Maofa i le Alofa o Iesu Mo Au

E sili ona ou maofa i le taimi na fetalai atu ai Iesu, i le mavae o lona tautevateva atu i le mamafa o Lana avega i luga o le mauga o Kalevaria e faapea, “Lou Tama e, ia e faamagaloina atu ia te i latou; aua ua latou le iloa le mea ua latou faia” (Luka 23:34).

Afai e i ai se taimi ou te tu ma ofo ai, o le taimi lenei. A ou mafaufau ia te Ia o tauaveina le mamafa o a tatou agasala uma ma faamagalo atu ia i latou o le a tuituiina o Ia i le satauro, ou te le fesili “Na faapefea ona Ia faia?” ae o le “Aisea na Ia faia ai?” A o ou iloiloina lou olaga agai i Lona soifuaga alofa tunoa, na ou iloa ai lo’u toilalo e fai ni galuega se tele e pei ona sa tatau ona faia e mulimuli ai i le Matai.

Ia te au, o se itu e sili atu ona taua lea e maofa ai. Ou te matuai tei lava i Lona gafatia ona faamalolo i e mamai ma faaola e na oti, ae na i ai sina ou aafiaga i le faamalologa i se auala laitiiti lava. O i tatou o tagata e itiiti o tatou agavaa, ae ua tatou vaaia vavega a le Alii o faataunuuina pea lava pea i o tatou lava olaga ma i totonu o o tatou lava aiga, i o tatou vaega o le perisitua. Ae o le alofa tunoa? Faamagaloga? Togiola? Faaleleiga? O le tele o taimi, o se tulaga e ese mai lena.

Na faapefea ona Ia faamagaloina i latou na faasaua ia te Ia i lena taimi? O na tiga uma, o le tafe mai o le toto i pu ninii uma, ae sa mafaufau lava o Ia i isi. O se tasi lenei o faamaoniga aupito sili ona ofoofogia o Ia moni lava sa atoatoa ma e finagalo foi ina ia tatou atoatoa. I le Lauga i luga o le Mauga, a o lei fetalai mai o Ia e faapea o le atoatoa o le tatou sini lea, sa Ia tuuina mai se mea e fai ma manaoga faaiu. Na fetalai o Ia, e tatau i tagata uma ona “alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuai fua mai ma faasaua mai ia te outou” (Mataio 5:44).

O se tasi lenei o mea e aupito sili ona faigata ona fai.

O Iesu Keriso o le tagata aupito mama lea ma na o le pau lea o le tagata atoatoa na soifua [i le lalolagi]. O Ia o le tagata e toatasi i le lalolagi atoa mai ia Atamu e oo mai i lenei taimi o le ua tatau i ai le viiga ma le faaaloalo ma le faamemelo ma le alofa, ae ui i lea, sa faasalaina o Ia, tuulafoaia, ma fasiotia. E ui i nei mea uma, sa le mafai ona ia tausalaina i latou na sauaina o Ia.

Ina ua tutuliese o tatou uluai matua, o Atamu ma Eva mai le Faatoaga o Etena, na poloaiina i laua e le Alii e “tapuai atu i le Alii lo la Atua, ma … tuuina atu uluai manu o a laua lafu, mo se taulaga e osi atu i le Alii” (Mose 5:5). Na tau atu e le agelu ia Atamu, “O lenei mea o se faatusa o le taulaga a le Alo e Toatasi na Fanaua e le Tama, o le ua tumu i le alofa tunoa ma le upumoni” (Mose 5:7).

O le taulaga e fai ma faamanatu e le aunoa o le tauemuina ma le puapuagatia o le Alo o le a totogiina e togiolaina ai i tatou. O se faamaoniga tumau o le agamalu ma le alofa tunoa ma le agamaualalo—ioe, o le faamagaloina—o le a faapea ona faailogaina ai olaga o Kerisiano uma lava. Mo nei mafuaaga uma ma le tele o isi mafuaaga, o na tamai mamoe o uluai manu, e mama ma le pona, e atoatoa i soo se itu, na ositaulagaina i luga o na fata faitaulaga maa i lea tausaga ma lea tausaga ma lea augatupulaga i lea augatupulaga, e taitaiina atu i tatou i le Mamoe maoae a le Atua, o Lona Alo e Toatasi na Fanaua, o Lana Ulumatua, e atoatoa ma e aunoa ma se pona.

I lo tatou tisipenisione, e tatau ona tatou aai ma feinu i le faamanatuga—o se osigataulaga faafaatusa e atagia ai lo tatou loto momomo ma le agaga salamo (tagai MFF 59:8). A o tatou aai ma feinu [i le faamanatuga], ua tatou folafola atu e “manatua pea o ia ma tausi ana poloaiga … ; ina ia [tatou] maua pea lona Agaga e faatasi ma i [tatou]” (MFF 20:77).

O faailoga o le taulaga a le Alii, i taimi o Atamu ma o tatou taimi, e mo le fesoasoani ia i tatou e manatua ai e ola filemu ma usiusitai ma alolofa atu. O nei sauniga e mo le fesoasoani ia i tatou e manatua ai e faatino le talalelei a Iesu Keriso i lo tatou faapalepale ma le agalelei o le tagata o le tasi i le isi, e pei ona Ia faia mo i tatou i luga o lena satauro.

Ae i le aluga o seneturi, e toaitiiti i tatou ua tatou faaaogaina nei sauniga i le ala e tatau ai. O Kaino le tagata muamua na osia se taulaga sa le taliaina. E pei ona taua e le Perofeta o Iosefa Samita: “Na osia e Apelu i le Atua se taulaga lea na taliaina, o le faapolopolo o le lafu. Na osia e Kaino fua o le laueleele, ma e lei taliaina, aua e lei … mafai e ia ona faatinoina le faatuatua e ese mai le fuafuaga a le lagi. E tatau lava ona faamaligiina le toto o le Alo Pele e Toatasi e togiola ai le tagata, aua o le ata lea o le faaolataga, ma a leai le faamaligiina o le toto e leai foi se faamagaloga. Ma e pei ona faatulagaina le taulaga mo se faatusa e mafai ai e le tagata ona iloatino le Taulaga silisili na saunia e le Atua, o le osi ai o se taulaga e feteenai ma lena, e leai se faatuatua e mafai ona faaaogaina, aua o le faaolataga e lei faatauina mai i lena auala, pe na faatulagaina foi le mana o le togiola e mulimuli i lena faatulagaga. … E moni lava, o le faamaligiina o le toto o se manu e le mafai ona aoga i le tagata, vagana ai na fai i le faataitai, po o se faatusa po o se faamatalaga e tatau ona osia e ala i le meaalofa a le Atua Lava Ia.”²

Ma o isi foi i o tatou aso, e tai pei lava o Kaino, e toe foi atu i le fale pe a maea ona aai ma feinu i le faamanatuga e finau ma se tagata o le aiga pe pepelo pe le faamaoni pe ita foi i se tuaoi.

Na tautalagia e Samuelu, o se perofeta i Isaraelu le le aoga o le osia o se taulaga e aunoa ma le faamamaluina o le uiga o le taulaga. Ina ua le usitaia e Saulo, le tupu o Isaraelu le finagalo o le Alii e ala i le aumaia i Amaleka “o mamoe ma povi e aupito lelei ina ia fai ai taulaga ia Ieova [lona] Atua,” Ua fai atu Samuelu: “E tusa ea ona fiafia o Ieova i taulaga mu ma taulaga, i lona fiafia i le faalogo i le siufofoga o Ieova? Faauta, o le faalogo e sili lea i le taulaga, ma le usiusitai e sili lea i le ga’o o le mamoe poa” (1 Samuelu 15:15, 22).

Na osia e Saulo le taulaga e aunoa ma le malamalama i le uiga o lana taulaga. O le Au Paia o Aso e Gata Ai o e o atu ma le faamaoni i sauniga faamanatuga ae e le loto alolofa pe onosai pe loto faamagalo, o le taunuuga e tutusa lelei lava. Latou te faatinoina sauniga e aunoa ma se malamalama i faamoemoega na ala ai ona faatulagaina nei sauniga. O na faamoemoega o le fesoasoani lea ia i tatou ia tatou usiusitai ma agamalu i lo tatou sailiga o le faamagaloga o a tatou agasala.

O le tele o tausaga ua mavae, na aoao mai ai Elder Melvin J. Ballard (1873–1939) e faapea o le Atua “o le Atua fua ia—e fua ina ia [aua] nei o tatou le amanaia ma faagalo ma manatu e le taua Lana meaalofa silisili mo i tatou”³—o le soifua o Lona Atalii Ulumatua.

E faapefea la ona tatou mautinoa tatou le amanaiaina pe manatu faatauvaa pe faagalo Lana meaalofa silisili o meaalofa uma mo i tatou?

Tatou te faia lea i le faaali atu o lo tatou mananao mo se faamagaloina o a tatou agasala ma lo tatou loto faafetai e faavavau mo le tatalo aupito sili ona lototele: “Lou Tama e, ia e faamagaloina atu ia te i latou; aua ua latou le iloa le mea ua latou faia.” Tatou te faia lea e ala i le auai i le galuega o le faamagalo atu.

“‘Ia outou fesui i a outou avega e ave, ma ia faapea ona outou faia le tulafono a Keriso’ (Kal. 6:2) [Ua poloaiina i tatou e Paulo]. … O le tulafono a Keriso, o lo tatou tiute lea e faataunuu, o le tauave o le satauro. O le avega a lou uso lea e tatau ona ou tauaveina e le gata i lona itu i fafo [ma tulaga], … ae o le mea moni foi o ana agasala. Ma na o le pau lava le ala e tauave ai lena agasala o le faamagalo atu lea. … O le faamagalo atu o le puapuagatia lea faapei o Keriso, o le tiute lea o se tagata Kerisiano e tauave.”⁴

E mautinoa lava o le pogai na fetalai ai Keriso, “Lou Tama e, ia e faamagaloina atu ia te i latou,” ona e ui lava foi i lena itula faigata, na Ia silafia lava o le savali lenei na afio mai ai o Ia i le faavavau atoa e tuuina mai. Na semanu e leai se aoga atoa o le ata o le faaolataga pe a na galo ia te Ia, e faapea e ui lava i le le amiotonu ma le leaga ma le le alolofa ma le le usiusitai ae o le mea moni ona o i latou ua afio mai ai o Ia e tuuina mai le faamagaloga i le tagata. E mafai lava e soo se tasi ona amiolelei ma onosai ma loto faamagalo i se aso lelei. O se Kerisiano e tatau ona amiolelei ma onosai ma loto faamagalo i aso uma.

Pe o i ai se tagata i lou olaga o le atonu e manaomia le faamagaloga? O i ai se tasi i lou fale, se tasi i lou aiga, se tasi i le tou vaituaoi o le na faia se mea le lelei pe o se mea faalealofa po o se mea e le kerisiano? O i tatou uma lava e tausalaina i na ituaiga solitulafono, o lea e tatau lava ona i ai se tasi o loo manaomia lau faamagaloga.

Ma faamolemole aua nei fesiligia pe talafeagai lava ona tauaveina e le tagata manua le avega o le faamagaloina atu o le tagata ua sala. Aua nei fesiligia pe le o poloaiina e le “faamasinoga tonu” o le isi itu e tatau ona i ai. Pe a oo mai i a tatou lava agasala, tatou te le fesili mo le faamasinoga tonu. O le mea tatou te talosagaina o le alofa tunoa—ma o le mea lena e tatau ona tatou naunau e tuuina atu.

Pe ua outou silasila la i le leaga o le le tuuina atu i isi o le mea tatou te matuai manaomia foi e i tatou? Atonu o le gaoioiga aupito maualuga ma aupito paia ma aupito mama o le tau atu i foliga o le agaleaga ma le le tonu tou te “alolofa [moni] i e ita mai ia te outou, faamanuia atu i e ua fetuu mai ia te outou, agalelei atu i e ua inoino mai ia te outou, ma tatalo mo e ua tuuai fua mai ma faasaua mai ia te outou.” O le mea lena e manaomia i le ala o le atoatoa.

Ou te manatua ni nai tausaga ua mavae i lou vaaia ai o se mea na tupu i le Malae Vaalele Faavaomalo i Sate Leki. O lenei lava aso faapitoa, na ou aluese ai mai le vaalele ma savali atu i totonu o le fale o le malae vaalele. Sa vave lava ona ou iloa atu o se faifeautalai ua toe foi mai i le aiga ona sa tumu lava le malae vaalele i tagata na iloagofie lava o uo ma aiga o le faifeautalai.

Sa ou taumafai e filifili ia tagata moni o le aiga. Sa i ai se tama o le sa tau le lagolelei lana faalogo i se suti o le sitaili ua leva ua tau le ofi. Na foliga mai o ia o se tagata faifaatoaga, ua enaena lona pau ma ona lima lapopoa ua maosiosia i le galue.

Sa i ai se tina o le ua fai si paee, ma ua foliga mai sa galue malosi lava i lona olaga. Sa ia uuina se solosolo—ma ou te manatu sa avea i se taimi o se solosolo ie, ae ua pei lava o se pepa solo. Na toetoe lava a masaesae mai le naunautai lea e na o se tina lava o se faifeautalai ua foi mai na te iloa.

Pe a ma le toalua pe toatolu ia uso ma tuafafine laiti na taufetuliai solo, na matele lava ona o le le iloa o le mea na tupu.

Sa oo ina ou mafaufau pe o ai o le a muamua oso ese mai le vaega a le au faatali vaa [e faafeiloai le faifeau]. O lou vaai atu i le solosolo o le tina na ou talitonu ai atonu o ia lea.

A o ou saofai ai iina, na ou vaai atu ua sau le faifeautalai. Na ou iloaina o ia lea ona o le feei mai o le faapotopotoga i le fiafia. Na foliga uma o ia o Kapeteni Moronae, mama ma aulelei ma umi faasasao. E le taumate lava sa ia iloa le uiga o le osigataulaga o lenei misiona i lona tama ma lona tina.

Na sao lava, a o latalata atu o ia i le vaega, sa le mafai e se tasi ona faatali teisi. Sa le o le tina, ma sa le o se tasi foi o le fanau. Ae o Tama. O lena alii tino tele, na fai si le mautonu, filemu, pau enaena, na tamoe atu ma fusi mai lona atalii.

O le faifeautalai pe a ma le 6′2″ (188 cm) le umi, ae o lenei tama tino tele, na opoina mai o ia, sii i luga, ma fusi o ia mo se taimi umi lava. Sa na o lona fusiina lava o ia e aunoa ma se upu. Na tuu e le taulealea ona lima uma e fusi ai lona tamā, ona la feopoai ai lava lea. Na pei lava na le toe minoi le faavavau atoa. Na pei lava foi na sāō le lalolagi atoa ona o le faaaloalo mo sea taimi faapenei.

Ona ou mafaufau lea i le Atua le Tama Faavavau i le silasila atu i Lona Alo o alu e auauna atu, e ositaulaga ae e le faapea na tatau ona Ia faia, i se isi faaupuga, na totogi Ana lava mea na faaaoga, o le tau o mea uma na Ia faaputuina i Lona olaga atoa e tuuina atu. I lena taimi taua, sa le faigata le vaai faalemafaufau i lena Tama o talanoa atu ma se lagona ootia ia i latou na mafai ona lagonaina, “O lo’u Atalii Pele lena, ua ou fiafia lava ia te ia” (Mataio 3:17). Ma sa mafai foi ona [ou] vaai faalemafaufau i lena Atalii na toe foi manumalo atu o fetalai atu, “Ua taunuu” (Ioane 19:30). “Lou Tama e, ou te tuuina atu lou nei agaga i ou aao” (Luka 23:46).

E ui lava i le tapulaa o lau vaai faalemafaufau, e mafai ona ou vaai atu i lena toe tuufaatasia i le lagi. Ma ou te tatalo mo se toe tuufaatasia faapena mo oe ma au. Ou te tatalo mo le faaleleiga ma mo le faamagaloga, mo le alofa tunoa, ma mo le tuputupu ae faaKerisiano ma uiga faaKerisiano e tatau ona tatou atiina ae pe afai tatou te fia olioli atoatoa mo se taimi faapena.

Ou te tu ma ofo ona e oo lava i se tagata e pei o au, o loo i ai se avanoa. Afai na sa’o lau faalogo i le “tala lelei” o loo i ai moni se avanoa—mo oe ma au ma mo tagata uma o e naunau e tumau pea le faamoemoe ma taumafai pea ma ia tuuina atu i isi lea lava avanoa e tasi.