Teuana te Reirei Are e Bita Ara Bootaki n Utu n te Tairiki

Iai natira aika teniman ma aia ririki aika nimaua, teniua, ao teuana. N te moan tai e bon tei mangaon ara bootaki n utu n te tairiki. E tokitoki te waaki bwa a tangiria natira bwa ti ngaia ae a na taraaki. Ngai ma kainabau ti namakina ae ti kuri ni konaki.

Ngkanne n tairikin te Moanibong teuana, e anga reirei kainabau i aon Samuel are te I-Reimanaite ao e kabonganai tamnei are a kona ni kanimwaki i aon te kunnikai ae rabunaki iai te kairababa bwa a na bwai ni kamataku. E bane n reke ara tai ni kanimwi tamnei i aon te kairababa bwa a na kaitara ma aomata ake n te karaki ngkana a atongaki. A rangi ni kukurei ataei n te waaki ngaia are e a tibwa reke ara moan bootaki n utu n te tairiki i nanon namwakaina aika mwaiti ae rau ao e kaonaki n te Tamnei.

Te reirei aei e bon bita ara bootaki n utu n te tairiki. Ti moana katauraoan reirei are a bane ni irekereke iai, ao anga nano natira bwa a na karaoi bwaai aika mwaiti bwa e aonga n nakoraoi te bootaki n utu n te tairiki. Ti a moanna naba ni kabatia riki ara tai ni bairea ara bootaki n utu n te tairiki. Ti taraia raoi bwa e na akea te bootaki n utu n te tairiki ae titebo kanoana. Kakaokoron taian waaki a bon buoka kaungaan nanoia natira.

E kainnanoa te mwakuri korakora mai iroura bairean ao kateimatoan waaki aikai n ara bootaki n utu n te tairiki. Ngkai natira a kakantaninga te bootaki n utu n te tairiki ao a ira te waaki n aanga aika manena.