia ia te ia, a ia ave e ia lona satauro, i le mulimuli mai ai ia te au.”11

O loo talanoa lea i satauro o loo tatou tauaveina ae le o satauro o loo tatou asoaina. Ina ia avea ma soo o Iesu Keriso, e tatau i le tagata ona amoina i nisi taimi se avega—lau oe lava po o se avega a se isi—ma alu i le mea o loo manaomia ai le ositaulaga ma lē ma’alofia ai mafatiaga. O se Kerisiano faamaoni e le mafai ona mulimuli i le Matai i na o mea e malie o ia i ai. Leai. Tatou te mulimuli ia te Ia i mea uma, e aofia ai, pe a tatau ai, i mea tatou te fetagisi ma feagai ai ma faafitauli, ia atonu tatou te tutu ai na o i tatou i nisi taimi.

Ou te iloa tagata, i totonu ma fafo atu o le Ekalesia, o ē o loo mulimuli faapena lava ma le faamaoni ia Keriso. Ou te iloa tamaiti e i ai manaoga ogaoga faaletino, ma ou te iloa matua o ē o loo tausia i latou. Ua ou vaai ia i latou uma ia o galulue ma o nisi taimi e oo ina matua vaivai, e saili le malosi, saogalemu, ma taimi o le olioli lea e leai se isi auala e maua ai. Ou te iloa ni talavou nofofua matutua e toatele o ē o naunau mo se, ma ua tatau ai, se soa alofa, se faaipoipoga matagofie, ma se fale e tumu i a latou lava fanau. E leai se manao e sili ona amiotonu, ae e mavae lea tausaga ma lea tausaga, e le oo mai lava manuia. Ou te iloa i latou o ē o loo tauivi ma ma’i faalemafaufau o ituaiga eseese, o ē o augani mo se fesoasoani a o latou tatalo ma pulunaunau mo le nuu folafolaina o le mautu faalelagona. Ou te iloa i latou o ē o ola ma le mativa matautia ae, taulu’ilu’i i le faanoanoa, ae ole mai mo na o se avanoa lava ina ia faaleleia atili ai olaga mo a latou pele ma isi e le tagolima o loo siomia ai i latou. Ou te iloa le toatele o e o tauivi ma mataupu ogaoga o le faasinomaga, itupa, ma tulaga feusuai. Ou te tagi mo i latou, ma matou te fetagisi faatasi ma i latou, ma le iloaina o le taua o taunuuga o le a i ai a latou filifiliga.

Ua na o ni nai vaega nei o le tele o tulaga faigata atonu tatou te fetaiai i le olaga, o ni faamanatu faamaoni e i ai se tau o le avea ma soo moni. Ia Aruna, o lē sa taumafai e avatu fua ia te ia se povi ma fafie mo lana taulaga mu, na fai mai ai le Tupu o Tavita, “Aua lava; ou te faatau mai pea ia te oe i le tau: … [aua] o le a [ou le] faitaulaga ia Ieova lo’u Atua … maua fua.”12 E faapena la tatou tala e fai atu.

A o tatou aveina o tatou satauro ma mulimuli ia te Ia, semanu e matautia naua pe ana le avea le mamafa o o tatou luitau ma mea ua atili ai ona tatou amana’ia ma gauai atu i avega e tauamo e isi. O se tasi o tala faasaga ese mamana o le Faasatauroga e faapea na faaloloa faamafola aao o le Faaola ona tu’ifao ai lea iina, e lē ’ano’anoa ae o loo faaalia tonu ai lava faapea o alii uma, tamaitai, ma tamaiti i le aiga atoa o tagata e le gata ina talia lelei ae o loo valaaulia foi i Lana opo togiola, ma le faaeaina.13

E pei ona sosoo le Toetu mamalu ma le Faasatauroga matautia, e faapena foi ona liligi mai faamanuiaga o soo se ituaiga i luga o i latou o ē loto, e pei ona fai mai Iakopo le perofeta o le Tusi a Mamona, ia “talitonu ia Keriso, ma manatunatu i lona maliu, ma mafatia i lona satauro.” O nisi taimi o na faamanuiaga e vave ona oo mai a o nisi taimi e oo mai i se taimi mulimuli ane, ae o le faaiuga ofoofogia i o tatou lava via dolorosa [soloa’iga o aafiaga faigata]14 o le folafolaga mai le Matai lava Ia, e oo mai lava. Ina ia maua na faamanuiaga tau ina ia tatou mulimuli ia te Ia—ma le le faavaivai, e le tautevateva lava pe sola, e le ’alo i le galuega, e le ona ua mamafa o tatou satauro ma e le, mo sina taimi, foliga pogisa ai le ala. Mo lo outou malosi, lo outou faamaoni, ma lo outou alofa, ou te tuuina atu ai le faafetai patino. O le aso lenei ou te tuuina atu ai se molimau faaaposetolo ia te Ia o le sa “sii a’e”15 ma e uiga i faamanuiaga e faavavau ua Ia faaee mai ia i latou ua “sii a’e” faatasi ma Ia, le Alii o Iesu Keriso, amene.

Faamatalaga

  1. Tagai Jeffrey R. Holland, Encyclopedia of Mormonism (1992), “Atonement of Jesus Christ,” 1:83.

  2. Ua tautala Amoleka e uiga i le Togiola a Keriso e faapea o le “togiola sili ma le mulimuli” e “le gata ma e faavavau” lona taunuuga (Alema 34:10). Aua “ua pauu uma ma ua leiloloa, ma o le a fano vagana ai e ala i le togiola” (Alema 34:9; tagai foi i fuaiupu 8–12). Ua faaopoopo i ai Peresitene Ioane Teila: “I se tulaga tatou te le malamalama ma le mafaamatalaina, na tauave e [Iesu] le mamafa o agasala a le lalolagi atoa; e le gata ia Atamu, ae faapea foi ana fanau, ma o le faia o lena mea, na tatala ai le malo o le lagi, e le gata i le au talitonu uma ma i latou uma na usitai i le tulafono a le Atua, ae ia i latou e silia ma le afa o le aiga o tagata o e na maliliu a o lei aulia tausaga e ta’u matua ai, faapea foi ia i [latou] o e na maliliu e aunoa ma le tulafono, o le a toetutu, e ala i Lana puluvaga, o le a toetutu e aunoa ma le tulafono, ma faamasinoina e aunoa ma le tulafono, ma o le a auai ai … i faamanuiaga o Lana Togiola” (An Examination into and an Elucidation of the Great Principle of the Mediation and Atonement of Our Lord and Savior Jesus Christ [1892], 148–49; Aoaoga a Peresitene o le Ekalesia: Ioane Teila [2001], 52–53).

  3. Aoaoga a Peresitene o le Ekalesia: Iosefa Samita (2007), 49.

  4. 1 Nifae 11:32–33.

  5. 3 Nifae 27:14–15.

  6. E moni, e i ai, mau faasino i le satauro i aoaoga a Paulo (tagai, mo se faataitaiga, 1 Korinito 1:17–18; Kalatia 6:14; Filipi 3:18), peitai sa talanoa nei mau i se mea e sili atu ona tetele nai lo utupoto e tu’ifao faatasi, po o se isi lava faatusa faapena. O lea la, ina ua tautala Paulo e uiga i le satauro, o loo ia faaaogaina le faafonokarafi faaleaoaoga faavae autu e talanoa ai i le malualii o le Togiola, o se itumalae ua aufaatasi ai le Au Paia o Aso e Gata Ai ma ia ma ta’ua o ia.

  7. O uluai tagata Kerisiano masani e pei o le soa a Matini Luteru o Andreas Karlstadt (1486–1541) sa fefinauai i le faaiuiuga o Tausaga o le Taulotoaiga faapea “o le satauro [lava ia] o loo faaali mai ai na o mafatiaga faaletagata soifua o Keriso ma e le o faaalia ai Lona Toetu ma [mana] togiola.” (i le John Hilton III, Considering the Cross: How Calvary Connects Us with Christ [2021], 17).

  8. Harry Anderson, The Crucifixion; Harry Anderson, Mary and the Resurrected Lord.

  9. Tagai Russell M. Nelson, “Tatalaina o le Lagi mo se Fesoasoani,” Liahona, Me 2020, 72–74

  10. Gordon B. Hinckley, “The Symbol of Christ,” Ensign, May 1975, 92.

  11. Mataio 16:24.

  12. 2 Samuelu 24:24.

  13. “Ua faaloaloa mai lona aao i tagata uma o e e salamo ma talitonu i lona suafa” (Alema 19:36; tagai foi i le 2 Nifae 26:33; Alema 5:33).

  14. Via dolorosa o se fasifuaitau Latina o lona uiga “o se ala faigata e tumu i tiga, po o se soloa’iga o aafiaga” (Merriam-Webster.com Dictionary, “via dolorosa”). E tele ina i ai faatasi ma gaoioiga a Iesu mai Lona ta’usalaga i lima o Pilato e oo i Lona Faasatauroga i Kalevario.

  15. Tagai i le 3 Nifae 27:14–15.