Ana Wiiki Ben

E katokai baina Ben i aon te tutiketi are kaan ma ngaia i nanon te kaa. Tinau ao Tamau a kabutia nakon ana auti Tibuna te mwaane. E na tiku Ben iroun tibuna te mwaane i nanon teuana te wiiki ae bwanin. Akea tarina, akea mwaanena ae te merimeri—bon ti Ben ao Tibuna te mwaane.

E a tia Ben n taetae ma Tibuna te mwaane ibukin te wiiki are a na ikotaki iai. E taku Tibuna te mwaane bwa bon ana wiiki Ben ao a kona ni karaoi bwaai ni kabane are e mamate nanon Ben iai. E tara tinaniku Ben man te winto. E uringnga ni karini bwaai ni kabane? E karina bwarana n akawa ae na anganna te tekeraoi, matana te kiraati i aan te riringa, ao ana boki ake mamaten nanona.

“Ngkai, uringnga,” e taku Tinana man te kaintekateka are i moa, “Bon tiaki kaain ara ekaretia Tibum te mwaane. Bon te aomata ae tamaroa ao te tibu te mwaane ae tamaroa. Ma iai bwaai tabeua ni mweengana aika a na tara ni kaokoro iroum.”

“N aron tera?” E ataia Ben bwa e aki nanako n taromauri tibuna te mwaane. Ma e tuai ni iangoia bwa e na kanga anne ni kaokoro.

“Ko na bae ni kauringnga ae ko aki momoi n te ii ae mwaitorotoro,” e taku Tamana.

“Ngaia,” e taku Ben.

“Ko na aki kona n nako n taromauri n te Tabati, ma ko kona ni kawakina te Tabati ni katabua n anga tabeua,” e taku Tinana.

“N na karaoia,” e taku Ben.

Ngke a roko n ana auti Tibuna te mwaane, ao Tibuna te mwaane e bon tataningaia n ana bwaranta. Bon te moan aomata n otinaki man te kaa Ben. “Tibuu!”

“E uara mamaten nanou are ai itiua ana ririki?” E angan Ben te inga ae bubura Tibuna te mwaane. “Ko a tauraoi ibukin ara wiiki ae onoti? Ko kona n rineia bwa tera ae ti na uaia ni karaoia.”

“Ti kona n nako n akawa?” e titiraki Ben. “I uota bwarau n akawa ae anganai te tekeraoi.”

“Eng ti kona,” e taku Tibuna te mwaane.

“Ao ti kona n nakon te tabo ni man?” e titiraki Ben. “I uota matau te kirati ibukin te riringa.”

“Eng ti kona,” e taku Tibuna te mwaane.

“Ao ti kona ni uaia ni wareware?” e titiraki Ben. “I uoti au boki ake mamaten nanou.”

“Eng ti kona,” e taku Tibuna te mwaane. “Ao I taku bwa ti riai ni karaoa mwanangara ni bobwai bwa ko aonga n rinea am bwai n takakaro n te titoa.”

“Wow,” e taku Ben. “E na rangi ni kamaiu te wiiki aei!”

N te Kanimabong, ao a nako n akawa Ben ma Tibuna te mwaane.

N te Kaonobong, ao a nakon te tabo ni man Ben ma Tibuna te mwaane.

N te bong are imwiina, e karaoa aia kaingabong te burakibaan Tibuna te mwaane. “Te bong aei bon ara bong ni bobwai,” e taku Tibuna te mwaane.

“Ibbib!” e takarua Ben. “Aekakira au bwai n takakaro ae N na karekea?”

Ngkanne e a uringnga Ben—bwa e a Tabati. E na kanga ni kabwarabwara nakon Tibuna te mwaane taekan te bobwai n te Taabati?

Imwiin aia kaingabong ao e karaoa ana tataro Ben n ana ruu. E bubutia Tamara are i Karawa bwa E na buokia ni kabwarabwara nakon Tibuna te mwaane taekan kawakinan te bong ae te Tabati ni katabua.

Imwiin ana tataro Ben ao e tekateka i aon ana kainiwene. E wetea Ben tibuna te mwaane, “N na karini moa au kau, ao ti a nako naba.”

E kabubura ikeikena Ben ao e tei rake. E kunea Tibuna ngke tabe ni kabaea ana kau.

“Tibu, ko rabwa ngkai ko kairai n akawa ao nakon te tabo ni man. Ma I taku bwa ti riai ni motirawa n te bong aei.”

“Tera ae ko kananona?” e titiraki Tibuna te mwaane. “I berita bwa N na kairiko ni bobwai.”

“I ataia, ma n am iango ti kona n nako n te bong teuana?”

“Ko uara? Ko aoraki?”

“I aki, Tibu,” e taku Ben. “Te bong aei bon te Tabati. N au utu ao ti aki bobobwai n te Tabati.”

Akea te bwai ae taekina Tibuna te mwaane.

“Ti kona n tiku ni mweengara n te bong aei?” e titiraki Ben. “Ti kona n nakonako. Ti kona ni wareboki.”

E wingare nakon Ben Tibuna. “Eng ti kona,” e taku. “Bon aio am wiiki ae onoti, ao ko kona ni karaoa am rinerine.”

Ben e angan Tibuna te mwaane te inga ae bubura. “I bon ataia raoi bwa e na rangi n tamaroa te wiiki aei,” e taku Ben.