Met Mi Ennet?

Achengicheng pwi me fefinei, kinisou ngeni meinisin ren ei mwich mi omokutu netip! Seni ach ewe mwich non ewe April a no, sia fen kuna chommong mettoch mi fis won fonufan, seni watten metekin netipata ngeni pwapwa.

Sia pwapwa ren repotun watten mwichen sarafo a fis non unusen fonufan.¹ Ren ekkei mwich, nouch kewe murinon sarafo ra kaeo pwe inamo ika met a fis non manauer, ar wachemuken pochokun a feito seni ewe Samon.²

Sia pwapwa pwe chommong tempel ra kouta non unusen fonufan. Fiti ewe efeiochun ew me ew kewe minafon tempel, kapachetan an Kot manaman a feitto non ewe fonufan an epwe apochokuna kich me ungeni angangen ewe chon koum.

Echim ina napanapen ewe chon koum. Ew anoninenin tipis.³ Ren Presetenin ewe Mwichefen, ua affata ekkewe afanafan an ewe Samon Jises Kraist won ei osukosuk. Mut ngeni ei upwe wesewesen afata: ese nifinifin sokkun echim ren fefin, semirit, ika ese nifinifin ion a ew anieput ngeni ewe Samon. I a riaffou me ua riaffou inet chok emon a feiengaw. I a netipengaw me kich meinisin sia netipengaw ren emon me emon a fen feiengaw ren och sokkun echim. Ekkana ra fori ekkei fofor mi anieput rese chok angei niwinin ekkewe annukun aramas nge repwe pwan mesengeni ekkewe songen Kot mi Napanap.

Ren chommong ier, ewe Mwichefen a fen anapano ukukun an epwe epeti—non akkaewin—semirit seni echim. Mei wor chommong aninis non an ewe Mwichefen ewe website. Ua tingor ngenikemi ami oupwe kaeo usun.⁴ Ekkei minen emwen ra kawor ar repwe epeti ekkewe ese wor ar mwan. Ua pesei ngeni emon me emon kich pwe oupwe mamasa ngeni ese nifinifin ion epwe nom non feiengaw an a echim me mwitir ne anisir. Ewe Chon Amanau esap mutata echim, me ren kich Noun chon kaeo, sise pwan tongeni.

Ewe chon koum a wor pwan ar kokotun awosukosuk. Me neir an sotuni ne afatangawa nefinen met mi pung me met ese pung. Ewe chommongun porous a wor mecheresin ngeni kich, a fen sossor, a fori an epwe anapano weiresin ne finata met mi ennet.

Ei sosot a achemato ussun ew mettoch a fis ngeni kem me Sister Nelson nupwen am feino churi emon auchean aramas ikewe ekkoch chok aramas ra fen rong ussun Jises Kraist. Chienei ei achengichengin chinap a fen semwen. A urenikem pwe fansoun ekkewe chommong ran won an pet, fan ekkoch a neneta ngeni ungen imwan ewe me eis, “Met mi ennet?”

Chommong won fonufan ikenai “ra chok epet senir ewe ennet pokiten rese sinei repwe kuna me ian.”⁵ Ekkoch repwe fori ach sipwe nuku pwe ennet a auchea—pwe emon me emon aramas epwe ekieki ren pusin i met mi ennet. Ena sokkun nuku nge aneanen ekiek ren ekkana ra mwanino ne ekieki pwe resap pwan angei niwinin meren Kot.

Achengicheng pwi me fefinei, Kot i ewe popun ennet meinisin. Ewe Mwichefenin Jises Kraist ren Aramas mi Pin non Fansoun Soponon a etiwa meinisin ennet Kot a wato ngeni Noun semirit, ika repwe kaeo seni pekin saintis ika angei ren pwarata seni I.

Seni ei nenien afanafan ikenai me nesor, oupwe sopweno ne rongorong ennet. Ouse mochen oupwe makketiw ekkewe ekiek ra angei ami tumunoch ngeni me ekkana ra feitto non ami ekiek me nonnom non netipemi. Tingor ngeni ewe Samon epwe apungano pwe met oua fen rongorong mi ennet.

Ua tongei kemi, achengecheng pwi me fefinei. Uwa iotek pwe ei mwichenap epwe awora ngonuk ewe kametipen ngunumi oua kan kukuta. Non iten Jises Kraist mi pin, amen.