Te Kaoti Tarena

E tara tinaniku Marie man wintoon te ka ngke e tabe ni buti ma kaain ana kiraati n te Moanrinan nakon mweengaia kaara. Bon ana kaantaninga bwa ataeinaine aki noora matana ae tao n te rannimata.

Ngke e tuatua Titita Gibson bwa e na karaoaki te kaoti tarena bwa te waaki n te bong teuana, bon taraan ae te iango ae tamaroa. A bane ataeinaine ni karaoa aia baire ibukin te tarena are a na tibwauaia. E kataia Marie, ma bon akea te bwai ae kona ni iangoia bwa e na karaoia.

A na katanga te biano uoman ataeinaine. Temanna te ataeinaine e na katanga te waeorin, ao temanna e na anene. Temanna e kamatenanoa ana kario ae bon koreia, ao raoraon Marie ae tatangiria, Shelley, e na minomino n ree. Akea ana kamataku Andrea, ma e na karaoi bitiketi bwa a na bane aomata ni kanna imwiin te kamataku.

Ngke kabatia iangoan te kaoti tarena Marie, ao e a bon kakoaua bwa bon akea ana tarena. E aki ataia raoi bwa tera bukin rokona. E kataia Titita Gibson ni kakukureia, n tuangnga bwa e tuai ni kunea te tarena ae onoti are e a tia n anganna Tamara are i Karawa. Ma e bon kangaanga bwa e na kakoaua aei Marie. Bon ana iango bwa akea te bwai ae konaa n rabakau karaoana.

Bon akea te karongoa n te tabo ni bootaki ni mweengaia kaara. E onrake te tabo irouia kaara, ao bon anne te bwai ae nako nanon iai Marie. E aki ataia bwa tera ae e na taekinna nakoia ke ae na karaoia. Taraan ae titebo ana namakin ma ataeinaine ake tabeman. A ikoikotaki, ao a taratara nako ma te maama ni karokoa e kaota nakoia nneia n tekateka Titita Gibson.

E bon tiku n rawawata nanon Marie ngke moanaki kanoan te buroukuraem. Ngkanne, imwiin katangan te biano iroun temanna, ao e ongo bekobekon temanna i akuna. E tan rikaaki Marie ao e noora te aine ae iaia irana are e ruru rabwatana ni katoaa bekobekona.

E toki iangoana i bon irouna ao e a moanna n tabeaianga Marie iroun te aine arei. E karaurau ni buta te kanre ae matoatoa man ana bua ao e nakon te aine arei. E katokai baina i aon angan te aine arei ao e anganna te bwain tangira ae uarereke. Ngke e wingare te aine arei nakoina ao e anaia ni baina ae bwarukuruku, ao Marie e namakina te kukurei ao te rau.

E tiku Marie i rarikin te aine arei ni ua banen te buroukuraem. E taua bain te aine arei Marie ao n tabetai e tuangnga bwa tera ae tabe ni karaoaki. E namakina te kukurei ibukina bwa e karaoa te bwai ibukin temanna, ao e aikoa tabe n nanoangaia i bon irouna.

Ngke e a bo te tai n nako, e rabwata Marie te aine arei ao e wirikiriki, “Ko rabwa ngkai ko taetae ma ngai. Ko bon rangi n tarena ni karaoia aomata bwa a na namakina ae a tangiraki.”

I aon kawaia n okira te umwantabu, ao Marie e bon kakaitau n atakin ae ngaia bon iai ana tarena. Ngkana e beku ibukia tabeman, ao e namakina ana tangira Tamara are i Karawa, ao e buokiia tabeman n namakina naba Ana tangira. Bon anne te tarena ae rangi ni kakawaki ae iai irouna.