O Se Lesona e Lei Mafaufauina

Ina ua uma ona ou siitia atu ona o le galuega i le Aai o Niu Ioka, sa ou alu ai i se tasi afiafi o Tesema e faatau ni mea mo lou falemautotogi fou. E lei leva ona uma ona taia e se afa le aai, ma na tumu le auala i le kiona e pau i tuli. Sa ou faapupuu i se peleue mafanafana a o ou savali atu i le nofoaafi i le pisi o tagata fai faatau o aso fiafia.

Na ou faatalitali ma le le toa mo le taunuu mai o le nofoaafi, ma ou mafaufau i le lisi o lau faatauga. Ina ua oo mai le nofoaafi, na ou oso atu i totonu o le potu, ma ou tilotilo solo i nofoa mo se avanoa ou te nofo ai. O le nofoa aupito lata mai na faafeagai tonu lava ma se toeaina e leai sona fale. Na leai sona peleue mafanafana po o ni ofu mafiafia. Sa na o ni ana tagapepa palasitika lava na tumu i mea laiti e leai se aoga.

Ou te lei manao ou te nofo latalata i lona manaogi le lelei, ma ona foliga faainaelo ma na ou mafaufau pe o ia o se tagata leaga. Ae o le tele lava, ou te lei manao e aisi mai mo se tupe. Na vave lava ona ou savali atu i le isi itu o le potu ma ou nofo loa i se nofoa. Na faapena foi ona laina isi pasese i le faatausiusiuga o le potu, ae tuua ai na o le toeaina.

E lei umi ae oso mai se alii talavou i le nofoaafi ma nofo i le nofoa na faafesagai tonu ma le toeaina e leai se fale. E aunoa ma le faatuai, na faasafua atu ai e le alii talavou se ataata agalelei, o se lululima, ma se faatalofa fiafia. Na ataata foliga o le toeaina, ona la amataina ai lea o se talanoaga manaia. Na la talatalanoa mo le isi 15 minute, ma fiafia i le mafutaga a le tasi ma le isi.

A o ou vaavaai atu i ai, na faamanatu mai ai ia te au le agaga moni o le vaitau o le Kerisimasi. A o fai lava le la talanoaga, na tulai i luga le alii talavou ma tatala lona taoofu, ofutino, ma se ofutino lima uumi na lua ai ona ofutino na pito i totonu. Na tutu o ia i lona mitiafu na pito i totonu, ona ia tuuina atu lea o lona ofutino limauumi i le toeaina mativa. Na talia ma le faafetai e le toeaina, ona toe faaauau lea o le la talanoaga. Na ou aluese mai ma le nofoaafi ma le ootia tele i le agalelei o le alii talavou. Na ou lagona lou tausalaina i lou manatu faapito, ae na ou manao ia avea au ma se tagata e sili atu [nai lo le tagata na ou i ai].

Na afio mai le Tupu o tupu i le lalolagi i le tulaga aupito maualalo, i se falepovi faatauvaa. Na tuuina mai i le lalolagi se meaalofa faaola faapelepele—o le Alo o le Atua. Ou te faafetai mo le meaalofa o le Faaola i lou olaga ma Lona alofa e le muta ma le agalelei mo le fanau a le Atua. O le vaitau o le Kerisimasi, na ou lagonaina ai se naunautai faafouina ina ia ou agalelei teisi atu, ia faateleina ona ou le manatu mo au lava, ma ia avea atili e pei o lou Faaola, o Iesu Keriso.