I Kona ni Kaaki Arou ake Mai Mwaaina?

Te anua ae tamaroa ao e kukurei bon te bwai ae kainnanoaki irouia aomata aika mwakuri n te iokinibwai, n ai arou. Ma, n ririki aika bwakanako ao I namakina te bwarannano ao akea nanou ni kan taetae nakoia aomata. E bon rangi ni koaua aei n te bwakantaai teuana.

Tao e bon ootara man moamoau rawawatan nanou ibukina bwa temanna raou ni mwkauri, are I aki toki ni mamaroro ma ngaia n taai aika mwaiti, e titirakinai bwa I uara. I kabwarabwara bwa neiere buu ao ngai ti a tia ni buraure, imwiin taangara inanon onoua te ririki. Te namwakaina aei bon kauringaan koron onoua ara ririki ni buuraure, are nanona bwa titebo manin au tai ni buuraure ma au tai n taanga. E rawawata au iango ao nanou, ao e kaonaki nanou n te maraki ao te nanokaawaki. I ataia bwa I aki noori aron bwaai are a rinanoi natiu, ao ataakin anne bon te bwai ae I maraki iai n taai nako. E taonai te maroa, ao akea katokana ae I nooria—ke te kaantaninga—nakon taai aika a na roko. I tuanga raou ni mwakuri bwa, aio bon boon mwiin au kairua.

Raraou, are bon kaain te ekaretia ni Kiritian teuana, e kaeka “Tera te mwaiti ae na kabooaki iai ae ko taekinna?” e titiraki. “E a tia Iesu Kristo ni kabwaka boona, ngkana ko a tia n raira raoi nanom man am bure. Ke ko a mwanuokina bukin rokona nako aon te aba?”

I miimi n ana kaeka, ao akea te bwai ae I kona n taekinna imwiin ana taeka. E korakora rotakiu n ana taeka n te bwakantaai arei ngke I tabe ni iangoi ana taeka. Eng—e ngae ngke I tiku ni maeka ma mwiin au kairua, ma Iesu Kristo e a tia ni kabwaka boona. E aera ngke I aki ata aei? I ata te reirei, ao I ataia bwa e koaua. Atakin ae iai mwaakan te Mwakuri ni Kamaiu i nanon maiu e kaonai ma namakinan te rau ao te raunnanon are e teimatoa uringana irou n te bong aei.

A bwakanako ririki imwiin te bwai are i rinanona n te tabo ni mwakuri. I a tia n reiakinna bwa tabeua mwiin ara mwakuri a tiku ma ngaira i nanon maiura. Angiina a rootaki iai maiuia ake ti tangiriia. E aki beebete aron te tiku ni maroaa, ma e a tia ni buokai ni katerei mamarau ao ni bubuti kabwaraan au bure iroun Tamara are i Karawa ao aomata ake a rangi n rootaki riki—natiu ma tinaia.

Ni kabotauaki ma aron au namakin n te bwakantaai arei, I kona n taekinna bwa iai ngkai irou te rau ao te kaantaninga. I ataia bwa Iesu Kristo e a tia ni kabwaka boona, ao akea au nanokokoraki ibukin aei ibukina bwa I a tia n raira nanou. E a tia ni boutokaai ni kataakiu inanon ririki aikai. E ngae ngke a reitinako kataakiu, I ataia bwa ngkana I raira nanou, ao I rairaki nakon te Uea, ao I kakawakini tuua, E na bon teimatoa ni boutokaai.