I se tasi aso na ou anapogi ai ona sa ou popole ona o le tele o faigata, o lea na ou susueina ai le lomiga o le Liahona o Iulai 2007. Na tonu ia te au e faitau le vaega Mai le Soifuaga o Peresitene Spencer W. Kimball, o le tala na faaulutalaina “Tetee Atu i Faatosinaga Leaga,” lea e le masani ona ou faitauina ona o loo i ai i le vaega a tamaiti. O lenei tala na fesoasoani ia te au ou te solaese ai mai faatosinaga leaga na siomia ai au i lena aso, ma sa faamalosia au e le savali. Ou te uunaia tagata uma e faitau i vaega uma o le Liahona.

O Le Liahona o se malamalama ma o se puipuiga mo au. O le meafaigaluega muamua lava lea na ou faaaogaina e talai atu ai le talalelei i au uo.

Arlette Azi, Ivory Coast

A o ou tapenaina lau lesona mo Tamaitai Talavou i se tasi aso, na ou iloa ai na i ai vaega o le lesona na manaomia ona faaopoopo [atu i le lesona]. O le taimi lena na ou liliu atu ai i mea lilo sili o loo teuina a taitai maoae o le autalavou—o Taiala a le Perisitua Arona ma Tamaitai Talavou. O nei taiala o loo i ai faamatalaga mo tala ma tusiga fou mai le perofeta ma isi Pulega Aoao lea e mafai ona faaopoopo atu i lesona a Alii ma Tamaitai Talavou e fesoasoani ai i le autalavou e taulima ia luitau o nei aso.

O nei punaoa o se faamafanafanaga tele lea ia te au o se taitai aua ou te iloa o tala ma tusiga na ala mai i le faasologa sao ma o loo i ai aoaoga faavae moni. E mafai ona saoloto i le faaaogaina e faaopoopo, ae le suia ai lesona.

Genell Wells, Iuta, ISA

O se faamanuiaga sili le i ai o lenei lomiga matagofie, o le Liahona. Faafetai i lenei mekasini, ua mafai ai ona tatou maua saunoaga a perofeta ma iloa ai aafiaga faaleagaga a o tatou uso ma tuafafine i le lalolagi atoa. O le vaega e sili ona ou fiafia i ai o le mekasini O Leo o le Au Paia o Aso e Gata Ai. E faigata lava ona le lagonaina le Agaga pe a ou faitau i nei tala mananaia.

O loo ou sefeina i lau komepiuta ia lomiga PDF o le mekasini o loo maua i le Upega faaitulagi a le Ekalesia. Ao lei amataina lou aso, ou te faitauina ai se tusiga ina ia mafai ona faatumulia au i le Agaga. Faafetai tele lava mo le Liahona.

Oscar Javier Álvarez Gómez, Colombia

Ou te talitonu o le Liahona o se meafaigaluega lelei tele ona e mafai ai ona tatou aoao e uiga i molimau ma aafiaga o tagata o le ekalesia i le lalolagi atoa. Ou te fiafia foi e faalogologo i tala mai isi tagata o le ekalesia faapea foi ma le mauaina o fautuaga mai o tatou taitai. O a latou saunoaga e avea o ni taiala moni lava. O le mekasini foi o se auala lea e mafai ai ona tatou talisapaia le tuputupu ae ma le ola o le Ekalesia i le lalolagi atoa.

Darice Adolphe, Motu o Réunion

O le tele lava o taimi na ou manao ai lava e tusi atu i le Au Peresitene Sili ma le Au Pulega Aoao ma fesili atu i ai, “Na faapefea ona e iloa?” Ua faafia ona ou faalogo ona faitau lea i saunoaga o le konafesi, e pei lava o loo fetalai sao mai le Alii ia te au e uiga i ni ou atugaluga faapitoa o loo i ai. Mai nei aafiaga na ou iloaina ai le alofa tele o le Tama Faalelagi ia te au ma finagalo e fesoasoani mai ia te au ia avea ma se tagata sili atu. E oo mai lava savali o le konafesi ia te au po o fea lava ou te i ai, e oo lava i atunuu mamao lava. O nisi taimi o savali o se valaau ina ia salamo, o nisi taimi o se taitaiga, ma o nisi foi taimi o le faamafanafanaga. E masani ona ou lagonaina e pei lava au o se afafine e faapitoa ona alofa i ai le Tama Faalelagi pe a ou vaai i Lona tausia ma le faaeteete o au e ala i nei savali.

Charleen Crenshaw, Montana, ISA