Te Mwakoro n Rabakau ae te Kabanea ni Bongana

Tabeman mai iroumi ake a tataneiai ma Oxford University a na riai n ataia bwa bon te kabanea n ikawai n uniwetiri n te aonaaba.Te kateitei are I maeka iai ngke ataein te reirei ngai e kateaki n 1410—e tikiraoi taraakina, e kamwenga buaka te maeka iai. Ngke I a roko i Oxford, I tibwa ataia ae e na rangi ni kangaanga te riki bwa kaain te Ekaretia ae teimatoa n te Ekaretia. Te Rhodes Scholarship Trust, are e anganai au beba n reirei, a bati aia waaki ni kakukurei ibukiia naake e na reke irouia te beeba n reirei.

Ngke I taraia bwa e na aekakira ae N na mena iai n tangiria n irekereke ma te ekaretia, I a tibwa ataia bwa I aki ataa ana Boki Moomon ae e koaua. I a tia ni warekia tabeua te tai ma ni bon arona kanga bon te tibwanga—mairouia au karo ke te tia angareirei n te Brigham Young University. Ma n te tai aei I rangi ni kainnanoia ni kan ataia bwa e koaua ana Boki Moomon. Ai ngaia are I a baireia bwa N na karaoia ni katoa tairiki man 11:00 nakon 12:00 warekan ana Boki Moomon ni kakaea koauana.

I miimi ngkana tao N na kabanea mwaitin te tai arei ibukina bwa I a mena n te burokuraem n te reirei ae rangi ni kainnanoa te tai ae bati, ni kamatebwaia te mwakuri n te ware. I iangoia ni kataia ni kabanea te buroukuraem inanon uoua te ririki, ngkai angiia aomata a kabanea te buroukuraem aei inanon tenua te ririki. I aki ataia ngkana I kona ni kabanea teuana te aua ni katoa bong ni wareka Ana boki Moomon ao n teimatoa ni kakoroa bukin au iango aei.

Ma e ngae n anne ao I karaoia. I moanna n te 11.00 ni katorobubua n tataro irarikin te bwai ni kabuebue ae karako i aon te oo te atibu, ao I tataro ni kabaibati. I tuanga te Atua nanou ae korakai ni kakaea ngkana bon te koaua ana Boki Moomon. I tuangnga bwa ngkana E kaotia nakoiu bwa e bon koaua, I iangoia imwiina n anga maiu ni katea Abanueana. I tuangnga bwa ngkana e aki koaua, I kainnanoia naba n ataia n te koaua ibukina bwa imwina N na anga maiu ni kakaean te bwai ae e koaua.

I wareka moan iteranibaan ana Boki Moomon, Ngke I a roko inano n tokin te iteraniba, I toki. I iangoi baike I a tia ni wareki n te iteraniba anne, ao I titirakinai, “E na kona ni koreaki iroun te tia mwamwana te aba are e kataia ni keweia aomata, ke e bon koreaki iroun ana burabeti te Atua? Ao tera ae nanonaki ibukiu inanoni maiu?” Rimwi I katuka te boki ao ni katorobubua n tataro ao ni butia riki te Atua, “Taiaoka tuangai ngkana te koaua te boki aei”, Imwiina I tekateka n te kaintekateka, I anaa te boki, raira baana, warekia, motirawa n tokina, ao ni karaoa te bwai naba arei. I karaoa aei inanon teuanaa te aua ni katoa tairiki, tairiki imwin te tairiki, n te ruu ae kamariri ao n aoi i Oxford.

N te tairiki teuana, ngke I a roko n tokin mwakoro 2 Nibwaai, I tataro, n tekateka n au kaintekateka, ao ni kauka te boki. E a karina n roko naba inanon te ruu te Tamnei ae tikiraoi, e iraorao, n tatangira are e katomimiai ao ni kaona tamneiu, mwanokai n namakinan te tangira are I aki iangoia ni kona n namakinna. I tang. Ngke I tarai taeka n ana Boki Moomon imarenan ranin matau, ao I kona n noori koauan taeka akekei ae I tuai mani iangoia ni kona n oota iai mai imwaina. I kona n noori mimitongin te tabo are akea tokina, ao I kona n noora are e a tia te Atua ni katauraoia ibukiu ae bon Natina. E tiku irarikiu ni kabanea te aua arei ao ni katoa tairiki nako ngkana I tataro ao ni wareka ana Boki Moomon n au ruu. Te Tamnei naba arei e na manga oki, ao e na bita nanou ao maiu n aki toki.

I tanrikaaki n tara te itabarara are I a tia ni mena inanona, ni miimi iai ngkana I kona ni kabanea te aua ni katoabong ao n aki kabanea n te kamatebwai n te mwakuri n te ware ni kakaea ngkana ana Boki Moomon e bon koaua. I kabongana te mwakuri n te ware tao te taina n te ririki, ma I kabongana au atatai bwa Ana Boki Moomon bon ana taeka te Atua n taai aika bati ni katoa bong inanoni maiu. Man ni kabane te reirei ae I a tia ni karaoi, bon ti teuana te mwakoro n rabwakau ae te kabanea ni bongana ae I karekea.

Ibukimi ngkami ake kam bon maiu naba n aia kaoti koaua tabeman, I kaoi ngkami ni kaokoroa teuana te aua ni katoa bong ao ni kakaea iboni iroum ngkana ana Boki Moomon e koaua, ibukina bwa e na bita nanom n aron ae e tia ni bita nanou. Tabebong imwina ao ko na kona n nakon te tabo are ko maeka iai n te tai are e kaotia nakoim te Atua ao ni koteia ibukin natim ao kainabam ao n taku, “Bon anne te tabo ae tabu ibukina bwa anne te tabo are I reiakinna iai bwa Iesu bon te Kristo.”

Nkge I kataia ni kanakoraoa riki te wewete are I a tia ni weteaki nako iai ao ni kan ataa Iesu Kristo, I kona ni kakoaua bwa I bon ataia ni koaua bwa boni Ngaia Natin te Atua, ao E maiu. I ataia ni koaua bwa E ataira ao E tangiriira n tatabemaniira nako.