O Le Kerisimasi E Sili Lava Le Manaia

A tatou maua le agaga o le Kerisimasi, tatou te manatua o Ia o Lona soifua mai lea tatou te faamanatuina i lenei vaitau o le tausaga. Tatou te manatunatu i lena aso Kerisimasi muamua, na muai tauina mai e perofeta anamua. E te manatua, ma ou manatua ia upu mai ia Isaia: “Faauta, e to le taupou, ma fanau mai se tama tane, na te faaigoa foi ia te ia o Emanuelu”⁴—o lona uiga “Ua ia te i tatou le Atua.”

I le konetineta o Amerika, na saunoa mai perofeta: “O loo sau le aso, ma ua le toe mamao e afio ifo ai mai le lagi i le mana o le Alii e pule aoao … e mau foi i se fale omea. … e onosai o Ia i tofotofoga, ma le tigaina. … E taua foi o ia o Iesu Keriso, le Alo o le Atua.”⁵

Ona oo mai ai lea o lena po silisili a o i ai leoleo mamoe i fanua ma sa faaali atu ai le agelu a le Alii ia i latou, ma tau atu i ai le soifua mai o le Faaola. Mulimuli ane, na malaga atu le Au Makoi mai Sasae i Ierusalema, “Ua faapea, Po o fea o i ai le ua fanau mai o le Tupu o tagata Iutaia? aua ua matou vaaia lona fetu i sasae, ua matou o mai ai e ifo atu ia te ia. …

“Ua latou iloa le fetu, ona matua tele ai lea o lo latou fiafia.

“Ua latou ulufale atu i le fale, ua latou iloa ai le tama itiiti ma Maria lona tina, ona latou faapauu ai lea, ma ifo atu ia te ia: ua talai foi a latou oloa, ona latou avatu ai lea ia te ia o meaalofa; o le auro, ma le pulu lipano, ma le pulu muro.”⁶

E sui taimi; e vave foi le alu o tausaga, ae o loo faaauau pea ona paia le Kerisimasi. I lenei tisipenisione ofoofogia o le atoaga o taimi, o avanoa e foai atu ai i tatou lava e matuai anoano lava, peitai e maaleale foi. O loo i ai loto e faafiafiaina. O loo i ai upu agalelei e fai atu. O loo i ai meaalofa e tuuina atu. O loo i ai galuega lelei e fai. O loo i ai agaga e faaolaina.

I le amataga o le vaitaimi o le 1930, na tuuina atu ai e Margaret Kisilevich ma lona uso o Nellie se meaalofa o le Kerisimasi i lo latou tuaoi o le aiga o Kozicki, lea na manatuaina lava e i latou uma i o latou olaga, ma o loo avea ma se musumusuga i o latou aiga.

O le aiga ia Margaret i na vaitaimi o Two Hills, Alberta, Kanata—o se nuu faifaatoaga na tele lava ina nofoia e tagata na malaga atu mai Iukureini ma Polani, o e na matele ina i ai ni aiga toatele ma na matuai matitiva lava. O le vaitaimi lea o le Pau Tele o le Tamaoaiga.

O le aiga o Margaret na i ai o lona tina ma lona tama, ma le la fanau e 15. Sa galue malosi le tina o Margaret ae o lona tama sa fatufatu mea fou—ma faatasi ai ma na mau tamaiti, na toatele ai lava la latou au faigaluega. O le ala lea, na mafanafana ai lava lo latou fale i taimi uma, ma e ui lava i o latou tulaga faatauvaa, ae latou te lei fiaaai lava. O taumafanafana latou te totoina ai se faatoaga tele lava, utu fagu kapisi, sisi, kulimi oona, ma piko manogi e faafesuiai ma mea latou te manaomia. Sa latou fafagaina foi ni moa, puaa, ma ni povi. Sa matuai utiuti lava a latou tupe, ae o nei meaai sa mafai ona faafesuiai mo isi oloa sa le mafai ona latou faia e i latou lava.

Sa i ai ni uo a le tina o Margaret sa latou malaga mai faatasi mai lo latou atunuu moni. O nei uo sa i ai so latou faleoloa, ma na avea le faleoloa ma se nofoaga e feiloai uma ai tagata matutua o le eria e foai atu pe faafesuiai ai lavalava ua le ofi, seevae ma isi mea faapena. O le tele lava o nei aitema na faaaoga muamua na faasolo atu i le aiga o Margaret.

O le taumalulu i Alberta e malulu, uumi, ma faigata, ma o se tasi taumalulu na sili ona malulu ma faigata, na matauina ai e Margaret ma lona uso o Nellie le matitiva o lo latou tuaoi, o le aiga o Kozicki, o le latou faatoaga sa na o ni nai maila le mamao [ma i latou]. A alu tama Kozicki e momoli lana fanau i le aoga i lana taavale tosotoso na fai i le fale, o taimi uma lava e alu ai i totonu o le faleaoga e faamafanafana i le ogaumu tafu a o lei toe foi atu i le fale. O seevae o le aiga na fai i atigi taga masaesae e otioti ona taaiai ai lea o ogavae ma vae, e utu i vaovaomago, ona saisai lea i tuaina.

Na tonu ia Margaret ma Nellie e valaaulia le aiga o Kozicki, e ala atu i le fanau, mo le taumafataga o le Kerisimasi. Sa la filifili foi e le taua lava i se tasi o le latou aiga le valaaulia.

Na tafa ata o le vaveao o le Kerisimasi, ma na pisi uma tagata o le aiga o Margaret i tapenaga mo le aiga i le aoauli. Na tuu i le ogaumu i le po ua mavae le fasipuaa tele e tao ai. Ua leva foi ona uma ona saunia ia lola kapisi, tonati, pani vine, ma se vaiinu faapitoa e fai i le suka susunu. O le meaai o le a salani i salati kapisi tuu fagu, piko o fatu po o laulaau, ma fualaauaina faisua. O Margaret ma Nellie sa nafa ma le sauniaina o fualaau faisua fou, ma sa tuufesili lava lo la tina ia i laua pe aisea ua la soona fisiina ai ia pateta, kaloti, ma piti [beets]. Ae sa na o le la tau fai fisi lava.

O lo la tama na muamua lava matauina se solo a solofanua ma se taavale tosotoso e tumu i tagata e toa 13 na agai mai i lo latou auala. Ona e fiafia tele o ia i solofanua, o lea sa ia iloagofie atu ai lava se solo a solofanua mai se mea mamao. Sa fesili o ia i lona toalua, “Aisea ua o mai ai iinei ia le aiga o Kozicki?” O lana tali atu ia te ia o le, “Ou te le iloa.”

Sa latou taunuu mai, ma sa fesoasoani le tama o Margaret ia Mr. Kozicki i le nonoaina o solofanua. Na fusi e Mrs. Kozicki le tina o Margaret ma faafetai atu ia te ia mo le valaauliaina o i latou mo le Kerisimasi. Ona latou tau fai tumutumu atu lea i totonu o le fale, ma amata loa le taumafataga.

Na muamua tausasami tagata matutua, ona fufulu ai lea o ipu ma mea e faaaoga, ona faasolosolo ai lea ona aai o tamaiti. O se taumafataga na matuai fiafia, ma na atili ona matagofie i le faasoaina atu. Ina ua uma ona aai tagata uma, sa latou usuusuina faatasi ni pese o le Kerisimasi, ona saofafai loa lea o tagata matutua mo se talatalanoaga.

Na ave e Margaret ma Nellie ia tamaiti i totonu o le potumoe ma toso mai i fafo mai lalo o moega ni atigipusa na tutumu i mea ua faaaoga na tuuina atu mo i latou e uo faioloa a lo laua tina. O se vevesi faalelagi, na vave lava ona fai se faaaliga ofu ma na filifili lava e le tagata ia lavalava ma seevae na mananao i ai. Sa latou matuai pisapisao ai o lea na sau ai le tama o Margaret e vaai pe o le a le mea ua vavao ai. Ina ua ia vaaia le fiafia ma le olioli o tamaiti o le aiga o Kozicki i o latou ofu “fou”, sa ataata o ia ma faapea atu, “Fai pea.”

Ina ua amata ona afiafi, a o lei malulu tele ma pogisa i le goto o le la, na faatofa ai le aiga o Margaret ia latou uo, o e na o ese atu ua maoona lelei, faalavalava lelei, ma faaseevaeina lelei.

E lei tauina lava e Margaret ma Nellie i se tasi e uiga i lo la valaauliaina o le aiga o Kozicki, ma na tumau ai lava le mea lilo seia oo i le Kerisimasi lona 77 a Margaret Kisilevich Wright, i le 1998, ina ua ia faamatala atu i lona aiga mo le uluai taimi. Fai mai a ia, o lana Kerisimasi aupito sili lava lea ona manaia.

Afai tatou te mananao ia tatou maua le Kerisimasi e aupito sili ona manaia, e tatau ona tatou faalogo i le pao o vae ua faaseevaeina. E tatau ona tatou aapa atu mo le aao o le Kamuta. O laa uma lava tatou te faia i Ona tulagaaao, tatou te lafoai ai se masalosalo ae maua mai se upumoni.

Na taua e uiga ia Iesu le Nasareta e faapea “ua tupu [Lona] poto ma le tino, ua alofagia o ia e le Atua ma tagata.”⁷ Pe o ia i tatou ea le naunautai e faia faapea? O se laina o tusitusiga paia o loo i ai se saafiafiga mo lo tatou Alii ma le Faaola, o le na taua e faapea, o Ia “sa femaliuai ma agalelei … ; aua sa ia te ia le Atua.”⁸

O lau tatalo mo lenei vaitau o le Kerisimasi ma isi Kerisimasi uma o le a oo mai, ia tatou mulimuli i Ona tulagaaao. Ona avea ai lea o Kerisimasi taitasi ma Kerisimasi e aupito sili ona manaia.