O Le Tamai Pato Auleaga po o le Manuvai Malualii? E Pule lava Oe!

Ao o’u laitiiti, ou te manatua le faitau mai e lo’u tina ia te a’u o le tala “O Le Tamai Pato Auleaga,” na tusia e Hans Christian Andersen. Atonu ai ona sa ou matamuli ma lagona le faaesea, ae peitai o le manatua pea ma le aoaoga o lena tala sa tumau pea ia te a’u.

I le faamatalaga lea ou te manatua, sa faatalitali lava ma le onosai le pato tinā mo le taimi e fofoa ai ona fua i tamai pato. E lei umi, ae onoono mai loa tamai pato fulufulua sasama lea sa fiafia ai tele le pato tina. Ae peita’i, o loo i ai lava le fua e tasi e fai si lapoa atu e le’i fofoa. Sa faatalitali pea ma vaavaai atu i ai le tina ma ana tamai pato. Ina ua ta’e le fua, na iloa ai e tamai pato sasama e ese foliga o le sui fou lea o le aiga. Ua latou siosiomia o ia ma fai atu i lo latou tina ma lo latou tama, “E le pei o ia o i tatou. E auleaga.” Ua latou tuua na o ia i le faamoega ae feausi ese atu. Ua aluese le tamai pato auleaga mai le faamoega ma taumafai e lafi. Soo se mea lava na la fetaiai e le lelei lava ma lotovaivai ai. E masani ona mafaufau ifo ia te ia lava, “E feita uma tagata ia te a’u ona ou te auleaga.”

Ona tupu lea o se vavega i lona olaga. Ua ia iloa atu nisi e foliga ma amio e pei lava o ia! Ua ia faauo atu ia i latou, ona latou ave lea o ia i lo latou tina ma fai atu i ai, “Tina, Tina, ua maua so matou uso laitiiti! E mafai ona tatou nonofo ma ia e faavavau?” Ua opoopo atu e apaau papae o le manuvai tina lalelei, ma le amio faatausala le tamai pato auleaga ma fai atu ia te ia i se leo malu, “E le o oe lava o se tamai pato! O oe o se tamai manuvai, ma e i ai se aso o le a avea ai oe ma tupu o le vaituloto.”

Sa ou fiafia lava e faalogo i lenei tala ao o’u laitiiti. Ou te le’i iloa o lesona na ou aoaoina mai ai o le a fesoasoani ia te a’u i tausaga faigata o lo’u talavou. Sa ou papatiso o se tagata o le Ekalesia ina ua valu o’u tausaga, ae na faasolosolo lava ina le toaaga lo’u aiga [i le Ekalesia].

I le nuu laitiiti i Idaho lea na ou ola a’e ai, sa i ai se faletifaga sa faaali ai tifaga i aoauli o Aso Toonai uma lava. E masani ona matou o i ai ma a’u uo e toalua pe toatolu. E faaali i le faletifaga se ata puupuu e uiga i taaloga ma se isi ata e faatatau i mea e tutupu i lena taimi. O le ata autu lava sa masani ona faaali ai o se ata kaupoe e tau tele.

I se tasi Aso Toonai i le taimi o le malologa, na vilivili mai ai e le aufaigaluega se uila vilivae o le ituaiga o le 10-masau. E lanumumu, e manaia, ma sa latou sauni e foai atu i le tagata matamata sa i ai le pepa ulufale na manumalo! Oka, so’u manao i lena uila!

Na aapa ane le tagata faasalalau i totonu o se koneteina ma se’i a’e se pepa ulufale. A o ia faitauina le numera o le pepa, sa ou iloaina na ia te a’u le pepa manumalo. Peitai ou te le’i minoi pe fai atu se tala. Sa ou ma tele ma matamuli. Sa le lava lo’u talitonu ia te a’u lava ou te tulai atu ai ma faailoa atu i tagata uma sa ia te a’u le pepa manumalo. Sa toe faalau faalua mai le numera manumalo, ma o ia taimi uma sa ou tuuina ai i lalo le pepa ina ia aua nei iloa mai e se isi. Mulimuli ane, na faalau mai ai e le tagata faasalalau se isi numera. O se tasi o a’u uo sa matou o atu i le tifaga sa ia te ia le numera fou. Sa oso o ia i luga, faataio, ma tamoe i luga o le tulaga e aumai lana uila. O lena uila na semanu e fai mo a’u!

A o ou savalivali toatasi atu i le fale mai le tifaga i lena Aso Toonai, sa ou mafaufau i le tala i le tamai pato auleaga. Sa ou lagonaina lo’u faapei lava o lena tamai manuvai. Sa ou lagona sa pei o loo o’u fealuai solo i le togavao e taumafai e lafi ma e leai se isi sa fiafia ia te a’u. Sa ou le iloaina po o ai a’u ae po o le a foi se mea e mafai ona avea ai a’u. Ou te taunuu atu i le fale, ua ou iloa e i ai se mea e tatau ona sui. Ou te manatua lo’u mafaufau ai, “Ua tatau ona ou faatagata matua. O le a le toe tupu lava se mea faapea ia te a’u.”

Sa amata ona ou iloa sa i ai isi sa siomia a’u e alolofa ma popole ia te a’u. Sa fiafia mai le au epikopo o le matou uarota ia te a’u, faapena foi i le matou peresitene o le siteki, o le sa nofo i le magaala na sosoo atu ma le matou auala. Sa latou aoaoina mai le talalelei ia te a’u. Sa tuuina mai a latou molimau ia te a’u i le moni o le Faaola ma Lana Togiola pele ma le mea e mafai ona faia ai mo a’u. Sa latou faitau mai pea lava pea ia te a’u le tala ia Iosefa Samita ma lana faaaliga i le Vao Paia. Mai lena aafiaga ua ou atiina ae ai se mausa matagofie o le faitauina o le Talafaasolopito o—Iosefa Samita i vaiaso taitasi. O le faia o lena mea, ua ou iloa ai e mafai ona ou maua le malosi e faatoilalo ai soo se mea e oo mai ia te au i lena vaiaso.

I lena taimi o lo’u olaga, pe a ou matua manaomiaina se tagata, na faamanuiaina a’u e lo’u Tama Faalelagi. Sa Ia silafia o ai a’u, ma na Ia auina mai Ana auauna e fesoasoani ia te a’u ia ou iloa lena mea mo a’u. Sa latou opoopo ia te a’u ma ta’u mai e ala i a latou amioga e le o a’u o se tamai pato auleaga ma afai ou te agavaa ma tausi poloaiga a le Atua, e mafai ona avea a’u ma “tupu o le vaituloto.” O faamanuiaga ma le malamalamaaga i le Togiola na amata aumai ai ia te a’u le malosi faaopoopo ma le lototele.

Ina ua atoa le 16 o o’u tausaga, na uunaia ai a’u e nei tamalii lelei e fai lo’u faamanuiaga faapeteriaka. Ina ua maua lo’u pepa faataga [mo le faamanuiaga faapeteriaka], sa ou oso i luga o la’u uila tuai ma vilivili atu i ni nai maila i le fale o le peteriaka. Sa ia toe faamalamalama mai le uiga o se faamanuiaga faapeteriaka ma le ala o le a faamanuia ai e lea faamanuiaga lo’u olaga. Sa tuu ona aao i luga o lo’u ulu. Ina ua mavae lena aafiaga, sa le toe tutusa lava lo’u olaga.

Sa ou talia se valaauga faamisiona i Sikotilani ma maua ai so’u aafiaga matagofie. I ni nai vaiaso ina ua mavae lo’u taunuu mai i le fale, na ou fetaui ai i lo’u toalua o le lumanai i se fonotaga a le Ekalesia. Sa ma tafafao faamasani ma ou faamalamalama i ai mo se faaipoipoga. Sa ma faaipoipo i le Malumalu o Sate Leki.

O se tasi o fuaiupu i lo’u faamanuiaga faapeteriaka na ta’u mai ai o le a mafai ona ou ola i le olaga nei faatasi ma se agelu. I le taimi na tuu mai ai e le peteriaka lena faamanuiaga ia te a’u, sa ou le iloa po o le a lea mea o le agelu, e oo lava i le uiga o le fuaiupu. Ina ua ou tuua le malumalu i le aso na ma faamau ai ma lo’u toalua, sa ou iloa ai lona uiga. Sa avea lava o ia ma malamalama i lo’u olaga. Faafetai ia te ia, ua mafai ai ona ou ola i se siosiomaga o le malamalama. Na te aumaia le olioli ma le fiafia i le ma fanau e toa 8, fanau a le ma fanau e toa 25, ma le toa 2 o fanau a fanau a a latou fanau. E faaigoa o ia e la’u fanau uma ia amuia. Ou te faafetai i le Atua mo faamanuiaga o le talalelei ma faamanuiaga e faavavau o feagaiga ma sauniga o le malumalu paia.

E faatalitonu i tatou e Satani o i tatou o tamai pato auleaga e leai se avanoa e avea ai e faapei o lo tatou Tama Faalelagi ma Lona Alo paia. Ou te molimau atu e alofa le Atua ia i tatou taitoatasi i ni auala faapitoa. E pei ona saunoa soo mai Elder Neal A. Maxwell (1926–2004) o le Korama a Aposetolo e Toasefululua, “O faatosinaga patino a le Atua mo le mamanuina e lagona i mea e tutupu i o tatou olaga.”¹ O i Tatou o Ana fanau. Ua ou iloa e mafai ona avea i tatou ma tagata e sili atu i lo tatou siosiomaga o loo i ai nei ma avea ma “tupu ma tupu tamaitai o le vaituloto” e ala i le mulimuli i tulafono o le talalelei.

Ou te iloa foi se isi mea. Ou te iloa o ai oe ma le mea na e sau ai. Ua faamanatu mai e faaaliga ia i tatou lo tatou faamaoni i le mua’i olaga (tagai Faaaliga 12:7–11; MFF 138:56; Aperaamo 3:22–23). A o faapipii atu a tatou molimau i lena upumoni maoae, o aso taitasi e avea ai o se faamanuiaga matagofie mo i tatou taitoatasi.

Ia tumau i le itu a le Alii. Afai e mafai ona Ia tausia se tamaitiiti matamuli ma le ma e pei o a’u, o le a Ia tausia foi oe i le asō ma i le lumanai. O oe o se atalii po o se afafine filifilia o le Atua. Ia [e] filifili e ola mo le faamoemoega paia o loo i totonu ia te oe.