Fauina o se Olaga e Tete’e Atu ai i le Fili

Ua tele tausaga, o tatou maua mai lenei pulelaa matagofie i le Maota Autu mo Konafesi, ia fautuaga, musumusuga, faatonuga, ma faaaliga maoae. Ua faatele ona faaaoga e failauga faatusatusaga e ogatusa ma lo latou silafia ma le poto masani e faapupula manino mai ai ma le mamana se mataupu faavae o le talalelei a Iesu Keriso.

O lea faiga, mo se faataitaiga, ua tatou aoao ai e uiga i vaalele ma faigamalaga lea e mafai ai e sina muai suiga itiiti ona ave i tatou i se nofoaga mamao mai lo tatou uluai taunuuga. ¹ O lena foi faiga, ua tatou aoao ai mai se faatusatusaga o le galuega a o tatou fatu faaletino faatasi ai ma le suiga mamana o le loto e manaomia ai ona tali atu i le valaaulia a le Alii e mulimuli atu ia te Ia.²

O le taimi nei, ou te fia faaopoopo atu ai ma le lotomaualalo se faatusatusaga na musuia mai se vaega o la’u tapenaga faalegaluega. O loo ou faasino atu i le lalolagi faaenisinia savili. Mai lava i le amataga o a’u suesuega i le iunivesite, sa ou moemiti i le aso o le a mae’a ai mea manaomia ou te agavaa ai e ave le vasega o le a aoao mai ai a’u i le ala e mamanu ai fale ma isi fausaga ona mafai ai lea ona faitaulia e “malu mai mafui’e.”

Na o’o mai le aso mo la’u uluai vasega i lenei mataupu. O uluai upu nei mai le polofesa: “Ua e matua’i naunau lava e amata lenei kosi ma aoao i le ala e mamanu ai fausaga malu mai mafui’e,” lea na toatele i matou na luelue atu i ai matou ulu. Ona fai mai lea o le polofesa, “Ou te faamalie atu e le mafai lena mea, ona e le mafai ona ou aoao atu outou i le ala e mamanu ai se fale e faasagatau, lea e ‘tau’agaia,’ pe e tetee atu i, se mafui’e. E leai se uiga o lea mea,” o lana tala lea, “aua o le a tutupu lava mafui’e, pe tatou te mananao i ai pe leai.”

Ona ia faaopoopo mai lea, “O le a se mea e mafai ona ou aoao atu ia te outou i le ala e mamanu ai fausaga e tete’e atu i mafuie, fausaga e mafai ona teena malosiaga mai se mafui’e, ina ia tumau ai pea le fale e aunoa ma le afaina i soo se faatama’iga matuia ma ona mafai ai lea ona ofoina atu pea le auaunaga na mamanuina ai.”

E fai e le enisinia ia fuafaatatau e iloa ai fuafuaga, o tulaga anagata, o uiga o faavae, o poutu, utupoto, atufola sima, ma isi elemene faalefausaga na mamanuina. O nei taunuuga e faaliliu i fuafuaga ma ‘anofaamatalaga faalefausaga, lea e tatau ona matuai mulimulita’ia e le tufuga ina ia tulai mai le galuega ma faataunuu ai le faamoemoega na mamanu ai ma fausia.

E ui ina ua silia ma le 40 tausaga ua mavae talu mai lena uluai vasega i le faaenisinia e tetee atu i mafui’e, ou te manatua lelei le taimi na amata ai ona ou maua se malamalama loloto atu, ma sili ona mae’ae’a i le taua tele o le i ai o lenei manatu faavae i fausaga o le a ou mamanuina i lo’u olaga faalegaluega i le lumanai. E le gata i lena, ae e sili atu foi ona taua—o le a tumau le i ai pea i le faagaeetiaina o lo’u lava olaga ma i latou e ono faaaoga ai sa’u tosinaga lelei.

E maeu lo tatou faamanuiaina i le faalagolago i se silafia i le ata o le faaolataga na foafoaina e lo tatou Tama Faalelagi, le i ai o le talalelei toefuataiina a Iesu Keriso ma le faalagolago i le taitaiga musuia a perofeta soifua! O mea ua ta’ua i luga e aofia ai “fuafuaga” na mamanu faalelagi ma “‘anofaamatalaga faalefausaga” lea e aoao manino mai ai i tatou e fau ni olaga fiafia—olaga e tete’e atu i le agasala, e tete’e atu i faaosoosoga, e tete’e atu i osofaiga mai ia Satani, o lē saili ma le naunautai ia le taulau lo tatou taunuuga e faavavau faatasi ma lo tatou Tama Faalelagi ma o tatou aiga pele.

O le Faaola lava Ia, i le amataga o Lana galuega, “sa tuua e faaosoosoina e le tiapolo.”³ Peitai sa tulai manumalo Iesu mai lena tofotofoga tele. E faapefea i le i ai o se uiga faaalia o le tete’e ia Satani po o le tete’e i tofotofoga ona tautuaina o Ia? O le mea na mafai ai e Iesu ona tulai manumalo mai i na taimi aupito faigata o Lana tapenaga faaleagaga, lea na mafai ai e Ia ona i ai i se tulaga e tete’e atu ai i tofotofoga a le fili.

O a ni mea moni na fesoasoani i le Faaola e saunia ai mo lena taimi ogaoga?

Muamua, sa anapogi o Ia mo le 40 aso ma le 40 po, o se anapogi atonu na o faatasi ma le tatalo e le aunoa. O lea la, e ui ina vaivai faaletino o Ia, ae sa matua’i malosi Lona agaga. E ui, o le mea e lelei ai, e le o poloaiina i tatou e anapopogi mo se na umi—ae na o le 24 itula ma e ta’itasi i le masina—o le anapogi e aumaia ai ia i tatou le malosi faaleagaga ma saunia ai i tatou e tete’e atu i tofotofoga o lenei olaga.

O le tali ona lua i le fesili, i le tala i faaosoosoga na oo i le Faaola, ua tatou vaaia ai sa Ia tali atu e le aunoa ia Satani ma ni mau sa Ia mafaufau i ai, sa sii atu, ma faatatau i le taimi tonu lea.

Ina ua faaosoosoina o Ia e Satani e faaliliu ia maa i areto ina ia mafai ai ona Ia faamalie Lona fia taumafa mai Lana anapogi umi, sa fetalai atu le Alii ia te ia, “Ua tusia, e le na o meaai e ola ai le tagata, ae o afioga uma e tulei mai i le fofoga o le Atua.”⁴ Ona, oo lea ina ua i ai le Alii i le tumutumu o le malumalu, sa taumafai le tiapolo e faaosooso o Ia e faaali Lona mana, lea na tali atu ai le Alii ma le pule, “Ua tusia foi, Aua e te tofotofo i le Alii lou Atua.”⁵ Ma i le taumafaiga lona tolu a Satani, na tali atu ai le Alii, “Aua ua tusia, E te ifo atu i le Alii lou Atua, ua na o ia lava e te auauna i ai.”⁶

O le tupu mai o se mafui’e e tuua ai se maka e oo lava i fausaga sa mamanu sa’o ma fausia—o na taunuuga atonu o ni nai ta’ei, meaafale po o taualuga e pauu, ma faamalama ta’ei. Ae o lea malu na mamanuina lelei ma lelei le fauga, o le a faataunuuina lona faamoemoega o le puipuia o e nonofo ai, ma faatasi ai ma ni nai lipea, o le a toe faafoi ai i lona tulaga na muai i ai.

I se tulaga foi faapena, o tu’iga a le fili e mafai ai foi ona matua’ia ni “ta’eta’ei,” po o ni nai faatama’iga i o tatou olaga, e ui ia tatou taumafaiga e fauina o tatou olaga e tusa ai ma le mamanu faalelagi atoatoa. O nei “ta’eta’ei” e mafai ona faaalia i latou lava e ala i lagona o le faanoanoa po o le loto salamo ona o le faia o ni sese ma le le faia o mea uma ma le atoatoa, po o le lagona e le o tusa lo tatou lelei ma le mea tatou te mananao ai.

Ae o le mea moni e tatau ai o le mulimuli i fuafuaga ma ‘anofaamatalaga e mamanuina faalelagi, o lona uiga, o le talalelei a Iesu Keriso, o loo i ai pea lo tatou faamoemoe. E le’i talepeina fausaga o o tatou olaga ona o taumafaiga a le fili pe ona o tulaga faigata e tatau ona tatou fetaia’i; ae, o loo tatou agai pea i luma ma le mausali.

O le olioli ua folafola mai i tusitusiga paia o le faamoemoega o lo tatou i ai iinei⁷ e le tatau ona malamalama i ai faapea o lona uiga o le a leai ni o tatou faigata po o ni faanoanoaga, o le a leai ni o tatou “ta’eta’ei” o ni taunuuga o tofotofoga, o faigata, pe mai tofotofoga moni o lo tatou olaga iinei.

O le olioli e i ai se faiā ma le vaaiga a Nifae i le olaga ina ua ia fai mai, “Ona ua ou vaai i puapuaga e tele i le gasologa o oʼu aso, e ui i lea, sa alofagia tele aʼu e le Alii i oʼu aso uma.”⁸ Ona aso uma! E oo lava i aso na mafatia ai Nifae i le le malamalama ma le tete’e a ona lava uso, e oo lava i le taimi na la saisaitia ai o ia i luga o le vaa, e oo lava i le aso na maliu ai lona tama o Liae, e oo lava i le taimi na avea ai Lamana ma Lemuelu ma fili o lona nuu i le olaga nei. E oo lava i na aso faigata, na lagona ai lava e Nifae sa alofagia tele o ia e le Alii.

E mafai ona tatou maua le toafilemu i le iloa ai o le a le faatagaina lava i tatou e le Alii ia tofotofoina i talaatu o le mea e mafai ona tatou teena. Ua valaaulia i tatou e Nifae ia “mataala ma tatalo e lē aunoa, ina ia lē faaosoosoina [i tatou] i luga atu o le mea e mafai ona [tatou] lavatia, ma faapea ona taitaiina ai [i tatou] e le Agaga Paia, ma lotomaualalalo ai, agamalu, agamalolo, onosai, tumu i le alofa ma le tali-tiga atoa.”⁹

E mafai foi ona fai atu le mea lava lea i tofotofoga o le olaga. Ua faamanatu mai e Amona ia i tatou afioga a le Alii: “O … ma tauave ma le onosai o outou puapuaga, ma o le a ou tuu atu ia te outou le manuia.”¹⁰

E saunia pea lava e le Alii mo i tatou se ala e sosola ese ai pe a tatou feagai ma faigata, tofotofoga, lē malamalama, vaivaiga, e oo lava i le oti. Ua Ia fetalai mai foi, “Ma o lenei, e moni Ou te fai atu ia te outou, ma o le mea Ou te fai atu ai i le toatasi ua Ou fai atu ai i tagata uma, ia fiafia, le fanau iti e; ona ua Ou i ai i lo outou lotolotoi, ma Ou te lei tuulafoaia outou.”¹¹ O le a Ia le tuua lava i tatou.

Ou te tatalo ia mafai ona tatou fauina pea lava pea o tatou olaga e mulimuli i fuafuaga ma ‘anofaamatalaga faalefausaga o le mamanu faalelagi na fatuina e lo tatou Tama ma ausia e ala i lo tatou Faaola, o Iesu Keriso. O lea, ona o le alofa tunoa ua oo mai ia te i tatou e ala i le Togiola a lo tatou Faaola, o le a faamanuiaina ai i tatou i le fauina o se olaga e tete’e atu i le agasala, tete’e atu i tofotofoga, ma faamalosia e onosa’ia ai taimi faanoanoa, ma faigata i o tatou olaga. E le gata i lea, o le a tatou i ai i le tulaga e maua ai faamanuiaga uma ua folafola mai e ala i le alofa o lo tatou Tama ma lo tatou Faaola. I le suafa o Iesu Keriso, amene.