Ou te Manatua Iosefa

E toatele i latou na iloa le Perofeta o Iosefa Samita sa tusia e uiga i o latou aafiaga faatasi ma ia. O nisi nei o na tala o loo auina atu faatasi ma galuega o faatufugaga o loo faaalia ai le Perofeta. O nisi tala na tusia i taimi na latalata i le mea na tupu e pei ona faaalia i le faatufugaga ae o isi o ni taimi ua leva mulimuli ane, ae o loo aumaia uma ai ni vaaiga i lona olaga o se tagata ma o se perofeta a le Atua.

Fai mai Jesse N. Smith, o le tausoga o le Perofeta: “O [Iosefa Samita na] le mafaatusalia le avea o ia o le tagata sili ona faapei o le Atua ua ou vaai i ai. … Ou te iloa o lona natura e le mafai ona ia pepelo pe taufaalata, ae ua ia te ia se agalelei silisili ona maoae ma le tamalii o ona uiga. O taimi uma lava ou te i ai faatasi ma ia na ou lagonaina lava e mafai ona ati lana vaai ia te au i ou lagona ma manatu. Ou te iloa e moni uma lava mea ua faamatalaina ai o ia.”¹

Iosefa Samita, na saunia e William Whitaker, © Deseret Morning News, e le mafai ona kopiina

O Lau Auauna o Iosefa, na saunia e Liz Lemon Swindle, Foundation Arts, e le mafai ona kopiina

Taumatau: na tusia e Emmeline Blanche Wells: “I le Perofeta o Iosefa Samita, ou te talitonu na ou matauina le mana faaleagaga maoae na aumaia le olioli ma le mafanafana i le Au Paia. … O le mana o le Atua na i luga ia te ia i se maualuga lea na i ai i le tele o tulaga na foliga e liua o ia. … O le mamalu o ona foliga na le mafaamatalaina.”²

Iosefa i le Togavao, na saunia e A. D. Shaw, mai faaaloaloga a le Falemataaga o Talafaasolopito ma Faatufugaga a le Ekalesia

Tauagavale mamao: O se togalaau sa masani ona avea ma nofoaga mo le Perofeta e talanoa atu ai i le Au Paia o Aso e Gata Ai Na faamatalaina e Amasa Potter: “Ou te manatuaina le tulai o le Perofeta e lauga atu i se faapotopotoga tele i le togalaau i le itu i sisifo o le Malumalu i Navu. … Na faapea mai Iosefa o tagata taitoatasi o le Au Paia e i ai se mea foaifua [faaleagaga], ma e ala i le ola i se olaga amiotonu, ma le tatalo ia maua, o le a faaalia ai ia te ia e le Agaga Paia.”³

O Iosefa Samita ua Aoaiina Leoleo i le Falepuipui i Richmond, na saunia e Sam Lawlor

Tauagavale: Na tusia e Parley P. Pratt e uiga i se taimi na faapagotaina ai le Perofeta o Iosefa Samita ma isi i le falepuipui i Richmond, Misuri. Na leva ona latou faalogologo i gagana lauvavale ma le eleelea a leoleo. “Na faafuasei ona tu ae [Iosefa] i luga, ma tautala atu i le leo o le faititili, e pei o le leo o se leona taanoa, ma fai atu, e latalata i lou manatuaina, upu nei:

“‘FILEMU. … I le suafa o Iesu Keriso ou te vavao ia te outou, ma faatonuina outou ina ia filemu.’ …

“O leoleo ua gatete … ma aioi mai mo lana faamagaloga, ma tumau ai i le filemu.”⁴

Fugalaau mo se Tamaitai, na saunia e Liz Lemon Swindle, Foundation Arts, e le mafai ona kopiina

Luga: Na tusia e Mercy R. Thompson e uiga i le Perofeta, “A o matou tietie atu faatasi ma ia ma lona faletua o Ema i le la taavale solofanua, na ou vaaia o ia ua oso ese mai le taavale solofanua ma tau mai ni fugalaau o le togavao mo lau tama teine laitiiti.”⁵

Au Uso, na saunia e Liz Lemon Swindle, Foundation Arts, e le mafai ona kopiina

Ata faaopoopo i luga: O le ata vali lenei ua faaalia ai Ailama ma Iosefa Samita o [taaalo] tautoso i laau. Na tusia e Mosiah L. Hancock, “Na ofo mai Uso Iosefa e tauva i le taaloga toso laau ma soo se tasi—ma na ia tosoina uma lava taitoatasi i latou i luga.”⁶

Iosefa o loo Faapotopotoina le Faapotopotoga a Navu, na saunia e C. C. A. Christensen, mai faaaloaloga a le Falemataaga o Faatufugaga a le Brigham Young University

Tauagavale: Na tusia e Eunice Billings Snow: “Na ou vaaia le ‘Faapotopotoga a Navu’ o solo faatasi atu ma le Perofeta, … ma lona faletua o Ema Hale Smith, o tietie i solofanua i le pito i luma o le vaegaau. … O [Iosefa] e paepae, ae o [Ema] e enaena, i o laua laei tietie solofanua mananaia. O ia [Iosefa] i ona laei o le militeli, ae o ia [Ema] i lona laei tietie solofanua e faamau auro. … O lana solofanua e sili ona fiafia e tietie ai na igoa ia Charlie, o se solofanua tele lanuuliuli.”⁷

Taumatau: Na faamatalaina e Parley P. Pratt, “I le aso 21 o Fepuari, 1835, na ou faia ai le tautoga ma le feagaiga o le avea ma se aposetolo, ma sa vaetofiaina au i se sauniga ma faauuina au i lena tofiga; ma o se tasi o lena korama i lalo o aao o Iosefa Samita, Oliva Kaotui ma Tavita Uitimera.”⁸

Na Faagutu e le Perofeta Lana Solofanua, O Lana Toe Tepa Tasi i Fair Nauvoo, na saunia e Harold Hopkinson, e le mafai ona kopiina

Lalo: Na tusia e Lucy Walker Kimball: “Na ia iloaina lelei lava … e tatau ona ia ositaulagaina lona ola mo mataupu faavae na faaali mai e le Atua e ala mai ia te ia. … Na masani ona ou faalogo ia te ia o faapea mai, na te iloaina lava e faamauina lana molimau i lona toto.”⁹