Ukoukoran te Atua

Ngke e a kaan 18 au ririki, I kiba nakon te taun ae uarereke arana Soldotna, Alaska, ni mwakuri n tain te kabuebue. Aio te moan tai ae I kitana iai mweengau. A tia au karo ni bairea taekau bwa n na mwakuri ao ni maeka irouia te utu ae tamaroa ae te Wrights are bon raoraoia au karo, ae bwaina te titoa n amwarake n te aono anne. Au kantaninga bwa e na reke au mwane ae tau ibukin au reirei. I kantaningaia naba bwa n na oki nakon mweengau ma te kaeka nakon te titiraki ae okioki n au iango: Bon iai raoi te Atua?

I tangiria ni karekea te kaeka bon irou. Ngaia ae karekea kaekaana man te tataro ni katoa tairiki ao n titirakina te Atua ngkana E boni koaua. N aki atakina raoi ngkana bon iai te Atua, E na kaeka au tataro. Ngkana I aki karekea te kaeka, ngkane I ataia bwa bon akea Ngaia. E bebete, I taku.

Ni mwengaia ana utu Wrights, I buobuoka te ruu ni matu ma natiia te aine ae Lisa. E a oki man te Brigham Young Universtiy nakon mweengana n tain te kabuebue ao ni mwakuri n te titoa n amwarake ma ngai. I karinea Lisa n ana mwakuri man te moan tai. E rangin n tikiraoi, wanawana, koaua raoi, ao ni kukurei ibukin te maiu. N tain te kabuebue anne ao ti kabanea e kaniia te aua ni katoa bong ni boobotaki.

I tangiria ni kan ongora nakon Lisa ni karakina maiuna n te reirei. Maiuna e tara ni kamanga ao n rangin ni inaomata. Maiun Lisa e baireaki raoi ao e baeranti, mani kamatoaki nakon karinanakiia nakon kakawakiia.

Nanou ni karinea Lisa e rikirake ngke I tarataraia ni wareki booki aika tabu ni katoabong man tataro ni katoa ingabong ao n te tairiki. I tangiria n titirakina Lisa bwa e kanga ni karekea ana onimaki iroun te Atua ma e mamaama n aki taun au onimaki. I uringa ngke I wene iaon au kainiwene, ni iangoia tera te bwai are e taekinna Lisa n ana tataro nakon te Atua.

Ni katoa tairiki ao I aki toki ni katorobubua irarikin au kainiwene ao n taekina te tataro ae uarereke, n tuanga te Atua bwa E boni mena raoi ikai. Ma bon akea namakinan te bwai ae onoti ke te tamnei. I aki ongo te bwanaa. Akea te namakin ae okoro imwiin au tataro n aron are I karaoia ma imwaina. Karaoan aei ni katoa tairiki e reitinako inanon uoua te namwakaina. E bwarananou, ao I kunea bwa e rikirake nanououau iroun te Atua.

N te tairiki teuana, ngke e roko irou te ururing ae korakora, e moanna n onrake matau n te rannimata. I rangin n tangiria ni kani mena irarikiia au utu, raoraou, ao n te tabo ae I tataneiai ma ngaai. E kammaraki te taetae nakon temanna ae ataia ao e tangirai, I katorobubua n tataro. “Te Atua, I rangin ni kainnanoiko naba ngkai,” I moanna. Inanon tabeua te miniti ake imwiina, I taekina nanou ae koaua nakon Tamau are i Karawa. I Tuanga bwaai ni kabane. I taetae ma Ngaia n aron ae I kakoaua bwa e mena ikekei.

Te namakin ae rau e tara n roota rabwatau. I moanna n namakinna ae ti tebo ma e a tia n ruo Tamau are I Karawa man rabwatai ni baina. I aki maroa. E onrake inanou n te tangira ao te rau. I ataia bwa iai te Atua.

I miimi bwa bnkin tera e na raka iaon uoua namwakaina kaekaan au tataro. Ieremia 29:13 e anganai te kaeka: “Ao e na uokukorai, ao ni kuneai, ngkana e na ukoukorai ma nanom ni kabane.”

N tokina ao I karekea te kaeka nakon au tataro imwiin tibwauakin raoi au namakin ae koaua. I katuka te onimaki iroun te Atua. I katuka korakorau ae bati n au tataro.

E a tia ni bitaki maiu imwiin te tairiki anne. I nako ni mitinare ao I mare n te tembora. Au onimaki iroun te Atua e teimatoa n rikirake.

I aki toki n uringa tain te kabuebue i Alaska. N akean ana katooto Lisa, ao n na bon aki teimatoa ni kataia inanon namwakina aikanne n tataro. N na bae n tia ni bwara nanou ao n aki kona ni karekea ana tangira Tamara are i Karawa. N na teimatoa ni kakaitau nakon Lisa ao ana banna ni katooto. E buokai ni kona ni kina te Atua ma n namakina Ana tangira ibukiu.