Faapotopoto i le Malumalu

Ina ua filifili Benedito Carlos do Carmo Mendes Martins e ave lona aiga i le malumalu aupito lata ane i le 1992, sa ia manaomia ni aso se 15 e malolo ai mai le galuega ina ia faataunuuina ai le malaga faigata o le alu ma le toe foi mai i lona aiga i Manaus, i Pasila i matu. Ae o se taimi pisi lea o le latou kamupani, ma na musu foi lona pule e tuu atu ni ona aso malolo.

Talu ai ona sa saunia le aiga, ositaulaga, ma faaputu ni tupe mo le malaga, sa latou tatalo ai lava ina ia mafai ona latou o. E lei umi ae talia a latou talosaga.

“O le aso a o lumanai le malaga, na ou ma’i ai ona o ni siama ninii,” o le tala lea a Brother Martins. “Sa matuai ou fiafia lava ina ua ou mai!”

Sa vave ona faatonuina e lana fomai ni vai e inu ma le lua vaiaso e le faigaluega ai, ma o le tulafono lava, e tatau ona tuuina atu e lana kamupani. O le aso na sosoo ai, na malaga atu ai le aiga mo le malumalu.

“Sa ou aveina au vai, ma i le taimi o le malaga na fai ai ou tui,” o le tala lea a Brother Martins. E oo ane i le taimi na matou toe foi mai ai, ua leai ni siama ninii.

“Na ou sau i le fale ma se faatuatua ma se molimau e uiga i sauniga o le malumalu,” na ia fai mai ai, “ae maise lava i le sauniga o le faamauina i lou toalua ma lau fanau e toatolu.”

Ao lei avea Manaus ma se vaega o le Itu o le Malumalu o Caracas Venesuela i le 2005, o le malumalu aupito lata ane o le Malumalu o São Paulo Pasila, e faitau afe maila le mamao i Pasila sautesasae. O nisi o le Au Paia o Aso e Gata Ai i Manaus sa matuai naunau lava e o i le malumalu o lea na latou faataueseina ai o latou fale, taavale, meafaigaluega—soo se mea aoga lava—ina ia maua ai le tupe.

Ina ia oo atu i São Paulo, e malaga ai tagata o le ekalesia i le vaa i le vaitafe o Rio Negro e fetaui ai ma le vaitafe o le Amasone ma mai iina ona agai atu lea i sasae i le vaitafe o Rio Madeira—o se mamao e tusa ma le 70 maila (115 km). Ona latou malaga foi lea i le silia ma le 600 maila (965 km) i sautesasae i le vaitafe o Rio Madeira e oo atu i le aai o Pôrto Velho. Mai [Porto Velho] latou te o ai i pasi ma malaga atu ai i le isi 1,500 maila (2,400 km) i São Paulo. O le mavae ai ona auauna atu i le maota o le Alii, latou te toe foi mai ai i se malaga e fitu aso.

Ina ua tapena le Au Paia mai Manaus mo le latou malaga muamua i le malumalu i Caracas, sa latou matuai fiafia lava o lea na latou faapea mai ai, “O le taimi lenei e na o le 40 lava itula e o atu ai i le malumalu!” Ina ia oo atu i Caracas, na onosaia e le Au Paia le malaga i le pasi mo le 1,000-maila (1,600-km) lea na aofia ai le malaga i ni vaega lauleaga o le vaomatua o le Amasone ma le fesuiai mai se pasi tele i se pasi e laitiiti atu i le tuaoi o Pasila ma Venesuela. O le mamao na fai si puupuu, ae o le malaga o le a manaomia ai pea le ositaulaga tele i tulaga tautupe, ma le tupe faaopoopo o le mauaina o ni visa.

A o tulioso le Au Paia i luga o le pasi, sa latou pepese, “Ulu Atu i Malumalu.”¹ Ina ia faatumauina le faaaloalo ma tumau pea le uai atu i le faamoemoe o la latou malaga, sa latou faia ai ni faeasaite i luga o le pasi ma matamata ata tifaga a le Ekalesia e pei o le The Mountain of the Lord.

I se api o talaaga na tuufaatasia e i latou o e na aofia i lena malaga muamua, na taua ai e tagata o le Ekalesia o latou faamanuiaga, ae le o a latou osigataulaga. Na tusia e se tasi tuafafine: “O le aso o loo ou alu atu ai i le malumalu mo le taimi muamua lava. O ananafi, na ou faamanatuina ai le 20 tausaga talu ona avea au o se tagata o le Ekalesia—e matuai tele itula, aso, ma tausaga o le faatalitali ma tapenapenaga. Ua tumu lou loto i le agaga faafetai ma le fiafia mo au uo, taitai perisitua, ae maise lava ia Iesu Keriso, o Lana Togiola, ma lenei avanoa ou te alu atu ai i le maota o lou Tama Faalelagi.”

Na faapea mai se uso o le na faamauina i lona toalua ma lana fanau i lena malaga, na tuuina atu e le malumalu ia te ia se vaaiga itiiti o le faavavau. “Ou te le masalosalo afai tatou te tausia feagaiga ua tatou faia i le malumalu, o le a tatou maua se olaga e sili atu ona fiafia ma sili atu ona faamanuiaina,” na ia tusia ai. “Ou te alofa i lou aiga, ma o le a ou faia mea uma ou te mafaia ina ia matou mafuta faatasi i le mamalu selesitila.”

O le Misiona a Pasila Manaus na faatuina i le aso 1 o Iulai, 1990, e aveina atu le talalelei i setete e ono i Pasila i matu. O le taimi lena, sa tau le iloa le Ekalesia i na setete ma sa toaitiiti foi ona tagata. Ae e pei ona folafola mai e le Alii i le Tusi a Mamona, o i latou o e salamo ma o mai ia te Ia o le a faitauina faatasi ma Lona nuu i aso amuli (tagai 3 Nifae 16:13).

O le aso, ua valu siteki i le aai o Manaus, i le Setete o Amasona, ma siteki faaopoopo i isi setete, ma itu e fitu i totonu o tuaoi o le misiona. A o ou mafaufau loloto i le tuputupu ae o le Ekalesia ma le matafaioi a malumalu o loo faia i taumafaiga a le Alii e faapotopoto Lana fanau, e taaina atu lou mafaufau i Lana folafolaga o loo i le Tusi a Mamona: “Ioe, ona amata ai lea o le galuega e le Tama i atunuu uma i le teuteuina o le ala ina ia faapotopotoina lona nuu i le laueleele o lo latou tofi” (3 Nifae 21:28).

I le avea ai ma se peresitene o se misiona i Manaus mai le 1990 i le 1993, na ou vaaia ai le toatele o tagata Amasone ua taliaina mataupu faavae o le talalelei toefuataiina a Iesu Keriso, ua auai i le Ekalesia, ma “au foi i latou i le feagaiga” (3 Nifae 21:22). O le taunuuga, na amata ona faamanuiaina e le mana o le perisitua ia o latou olaga ma o latou aiga—ae maise lava e ala i sauniga o le malumalu.

Na olioli tagata o le Ekalesia i Pasila i matu ia Me 2007 ina ua fofogaina e le Au Peresitene Sili o le a fausia se malumalu, o le lona ono o malumalu i Pasila i Manaus. Mo le aiga o Martin ma tagata ua faatoateleina o le Au Paia o Aso e Gata Ai i Pasila i matu, o le i ai o se malumalu i Manaus o le a avea ma se faamanuiaga silisili. Ae peitai, mo le toatele o le Au Paia i le lalolagi atoa, o le auai i le malumalu o le a faaauau pea ona manaomia ai le ositaulaga tele.

Tau ina ia faaali atu i tatou o e o loo nonofo latalata i se malumalu le agaga faafetai e ala i le faateleina o lo tatou auai atu i le malumalu. Ma tau ina ia tatou pei o le Au Paia i Pasila i matu, na faataitai i faataitaiga a sa Nifae, o e “ua matua galulue” e faapotopoto atu i le malumalu “ina ia i ai latou … i le mea e faaali mai ai e Iesu o ia lava i le motu o tagata” (3 Nifae 19:3).