Avanoa i le Faletalimalo

I se aoauli susulu, ma le maatiati o le malulu, sa faasaga atu la matou veni agai i le fale o le misiona i Bordeaux, Farani. O le aso 24 o Tesema, 1990, ma sa matou agai atu i le fale mo le Kerisimasi.

O i maua ma lou toalua o Kathy, faatasi ai ma le ma fanau e toafa—o Camey, e 14 tausaga, Brandt, 13, Kristen, 10, ma Derek, e 8—na faatoa uma atu lava se vaiaso o aafiaga e manatua pea. Ona o le vavamamao o le matou misiona, na matou le aumaia faatasi ai faifeautalai mo se faamanatuina o le Kerisimasi. Ae, sa matou malaga o se aiga i taulaga uma i totonu o le misiona, ma aumaia se lagona o le faatasia o aiga, na aofia ai tamaiti i le tuuina atu o se polokalama faapitoa o le Kerisimasi Sa fiafia lava lo matou aiga faatasi ma faifeautalai taitoatasi i le avanoa maoae e fetufaai atu ai le talalelei toefuataiina a Keriso i lenei taimi fiafia o le tausaga.

O le matou aso mulimuli, sa matou faatasi ai ma ni faifeautalai lelei lava se toafa. Ua tumu nei le veni lapoa lanumoana, sa faatumulia foi i le agaga o le Kerisimasi, ma o pesepesega o le Kerisimasi ma tala e sili ona fiafia i ai, na vave ai lava ona uma le taimi o le malaga. Na atili fiafia lava Kristen ma Derek i itula taitasi a o la tulimatai atu i mea e faateia ai o le a aumaia e le taeao o le Kerisimasi. Na toetoe lava a matou sosogi i le pipi o le taumafataga na saunia i le ofisa o le misiona e se ulugalii faamisiona lelei lava e faatali mai ai i matou. Sa i ai i peau o le ea ia lagona o le Kerisimasi.

Ae ana le oo lava i le tuneva o le aoauli matou te le iloaina e ono i ai sina faafitauli. O le tele o le taimi i le taeao sa faafaigata ai lava ona sui le kia o le veni. Sa matou tutu e siaki le fuluti, ae na foliga mai sa lelei lava mea uma. Ae o lenei, ua amata ona pogipogi mai ae toe lua foi itula ona oo lea i Bordeaux, ae ua matuai le maua lava le kia tolu, fa, ma le lima.

Sa matou tautolotolo lava i le auala maotua e laina i laau i le kia lona lua. E matuai le mafai lava ona matou oo atu i Bordeaux i lenei tulaga, ma o lea na matou vaavaai ai mo se fesoasoani e mafai ona maua. O lo matou faamoemoe muamua lava o se faleoloa na amata tapenapena e tapuni. Sa ou fesili pe i ai se nofoaga e ono maua ai se taavale e faaaoga mo se taimi po o se fale faatali nofoaafi e lata ane. Peitai, na lei taitai lava matou latalata atu i se taulaga, ma sa le tele foi ni tali i au fesili.

Na ou toe foi atu i le veni. Na vaaia i foliga o le ma fanau laiti ifo le popole ma le le fiafia. Mata o le a latou le oo i le fale mo le Vaeluaga o le Kerisimasi? Pe o le a latou faaaluina lenei po aupito sili ona faapitoa o le tausaga i totonu o se veni feomai a le misiona? O le maea ai ona latou aumaia o le fiafia ma le sagisagi i faifeautalai o loo mamao mai o latou aiga, pe o le a latou fai Kerisimasi i tafaala o se auala maotua ma e le faaaogaina i Farani e mamao mai lo latou lava foi aiga?

Na iloa e Kristen le tagata e mafai ona matou talosaga i ai, ma sa vave lava ona ia fautuaina se tatalo. O le tele lava o taimi i le i ai o se aiga, sa matou tatalo ai mo i latou o loo manaomia se fesoasoani—mo faifeautalai, o tagata sailiili, o tagata o le Ekalesia, o o tatou taitai, o tagata Farani, ma o matou lava aiga. Sa matou punonou i le tatalo ma ole atu ma le faamaualalo mo se fesoasoani.

O le taimi lea ua pogisa. Na tolotolo agai i luma le veni, pei o le tamoemoe a se tagata koleni i lalo o le togavao paina. Sa matou faamoemoe ia matou taunuu atu i se taulaga laitiiti e na o le tolu maila (5 km) sa i luma atu. E lei umi ae suluia e moli se faailo laitiiti e i ai se au e faasino atu ai i matou i Villeneuve-de-Marsan.

Sa matou ui atu i le auala e lua ituala mai Pau i Bordeaux i le tele o taimi, ae matou te lei oso atu lava mai le alatanu i le taulaga laitiiti o Villeneuve-de-Marsan. A o tolotolo atu la matou taavale i le taulaga, na pei lava le vaaiga o le tele o nuu laiti o Farani. Sa pipii lava fale i faleoloa laiti, na tumu ai le auala vaapiapi e agai atu i le taulaga. Sa vave tapunipuni pola o faitotoa ma faamalama, ma na pogisa ma leai nisi e feoai i le alatele. O moli i totonu o le falesa tuai o le Katoliko i le ogatotonu o le taulaga na iloa ai le faailoga e tasi o loo i ai ni tagata iina o loo tapena mo le misasa masani o le vaeluaga. Sa matou tolotolo atu ma pasia ai le falesa, ae na toomaunu le veni ona pe lea. O le mea e laki ai, sa matou i ai tonu i luma o se faletalimalo matagofie. Sa ola ai moli, ma sa tonu ia i matou o lo matou avanoa mulimuli lenei mo se fesoasoani.

Ina ia taofia le faapopoleina o i latou sa i totonu o le faletalimalo, o lea sa faatali atu ai Kathy, Camey, ma faifeautalai i le veni ae ou alu ma ave tamaiti laiti e toatolu i totonu. Sa ou faamatalaina atu lo matou tulaga i le tamaitai talavou sa i ai i le laulau i luma. Sa mafai ona ia iloa mai foliga lelavava ma le faanoanoa o lau fanau, ona ia fai mai lea ma le agalelei matou te faatali ae sei telefoni atu i le pule o le faletalimalo o Mr. Francis Darroze.

Na sau Camey e vaai pe na a mai le matou savali. A o matou faatalitali mo le taunuu mai o Mr. Darroze, sa ou faia se tatalo le leoa o le faafetai. Atonu o le a le mafai ona matou oo atu i Bordeaux i le po, ae e ese le agalelei o lo tatou Tama oi le Lagi, ma le taitaiina mai o i matou i se faletalimalo mama! Sa ou tetete i lou iloaina sa faigofie lava ona matou faaaluina le po i totonu o le veni i se eria maotua o Farani. Sa ou iloa atu se faleaiga i le isi potu na sosoo ai, ma sa ou maofa ona sa matala i le Vaeluaga o le Kerisimasi. O le a maua sa matou meaai lelei, taeele i se vai mafanafana, ma se moe lelei.

Na taunuu mai Mr. Darroze i ona lavalava masani o se kuka Farani, ma lona peleue kuka mafiafia na faamau e pau i lona auvae. O ia o le pule o le faletalimalo, ma o se tagata taua foi i le alalafaga. O ona foliga agaalofa ma le vave ona ataata na tau mai ai o ia foi o se tamalii.

Sa ou faamatala atu ia te ia e uiga i lo matou pagatia, ma le toa 10 o i matou i totonu o le veni, ma o matou e o Bordeaux. A o ia matauina lau tautala, sa ou faaopoopo atu o i matou o tagata Amerika ma i se fuaiupu se tasi na ou tau atu ai le mafuaaga o lo matou i ai i Farani.

O le taimi lava lena sa ia fesoasoani mai ai ia i matou. Pe tusa ma le 10 maila (16 km) le mamao na i ai se nuu e le tele tele e fealuai ai se nofoaafi. Sa telefoni atu o ia e fesili pe o le a le isi taimi o le nofoaafi mo Bordeaux ma iloa ai faatoa toe malaga i le 10:15 i le taeao o le Kerisimasi. Na tapuni uma kamupani taavale faaaoga faavaitaimi i lena aai e tele atu.

Na iloagofie lava le le fiafia i foliga o lau fanau laiti. Sa ou fesili atu ia Mr. Darroze pe avanoa ni potu o le faletalimalo mo lo matou aiga ma faifeautalai e toafa matou te momoe ai. E ui o le a le mafai ona matou oo atu i le fale, ae o le mea taulia o se faamanuiaga maoae le maua o se nofoaga lelei faapenei.

Na tilotilo atu Mr. Darroze i tamaiti. E lei leva ona ia iloa i matou, ae na ootia lona loto ona o i matou na pei lava o ni ona aiga e ui o i matou o ni tagata ese. Na tumu lona loto i le agaga o le foai atu o le Kerisimasi. “Mr. Andersen,” na ia fai mai ai, “o loo i ai potu e mafai ona outou nofo totogi ai. Ae e te le manao e faaalu le Vaeluaga o le Kerisimasi iinei i le faletalimalo. E tatau ona i ai tamaiti i le fale a o latou faatalitalia le fiafia o le taeao o le Kerisimasi. O le a ou tuuina atu lau taavale tou te o atu ai i Bordeaux i le po nei.”

Sa ou maofa i lona manatu mai [ia i matou]. O le tele lava o tagata latou te mafaufau ma le faaeteete i tagata ese, ae maise lava o tagata mai se isi atunuu e pei o i matou. Sa ou faafetai atu ia te ia ma faamatala atu e toa 10 i matou ma o le a le gafatia e se taavale Farani laitiiti i matou.

Sa le mautonu o ia mo se taimi, ae o lona le mautonu sa le faaitiitia ai le meaalofa ae sa na ona faateleina ai.

“O loo i ai sau veni tuai i lau faatoaga pe a ma le 10 maila le mamao mai iinei. E faaaoga mo le faatoaga ma e na o le lua nofoa i le pito i luma. O le a mafai ona alu i le na o le 45 maila i le itula (70 kph), ma ou te le mautinoa pe o lelei le ea mafanafana. Ae afai e te manao i ai, o le a ta o atu i le 10 maila i lau faatoaga e aumai ai.”

Sa osooso tamaiti i le fiafia. Sa ou tago ifo i lau taga mo lau tupe po o kata fai faatau. Sa vave ona lulu mai lona ulu ma lona tamailima e le taliaina.

“Leai,” na ia fai mai ai, “Ou te le taliaina se mea faapena. E mafai ona e toe faafoia mai lau veni i sou taimi avanoa pe a uma le Kerisimasi. O le Vaeluaga lenei o le Kerisimasi. Ave lou aiga i le fale.”

O le tea laitiiti o le vaeluaga o le po ae vaaia loa moli o Bordeaux. Na momoe tamaiti ma faifeautalai i le pito i tua o le veni a le pule o le faletalimalo. A o matou ui atu i alatele masani e tau atu i lo matou fale, sa ma faafetai atu ma Kathy i le Tama Faalelagi agalelei mo la matou lava vavega o le Kerisimasi. I se taimi lea e na o Ia lava e mafai ona aumaia i matou i le fale, sa Ia faafofogaina a matou tatalo.

Sa matou i ai i le fale i le Vaeluaga o le Kerisimasi, e ui lava ina sa avanoa le faletalimalo i Villeneuve-de-Marsan.