Kakorakoraan Au Koaua

I aki toki ni miimi n te bwai ae I kona n reiakinna n te intitute. I aki uringnga n iriiran te kiraati ni kitanna n akea te bwai ae e boou ae I reiakinna ke ni mataata riki n tabeua tuan te euangkerio. Ao n tokina, e a bitaki maiu.

Ibuakon taian kakabwaia ae I a tia ni karekei man iriiran te intitute bon karikirakean te ikokoraki n te utu ao rikiraken tangiran te euangkerio. E a tia naba ni karikirakea au koaua. Imwain irakin te intitute, I bon aki koaua raoi bwa I tangira te mwakuri ni mitinare. Ngkai, I ataia bwa karaoan te mwakuri ni mitinare bon te bwai ae I kainnanoia ni karaoia.

Te intitute bon te waaki ae moan te nakoraoi ibukiu. E a tia ni buokai ni ni kaotaai ao n ongeaba nakon ana kainibaire te Ekaretia. Ana reirei te Ekaretia bon ngaia nanon te kamaiuaki ao te karietataaki, ao I rangi ni karabwarabwa ngkai I kona ni kamatebwaia n te intitute.