O Ni Tagata e Toaaga i le Malumalu

Ina ia saunia, e galulue faatasi tagata matutua ma le epikopo ia agavaa e auai atu i le malumalu. Ona latou auai lea i le vasega sauniuni mo le malumalu. Sa matua iloa lo latou fiafia i le vasega ina ua uma ona latou faataunuuina papatisoga mo e ua maliliu. Na latou iloa ai e ese lava le talanoa e uiga i le malumalu i le taimi o le vasega, ae o le mea moni e ese foi le lagonaina o le Agaga o le Alii i totonu o le malumalu.

“O le i ai o le filifiliga e ave se tasi i le malumalu o lē atonu e le’i saunia mo feagaiga faaopoopo, ae e mafai lava ona maua se aafiaga e auai ai i sauniga o se mea tele tele,” na saunoa ai Epikopo Baczuk. “Ou te manatu e fetaui tonu lava ma le lagona o loo taumafai le Ekalesia e faaali mai i totonu o lana tamaitusi o sauniuniga mo le malumalu: ‘O mai i le malumalu!’”¹

Fai mai le peresitene o le korama a le au toeaina a le Uarota a Forks Tolu, o David Boyd, o le auai atu i le malumalu e faataunuu papatisoga e avea ai se sini ma se mea mo’i: “E amata ai ona latou iloa le avanoa e mafai ona latou maua ai o latou lava faaeega paia. O le toatele o i latou e le’i tuvae muamua i lotoa o le malumalu, ma o malaga la nei a tagata matutua mo papatisoga, ua tuuina atu ai i le au paia lena avanoa.”

O le toatele o tagata e le’i leva nei ona toe faatoaagaina mai i le uarota na faataunuuina papatisoga mo e ua maliliu ona faatoa maua ai lea o o latou lava faaeega paia. “Sa le’i avea lava o se fesili o le agavaa,” o le tala lea a Epikopo Baczuk. “Sa o se fesili o le saunia. O nisi sa agavaa ma saunia e fai papatisoga ae sa le’i saunia faalemafaufau pe faaleagaga e talia feagaiga o le faaeega paia.” Mo alii, o se taimi foi lea e sauniuni ai e maua le Perisitua Mekisateko.

O le talafaasolopito o aiga e tuleia foi galuega faalemalumalusa. O tagata o le uarota e pei o Larry ma Carolyn Isom, e galulue i le nofoaga autu o talafaasolopito o aiga a le uarota ina ia tuuina mai le faitau selau o igoa o aiga. O nei taumafaiga e tolu—o le vasega sauniuni mo le malumalu, talafaasolopito o aiga, ma le tapuai i le malumalu—e galulue faatasi. O i latou e faia talafaasolopito o aiga e fiafia lava e tuuina mai igoa mo i latou o e o atu i le malumalu. O i latou e o atu i le malumalu e fiafia lava e fai galuega faalemalumalu mo o latou lava tuaa ma tuaa o o latou uso a tagata o le uarota. Ma o le i ai i le malumalu e uunaia ai tagata e saunia e toe foi atu i le malumalu.

I nai tausaga ua mavae, e toa 22 tagata o le Uarota a Forks Tolu na avea le vasega sauniuni mo le malumalu, ma o le 14 o i latou na amata o atu e le aunoa i le malumalu e faataunuu papatisoga mo e ua maliliu. Ma, i le maea ai o le vasega, e toa 13 o le 14 lena na maua o latou faaeega paia. O nisi o i latou sa nofofua pe ua maliliu a latou tane, ae o isi, e pei o Gary ma Jennifer Tucker, sa faamauina o se aiga.

Na auai Gary i le Ekalesia i le 1992, i le lua masina a’o lei faaipoipoina i la’ua ma Jennifer. Sa avea lava o ia [Jennifer] ma tagata o le ekalesia. Ae o le uumi o itula faigaluega ma le fegalegaleai ma uo sese na faigata ai ia Gary ona tumau e toaga i le Ekalesia, e ui lava i le lagolago a lona toalua. Fai mai o ia sa ia faaaluina le tele o tausaga i le ‘lamu tapaa’ ma le fai upu mataga.’”

Ina ua fanau le la tama teine o Cody, sa taumafai lava Tuafafine Tucker e tausia o ia i le talalelei e ala i le ave o ia i le lotu, e ui lava ina sa le manao Uso Tucker i soo se tusi a le Ekalesia i le latou fale. E ui ina sa ia uunaia lona aiga e o i le lotu, sa le’i alu o ia i le lotu. Ina ua valu tausaga o Cody, sa papatisoina o ia e se faifeautalai, ae le o lona tama. Fai mai Uso Tucker, “Sa ou fiafia lava ona sa ou i ai iina, ae o se mea tele lena na ou faanoanoa ai—o le matamata ae le auai [i se faatinoga].”

I tausaga na sosoo ane ai, o le faaaumeaina na fesoasoani ia Gary e toe malosi mai ai i le Ekalesia. E valaaulia e Jennifer ia tagata o le uarota po o faifeautalai latou te fai’aiga i le afiafi, ma le iloa o le a latou maua ai se avanoa e talanoa ai ma Gary. E faafetai lava o ia i na tagata o le uarota ma faifeautalai mo le avea ma ni faatosinaga lelei ia te ia.

Mo se faataitaiga, o Dale Price, na faiaoga o aiga i le tina o Jennifer ma o le ala lena na masani ai ia Gary ma Jennifer. Ina ua asiasi atu Uso Price ia Uso Tucker, la te le’i talanoa muamua e uiga i le talalelei. Sa la talanoa e uiga i se mea sa laua tau fai fiafia i ai: o le tutuli manu. Sa nonofo faatasi foi le aiga o Price ma le aiga o Tucker i gaoioiga a le uarota, ma avatu ni meaai mo i latou mai le latou teugameaai ina ua le toe faigaluega Uso Tucker, ma tuuina atu ia i latou ni meli mai la latou faamoega lagomeli. O le meli o le salani lea e sili ona fiafia i ai le aiga o le au Tucker mo a latou paanunu. O lena meaalofa, e pei ona faamatalaina ai e Uso Price, sa “mo le faasuamalieina o le mafutaga.”

Sa fesoasoani foi i le au Tucker fautuaga mai lo latou peresitene o le siteki. Sa talosagaina e Peresitene David Heap ia tagata o le siteki e fai “ni mea laiti ma faigofie se fitu”: (1) Faitau ia tusitusiga paia i aso uma e le tagata lava ia; (2) faitau faaleaiga ia tusitusiga paia ia le itiiti ifo ma le lima aso o le vaiaso; (3) faia tatalo faaletagata lava ia i taeao ma po uma lava; (4) faia tatalo faaleaiga i taeao ma po uma lava; (5) auai o se aiga i le lotu i Aso Sa uma lava; (6) faia afiafi faaleaiga i afiafi o Aso Gafua uma lava; ma le (7) o atu i le malumalu i masina uma.

Na iloa e Gary o nei mea o le a fesoasoani i lona aiga ia atili vavalalata ai—o se mea sa matua naunau lava i ai—o lea na amata ai ona faia e le aiga o Tucker ia tatalo faaleaiga, suesuega i tusitusiga paia, ma afiafi faaleaiga. O nei taumafaiga na fesoasoani e saunia ai Gary e gauai atu i le valaaulia a lona epikopo ia saunia e alu atu i le malumalu.

Ia Ianuari o le 2006 na auai atu ai le aiga o Tucker i se faeasaite i le maota o le epikopo. Na faasee atu i se autafa ia Epikopo Baczak ma Gary ma talanoa atu ia te ia e uiga i le malumalu. O iina lava, na tuu atu ai e Gary i le epikopo lana apa tapaa ina ia le avea pea ma se faaosoosoga ia te ia. Sa tele ni ana fesili sa i ai mo le epikopo i lena taimi ma isi faatalanoaga na sosoo ai. Sa faamamafa atu e le epikopo le ola ai i feagaiga na faia e Gary i le papatisoga ina ia mafai ona agavaa o ia mo le Agaga.

Sa amata ona auai le au Tucker i le vasega sauniuni mo le malumalu, ma na amata ona auai atu Jennifer faatasi ma lana uarota i le malumalu i masina taitasi e faataunuu papatisoga mo e ua maliliu. Sa galue Gary ia agavaa e alu atu [i le malumalu]. O le la tama teine, o Cody, o le na 11 tausaga i lena taimi, sa fiafia lava i le le toe umi ae mafai ona alu atu i le malumalu e faataunuu papatisoga. E oo ane i le taimi na atoa ai lona 12, ua mafai ona la o faatasi ma Gary i le malumalu. O le taimi muamua lea na oo atu ai se tasi o i laua i le malumalu.

Fai mai Cody, “Sa matagofie naua. Sa ese foi le toafilemu o iina. Na alu lo’u tama, o lea sa avea atili ai ma se mea faapitoa.” Fai mai Gary, sa ia lagonaina “mo le taimi muamua lava se toafilemu uiga ese ma le olioli.”

O le Aso Sa na sosoo ai i le vasega sauniuni mo le malumalu, sa avea ai Gary ma se tagata ese. “Na susulu se malamalama,” o le tala lea a Tuafafine Elna Scoffield, o le na aoaoina le vasega mo ni nai tausaga. Sa nofo Gary i le maea ai o le vasega e fai atu ni fesili. Sa ia maua le Agaga i le malumalu ma manao ai e toe foi atu—e le mo na o le faia o papatisoga ae ia maua ona faaeega paia ma ia faamauina lona aiga ia te ia.

O le masina na sosoo ai na toe o atu ai le aiga o Tucker i le malumalu faatasi ai ma le epikopo ma isi tagata o le uarota.

I vaiaso a o lumanai le mauaina e Uso ma Tuafafine Tucker o o laua faaeega paia ma faamauina, sa la lagonaina le tetee mai o le fili. Sa sologa manuia lava taumafaiga a Gary, ae sa i ai lava ni ona masalosaloga e uiga i lona agavaa i le auai atu i le malumalu. Na latalata mai lava le faataunuuina o le la sini o le avea ma se aiga e faavavau, ae na pei lava na tau le mafai ona oo atu i ai. Na iloa e le au Tucker e tatau ona la tatalo faatasi e le aunoa, ma ole atu mo le malosi. “O taimi uma lava sa ma mauaina ai [ni tali] i le tulaga o le filemu toafimalie ma le faamautinoaga o mea uma ua i aao o le Alii,” o le tala lea a Tuafafine Tucker. “E oo lava i le taimi na ma savavali atu ai i totonu o le malumalu, sa i ai lava Lona Agaga toafimalie i lo matou aiga atoa.”

Ina ua uma ona maua faaeega paia o Gary ma Jennifer, na faapea ona latou tootutuli faatasi i le potu o faamauga ma le la fanau o Cody ma Garrett, i ni laei papae. Ina ua vaai atu le alii e ono tausaga le matua o Garrett o tagi lona tina, sa aapa atu o ia e solo ese loimata mai ona alafau. Sa fetagisi foi Gary ma Cody i le fiafia. Na faapena foi ona tagi le fai faamauga.

Fai mai le au Tucker, ua fiafia nei lo latou aiga i ni mafutaga malolosi atu ma ni fesootaiga lelei atu. Fai mai Gary, “Ua sili atu lo matou fiafia. Ua ma vavalalata atili ma lo’u toalua, ma ua vaaia e le ma fanau lena mea.” Ua lagona e Gary ua avea o ia ma se faataitaiga lelei atu i tagata o lona aiga o e e le o ni tagata o le Ekalesia, ma e faamoemoe o ia o le a mananao foi isi aiga o le uarota i ia lava faamanuiaga ua tuuina mai e le Alii i le auaiga o Tucker e ala mai i le malumalu.