Lototoa e Tala’i Atu le Upumoni

I le 1982, sa faaiuina lo’u faailoga lagolago i le tosifanua i se aoga faalematata.

I le faaiuga o le tausaga, sa valaaulia a’u e se tasi o la’u vasega ma te talanoa. Ou te manatua na ma tuua isi tagata o le vasega ae ma o i se mea i autafa o se malae taalo. Ina ua ma taunuu iina, sa ia talanoa mai ia te a’u e uiga i ona talitonuga maumaututu faalelotu, ma e le gata ina sa ia faaali mai ia te a’u se tusi, ae na ia tuu mai ia te a’u le tusi. O le mea moni, ou te le manatua upu uma na ia fai mai ai, ae ou te manatua lelei lena taimi ma o’u lagona ina ua ia fai mai, “Ou te manao e tuu atu la’u molimau ia te oe e moni lenei tusi, ma ua toefuatai mai le talalelei a Iesu Keriso.”

I le mavae ai o le ma talanoaga, sa ou alu i le fale, susue ni nai itulau o le tusi, ma tuu i luga o se fata. Ona sa matou i ai i le faaiuga o le tausaga, ma o le tausaga mulimuli o lo’u faailoga tosifanua, sa ou lē ano tele ai i le tusi po o le tagata o la’u vasega lea na faasoa maia ia te a’u. Ua mafai ona outou mateina le igoa o le tusi. Ioe, o le Tusi a Mamona.

Lima masina mulimuli ane, na o mai ai faifeautalai i lo’u fale; o le a o i la’ua, ae ou taunuu atu loa i le fale mai le galuega. Sa ou toe valaauina i la’ua e toe o mai. Sa matou nonofo i lalo i le tama’i poletito i luma o lo’u fale, ma sa la aoaoina au.

I la’u sailiga mo le mea moni, sa ou fesili ai pe o le fea lotu e moni ma pe mafai faapefea ona ou mauaina. Sa aoao a’u e faifeautalai faapea e mafai ona ou maua lena tali mo a’u lava. Faatasi ai ma se faamoemoega tele ma le naunauga, sa ou talia le lu’i e faitau ni mataupu mai le Tusi a Mamona. Sa ou tatalo ma le loto faamaoni ma se faamoemoega moni (tagai i le Moronae 10:4–5). Sa manino le tali i la’u fesili, ma i ni nai aso mulimuli ane—i le aso tonu le aso 1 o Me, 1983—sa papatiso ai a’u ma faamauina o se tagata o Le Ekalesia a Iesu Keriso o le Au Paia o Aso e Gata Ai.

O le asō, pe a ou mafaufau e uiga i le faasologa o mea na tutupu, ua ou vaai manino ai i le taua o le lototele o se sa ma vasega, ina ua ia tuuina mai se molimau e uiga i le upumoni toefuatai ma tuuina mai ia te a’u se faamaoniga totino o le Toefuataiga o le talalelei a Iesu Keriso, le Tusi a Mamona. O lena faatinoga faigofie, ae maoae lona taua ia te a’u, na fatuina ai se sootaga i le va o a’u ma faifeautalai ina ua matou feiloai.

Na tuuina mai le mea moni ia te a’u, ma ina ua maea lo’u papatisoga, sa avea a’u o se soo o Iesu Keriso. I le aluga o tausaga mulimuli ane, ma faatasi ai ma le fesoasoani a ni tagata faapitoa e pei o taitai, faiaoga, uo, ma ala mai i a’u lava suesuega patino, sa ou iloa ai ina ua tonu ia te a’u e avea o se soo o Iesu Keriso, sa ou taliaina le galuega e le gata o le puipuia o le upumoni, ae o le tala’iina atu foi.

Pe a tatou malilie e talitonu i le upumoni ma mulimuli i ai, ma pe a tatou faia se taumafaiga e avea o ni soo moni o Iesu Keriso, tatou te le mauaina se tusi faamaonia ma se faamaoniga faapea o le a tatou le faia ni mea sese, o le a le faitioina i tatou, o le a le tofotofoina i tatou e savavali ese mai le mea moni pe o le a tatou le oo foi i ni mafatiaga. Peitai o le malamalama i le upumoni e aoao ai i tatou faapea pe a tatou ulu atu i le ala sa’o ma le vaapiapi lea e toe faafoi atu ai i tatou i le afioaga o le Tama Faalelagi, o le a i ai pea lava e le aunoa se ala e sosola ese ai mai nei faafitauli (tagai i le 1 Korinito 10:13); o le a i ai pea lava e le aunoa le avanoa e masalomia ai o tatou masalosaloga a o le’i masalomia lo tatou faatuatua (tagai i le Dieter F. Uchtdorf, “Sau, Auai faatasi ma i Matou,” Liahona, Nov. 2013, 21); ma le mea mulimuli ua i ai sa tatou faamaoniga o le a le tuua lava na o i tatou pe a tatou feagai ma mafatiaga, aua e asiasi le Atua i Lona nuu i le lotolotoi o o latou mafatiaga (tagai i le Mosaea 24:14).

A tatou aoaoina loa le mea moni, e tuu mai e le Alii ia i tatou le avanoa e faia ai le mea semanu na te faia pe ana faapea o i ai o Ia iinei i le asō. E moni lava, na Ia faaali mai ia i tatou e ala i Ana aoaoga mea e tatau ona tatou fai: “Ma ia outou o atu i le mana o lo’u Agaga, ma talai atu la’u talalelei, taitoalua, i lo’u igoa, ma sii i luga o outou leo faapei o le leo o se pu, e alaga atu la’u upu e pei o agelu a le Atua” (Mataupu Faavae ma Feagaiga 42:6). E tulagaese le avanoa mo la tatou galuega auauna atu faafaifeautalai i lo tatou talavou.

Faamolemole, alii talavou, aua nei tolopoina a outou tapenapenaga e auauna atu i le Alii o se faifeautalai. A o e feagai ma tulaga e ono faigata ai le faia o le faaiuga e auauna atu i se misiona—e pei o le faalavelaveina o au suesuega mo se taimi, faatofa atu i lau uo teine e aunoa ma se faamaoniga o le a oulua toe tafafao, po o le tuua o se galuega lelei—manatua le faataitaiga a le Faaola. I le taimi o Lana galuega, sa faapena foi ona feagai o Ia ma faigata, e aofia ai faitioga, sauaga, ma mulimuli ane o le ipu oona o Lana taulaga togiola. Ae i tulaga uma lava sa Ia saili ai e faia le finagalo o Lona Tama ma avatu le mamalu ia te Ia. (Tagai Ioane 5:30; 6:38–39; 3 Nifae 11:11; Mataupu Faavae ma Feagaiga 19:18–19.)

Tamaitai talavou, e matuai talileleia outou e galulue i le tovine o le Alii ma a tonu ia te oe e auauna atu ia te Ia, o le a le tuusaunoaina foi oe mai lu’itau lava e tasi.

Ia i latou uma o e filifili e auauna atu ia te Ia, ou te folafola atu ia te outou o le 24 po o le 18 masina o le galuega, o le a mae’a i le galuega faamisiona e pei lava foi ona oo mai pe a e nofo i le fale, peitai o avanoa o loo faatalitali mai i alii talavou ma tamaitai talavou agavaa o lenei Ekalesia i le galuega faamisiona, e tulagaese. O le avanoa paia o le avea ma sui o le Faaola o Iesu Keriso ma Lana Ekalesia e lē mafai ona faatuatuana’i i ai. O le auai i le faatinoina o tatalo e le mafaitaulia, atina’e ma le tuuina atu faafia o lau molimau i le aso, o le tele o itula e suesue ai tusitusiga paia, feiloai ma tagata semanu e te le feiloai i ai pe ana faapea e te nofo i le fale, o ni aafiaga e le mafaamatalatalaina. O le maualuga lava lea o le aafiaga o loo faapolopolo mo le autalavou e valaauina e le Alii e auauna atu ai i se misiona. E matuai talileleia oe ma e tatau ai. Faamolemole aua nei tuuitiitia le taua o se misiona o auaunaga, aua o misiona o auaunaga e maua ai foi ni aafiaga e lē mafaamatalaina. “Ua tele lava le taua o agaga i le silafaga a le Atua” (Mataupu Faavae ma Feagaiga 18:10), e aofia ai le taua o lou agaga.

A e taliu mai lau auaunaga, atonu e le o toe faatalitali atu lau uo teine po o le uo tama ia te oe, ae ua tatau ona e aoaoina lelei le auala e faafesoota’i lelei ai tagata. O le a atili ‘anoa au suesuega faaakatemia faatasi ma nai aafiaga iti ae tele lona aoga mo se galuega ma le mea mulimuli, o le a ia te oe le mautinoa atoa o le talai atu o le talalelei o le filemu ma le lototoa, ma molimau atu e uiga i le upumoni toefuatai.

Mo outou na ua faaipoipo ma ua i ai i tulaga eseese o le olaga, ua matuai moomia lava outou i le galuega a le Alii. Ia saunia outou lava. Ola i ni olaga maloloina, saili mo le ola tutoatasi faaletino ma faaleagaga, aua o avanoa e faia ai mea e finagalo le Alii semanu e fai e le Alii mo Ana fanau, e le fuapauina i se na o se vaitausaga e tasi. O aafiaga e sili ona fiafia na ma maua ma lo’u toalua i nai tausaga talu ai, na oo mai a o matou galulue faatasi ma ni ulugalii faapitoa, i nofoaga faapitoa, ma auauna atu i ni tagata e ese le faapitoa.

O le aafiaga na ou maua i le faaiuga o lo’u faailoga tosifanua, na aoao mai ai a’u e faapea tatou te puipuia le mea moni e le aunoa pe a tatou tala’i atua ma o le puipuia o le mea moni o se mea e faapatino ona fai. O le puipuia o le mea moni e le tatau lava ona faia i se uiga faumālō ae fai ma le naunau moni e alofa, faasoa, ma valaaulia tagata o loo tatou molimau atu i ai e uiga i le upumoni, ma tau o le mafaufau i le soifua manuia faaletino ma faaleagaga o le fanau a se Tama Faalelagi alofa (tagai i le Mosaea 2:41).

I le konafesi aoao ia Oketopa 2021, na aoao mai ai e Peresitene Russell M. Nelson, lo tatou perofeta pele e faapea e feteenai ma mea e manatu ai nisi, ae e i ai moni lava le mea ua tatou ta’ua o le sa’o ma le sese. O loo i ai moni lava se upumoni a’ia’i—o se upumoni e faavavau. (Russell M. Nelson, “Upumoni Mamā, Mataupu Faavae Mamā, ma Faaaliga Mamā,” Liahona, Nov. 2021, 6)

I tusitusiga paia, ua tatou aoao ai “O le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai” (Mataupu Faavae ma Feagaiga 93:24).

O le iloa o le upumoni e le faia ai i tatou ia sili atu ona lelei nai lo isi tagata, ae e aoao ai i tatou i le mea e tatau ona tatou fai e toefoi atu ai i le afioaga o le Atua.

A o mausali pea lou ola faamaoni ia Keriso ma le lototoa e le gata e talai atu le upumoni ae ola ai foi i le upumoni, o le a e maua le mafanafana ma le toafilemu i le taimi o faafatiatama’i o le a oulua fetaia’i i nei taimi.

O luitau o le olaga e mafai ona faatoilalo ai i tatou, ae ia e iloa a tatou faaaogaina le faatuatua ia Iesu Keriso, “[o tatou] puapuaga o le a nao sina minute laitiiti” (Mataupu Faavae ma Feagaiga 121:7) i le tulaga lautele o le faavavau. Faamolemole aua ne’i faia se aso mulimuli e faagata ai ou faigata ma luitau. Faalagolago i le Tama Faalelagi ma aua le fiu, aua afai tatou te fiu, o le a o tatou le iloaina lava pe faapei le iuga o la tatou malaga i le malo o le Atua.

Taofimau i le upumoni, ma aoao mai faapogai o le upumoni:

• O tusitusiga paia (tagai i le 2 Nifae 32:3).

• O upu a perofeta (tagai i le Amosa 3:7).

• O le Agaga Paia (tagai i le Ioane 16:13).

Ou te tuuina atu la’u molimau ia Iesu Keriso ma o Lana Ekalesia lenei. O loo i ai so tatou perofeta soifua, ma o le a tatou lagonaina e le aunoa le saoloto pe a tatou talai atu ma le lototoa le upumoni. I le suafa, o Iesu Keriso, amene.