Эзэн, бид Есүсийг хармаар байна

1945 оны хаврын нэг өдөр нэгэн залуу цэргийн эмнэлэгт сэрэв. Тэр ус уух хувьтай хүн байв. Яг чихнийхээ ард буудуулсан ч эмч нар мэс засал хийснээр хэвийн алхаж, ярьж чаддаг болсон.

Харамсалтай нь сум хүний нүүр царайг ялган таньдаг тархиных нь нэг хэсгийг гэмтээсэн байлаа. Тэр эхнэр рүүгээ харсан ч таньж байгаа ямар ч шинж илрээгүй бөгөөд төрсөн эхээ ч таньж чадаагүй. Тэр ч бүү хэл толинд харагдах нүүр царай нь хүртэл үл таних хүнийх байлаа. Тэр эрэгтэй хүн үү, эмэгтэй хүн үү гэдгийг нь ч ялгаж чадахгүй байв.¹

Тэр нүүр царайг ялгаж харах чадвараа алдсан олон сая хүний нэг нь болсон байлаа.²

Нүүр царайг ялган харах чадвараа бүрэн алдсан хүмүүс охиноо сэвхний хэлбэрээр нь эсвэл найзаа хөлөө чирч алхдаг байдлаар таних гэх мэт ялган таних шинж тэмдгийг нь ойндоо тогтоох дүрмийг дагах замаар бусдыг тодорхойлохыг хичээдэг.

Хуваалцах хоёр дахь түүх маань миний амьдралд тохиолдсон юм. Бага байхдаа би ээжийгээ дүрэм журам тогтоогч нэгэн гэж хардаг байлаа. Тэр намайг хэзээ тоглох, хэзээ орондоо орох эсвэл хамгийн хэцүү нь хашааныхаа хогийн ургамлыг хэзээ зулгаахыг хүртэл шийддэг байв.

Мэдээж тэр надад хайртай байсан. Гэхдээ би ихэвчлэн түүнийг зөвхөн “Үгийг нь дуулгавартай дагавал зохих эмэгтэй” гэж хардаг байснаасаа одоо ичдэг.

Гагцхүү олон жилийн дараа л би түүнийг бодит хүн талаас нь харах болсон юм. Үнэндээ би түүний золиосыг огт анзаарч байгаагүй, (хажууд нь би хичээлд өмсөх шинэ хувцастай байхад) тэр яагаад олон жилийн турш нөгөө л хоёр хуучин банзлаа өмссөнийг нь эсвэл яагаад өдрийн төгсгөлд тэр маш их ядарч намайг эртхэн орондоо орохыг хүсдэг байсныг нь гайхаж бодож байгаагүйдээ ичдэг.

Энэ хоёр түүх үнэндээ нэг зүйлийн тухай өгүүлсэн гэдгийг та анзаарсан байх. Олон жилийн турш би бодит байдал дээр нүүр царайг ялгаж харах чадваргүй байжээ. Би ээжийгээ жинхэнэ хүн талаас нь харж чадаагүй. Би түүний дүрмүүдийг хардаг байсан ч тэдгээрээс түүний хайрыг олж харж чадаагүй.

Энэ хоёр түүх нэг санааг илэрхийлж байгааг би та нарт хэлье. Та нар нүүр царайг ялгаж харах чадваргүй нэгнийг мэднэ гэдэгт би итгэлтэй байна (магадгүй та тэр хүн нь байж магад).

Та Бурханыг хайрт Эцэг гэдгээр нь харж чадахгүй байж магад. Та тэнгэр өөд хараад хайр, нигүүлслийн нүүр царайг биш, харин зам гаргаж явах ёстой дүрэм журмын шигүү ойг олж хардаг байж болох юм. Та Бурхан тэнгэртээ удирдан захирдаг, бошиглогчдоороо дамжуулан ярьдаг, эгчийг тань хайрладаг гэдэгт итгэдэг ч Тэр таныг хайрладаг болов уу гэж битүүхэн дотроо бодож байж магад.³ Магадгүй та төмөр бариулаас барьсан ч үүнийг дагавал хүрдэг Аврагчийнхаа хайрыг хараахан мэдрээгүй байж болох юм.⁴

Та ийм хүмүүсийг мэддэг байх. Учир нь би олон жилийн туршид ийм л хүн байсан. Би сүнслэг байдлын хувьд нүүр царайг ялгаж харах чадваргүй байсан.

Миний амьдралын зорилго бол дүрэм журам дагаж, бодит бус жишгүүдэд хүрэх гэж андуурдаг байсан. Би Бурхан та нарт төгс хайртайг мэдэж байсан ч үүнийг өөрөө мэдэрдэггүй байсан. Би Тэнгэрлэг Эцэгтэйгээ хамт байх талаар биш харин диваажинд орох талаар илүү их бодож байсан гэдгээсээ эмээж байна.

Хэрэв та заримдаа над шиг “гэтэлгэх хайрын дууг”⁵ дуулахгүй зөвхөн ам барьж чаддаг бол бид юу хийж чадах вэ?

Ерөнхийлөгч Рассэлл М.Нэлсоны бидэнд сануулснаар үүний хариулт бол үргэлж Есүс юм.⁶ Энэ бол харин маш сайхан мэдээ.

Иоханы номд миний дуртай нэгэн богино шүлэг байдаг. Энэ нь харийн хэсэг хүн нэгэн чухал хүсэлт тээсээр Түүний шавь руу ирсэн тухай өгүүлдэг. Тэд “Эзэн, бид Есүсийг хар[ахыг хүсэж] байна”⁷ гэжээ.

Энэ бол бид бүгдийн хүсдэг зүйл мөн бөгөөд бид Есүсийн хэн болохыг нь харж, Түүний хайрыг мэдрэхийг хүсдэг. Энэ нь Сүмд хийдэг бараг бүх зүйлийн маань мөн ариун ёслолын цуглаан бүрийн шалтгаан нь байх ёстой. Хэрэв та ямар хичээл заах вэ, ямар уулзалтыг төлөвлөх вэ, диконуудаа орхиод дожболл тоглох уу гэж бодож байвал энэ шүлгийг өөрийн хөтөч болгон хэрэглэж, “Энэ нь хүмүүст Есүс Христийг харж, хайрлахад тус болох уу?” хэмээн асуу. Хэрэв үгүй бол магадгүй өөр зүйл хийгээд үз.

Эцгийн нигүүлслийн царайг биш дүрэм журмыг хардаг, сүнслэг байдлын хувьд нүүр царайг ялгаж харах чадваргүй байснаа ойлгохдоо би энэ нь сүмийн буруу биш гэдгийг мэдэж байсан. Энэ нь Бурханы ч буруу биш буюу бүх зүйл талаар болсон гэсэн үг ч биш, харин бид бүгдийн хийж сурвал зохих зүйл юм. Амилалтын эртний гэрчүүд ч амилсан Их Эзэнтэй олон удаа нүүр тулж байсан ч Түүнийг таниагүй. Түүний анхны дагагчид булшны цэцэрлэгээс Галилийн эрэг хүртэл “Есүсийн зогсож байхыг харсан боловч тэр нь Есүс байсныг таньсангүй.”⁸ Тэд Түүнийг таньж сурах ёстой байсан ба бид ч мөн адил таньж сурвал зохино.⁹

Би сүнслэг байдлын хувьд нүүр царайг ялгаж харах чадваргүй байснаа анзаараад Түүнийг гэх миний хайр болон Түүний намайг гэх Түүний бүх шавь нарт амлагдсан хайраар дүүргэгдэж, “Түүнийг байгаагаар нь харж … энэ найдвар байж болохын тулд” “зүрхнийхээ бүхий л эрч хүчээр” залбир хэмээсэн Мормоны зөвлөгөөг дагаж эхэлсэн.¹⁰ Би Бурханыг хайрла хэмээх эхний зарлигийг дагах мөн “Бурхан биднийг бүх зүрх сэтгэлээрээ өөрийн бүх хүч чадал, оюун хийгээд чадлаар хайрладаг гэдэг … хамгийн эхний агуу үнэнийг”¹¹ мэдэрч болохын тулд хэдэн жилийн турш залбирсан.

Энэ удаа би дүрэм журмыг олж мэдэхийн тулд биш, харин Тэр хэн бэ, Тэр хэнийг хайрладаг вэ гэдгийг олж мэдэхийн тулд дөрвөн Сайн мэдээг ахин дахин уншсан бөгөөд цаг нь болоход би Түүнээс ундран гарах хайрын голд умбасан билээ.

Есүс эхлэлд “шархалсан зүрхийг эдгээж, олзлогдогсдод эрх чөлөөг тунхаглаж, сохруудад хараа оруулах, дарамтад байгсдыг чөлөөлөхийн”¹² тулд ирсэн гэдгээ зарласан.

Энэ нь зүгээр л нэг хийх ажлын жагсаалт эсвэл нэр хүнд олох гэсэн арга биш харин энэ нь Түүний хайрын илрэл байсан юм.

Сайн мэдээний номуудаас санамсаргүй байдлаар нээгээд үзвэл бараг хуудас болгоноос бид Түүнийг нийгмийн хүрээнд гадуурхагдсан, сүнслэг байдлын болон бие махбодын хувьд зовж зүдэрч буй хүмүүст анхаарал тавьж байгааг харах болно. Тэр бохир, цэвэр бус¹³ гэсэн хүмүүст гар хүрч, өлссөн нэгнийг хооллож байсан.¹⁴

Таны хамгийн дуртай Есүс Христийн тухай түүх юу вэ? Энэ нь магадгүй Бурханы Хүү уяман өвчтэй,¹⁵ үзэн ядагдсан самари хүн,¹⁶ гэм буруутай гэгдсэн, дуулиант нүгэлтэн¹⁷ эсвэл үндэсний дайсан¹⁸ гэх мэт нийгэмд гадуурхагдсан хүнд ойртон очиж тэвэрч, итгэл найдвар өгч байгааг харуулдаг түүх байж болох юм. Түүний ач ивээл гайхалтай юм.

Тэр гаднын хүнийг сайшаасан, эдгээсэн, хамт хооллосон тохиолдол бүрийг нэг бүрчлэн бичиж тэмдэглэх гээд үз. Лукийн номыг дуусгахын өмнө бэх чинь дуусна.

Би үүнийг олж хараад зүрх сэтгэл минь хайраар цохилж, Түүний ач ивээлийг танин, Тэр намайг хайрладаг юм байна гэдгийг мэдэрч эхэлсэн. Ерөнхийлөгч Нэлсоны заасанчлан “Аврагчийн талаар илүү ихийг сурах тусам Түүний нигүүлсэл, хэмжээлшгүй хайранд … итгэж найдахад хялбар болно.”¹⁹ Та мөн Тэнгэрлэг Эцэгтээ илүү ихээр итгэж, Түүнийг илүү ихээр хайрладаг болно.

Есүс бидэнд “Бурхан бидний Мөнхийн Эцэг хэн болох мөн ямар болохыг, түүнчлэн … бүх насны, өөр өөр улс үндэстний хүүхдүүддээ хэрхэн Өөрийгөө бүрэн зориулдгийг харуул[ахаар]” ирсэн²¹ гэж ахлагч Жэффри Р.Холланд заасан.

Паул Бурхан бол “[бүх] өршөөлийн Эцэг бөгөөд бүх тайвшралын Бурхан мөн”²¹ хэмээн хэлсэн.

Хэрэв та Түүнийг өөрөөр харж байвал үргэлжлүүлэн хичээ.

Бошиглогчид биднийг Түүний нүүр царайг хайхад урьдаг.²² Бид дүрэм журмыг нь биш өөрсдийн Эцэгийг бишрэн шүтэж, Есүсийг Эцэгийн хайрын нүүр царай гэж харан²³, зөвхөн дүрмүүдийг нь биш Түүнийг Өөрийг нь дагадаг²⁴ болтлоо ажил дуусаагүй гэдгийг энэ нь надад сануулдаг.

Бошиглогч, төлөөлөгчид гэрээний талаар ярихдаа нөхцөл байдлыг мэдэхгүй байж “илүү их хичээ” гэж хашхирдаг дасгалжуулагчтай адилгүй. Тэд биднийг гэрээ маань үнэндээ харилцааны талаар²⁵ бөгөөд сүнслэг байдлын хувьд нүүр царайг ялгаж харах чадваргүй байх эмгэгээсээ эдгэрэх боломж гэдгийг олж хараасай хэмээн хүсдэг²⁶. Тэдгээр нь Түүний хайрыг олж авах дүрэм биш юм. Тэр биднийг аль хэдийн төгс хайрладаг. Тэр хайрыг ойлгож, уг хайрын дагуу амьдралаа бүтээх нь бидний хувьд асуудал юм.²⁷

Яг л цонхны цаана нь байгаа зүйлийг харж болдог шиг бид гэрээнүүдээрээ дамжуулан цаана нь байгаа Эцэгийн нигүүлслийг олж харахыг хичээдэг.

Гэрээнүүд нь Бурхан биднийг тэвэрч буй нэгэн арга зам юм.

Эцэст нь, бид түүнд үйлчилснээр Түүнийг харж сурах болно. “Учир нь өөрийн үйлчилж байгаагүй, өөрийн танихгүй эзнээ хүн хэрхэн мэдэх билээ?”²⁸

Хэдэн жилийн өмнө би шинэ дуудлага хүлээн авсан бөгөөд уг дуудлагыг хийж чадна гэдэгтээ итгэлгүй байв. Би эрт сэрж, сэтгэл тавгүй байлаа. Гэтэл “Энэ Сүмд үйлчлэх нь Бурханы хүүхдүүдээ гэх хайрын гол дотор зогсох явдал юм” гэсэн урьд өмнө сонсож байгаагүй нэгэн үг толгойд орж ирсэн юм. Энэ Сүм бол талбайн төгсгөлд байх Бурханы хүүхдүүдэд Түүний хайрын голын усыг хүргэхийн тулд хүрз, зээтүү барин, сувгийг нь чөлөөлөхөд тусалж буй хүмүүсийн ажлын хэсэг юм.

Та хэн ч бай, таны өнгөрсөн ямар ч бай, та нарт зориулсан газар энэ Сүмд бий.²⁹

Хүрз зээтүүгээ бариад багт нэгд. Түүний хайрыг хүүхдүүдэд нь хүргэхэд тусал. Тэгвэл хайр нь тан руу ч гэсэн цацарна.³⁰

Бүгдээрээ Түүний хайрын нүүр царайг, Түүний гэрээний тэврэлтийг эрэлхийлж, Түүний хүүхдүүдтэй гар гараа барин нэгдэж хамтдаа “Израилын Гэтэлгэгч”-ийг дуулцгаая.

Бид Түүний нүүр царайг эрэлхийлэн Түүний хүүхдүүдэд Түүний нигүүлслийн сав байх болтугай.³² Есүс Христийн нэрээр, амен.