O Se Vavega o le Kerisimasi

O le taumalulu o se taimi malulu lea o le tausaga i le Misiona a Rusia Moscow. I se faifeautalai la, o lenei mea e sao i nisi taimi e le gata o le tau ae faapea foi o tagata. Na avea ai o ni tagata matamumuli. O tagata uma e foliga mai e nanati atu i le fale pe a manava galuega. E mama’i tagata, e matuai maseesee leaga le auala, ma e matuai maatiati lava le malulu i soo se vaega o le tino e le ufiufia. E seasea lava vaaia ni foliga ataata.

Na ma oo ma lau soa i se tulaga faapena i le taimi o le taumalulu o le 2005. Sa ma mananao e faafiafia tagata e ala i le fetufaaiina atu o le ma savali o le faatuatua, faamoemoe, ma le alofa, ae peitai na leai se tasi na fia faalogo. Ma i lou faamaoni foi, sa le i tele so’u naunau. Sa leai sau mea e mafai ae na o le lotovaivai. O lea aso ma lea aso sa ma savalia ai alatetele malulu e sue ni tagata e aoao, ma na matuai maluluina atoa o ma vae e oo i ponaivi. E ui lava i tulaga faalotovaivai tagata, ae sa ma le mananao ma te fiu ai. Na latalata mai le Kerisimasi, ma sa ma mananao ma te fesoasoani i tagata ia lagona le agaga o le Kerisimasi. Ae e faapefea?

I se tasi afiafi a o ma tietie i le nofoaafi e toe foi atu i le fale, na savavali mai i totonu o le potu o le nofoaafi se vaega toalaiti o tagata musika. Sa matuai matagofie a latou tataaga, ae na ou tei ona sa leai ma se aafiaga o le latou faafiafiaga i se tagata. Atonu pe toatasi pe toalua ni tagata na tuuina atu mo i latou ni tupe o sui [o faatauga] mai a latou taga, ae o le toatele lava sa na o le faataupupula i fafo o faamalama aisa. Sa ou misi alofa i nai tagata faafiafia ma ave atu mo i latou ni nai sene.

E lei leva ae taunuu i le fale faatali nofoaafi e latalata i lo ma fale mautotogi ma ma taufetuli loa i le fale. O le taimi lava na ou tapunia ai le faitotoa o le fale, na tatagi ai ma le telefoni. Na ou taliina ma matauina ai le leo o le matou taitai itu. O le aso lena sa tatau ai ona ma mafaufau i ni aitia mo le faamanatuina o le vaitau o le Kerisimasi o ni faifeautalai. Sa matuai galo lava ia te au, ae ou te lei manao na te iloa lena mea. I lou mafaufau loloto ai mo se aitia, sa ou manatuaina ai loa le vaega o tagata fai musika ma fautuaina atu e mafai ona usu e le matou itu ia viiga o le Kerisimasi i luga o nofoaafi. E mafai ona ou taina le vaiolini. Na ou tei ma atonu sa faanoanoa, ona sa fiafia lou taitai itu i le manatu. Sa ma malilie loa i le aso. “O le a le mea na ou mafaufau i ai!” Sa ou faapea ifo ia te au lava, ina ua ou manatua o le toatolu o faifeautalai o le matou itu e matuai leaga faia lava leo.

Na oo i lea aso ma sa faapotopoto faifeautalai i luga o le tulaga. Ua leva ona goto le la, ma na matuai malulu lava. Na amata foi ona pepe ou vae. E tusa ma le lima minute na matou faataitai ai seia oo ina sosolo malie mai le nofoaafi i luga o le tulaga. Ma matou ulufale atu ma le fiafia i ona faitotoa matala, ma o ese ai mai le savili malulu ma le kiona. Sa ou aveeseina mai lau vaiolini mai lona pusa ma tatalo lemu ina ia pai mai le Atua i loto o tagata faalogologo.

A o matou o atu i totonu o le nofoaafi, o le toatele lava o tagata sa le ano mai ia i matou. E lei masani lelei tele foi ou lima, ma ina ua amata ona ou tata, sa faatauvaa lava le leo o le vaiolini ae na matuai tuia ai lava. Na faafuasei lava ona sui le lagona i totonu o le potu o le nofoaafi. Na toetoe lava a e faalogoina se mea i le ea. Na pei ua taofiofi le manava a le pasese. Na matou pepese faatasi ma isi faifeautalai i upu o le “Po Filemu”:

A o ou taina [le vaiolini] ae pepese isi faifeautalai, na leai se tasi sa i totonu o le potu o le nofoaafi na tautala i se upu e tasi. Ina ua uma le viiga, sa ou tilotilo solo i foliga o tagata. Na tilotilo mai tagata uma ia i matou ma le lotonaunau. Na tafe ifo loimata i alafau o nisi o tamaitai. Sa filemu mo se minute ona sa leai se tasi na manao e faalavelave i lena taimi. Mulimuli ane, na tulai mai se alii i le pito i tua o le potu ma valaau mai, “O i latou o tagata Paia, o tagata Paia moni lava!” Na amata ona patipati tagata uma.

A o matou savavali atu i le ala savali, e toatele tagata na mananao e aumai ia i matou ni tupe. Ina ua matou le taliaina, sa atili ai ona latou maofa. Sa ou faalogo o tautala lemu se tagata ia te ia lava, “E le tupu fua lenei mea.” Sa taumafai foi se tasi alii e tuuina mai ia i matou se afe tala ma sa maofa o ia i lo matou teteeina o le tupe. Nai lo lena, sa matou ofoina atu ia te ia se kata fepasiai, sa faapea ona ia aveina ma le fiafia. E lei umi ae amata ona fesili mai isi pasese mo ni kata fepasiai. Sa latou fesili foi e uiga i le Ekalesia ma i matou. Na foliga mai o fea lava sa matou tilotilo i ai, sa fetaui lava o matou mata ma ni foliga ataata ma ni lagona mafanafana. I le faatausiusiuga o le potu o le nofoaafi, sa matou faamanuia atu ai i le pasese ia maua se Kerisimasi fiafia ma talotalo faatofa atu i a matou uo fou.

I le isi itu o le faitotoa, sa matou tau fai fetilotilofai ai i le le talitonu “O le a le mea lea na tupu nei lava?” sa matou tau fai fesili ai. Ma, faatasi ai ma le faaluaina o lo matou malosi, sa matou ulu atu ai i le isi faitotoa. O le taimi muamua sa le ano mai le pasese ia i matou, ae ina ua uma ona matou usuina le viiga, e tutusa lava foi le vavega na oo ia i latou. Mo lena afiafi atoa, sa matou o atu ai i potu o nofoaafi, ma e tutusa lava aafiaga na [matou maua] ai i vaega taitasi. E lei i ai se taimi muamua na ou vaaia ai se taliaina ma se alofa faapenei.

O le toe foi atu i le fale i lena po, na ou iloaina ai na ou vaaia se vavega na aumaia e musika, o se savali e uiga i le Faaola, ma le agaga o le Kerisimasi. E oo lava i taimi e sili ona le lelei o o tatou olaga, e mafai ona faamafanafanaina i tatou i le faatasi mai o le Alii. Na faamanuiaina tele au i lou vaaia o le ala e suia tele ai tagata i lalo o aafiaga o le Agaga. O le a ou manatua pea lena afiafi ma ou teufatuina. Tau ina ia galueaiina e faavavau e le Agaga ia vavega faapena!