O Le Tagata Foai Faalilolilo

Ou te fiafia i mea uma lava e faatatau i le Kerisimasi: o moli, pesepesega, taimi ma aiga—mea uma lava tatou te faia e faamanatu ai le fanau mai o Iesu. Oi, ma e faapitoa lava lou fiafia i le mauaina o meaalofa. Na amata ona fai lau lisi o mea ou te moomoo i ai i le Kerisimasi ia Setema.

I se tasi tausaga na pei lava le umi o lau lisi o le umi o lou ogalima. Ma na atili ai lou mafaufau i mea e faaopoopo atu i ai. Sa ou naunau lava e faaali atu i lou tama. “Ia, Tavita, ua ou iloa atu mea ua e manao e maua mo le Kerisimasi,” o lana tala lea a o tilotilo i le lisi. “Ae o le a sau mea e foai atu?”

“O loo fai ni au meaalofa mo oulua ma Tina i le aoga. O le Aso Faraile o le a ma o ai ma Tina e faatau ni meaalofa mo Shannon ma Jon. Ua uma lava ona ou fuafuaina.”

“Hmmm,” na pau lena o le tala a Tama. Mo se mafuaaga e lei fiafia o ia i lau tali. Ou te lei fiafia i le leo o le “hmmm.”

O le afiafi faaleaiga na sosoo ai, na talanoaina ai e ou matua le manatu o le tuuina atu ma le mauaina mai ma le uiga moni o le Kerisimasi. Na mafai ona vaaia le fai ifo o lau lisi i lea minute ma lea minute. Na la fesili mai pe i ai ni o matou manatu e fesoasoani ai ia matou manatua ia foai tele atu. Na talotalo atu ma le fiafia e Shannon lona lima. Sa ma mumumumu ma lou uso matua o Jon. O Shannon, o manatu na masani lava ona aofia ai le faia o mea mo isi tagata, e pei o le veleina o le togalaau a lo matou tuaoi.

“Tatou filifilia ni tagata ua tuua toatasi pe matitiva ma tuu ai ni meaalofa i o latou faasitepu e aunoa ma le iloaina,” o le tala lea a Shannon ma le fiafia tele.

“E le o se manatu leaga lena,” o le tala lea a Jon. “O le a matua faalilolilo lava.”

“Atonu o le a malie moi lava lenei manatu,” o lou mafaufau lea.

Na matou malilie uma lava o se fuafuaga sili lea. Sa matou filifilia ni aiga se lua. E tasi o le aiga o Swenson o le matou uarota. Talu lava ona toe a’oga ia Uso Swenson, na foliga mai na le lava ai a latou tupe. E toatele foi a latou tamaiti, o e o le a fiafia i le mauaina o ni mea e ofo ai i le Kerisimasi. O le isi aiga o Mr. ma Mrs. Perez, o se ulugalii matutua na nonofo i lalo atu o le auala tele. Na foliga mai foi na tuua na o i laua.

Na matou o uma lava e fai faatauga mo ni meaalofa. Sa matou malilie e faatau ia meaalofa e faaaoga ai tupe na semanu e faaaoga mo a matou lava meaalofa. Sa le afaina lena mea ia te au. Sa ou matuai fiafia lava i le filifilia o meataalo mo le fanau tama laiti a le au Swenson. I se isi itu, na le toe taua mea na ou manao i ai.

Na matou filifili e ave atu se meaalofa se tasi i le po i aiga taitasi e amata ai aso e 12 a o lei oo i le Kerisimasi. Ina ua oo mai le po muamua, sa fai lou ofu uliuli mai lava i le ulu e oo i tamatamaivae, ma na momoli atu au e Jon i le fale o le au Swenson. Na ou tuuina ma le filemu le meaalofa muamua i luga o le polotito o le fale, faatatagi le logo, ma ou tamoe ese loa i le saoasaoa na ou mafaia. Na ou oso i tua o se pa i le taimi tonu na tatala ai e se tasi o tamaitiiti le faitotoa. Na mafai lava ona ou lagonaina atu o latou leo faateia a o latou mauaina le meaalofa. Na toetoe a ou pa i le malie ma le fiafia. Ua amataina lou olaga o se Tagata Foai Faalilolilo.

O mea na amata ona lelei—ma faigata. Na tatau ona matou o atu i ni taimi eseese i po taitasi ma o nisi taimi o taeao ona sa amata ona tilotilo mai tamaiti o le aiga o Swenson i le faamalama i se taumafaiga e maua ai i matou. Ma o taimi uma lava ou te tolotolo atu ai i luma o le faitotoa o le aiga o Perez, ou te vaai faalemafaufau o loo faatalitali mai ai Mrs. Perez iina, ma sauni e tatala mai le faitotoa, opo au, ma faapea mai e ese lou lelei. E tatau lava ona ou aloese mai lena mea. O le tausia o se mea lilo o le afa lena o le fiafia.

Ia, o le tausaga lena sa na o le amataga lea. O le Kerisimasi na sosoo ai, sa matou filifilia se aiga na faa 11 ona ma’i le latou tama teine i le falemai i lena tausaga ma se isi aiga na maua le tina i le kanesa. Oka—ou te lei iloaina sa matuai faigata le olaga i nisi tagata.

O lenei la ua toe oo mai le Kerisimasi, ma na matou filifili e fesoasoani atu i ni aiga se tolu. O le vaega aupito faigata o le filifilia o nei aiga. Na foliga mai e toatele naua tagata e manaomia sina faafiafia laitiiti mo le Kerisimasi.

Ae mo lau lava lisi? O tausaga taitasi ua atili ai le puupuu. Ua ou pisi lava i le faiga o au fuafuaga o le Foai Faalilolilo, ua tau leai ai se taimi ou te mafaufau ai mo au lava. O loo i ai meaalofa e filifili ma fuafuaga e fai.

E tasi lava le mea ua mautinoa—e ese le manaia o le faia o mea mo isi. E leai se mea e tutusa ma le lagona ou te maua pe a ou vaaia foliga ofo ma le fiafia o tagata matou te fesoasoani i ai. O le foai atu ua avea o se tasi o mea e sili ona ou fiafia i ai i le Kerisimasi.