Tai Mwaninga ae Ngkoe te Moomon

N te tai are ti bwaka iai, n te tai are ti aki karaoa mwaitin are ti riai ni karaoi, ao ni koauana raoi ti bon mwanuokina tinara,” e katanoata Beretitenti Thomas S. Monson. E reitia n taku, “A tannako aomata man te buakaka ao a ira nanon anuaia aika tamaroa riki ngkana e uringaki te tina.”¹

E a tia n riki ana rongorongo Beretitenti Monson bwa kakorakorakiu, n te aro ae rangi ni korakora ao ngke I moan wareki ana taeka, ao I uringa tinau ao ana reirei aika wanawana are e anganai n ririki aika bwakanako, tabeua te tai imwiin kaainakin te Ekaretia.

Tinau bon kaain te ekaretia ni Kiritian teuana, ma e bon akoi nakoia mitinare ake a reireinai taekan te euangkerio. N te tai are I motikia bwa N na riki bwa te Aomata ae Itiaki ni Boong Aika Kaitira, ao e boutokaai n taai nako.

A bane n nakoraoi bwaai ni kabane ni maiu ae boou ngke I kaaina te Ekaretia ni karokoa I ira te kauring ibukin te Bong ni Kareke Rongorongo n abau are Peru. N te bootaki are I iria, ao ko kona n ongo taian marooro ao taeka ni katekeraoi. Imwiina ao a taekinaki taeka ni katekeraoi ao a tabeki aia mangko ni kamanging. Ngke e waaki nako te bootaki, ao e rikirake naba te kariiri ni kan mooi ma raraou.

Te bitaki are a karaoia taan rairaki nakon te Ekaretia ngkana a butimwaea te euangkerio bon nanona n angiin te tai bwa a riai ni karekeia raraoia aika boou. N taai tabetai, n aron are I a tia n reiakinna, raraom ake mai mwaina a kona n riki bwa ana bwai ni mwakuri te tia kaaitara ni kariirira bwa ti na urui tuua ao n okiri arora ake rimoa.

Ngke anganai te mangko ni manging raou ni mwakuri, I anaia, I nimma, ao e reitinako mooiu. Ni bwaran te bootaki, ao I ataia n au iango bwa I karaoa ae bure. I a tia ni bwaka. Tera ae na taekinna tinau?

Ngke I roko ni mweengau, I karaurau n rin nako ao ni matu n te tai naba arei. Akea te bwai ae taekinna tinau, ma I namakina te maama ao I baireia bwa N na aki manga ira te taromauri. Teuana te wiiki i mwiina, ngke ti tekateka n amwarake n te tawanou, e tarai matau ao e taku, “Natiu te mwaane, tai mwaninga ae ngkoe te Moomon.”

Ngkana I nako ao I oki ni mwakuri ao I buti n au bwatika irarikin Ana auti ni bootaki te Ekaretia. Ni katoaa te tai are I rirarikina, ao e tabeaianga au iango. N te tairiki teuana ao I baireia bwa I aki kona ni maeka ma namakinan ae I a tia ni karaoa ae bure. I katea au bwatika i matan ana aobiti te beretitenti n te mwaanga, I rin nako, ao I bubuti te marooro.

I tuanga te beretitenti n te mwaanga te bwai are I tia ni karaoia ao I bubuti kabwaraan au bure, ao imwiina e anganai taeka n reirei. Man te tai arei ni karokoa ngkai, ao I tuai man urua Tuan te Mauri.

E mate tinau 20 tabun te ririki n nako, ma I kataia n ururinga te bwai are e tuangai bwa N na aki mwaninga: Ngai kaain Ana Ekaretia Iesu Kristo ibukiia Aika Itiaki ni Boong Aika Kaitira.